Bisi nuan macha semua artikel ari majalah Menara Jaga kena taun tu? Enti pia, saut meh tanya ke bisi ba baruh tu:

Nama teladan ke ditetapka Jehovah pasal chara ngintu orang indu?

Iya enda bechiping enggau orang indu. Iya enda ngumbai orang lelaki manah agi ari orang indu. Jehovah ningaka orang indu sereta ibuhka asai ati enggau penanggul sida. Iya mega pechayaka orang indu ngereja peneka Iya.—w24.01, lamb. 15-16.

Baka ni kitai ulih nitihka Epesus 5:​7, ke madahka: “Anang bisi nama-nama kaul enggau sida”?

Rasul Paul nangkan kitai ngambika enda begulai enggau orang ke ngasuh kitai tusah deka ngasika standard Jehovah. Kaul ti enda manah nya nyengkaum lebuh kitai begulai enggau orang betunga mua sereta ba media sosial.—w24.03, lamb. 22-23.

Nama jenis cherita ti bula ke patut diseliahka kitai?

Kitai patut bejimat enggau cherita ti enda ditemu amat tauka enda ari bala menyadi Kristian, email ari orang ke enda ditemu kitai, sereta orang ti limpang sereta ngelaban Petara ke pepura bisi minat enggau pesan kitai.—w24.04, lamb. 12.

Nama utai ke ditemu kitai sereta utai ke enda ditemu kitai pasal chara Jehovah deka ngakim Raja Solomon, sida ke dipunaska ba Sodom enggau Gomorah, sereta ke dipunaska maya Bah Besai?

Kitai enda nemu sekalika Jehovah udah ngakim sida mati belama iya. Tang kitai nemu, Jehovah nemu semua utai lalu Iya penuh enggau pengasih.—w24.05, lamb. 3-4.

Jehovah dikumbai “Gunung Batu.” Nama ulih dipelajarka kitai pasal Jehovah ari gelar tu? (U-dat. 32:4)

Jehovah nyaga kitai ba maya ti tusah. Iya ulih dikearapka, laban Iya selalu ngamatka semaya Iya. Jehovah enda berubah. Personaliti enggau tuju Iya enda kala berubah.—w24.06, lamb. 26-28.

Nama deka nulung nuan nelebaka diri enggau raban gempuru ti baru?

Bepanggai ba Jehovah. Iya deka nulung nuan baka Iya ke udah nulung bala nembiak Iya kelia menya. Anang manding raban gempuru nuan ti suba enggau raban gempuru ti baru. Mengkang kisuk ba raban gempuru ti baru sereta bebendar ngiga kaban ti baru.—w24.07, lamb. 26-28.

Nama utai ke ulih dipelajar ari tiga iti sempama ba Matthew bagi 25?

Sempama pasal bedus enggau kambin ngajar kitai pasal mengkang setia. Sempama pasal bala indu dara ke pintar sereta ke beli ngajar kitai mengkang besedia sereta bejaga. Lalu sempama pasal beg duit pirak ngajar kitai pasal mengkang bagas.—w24.09, lamb. 20-24.

Ni peninggi ruang depan Rumah Sembiang Solomon?

Bekaul enggau 2 Bansa Israel 3:​4, sekeda manuskrip lama madah peninggi ruang depan nya “120 kiubit,” iya nya 53 meter. Tang manuskrip bukai ke ulih dikearapka madah peninggi nya “20 kiubit,” iya nya 9 meter. Peninggi tu chun agi enti nitihka penebal dinding Rumah Sembiang.—w24.10, lamb. 31.

Nama reti iya penulung gempuru “bisi siku aja bini”? (1 Tim. 3:12)

Reti iya, iya mesti nitihka standard Jehovah pasal tikah, iya nya entara siku lelaki enggau siku indu. Iya enda ngereja ulah seks ti kamah, lalu enda sekali-kali ngayanka minat ngagai indu bukai.—w24.11, lamb. 19.

Nama kebuah kitai madah John 6:53 ukai nunjukka utai ke deka nyadi maya pengawa Makai Malam Tuan?

John 6:53 bejaku pasal makai tubuh Jesus sereta ngirup darah iya. Jesus nyebut jaku tu ba taun 32 M., di Galili, ngagai orang Judah ke agi patut arapka iya. Tang pengawa Makai Malam Tuan berengkah diintu setaun pengudah nya ba Jerusalem. Maya nya, Jesus bejaku ngagai sida ke deka merintah enggau iya ba serega.—w24.12, lamb. 10-11.