Rasul Paul nulis ngagai Timoti: “Ba mua Petara, Jesus Kristus, enggau bala melikat ke dipilih Petara, aku meri pesan tu ngagai kita ngambika kita enda bepilih mata tauka berat sepiak lebuh kita nitihka iring tu.”—1 Tim. 5:21.

Kena nemu sapa “bala melikat ke dipilih” nya, kitai deka berandauka bala melikat ke enda disengkaum ba raban tu. Keterubah, sida ukai 144,000 ke dipilih ngagai serega. Lebuh Paul nulis ngagai Timoti, nadai siku pan orang Kristian ke udah dipilih diangkatka idup baru ngagai serega. Bala rasul enggau orang Kristian ke dipilih bedau nyadi melikat maya nya. Nyadi, sida ukai “bala melikat ke dipilih.”—1 Kor. 15:​50-54; 1 Tes. 4:​13-17; 1 Jhn. 3:2.

Kedua, sida mega ukai bala melikat ke enda ngasi maya Bah Besai. Bala melikat nya nyukung Sitan lalu nyadi melikat ti jai. Sida mega nyadi munsuh Jesus. (P-kal. 6:2; Luk. 8:​30, 31; 2 Pet. 2:4) Jemah ila, Jesus deka ngurung sida ba lubang ti amat dalam pengelama 1,000 taun. Pengudah nya, sida deka dipunaska enggau Sitan.—Jud. 6; Pem. 20:​1-3, 10.

Nyadi, “bala melikat ke dipilih” merujuk ngagai bala melikat ba serega ke enggau setia gawa begulai enggau “Petara [sereta] Jesus Kristus.”

Bisi beribu-ribu iku melikat ti setia. (Heb. 12:​22, 23) Jehovah meri sida pengawa ti enda sebaka. (Pem. 14:​17, 18) Ambika chunto, Jehovah ngasuh siku melikat munuh 185,000 iku soldadu Asiria. (2 Raj. 19:35) Tang melikat ke bukai diasuh “muai ari Perintah [Jesus], semua orang ti ngasuh orang bukai bedosa, enggau semua orang ke ngereja penyai.” (Mat. 13:​39-41) Bisi mega diasuh “ngempuruka sida ke udah dipilih” ngagai serega. (Mat. 24:31) Lalu melikat ke bukai diasuh ‘nyaga kitai di sebarang endur kitai bejalai.’—Mas. 91:11; Mat. 18:10; banding Matthew 4:11; Luke 22:43.

“Bala melikat ke dipilih” ke disebut ba 1 Timoti 5:21 engka bisi tanggung pengawa nyaga raban gempuru. Lebuh Paul nulis ayat nya, iya benung meri jaku lalau ngagai bala tuai gempuru pasal chara sida patut bejalaika tanggung pengawa sida. Iya mega ngasuh bala menyadi ba raban gempuru bebasaka bala tuai gempuru. Paul madah, bala tuai gempuru enda patut “bepilih mata tauka berat sepiak,” lalu patut berunding enggau manah lebuh ngaga pemutus. Pengudah nya, Paul meri sida kebuah ti manah nitihka jaku lalau iya. Iya madah, bala tuai gempuru gawa ke bala menyadi sida “ba mua Petara, Jesus Kristus, enggau bala melikat ke dipilih.” Reti ku Paul nya, Jehovah, Jesus, enggau “bala melikat ke dipilih” benung meda chara bala tuai gempuru nyaga raban gempuru. Nyadi, sekeda melikat bisi tanggung pengawa nyaga raban gempuru, baka nyaga bala menyadi, nulung sida ba pengawa nginjil, sereta madah ngagai Jehovah pasal utai ti diperatika sida.—Mat. 18:10; Pem. 14:6.