1, 2. (a) Baka ni Saksi-Saksi Jehovah enda sebaka enggau jalai pengarap bukai? (b) Nama deka dipelajarka kitai ba artikel tu enggau artikel pengudah tu?

ORANG suah nanya Saksi-Saksi Jehovah, “Sapa ketuai kita?” Sida deka nemu pasal tu laban mayuh jalai pengarap bisi orang ke lelaki tauka indu nyadi ketuai sida. Taja pia, kitai temegah ati madahka Kepala kitai ukai mensia ti enda sempurna. Tang Kepala kitai, Jesus Kristus! Lalu iya ngasika Apai sereta Kepala iya, Jehovah.—Mat. 23:10.

² Bisi mega seraban orang ke dikumbai “ulun ke tetap ati sereta bepenemu-dalam,” ke ngiring bala nembiak Petara ba dunya kemaya hari tu. (Mat. 24:45) Tang baka ni kitai nemu, Jehovah ke ngiring kitai nengah Anak Iya? Kitai deka meda tiga iti kebuah kitai tau pechaya Jehovah ke ngiring kitai. Taja pan Jehovah udah ngena sekeda mensia ngiring nembiak Iya, tang kitai ulih nemu, Jehovah ke nyadi Kepala nembiak Iya ari menya nyentuk ke diatu.—Isa. 58:11.

3. Nama nulung Moses ngiring orang Israel?

³ Roh kudus bekuasa ba bala pengari Petara. Petara milih Moses nyadi tuai orang Israel. Nama nulung Moses bejalaika pengawa ti besai tu? Jehovah meri Moses ‘roh kudus Iya.’ (Bacha Isaiah 63:11-14.) Nya alai, Jehovah ke ngiring nembiak Iya laban Moses ditulung ngena roh kudus Iya.

4. Nama nunjukka Moses bisi roh kudus Petara? (Peda gambar ba pun artikel.)

⁴ Kati ulih orang meda roh kudus Jehovah ba Moses? Ulih! Roh kudus Jehovah nulung Moses ngereja kereja ajih, sereta madahka nama Jehovah ngagai raja menua Ejip. (P-sut. 7:1-3) Roh kudus mega nulung Moses nyadi tuai ti bisi pengerindu sereta sabar. Iya enda sebaka enggau bala tuai ari menua bukai ke kasar sereta berundingka diri empu! (P-sut. 5:2, 6-9) Amat, Jehovah udah milih Moses nyadi tuai ke nembiak Iya.

5. Sapa agi ke diberi Jehovah roh kudus kena ngiring nembiak Iya?

⁵ Ngagai sapa agi ke diberi Jehovah roh kudus kena ngiring nembiak Iya? Bup Kudus madahka: “Josua anak Nun penuh laban [roh] penemu-dalam.” (U-dat. 34:9, NW) ‘Roh Jehovah lalu bekuasa ba Gideon.’ (P-ulu. 6:34) Lalu ‘roh Jehovah lalu bekuasa ba David.’ (1 Sam. 16:13) Semua sida bepanggai ba roh kudus Petara kena nulung sida ngereja utai ke enda ulih dikereja sida enggau pengering diri. (Jos. 11:16, 17; P-ulu. 7:7, 22; 1 Sam. 17:37, 50) Amat, Jehovah ke meri sida kuasa kena ngereja utai ti besai, nya alai semina Iya aja ke patut dipuji.

6. Nama kebuah Petara deka nembiak Iya bebasaka bala tuai ba menua Israel?

⁶ Nama patut digaga orang Israel lebuh sida meda roh kudus Petara bekuasa ba Moses, Josua, Gideon, enggau David? Orang Israel patut bebasaka sida. Lebuh orang Israel mutap pasal Moses, peratika utai ti ditanya Jehovah: “Ni pengelama orang tu agi mechat [enda masa, NW] Aku?” (P-pau. 14:2, 11) Amat, Jehovah milih orang nya ngambika ngiring nembiak Iya. Lebuh orang Israel ngasika sida ke ngiring, kebendar orang Israel nitihka Jehovah nyadika Kepala.

7. Baka ni bala melikat nulung Moses?

⁷ Bala melikat nulung bala pengari Petara. (Bacha Hebrew 1:14.) Petara ngena bala melikat ngiring Moses. Kesatu, seiku melikat “pegari di mua iya ba babas,” lalu meri iya pengawa,  iya nya ngelepaska orang Israel sereta ngiring sida. (SKR. 7:35) Kedua, Petara ngena bala melikat meri Adat ngagai Moses kena ngiring orang Israel. (Gal. 3:19) Ketiga, Jehovah ngasuh iya: “Uluka orang mayuh ngagai endur ti udah dipadahka Aku ngagai nuan. Ingat, melikat Aku deka ngiring nuan.” (P-sut. 32:34) Bup Kudus nadai madahka orang Israel meda melikat ngereja semua utai tu. Tang, ari chara Moses ngatur sereta ngiring orang Israel, endang terang nunjukka bala melikat nulung iya.

8. Baka ni bala melikat nulung Josua enggau Hesekiah?

⁸ Sapa agi ke ditulung bala melikat? Bup Kudus madahka ‘tuai bala soldadu Jehovah,’ iya nya seiku melikat, udah nulung Josua menang ngelaban orang Kanaan. (Jos. 5:13-15; 6:2, 21) Udah nya, lebuh Raja Hesekiah ngiring nembiak Petara, seraban besai soldadu Asiria ngemba deka ngerusak Jerusalem. Dalam semalam, ‘siku melikat Jehovah mansang . . . lalu munuh 185,000 iku soldadu.’—2 Raj. 19:35.

9. Taja pan bala pengari Jehovah enda sempurna, nama patut digaga orang Israel?

⁹ Bala melikat sempurna. Taja pia, orang ke ditulung sida enda sempurna. Ngambika chunto, bisi sekali Moses enda ngemuliaka Jehovah. (P-pau. 20:12) Josua enda nanya Jehovah utai ke patut dikereja lebuh orang Gibeon deka ngaga sempekat enggau iya. (Jos. 9:14, 15) Bisi sekali, Hesekiah nyadi sumbung. (2 Ban. 32:25, 26) Taja pan sida ke ngiring nya enda sempurna, orang Israel patut nitihka iring ari sida. Orang Israel ulih nemu, Jehovah ngena bala melikat nulung sida ke ngiring tu. Amat, Jehovah ke ngiring nembiak Iya.

10. Baka ni Moses diiring Adat Petara?

¹⁰ Jaku Petara ngiring bala pengari Iya. Bup Kudus ngumbai Adat ke diberi ngagai orang Israel nya “Adat Moses.” (1 Raj. 2:3) Tang Bup Kudus enggau terang madahka, Jehovah ke meri orang Israel Adat nya. Lalu Moses mega patut ngasika Adat nya. (2 Ban. 34:14) Ngambika chunto, pengudah Jehovah madah ngagai Moses chara ngaga langkau sembiang, ‘Moses ngereja semua utai nya nitihka asuh Jehovah.’—P-sut. 40:1-16.

11, 12. (a) Nama patut digaga Josua enggau bala raja ke merintah nembiak Petara? (b) Baka ni Jaku Petara ngiring orang ke nyadi tuai?

¹¹ Josua ngembuan sebegian ari Jaku Petara lebuh iya nyadi tuai, lalu Jehovah ngasuh iya: “Anang ngetu macha Bup Adat [“enggau nyawa ti enda inggar,” NW]; belematika iya siang malam, ngambika nuan ngereja semua utai ti ditulis dalam Bup tu.” (Jos. 1:8) Bala raja ke merintah nembiak Petara ke udah nya mega patut macha Adat nya ninting hari, nyalin Adat nya ke dikena diri empu, lalu ngasika “semua utai ti ditulis dalam bup [Adat] nya.”—Bacha Ulang Adat 17:18-20.

¹² Baka ni Jaku Petara ngiring orang ke nyadi tuai? Perundingka chunto Raja Josiah. Pengudah Adat Moses ditemu, sekretari Josiah berengkah macha Adat nya ke iya. * (Peda nota kaki.)  “Lebuh raja ninga bup nya dibacha, ati iya tusah, lalu iya nyarikka gari diri.” Jaku Petara udah nya meransang Josiah ngerusak semua engkeramba ba menua nya, lalu ngatur pengerami Paska ti pemadu besai ke kala diintu. (2 Raj. 22:11; 23:1-23) Laban Josiah enggau bala tuai ke tetap ati ke bukai nitihka Jaku Petara, sida sedia deka ngubah iring ke diberi sida ngagai nembiak Petara. Ubah nya nulung nembiak Petara ngasika Iya.

13. Baka ni bala tuai nembiak Petara enda sebaka enggau bala tuai ari bansa bukai?

¹³ Bala tuai ari bansa bukai diiring penemu mensia ke bisi tatak. Ngambika chunto, bala tuai orang Kanaan enggau nembiak sida ngereja utai ti balat jai baka beleman enggau kaban belayan diri empu, orang lelaki beleman enggau orang ke sama lelaki, beleman enggau jelu, munuh anak nyadika pemeri, sereta nyembah engkeramba. (Lew. 18:6, 21-25) Pia mega, bala tuai orang Babilon enggau bala tuai orang Ejip nadai ngembuan atur pasal ngintu pemeresi ti sama baka ke dikembuan nembiak Petara. (P-pau. 19:13) Taja pia, nembiak Petara ulih meda baka ni bala tuai sida ke tetap ati meransang sida terus ngetanka sembah ti tuchi, nyaga pemeresi tubuh sereta nyeliahka ulah seks ti kamah. Amat, Jehovah ngiring sida.

14. Nama kebuah Petara disiplin sekeda bala tuai nembiak Iya?

¹⁴ Ukai semua raja ke merintah nembiak Petara nitihka iring ari Petara. Sida raja ke enda tetap ati enggai nitihka iring ari roh kudus Petara, bala melikat, sereta Jaku Iya. Ba sekeda pekara, Petara disiplin tauka nganti bala tuai nya. (1 Sam. 13:13, 14) Udah nya, Jehovah milih seiku orang ke deka nyadi tuai ti sempurna.

15. (a) Baka ni bala nabi nunjukka seiku tuai ti sempurna deka datai? (b) Sapa tuai ti sempurna nya?

¹⁵ Beratus-ratus taun, Jehovah besemaya deka milih seiku tuai ti sempurna ke nembiak Iya. Ngambika chunto, Moses madah ngagai orang Israel: ‘Jehovah Petara kita deka meri kita siku nabi ke baka aku, ari bansa kita empu, lalu kita enda tau enda ngasika iya.’ (U-dat. 18:15) Isaiah madahka Orang nya deka nyadi ‘tuai, enggau nyadi kepala.’ (Isa. 55:4) Lalu Daniel nulis pasal Messiah ke deka nyadi “tuai.” (Dan. 9:25) Pengujung iya, Jesus madahka diri “kepala” nembiak Petara. (Bacha Matthew 23:10.) Bala murid Jesus deka nitihka iya, lalu sida pechaya iya endang dipilih Jehovah. (Jhn. 6:68, 69) Nama ngasuh sida pechaya Jesus Kristus nya orang ke deka dikena Jehovah ngiring nembiak Iya?

16. Nama nunjukka roh kudus bekuasa ba Jesus?

 ¹⁶ Roh kudus bekuasa ba Jesus. Lebuh Jesus dibaptisa, John meda ‘roh kudus nurun ari serega baka burung achang lalu meruan ba iya.’ Enda lama udah nya, ‘roh kudus . . . mai iya ngagai menua puang.’ (Jhn. 1:32; Mrk. 1:10-12) Lebuh Jesus nginjil ba dunya, roh kudus Petara meri kuasa kena Jesus ngajar sereta ngereja kereja ajih. (SKR. 10:38) Nambahka nya, roh kudus nulung Jesus ngayanka kualiti baka pengerindu, pengaga sereta pengarap ti tegap. (Jhn. 15:9; Heb. 12:2) Nadai tuai bukai ke ngembuan roh kudus Petara baka nya. Amat, Jehovah udah milih Jesus nyadi tuai.

17. Nama digaga bala melikat kena nulung Jesus?

¹⁷ Bala melikat nulung Jesus. Enda lama pengudah Jesus dibaptisa, ‘bala melikat datai lalu ngintu iya.’ (Mat. 4:11) Beberapa jam sebedau iya mati, ‘siku melikat ari serega pegari di mua iya, lalu ngeringka iya.’ (Luk. 22:43) Jesus nemu, Jehovah deka ngirum bala melikat nulung iya lebuh iya begunaka tulung.—Mat. 26:53.

18, 19. Baka ni Jaku Petara ngiring pengidup Jesus enggau utai ti diajar iya?

¹⁸ Jaku Petara ngiring Jesus. Kenyau ari Jesus berengkah ba pengawa nginjil nyentukka iya mati ba tiang, iya ngawakka Jaku Petara ngiring iya. Indah lebuh iya nyau deka mati, iya nyebut  utai ke udah dipadah pasal Messiah. (Mat. 4:4; 27:46; Luk. 23:46) Taja pia, bala tuai pengarap maya nya enda baka Jesus. Sida enda bedulika Jaku Petara enti Jaku nya enda sejalai enggau utai ke diajar sida. Jesus ngambi Jaku Petara lebuh iya nyebut pasal sida: ‘Orang tu ngemesaika aku ngena mulut sida aja, tang ati sida jauh ari aku. Sida ngelebuka diri nyembah aku, laban sida ngajar adat mensia.’ (Mat. 15:7-9) Jehovah enggai milih orang ke enda nitihka Jaku Iya ngiring nembiak Iya.

¹⁹ Jesus mega ngena Jaku Petara lebuh iya ngajar orang bukai. Lebuh bala tuai pengarap nguji iya, iya enda ngena penemu diri tauka peneleba ba pengidup kena iya nyaut sida. Tang iya ngajar orang ngena Jaku Petara. (Mat. 22:33-40) Pia mega, Jesus ulih narit ati orang bukai ngena mayuh cherita pasal pengidup iya ti di serega tauka pasal utai ti ditempa ba dunya raya. Tang ketegal iya rinduka Jaku Petara, iya keran deka bekunsika Jaku Petara enggau orang bukai sereta “muka runding sida, ngambika sida meretika Bup Kudus.”—Luk. 24:32, 45.

20. (a) Baka ni Jesus ngemuliaka Jehovah? (b) Nama bida entara ulah Jesus enggau Herod Agripa I?

²⁰ Taja pan orang ke ninga Jesus alit ati enggau chara iya bejaku, tang iya seruran meri mulia ngagai Pengajar iya, Jehovah. (Luk. 4:22) Lebuh seiku lelaki ke kaya nguji deka ngemuliaka Jesus ngena gelar “Pengajar ti manah,” Jesus baruh ati lalu madahka: ‘Nama kebuah nuan ngumbai aku manah? Nadai orang ke manah. Semina Petara siku aja manah.’ (Mrk. 10:17, 18) Taja pia, Herod Agripa I ke nyadi tuai ba menua Judea kira-kira lapan taun pengudah Jesus mati, ngembuan ulah ti enda sebaka enggau enggi Jesus. Bisi sekali, ba siti aum ti spesial, Herod begari ngena gari diraja ke narit ati sereta mar. Lebuh orang meda sereta ninga iya, sida manjung: “Munyi nyawa petara! Ukai munyi nyawa mensia!” Herod rindu dipuji. Tang nama nyadi udah nya? ‘Tekala nya melikat Jehovah lalu nampar Herod, laban iya enda ngemuliaka Petara. Iya diempa ulat, lalu mati.’ (SKR. 12:21-23) Amat, Jehovah enda milih Herod nyadi tuai. Taja pia, Jesus nunjukka Petara udah milih iya, lalu iya seruran ngemuliaka Jehovah nyadika Kepala ti Pemadu Tinggi ke nembiak Iya.

21. Nama deka dikerandauka kitai ba artikel pengudah tu?

²¹ Jehovah enggai Jesus nyadi Kepala beberapa taun aja. Pengudah Jesus diangkatka idup baru, ku iya madah ngagai bala murid iya: ‘Semua kuasa di serega enggau di dunya udah diberi magang ngagai aku.’ Ku iya agi: ‘Lalu ingat, aku deka seruran enggau kita nyentuk ngagai pengujung dunya.’ (Mat. 28:18-20) Tang baka ni Jesus ulih ngiring nembiak Petara ba dunya enti iya enda ulih dipeda di serega? Sapa dikena Jehovah ngarika Jesus ba dunya? Lalu baka ni orang Kristian ulih ngelala bala pengari Petara? Artikel pengudah tu deka berandauka saut ngagai tanya nya.