Enti tu amat, uji pikirka baka ni pekara tu bekaul enggau pengidup kitai. Ngambika chunto, anak seiku menyadi Kristian lelaki udah munuh diri. Apai anak nya balat tusah ati. Iya berunding sekalika Jehovah udah nemu utai ke deka nyadi dudi hari, lalu nentuka iya enggau bini iya ulih natka penusah nya. Ba dunya tu, mayuh ari kitai deka napi penusah ti balat. Nya alai, patut kitai pechaya Jehovah ke nentuka semua utai ke nyadi ba pengidup kitai?

Seraya kitai mansik 1 Korint 10:13, kitai deka nemu Bup Kudus enda nyukung penemu ke madahka Jehovah udah dulu nemu utai ke ulih ditatka kitai, lalu udah nya nentuka bagi penguji ke deka ditapi kitai. Nama kebuah kitai ulih madah munyi tu? Aram kitai mansik empat iti kebuah.

Kesatu, Jehovah meri mensia peluang bibas milih. Iya deka kitai ngaga pemutus kediri empu. (Ulang Adat 30:19, 20; Josua 24:15) Enti kitai milih deka ngaga pemutus ti ngelantangka ati Jehovah, kitai ulih bepanggai ba Iya ngiring kitai. (Jaku Dalam 16:9) Tang lebuh kitai ngaga pemutus ti enda manah, kitai deka napi penanggul ke datai ari pemutus nya. (Galatia 6:7) Nya alai, enti Jehovah milih bagi penguji ke ditapi kitai, kati kitai amat bisi peluang bibas milih?

Kedua, Jehovah enda nyaga kitai ari utai ke nyadi “lebuh kitai enda ngadang.” (Pengajar 9:12) Seiku-seiku orang engka napi penusah ti balat laban iya benung ba endur sereta jam ti salah. Jesus bejaku pasal penusah ke nyadi ba 18 iku orang ti mati lebuh menara runtuh ningang sida. Iya enggau terang madahka, pemati sida ukai ketegal Petara. (Luke 13:1-5) Endang enda patut ngumbai Petara udah nentuka sapa ke deka idup tauka mati sebedau siti-siti penusah nyadi.

Ketiga, tiap iku kitai bisi peluang ngetanka penetap ati ngagai Jehovah. Sitan madahka nembiak Jehovah nyembah Iya ketegal utai ti diberi Iya ngagai sida. Sitan ngumbai kitai enda ulih mengkang tetap ati ngagai Jehovah enti kitai napi penguji. (Jop 1:9-11; 2:4; Pemandang 12:10) Enti Jehovah nyaga kitai ari siti-siti penguji, jaku Sitan nya baka ke amat.

Keempat, Jehovah milih enggai nemu semua utai ke deka nyadi ba kitai. Endang amat, enti Jehovah deka, Iya ulih nemu utai ke deka nyadi jemah ila. (Isaiah 46:10) Tang Bup Kudus nunjukka, Iya milih enggai nemu semua utai. (Pemungkal 18:20, 21; 22:12) Jehovah bisi pengerindu sereta lurus, nya alai Iya enggai ngachau pengelepas kitai ke ulih milih kediri empu.—Ulang Adat 32:4; 2 Korint 3:17.

Nya alai, nama reti utai ku Paul lebuh iya nyebut Jehovah “enda nejuka kita diuji lebih ari ti ulih ditatka kita”? Ditu, Paul madahka utai ti digaga Jehovah maya penguji, ukai sebedau penguji. Enti kitai arapka Jehovah, Iya deka nulung kitai napi sebarang penguji ba pengidup kitai. (Masmur 55:22) Kitai diatu deka mansik dua iti kebuah Paul madahka baka nya.

Kebuah kesatu nya laban penguji ke ditapi kitai nya “udah diasaika semua orang.” Seagi-agi kitai idup ba dunya Sitan tu, semua kitai deka napi penusah, indah penusah ti balat. Tang enti kitai bepanggai ba Jehovah, kitai ulih tan natka penguji tu sereta mengkang taluk. (1 Peter 5:8, 9) Ba pun 1 Korint bab 10, Paul nulis pasal sekeda penguji ke ditapi orang Israel ba menua puang. (1 Korint 10:6-11) Sida ke bepanggai ba Jehovah ulih tan natka penguji nya. Tang sekeda orang Israel enda ngasika  Jehovah. Sida enda mengkang taluk laban sida enda bepanggai ba Iya.

Kebuah kedua nya laban ‘Petara endang tau dikarapka.’ Nama reti tu? Lebuh kitai beratika chara Jehovah nyaga nembiak Iya sepemanjai sejarah, kitai nemu Iya enggau taluk nulung “orang ke rinduka Iya, sereta ngasika pesan Iya.” (Ulang Adat 7:9) Kitai nemu Jehovah seruran ngamatka semaya Iya. (Josua 23:14) Kitai tau arap, (1) Jehovah enda ngelakka sebarang penguji kelalu mar nyentukka kitai enda ulih tan natka penguji nya, lalu (2) Iya deka “meri [kitai] jalai kena [kitai] ngelepaska diri.”

Baka ni Jehovah meri jalai kena ngelepaska diri ngagai orang ke bepanggai ba Iya? Endang amat, Iya ulih muai penguji nya. Tang kingatka, Paul madahka Jehovah deka “meri [kitai] jalai kena [kitai] ngelepaska diri, ngambika [kitai] tan natka penguji nya.” Nya alai, Jehovah suah meri jalai ngagai kitai kena ngelepaska diri enggau chara ngeringka kitai ngambika kitai ulih mengkang taluk. Aram kitai berandauka sekeda jalai ke diberi Jehovah nya.

• Jehovah “merindang [kitai] lebuh [kitai] dituntung semua macham penusah.” (2 Korint 1:3, 4) Iya ulih ngelantangka runding, ati sereta asai ati kitai nengah Bup Kudus, roh kudus Iya, sereta ulun ke tetap ati.—Matthew 24:45; John 14:16, Rome 15:4.

• Jehovah ngena roh kudus Iya ngiring kitai. (John 14:26) Roh kudus ulih nulung kitai ingatka cherita sereta prinsip dalam Bup Kudus ngambika kitai ulih ngaga pemutus ti manah.

• Jehovah ngena bala melikat Iya nulung kitai.—Hebrew 1:14.

• Jehovah ngena bala menyadi Kristian nulung kitai. Sida ulih ngeringka kitai ngena jaku sereta utai ti digaga sida.—Kolosi 4:11.

Nya alai, nama udah dipelajarka kitai ari jaku Paul ba 1 Korint 10:13? Jehovah enda netapka bagi penguji ke ditapi kitai. Tang kitai tau pechaya, enti kitai arapka Jehovah, kitai ulih tan natka sebarang penguji. Kitai nemu Jehovah seruran deka meri kitai jalai kena ngelepaska diri ngambika kitai ulih mengkang taluk ngagai Iya.