1, 2. (a) Nama udah dipadah Jehovah ngagai kitai? (b) Nama semaya ke bisi ba Isaiah 46:10, 11 enggau 55:11?

AYAT ti keterubah dalam Bup Kudus madahka: ‘Ba pun iya kelia, lebuh Petara berengkah ngaga langit enggau dunya.’ (P-kal. 1:1) Kitai semina meda mimit aja ari pemayuh utai ke udah ditempa Petara ba dunya raya, lalu kitai nemu mimit aja pasal utai baka langit, penampak sereta graviti. (P-jar. 3:11) Tang Jehovah udah madahka tuju Iya bekaul enggau dunya sereta mensia. Iya nempa mensia neladan gamal Iya sereta deka sida idup lantang ba dunya. (P-kal. 1:26) Sida deka nyadi anak Iya, lalu Iya deka nyadi Apai sida.

² Ari bab ketiga ba bup Pemungkal, kitai nemu tuju Jehovah udah dilaban. (P-kal. 3:1-7) Taja pia, nadai penanggul ke enda ulih diputarka Jehovah. Nadai orang ulih nagang utai ti deka dikereja Jehovah. (Isa. 46:10, 11; 55:11) Kitai tau pechaya, tuju asal Jehovah deka dikeamatka ba maya ti udah ditetapka!

3. (a) Nama ajar ti beguna ke nulung kitai meretika pesan Bup Kudus? (b) Nama kebuah kitai diatu deka berandauka ajar nya? (c) Nama tanya ti deka dikerandauka kitai?

 ³ Endang amat, kitai nemu tuju Petara bekaul enggau dunya sereta mensia, nyengkaum pengawa Jesus bekaul enggau tuju Petara. Semua tu pemendar ari Bup Kudus ti beguna bendar, lalu nyadi pemendar ti keterubah iya dipelajarka kitai lebuh belajarka Jaku Petara. Diatu kitai deka nulung orang bukai belajarka ajar ti beguna bendar tu. Kitai bisi peluang ti spesial ngereja tu ba maya tu dalam taun tu, lebuh kitai ngelaluka orang datai Ngingatka Pemati Jesus. (Luk. 22:19, 20) Enti sema sida datai ngagai pengawa ti besai tu, sida deka belajar mayuh agi pasal tuju Petara ti ngerinduka ati. Nya alai, diatu maya ti manah berundingka tanya ti nyemetak ke ulih dikena kitai meransang orang datai. Ba artikel tu, kitai deka berandauka tiga iti tanya: Nama tuju Petara bekaul enggau dunya sereta mensia? Nama udah nyadi? Lalu nama kebuah genselan tebus Jesus nya peluang dikena nyapai tuju Petara?

4. Baka ni utai ti ditempa ‘mandangka mulia Petara’?

⁴ Jehovah nya Penempa ti ngalitka ati. Semua utai ti ditempa Iya endang pemadu manah. (P-kal. 1:31; Jer. 10:12) Nama ulih dipelajarka kitai ari utai ti ditempa Iya ke manah sereta teratur? Kitai nemu, semua utai ti ditempa Jehovah endang beguna magang. Nambahka nya, baka ni asai ati nuan lebuh berundingka sel dalam tubuh mensia ti ngalitka ati tauka meda anak mit ke baru ada, tauka meda mata panas padam ti ngerinduka ati? Kitai alit ati enggau semua utai tu laban Jehovah nempa kitai ngambika ngembuan penau kena nemu utai ti amat manah.—Bacha Masmur 19:1; 104:24.

5. Nama udah digaga Jehovah ngambika semua utai ti ditempa Iya sama bekereja enggau pangan diri?

⁵ Jehovah enggau bejimat netapka tatak ke semua utai ti ditempa Iya. Iya ngaga atur bekaul enggau alam sereta moral. Iya ngaga atur tu ngambika semua utai ba dunya raya ulih sama bekereja enggau pangan diri. (Mas. 19:7-9) Semua utai ba dunya raya udah bisi alai sereta guna sida empu. Ngambika chunto, ukum graviti nulung atmosfera mengkang semak enggau dunya, lalu ukum nya nentuka gaya tasik sereta pasang surut ai. Semua utai ba dunya enda ulih idup enti nadai graviti. Tatak ke udah ditetapka Jehovah ba alam ngasuh semua utai ba dunya raya teratur manah. Tu nunjukka Iya bisi tuju bekaul enggau dunya sereta mensia. Ba pengawa nginjil, kitai ulih nulung orang bukai ngelala Penempa dunya raya tu.—Pem. 4:11.

6, 7. Nama sekeda pemeri ke diberi Jehovah ngagai Adam seduai Hawa?

⁶ Tuju Jehovah iya nya deka mensia idup belama iya ba dunya. (P-kal. 1:28; Mas. 37:29) Iya gerah jari, lalu meri Adam seduai Hawa mayuh macham pemeri ti berega. (Bacha James 1:17.) Jehovah meri seduai iya peluang  bibas milih sereta penau kena berunding, ngayanka pengerindu, sereta deka bisi kaul ti manah enggau pangan diri. Penempa bejaku enggau Adam, lalu ngajar iya chara ngereja utai ti manah. Adam mega belajar chara ngintu diri, nyaga bala jelu sereta kebun nya. (P-kal. 2:15-17, 19, 20) Jehovah meri Adam seduai Hawa penau kena ensepi, negu, meda, ninga sereta nyium bau utai manah ti digaga Iya ke seduai iya. Enggau tu, seduai iya ulih idup lantang ba rumah ti manah nya. Adam seduai Hawa ngembuan mayuh pengawa ti ngerinduka ati. Lalu seduai iya ulih terus belajar sereta nemu pasal utai baru belama iya.

⁷ Nama agi ke nyadi sebagi ari tuju Petara? Jehovah meri Adam seduai Hawa penau ulih ngembuan anak ti sempurna. Lalu bala anak seduai iya mega deka ngembuan anak, nyentukka serata dunya penuh enggau mensia. Jehovah dekaka apai indai rinduka bala anak sida, sama baka Iya ke rinduka anak mensia Iya ke sempurna ti keterubah, iya nya Adam seduai Hawa. Iya meri dunya enggau semua utai ti berega sereta manah ba dunya ngagai ruang bilik mensia nya. Dunya tu deka nyadi rumah Adam seduai Hawa, lalu seduai iya deka diau dia belama iya.—Mas. 115:16.

8. Nama kebuah Petara meri Adam seduai Hawa atur ke bisi ba Pemungkal 2:16, 17?

⁸ Utai ti diperambu Jehovah enda nyadi baka ti dikedekaka Iya. Nama udah nyadi? Jehovah meri Adam seduai Hawa siti atur ti senang ngambika seduai iya nemu naka ni tatak pengelepas seduai iya. Jehovah madahka: “Nuan tau makai buah ari semua kayu dalam kebun tu, tang nuan enda tau makai buah ari kayu penemu ti tau ngasuh nuan nemu semua utai, laban lebuh nuan makai buah nya, nuan deka mati.” (P-kal. 2:16, 17) Atur nya enda tusah dimeretika seduai iya. Lalu seduai iya enda tusah ngasika atur nya, laban ba kebun nya bisi mayuh pemakai bukai ke nyamai.

9, 10. (a) Baka ni Sitan bejai Jehovah? (b) Nama pemutus ke digaga Adam seduai Hawa? (Peda gambar ba pun artikel.)

⁹ Antu Sitan ngena ular ngemulaka Hawa ngambika Hawa enda ngasika Apai iya, Jehovah. (Bacha Pemungkal 3:1-5; Pem. 12:9) Sitan nyalahka Petara ketegal enda ngemendarka mensia makai “buah ari semua kayu ti dalam kebun tu.” Sitan baka ke nyebut: ‘Reti nya, nuan enda ulih ngereja utai ti dikedekaka nuan?’ Udah nya iya madah ngagai indu nya: “Enda seduai mati.” Nya jaku bula. Udah nya iya nguji ngasuh Hawa pechaya, Hawa tau enda ibuh mendingka Petara. Sitan madahka: ‘Petara nemu, lebuh seduai makai buah nya, mata seduai deka tebuka.’ (NW) Sitan madahka, Jehovah nagang seduai iya makai buah nya laban buah nya deka meri seduai iya sekeda penemu ti spesial. Pengujung iya, Sitan ngaga semaya ti bula tu: ‘Seduai deka nyadi sebaka enggau Petara, nemu ngelala bida entara utai ti manah enggau utai ti jai.’

 ¹⁰ Adam seduai Hawa patut mutuska bagi utai ti deka digaga. Kati seduai iya deka ngasika Petara, tauka mendingka ular nya? Tang sayau amat, seduai iya milih enggai ngasika Petara. Seduai iya nulak Jehovah nyadika Apai, lalu nitihka Sitan. Diatu seduai iya nyau ngatika diri, enda agi dijaga Jehovah.—P-kal. 3:6-13.

11. Nama kebuah Jehovah patut mutarka dosa Adam seduai Hawa?

¹¹ Lebuh Adam seduai Hawa ngelanggar atur Petara, seduai iya enda agi sempurna. Nambahka nya, seduai iya nyadi munsuh Petara laban Petara begedika penyai. “Mata Nuan kelalu kudus merening ngagai penyai.” (Hab. 1:13) Enti Jehovah enda mutarka dosa Adam seduai Hawa, semua utai ti ditempa Jehovah deka nadai pengadang ke jemah ila. Bala melikat sereta mensia deka berunding sekalika sida tau bepanggai ba jaku Petara. Tang Jehovah tetap ati ngagai standard Iya Empu; Iya enda ngelanggar standard nya. (Mas. 119:142) Taja pan Adam seduai Hawa ngembuan peluang bibas milih, seduai iya enda ulih nyeliahka penusah ti datai ari pengawa ngelaban Jehovah. Pengujung iya, seduai iya mati lalu pulai ngagai amau ke dikena nempa seduai iya.—P-kal. 3:19.

12. Nama nyadi ngagai bala anak Adam?

¹² Lebuh Adam seduai Hawa makai buah nya, Jehovah enda agi nerima seduai iya nyadi sebegian ari ruang bilik Iya. Iya muru seduai iya ari Kebun Eden, lalu seduai iya enda ulih pulai kia agi. (P-kal. 3:23, 24) Jehovah ngelakka seduai iya napi penusah ke datai ari pemutus ti digaga seduai iya. (Bacha Ulang Adat 32:4, 5.) Ketegal tu, seduai iya enda agi ulih neladan kualiti Jehovah enggau pengabis manah. Adam ukai semina ngelenyauka pengidup ti badas ke jemah ila ke iya empu, tang mega ke bala anak iya. Iya semina ulih meri tubuh ti enda sempurna, dosa sereta pemati ngagai bala anak iya. (Rom. 5:12) Adam muai peluang idup belama iya ari bala anak iya. Seduai iya enda ulih ngembuan anak ke sempurna, lalu bala anak seduai iya enda ulih ngembuan anak ke sempurna. Kenyau ari Sitan udah mai Adam seduai Hawa angkat ngelaban Petara, Sitan udah nguji mai semua mensia ngereja pengawa ti sama.—Jhn. 8:44.

13. Nama dikedekaka Jehovah bekaul enggau mensia?

¹³ Jehovah agi rinduka mensia. Taja pan Adam seduai Hawa udah ninggalka  Iya, Iya agi dekaka mensia bisi kaul ti manah enggau Iya. Lalu Iya enggaika sida mati. (2 Pet. 3:9) Nya alai, Petara jejampat ngaga atur ngambika mensia tau bisi kaul enggau Iya baru. Baka ni Iya ulih ngereja tu enggau enda ngelanggar standard Iya Empu? Aram kitai meda.

14. (a) Nitihka John 3:16, nama digaga Petara kena nyelamatka mensia ari dosa enggau pemati? (b) Nama tanya ke ulih dikerandauka kitai enggau orang?

¹⁴ Bacha John 3:16. Sekeda orang ke dikangau kitai datai Ngingatka Pemati Jesus engka nemu ayat tu. Tang, baka ni genselan Jesus muka peluang ngagai pengidup ti meruan belama iya? Kitai bisi peluang nulung orang nemu saut ngagai tanya tu lebuh kitai ngelaluka sida datai Ngingatka Pemati Jesus, lebuh kitai enggau sida ba pengawa nya, sereta lebuh kitai ngelawa sida pengudah nya. Mayuh agi utai ti ditemu sida pasal tebus, dalam agi penemu sida pasal pengerindu Jehovah ke mensia sereta pemintar Iya. Nama batang pekara pasal tebus ke ulih dikunsi kitai enggau sida?

15. Baka ni Jesus enda sebaka enggau Adam?

¹⁵ Jehovah nyediaka seiku mensia ti sempurna ke ulih nyerahka nyawa diri nyadika tebus. Orang ke sempurna nya patut taluk ngagai Jehovah sereta sanggup nyerahka nyawa diri ke mensia. (Rom. 5:17-19) Jehovah mindahka pengidup Jesus, utai keterubah ti ditempa Iya, ari serega ke dunya. (Jhn. 1:14) Nya alai Jesus nyadi mensia ti sempurna, sama baka Adam menya. Tang enda baka Adam,  Jesus nitihka standard ti dikedekaka Jehovah ari mensia ti sempurna. Indah lebuh napi penguji ti pemadu besai, iya enda kala ngelanggar sebarang atur ari Petara.

16. Nama kebuah tebus nya pemeri ti berega?

¹⁶ Enggau mati nyadi mensia ti sempurna, Jesus ulih nyelamatka mensia ari dosa enggau pemati. Jesus ngembuan semua utai ke patut dikembuan Adam. Jesus nya mensia ti sempurna, taluk sereta ngasika Petara enggau pengabis ati. (1 Tim. 2:6) Iya mati ke kitai, lalu tebus iya meri peluang idup belama iya ngagai semua lelaki, indu sereta bala anak. (Mat. 20:28) Tebus nya peluang ti dikena ngamatka tuju Petara.—2 Kor. 1:19, 20.

17. Tebus muka peluang ngagai nama?

¹⁷ Jehovah nyediaka tebus ti berega ke dibayar ngagai Iya Empu. (1 Pet. 1:19) Kitai amat berega ba Iya nyentukka Iya sanggup nyerahka Anak ti dikesayauka Iya mati ke kitai. (1 Jhn. 4:9, 10) Reti nya, Jesus nganti penuduk Adam nyadika apai kitai. (1 Kor. 15:45) Jesus ukai semina muka peluang ngambika kitai ngembuan pengidup ti meruan belama iya, tang mega ngambika kitai ulih pulai baru ngagai ruang bilik Petara dudi hari ila. Nengah tebus, mensia deka nyadi sempurna, lalu Jehovah ulih nerima sida pulai baru ngagai ruang bilik Iya enggau enda ngelanggar atur Iya Empu. Uji gambarka, naka meh pemanah lebuh semua orang ke taluk ngagai Jehovah nyadi sempurna! Pengujung iya, semua ke di serega enggau ke ba dunya deka beserakup nyadi siti ruang bilik. Semua kitai deka nyadi anak Petara.—Rom. 8:21.

18. Ni maya Jehovah deka nyadi “semua utai ke semua orang”?

¹⁸ Taja pan apai indai kitai ti keterubah nulak Jehovah, tang Iya enda ngetu rinduka orang, lalu nyediaka tebus. Lalu taja pan kitai enda sempurna, Sitan enda ulih nagang kitai ari taluk ngagai Jehovah. Nengah tebus, Jehovah deka nulung kitai nyadi orang ke pengabis lurus. Uji gambarka pemanah pengidup lebuh semua orang “ke meda Anak, lalu arapka iya” bulih pengidup ti meruan belama iya! (Jhn. 6:40) Apai kitai ti bisi pengerindu sereta bepenemu-dalam deka ngamatka tuju Iya sereta nulung mensia nyadi sempurna. Udah nya, Jehovah deka nyadi “semua utai ke semua orang.”—1 Kor. 15:28, NW.

19. (a) Beterima kasih ke tebus patut meransang kitai ngereja nama? (Peda kutak “ Aram Terus Ngiga Orang ke Patut.”) (b) Nama deka dikerandauka kitai ba artikel pengudah tu?

¹⁹ Ulah kitai ke beterima kasih ke tebus patut meransang kitai madah ngagai orang bukai pasal pemeri ti berega tu. Orang patut nemu, nengah tebus, Jehovah enggau pengerindu meri semua mensia peluang idup belama iya. Tang tebus ngereja lebih agi ari nya. Tebus mutarka pekara ti dikemesaika Sitan ba Kebun Eden. Kitai deka berandauka baka ni tebus mutarka pekara nya ba artikel pengudah tu.