1, 2. Nama ditemu seiku menyadi lelaki pasal iya empu, lalu nama digaga iya?

ROBERT dibaptisa lebuh iya beumur 15 taun, tang iya enda beberatka pemendar ba pengidup. Ku iya madahka: “Aku nitih aja utai ti dikereja orang. Aku enda ngereja utai ti salah. Aku baka ke rapat enggau Petara, datai ngagai semua gempuru sereta nyadi pengerintis sukung beberapa kali dalam setaun. Tang aku ngasaika agi bisi utai kurang.”

² Robert nyau sedar pasal utai ke kurang nya pengudah iya kawin. Kekadang seduai bini iya nanya pangan diri pasal tanya Bup Kudus. Bini iya nemu mayuh utai, lalu senang deka nyaut tanya nya. Tang Robert selalu enda nemu saut iya. Tu ngasuh iya berasai malu. Ku Robert: “Aku baka ke enda nemu utai. Aku berunding, ‘Enti aku deka ngiring bini aku ba pengarap, aku patut berubah.’” Nya meh utai ti digaga Robert. Iya madah: “Aku bebendar belajar lalu belubah-lubah ulih nemu utai ku Bup Kudus. Penemu aku majak nambah, lalu keberat agi, kaul aku enggau Jehovah majak rapat.”

3. (a) Nama lalau ti manah ari peneleba Robert? (b) Nama tanya ti deka dipejuraika kitai?

 ³ Peneleba Robert ulih nyadi lalau ti manah. Kitai engka bisi mimit penemu pasal Bup Kudus, suah datai begempuru sereta nginjil enggau tetap. Tang tu ukai reti nya kitai ngembuan runding Petara. Tauka kitai engka udah bebendar berunding baka Petara tang lebuh kitai meresa diri empu, kitai agi ulih meda bagi utai ke patut dikemansangka. (2 Tim. 3:14) Dalam artikel tu, kitai deka bejuraika tiga iti tanya: (1) Baka ni kitai nemu sekalika kitai ngembuan runding Petara tauka enda? (2) Nama ulih digaga kitai ngambika tegap ba pengarap? (3) Nama penguntung enti kitai rapat enggau Petara ba pengidup besehari-hari?

4. Jaku lalau ba Epesus 4:23, 24 dituju ngagai sapa?

⁴ Lebuh berengkah nyembah Petara, kitai ngaga ubah ba pengidup. Pengudah dibaptisa, kitai enda ngetu ngaga pemansang. Bup Kudus madahka: “Ngelakka runding enggau ati [kitai] diubah nyadi baru.” (Eps. 4:23, 24) Dalam jaku Gerika, “diubah nyadi baru” mai reti enda ngetu ngaga ubah. Ketegal kitai enda sempurna, kitai patut terus ngaga ubah. Taja pan kitai udah betaun-taun nyembah Jehovah, kitai patut nentuka kaul kitai enggau Iya mengkang tegap.—Plp. 3:12, 13.

5. Nama tanya ke ulih nulung kitai nemu sekalika kitai ngembuan runding Petara tauka enda?

⁵ Enda ngira tuai tauka biak, kitai patut meresa diri empu. Kitai ulih nanya diri: ‘Kati aku ngembuan runding Petara? Kati aku neladan Kristus? Baka ni ulah sereta chara aku begulai enggau orang ba gempuru? Ari randau, aku nunjukka diri ngemeratka nama ba pengidup? Kati aku belajarka Bup Kudus enggau tetap? Kati chara aku begari enggau ngintu diri nitihka prinsip Bup Kudus? Baka ni chara aku nerima jaku lalau? Nama digaga aku lebuh bisi pengingin deka ngereja utai ti salah? Kati aku udah nyadi orang Kristian ke tegap ba pengarap?’ (Eps. 4:13) Tanya ke baka tu ulih nulung kitai nemu sekalika kaul kitai enggau Petara tegap tauka enda.

6. Nama utai bukai ke ulih nulung kitai nemu sekalika kitai ngembuan runding Petara tauka enda?

⁶ Kekadang kitai begunaka tulung ari orang bukai kena nemu sekalika kitai ngembuan runding Petara tauka enda. Rasul Paul madahka orang ke ngembuan runding dunya enda nemu chara pengidup diri enda ngelantangka ati Petara. Tang orang ke ngembuan runding Petara nemu chara Petara beratika siti-siti utai. Iya nemu Petara enda nerima chara  pengidup dunya. (1 Kor. 2:14-16; 3:1-3) Enti bala menyadi Kristian bisi ngembuan ulah baka orang ba dunya, bala tuai gempuru ke ngembuan runding Kristus ulih beratika nya lalu nulung sida. Enti bala tuai gempuru nulung kitai, kati kitai deka nerima tulung ari sida lalu ngaga ubah? Enti kitai nerima tulung ari sida, kitai nunjukka diri deka tegap ba pengarap.—P-jar. 7:5, 9.

7. Baka ni kitai nemu ngembuan penemu Bup Kudus aja enda chukup enti deka nitihka chara Petara berunding?

⁷ Ngembuan penemu Bup Kudus aja enda chukup, enti deka nitihka chara Petara berunding. Raja Solomon nemu mayuh utai pasal Jehovah, lalu sekeda jaku ajar Solomon bisi ditulis dalam Bup Kudus. Tang nyau kelama, kaul iya enggau Jehovah nyadi lemi, lalu iya pan enda agi mengkang tetap ati. (1 Raj. 4:29, 30; 11:4-6) Nya alai, nama agi patut digaga kitai? Kitai patut negapka pengarap. (Kol. 2:6, 7) Baka ni kitai ulih ngereja nya?

8, 9. (a) Nama ulih nulung kitai mansang tegap ba pengarap? (b) Nama tuju kitai belajar enggau belemati? (Peda gambar ba pun artikel.)

⁸ Ba abad keterubah, Paul meransang orang Kristian “mansang ngagai ajar ke orang ti besai tuai.” (Heb. 6:1) Baka ni kitai ulih nitihka jaku lalau tu? Siti chara nya kitai belajarka bup Meruan Dalam Pengerindu Petara. Bup tu ulih nulung nuan meretika chara ngena prinsip Bup Kudus ba pengidup. Enti nuan udah belajarka bup tu, bisi litaricha bukai ke ulih dipelajarka nuan ngambika pengarap nuan tegap. (Kol. 1:23) Kitai mega patut belematika utai ke udah dipelajarka lalu minta Jehovah nulung kitai ngena utai nya ba pengidup.

⁹ Lebuh kitai belajar sereta belemati, kitai patut bisi tuju, iya nya deka ngasi sereta ngelantangka ati Jehovah. (Mas. 40:8; 119:97) Kitai mega patut nulak semua utai ke ulih nekul kitai mansang ba pengarap.—Tit. 2:11, 12.

10. Nama patut digaga bala nembiak ngambika ulih mansang tegap ba pengarap?

 ¹⁰ Kita ke nembiak, kati kita bisi juluk ati ba pengarap? Seiku menyadi lelaki ke gawa ba Betel suah berandau enggau bala nembiak ti deka dibaptisa ba gempuru besai, lalu nanya pasal juluk ati sida. Iya beratika sida bisi berundingka chara deka gawa ke Jehovah. Sekeda sida deka gawa penuh jam ke Jehovah tauka ngagai endur ke begunaka mayuh penginjil. Bisi nya enda ulih nyaut tanya iya. Kati reti nya sida tau enda ibuh ngembuan juluk ati ba pengarap? Orang ke nembiak tau nanya diri empu: ‘Kati aku datai begempuru sereta nginjil ketegal diasuh apai indai? Tauka kati aku empu bisi kaul ti rapat enggau Petara?’ Enda ngira tuai tauka biak, semua kitai patut bisi juluk ati ba pengarap. Juluk ati nya ulih nulung kitai mansang tegap ba pengarap.—P-jar. 12:1, 13.

11. (a) Nama patut digaga kitai ngambika ulih ngembuan runding Petara? (b) Nama teladan ba Bup Kudus ti ulih dititihka kitai?

¹¹ Pengudah beratika bagi utai ke patut dikemansangka, kitai anang enda ngaga ubah. Tu utai ti dikereja kitai laban nya bekaul enggau nyawa kitai. (Rom. 8:6-8) Jehovah enda ngarapka kitai nyadi sempurna, lalu Iya meri roh kudus ngambika ulih nulung kitai. Tang kitai empu  patut bebendar ngaga pemansang. Menyadi John Barr, ke nyadi Raban ti Ngiring bisi ngenang pasal Luke 13:24 lalu ku iya: “Mayuh ari sida enda ulih tama nengah pintu ti sempit laban enda bebendar ngaga pemansang.” Kitai patut neladan Jakop, ke bibat enggau melikat lalu enda ngalahka diri nyentuk ke iya bulih berekat. (P-kal. 32:26-28) Taja pan belajarka Bup Kudus ngerinduka ati, tang kitai enda patut ngumbai Bup Kudus nya baka bup cherita ti merindang ati. Kitai patut bebendar ngulihka reta pemendar Bup Kudus ti berega ke ulih nulung kitai.

12, 13. (a) Nama ulih nulung kitai nitihka jaku ba Pilipi 2:5? (b) Baka ni teladan sereta jaku lalau Peter nulung kitai? (c) Nama ulih digaga nuan ngambika tegap ba pengarap? (Peda kutak “ Chara Mansang Tegap ba Pengarap.”)

¹² Lebuh kitai enggau naka ulih deka rapat agi enggau Jehovah, roh kudus ulih ngubah chara kitai berunding. Nyau kelama kitai ulih berunding baka Kristus. (Plp. 2:5) Roh kudus ulih nulung kitai ngemansangka kualiti ti ngerinduka ati Petara lalu muai pengingin ti salah. (Gal. 5:16, 22, 23) Enti kitai bisi pengingin deka ngenuluka reta sereta pemerindang, kitai enda patut alah laban pengingin nya. Kitai patut minta roh kudus ari Jehovah ngambika nulung kitai ngenuluka utai ti ngena. (Luk. 11:13) Agi ingatka rasul Peter? Kekadang iya enda berunding baka Jesus. (Mat. 16:22, 23; Luk. 22:34, 54-62; Gal. 2:11-14) Tang iya enda mantul ati, lalu Jehovah nulung iya. Nyau kelama, Peter ulih ngembuan runding Kristus. Pia mega enggau kitai.

¹³ Peter bisi nyebut pasal kualiti ti ulih nulung kitai. (Bacha 2 Peter 1:5-8.) Kitai patut bebendar ngemansangka kualiti baka ulih nagang diri, ati ti tan, pengerindu ke bala menyadi sereta kualiti manah bukai. Ninting hari kitai ulih nanya diri empu, ‘Nama kualiti ke ulih dikemansangka aku seharitu ke ulih negapka pengarap aku?’

14. Baka ni ngembuan runding Petara ulih nulung kitai ba pengidup?

¹⁴ Enti kitai berunding baka Kristus, tu ulih ngubah ulah kitai ba endur kereja tauka ba sekula, chara kitai bejaku sereta ngaga pemutus. Pemutus ke digaga kitai nunjukka kitai deka neladan Kristus. Ketegal kitai ngembuan runding Petara, kitai enggai ngelakka sebarang utai ngerusak kaul kitai enggau Iya. Lebuh kitai bisi pengingin deka ngereja utai ti salah, prinsip Petara ulih nulung kitai ngelaban penguji. Sebedau ngaga pemutus, kitai patut nanya diri empu: ‘Nama prinsip Bup Kudus ke ulih nulung aku? Enti Kristus napi tu, nama digaga iya? Nama pemutus ke ulih ngelantangka ati Petara?’ Kitai patut seruran berundingka tanya baka tu sebedau ngaga pemutus. Aram kitai berandauka sekeda pekara ke begunaka pemutus ari kitai. Ba tiap iti pekara nya, kitai deka beratika prinsip Bup Kudus ke ulih nulung kitai ngaga pemutus ti manah.

15, 16. Baka ni ngembuan runding Kristus ulih nulung kitai ngaga pemutus pasal (a) milih kaling pengidup? (b) milih bakih?

¹⁵ Milih kaling pengidup. Prinsip Bup Kudus ke ulih dikena bisi ba 2 Korint 6:14, 15. (Bacha.) Paul nerangka enggau nyemetak chara orang ke ngembuan runding Petara enggau orang ke ngembuan runding dunya berunding enda sebaka.  Baka ni prinsip tu ulih nulung nuan milih kaling pengidup?

¹⁶ Milih bakih. Uji peratika prinsip Bup Kudus ba 1 Korint 15:33. (Bacha.) Orang ke ngembuan runding Petara enda bebakih enggau orang ke ulih ngelemika pengarap sida. Uji perundingka chara nuan ulih ngena prinsip tu. Ambika chunto, baka ni prinsip tu ulih nulung nuan ngaga pemutus pasal media sosial? Baka ni prinsip tu ulih nulung nuan nentu sekalika nuan deka bemain game online enggau orang ke enda dikelala tauka enda?

17-19. Baka ni ngembuan runding Petara nulung kitai (a) nyeliahka pengawa ke nadai guna? (b) netapka juluk ati ti manah? (c) lebuh enda sepenemu enggau orang bukai?

¹⁷ Pengawa ke ulih ngachau kaul kitai enggau Petara. Kitai bisi jaku tangkan ba Hebrew 6:1. (Bacha.) Nama pengawa ke patut diseliahka kitai? Kitai patut nyeliahka pengawa ke nadai guna sereta ke enda nulung kitai tegap ba pengarap. Jaku tangkan ba ayat tu ulih nulung kitai nyaut tanya baka: ‘Kati pengawa tu mai penguntung tauka enda? Kati aku patut enggau pengawa dagang tu? Kati aku patut nitihka raban ke nguji deka ngubah dunya tu?’

¹⁸ Juluk ati ba pengarap. Ajar Jesus ba atas Bukit bisi jaku lalau ti manah pasal juluk ati. (Mat. 6:33) Orang ke ngembuan runding Petara ngenuluka Perintah Petara ba pengidup. Lebuh kitai berundingka prinsip tu, kitai ulih nyaut tanya baka: ‘Kati patut aku nyambung pelajar ngagai universiti pengudah abis sekula? Kati patut aku nerima siti-siti kereja?’’

¹⁹ Enda sepenemu. Jaku lalau Paul ngagai orang Kristian ba Rome ulih nulung kitai lebuh enda sepenemu enggau orang bukai. (Rom. 12:18) Kitai neladan Jesus, nya alai kitai bebendar deka “diau bebaik enggau semua orang.” Nama digaga kitai lebuh enda sepenemu enggau orang bukai? Kati kitai berasai tusah deka nerima runding orang bukai? Tauka kati orang ulih beratika kitai rinduka pemaik?—Jas. 3:18.

20. Nama kebuah nuan deka majak ngembuan runding Petara?

²⁰ Chunto tu tadi nunjukka kitai diiring roh kudus enti kitai ngaga pemutus bepelasarka prinsip Bup Kudus. Ngembuan runding Petara ulih ngasuh kitai berasai gaga sereta puas ati. Robert ke disebut ba pun artikel tu madah: “Pengudah aku bulih kaul ti amat rapat enggau Jehovah, aku nyadi laki sereta apai ti betanggungjawap agi. Aku amat gaga sereta puas ati.” Enti kitai enggau naka ulih majak ngembuan runding Petara, kitai deka bulih mayuh penguntung. Pengidup kitai deka lantang agi, lalu jemah ila kitai deka bulih “pengidup ti bendar.”—1 Tim. 6:19.