Ari ni asal penatai balai gempuru?

LEKA jaku “balai gempuru” dalam jaku Gerika mai reti “begempuru” tauka “ngempuruka.” Tu amat ngena ketegal balai gempuru nya endur alai orang begempuru nerima iring sereta endur alai orang Judah bejalaika pengawa nyembah Petara maya jeman kelia. Bup Sempekat Lama nadai madah pasal balai gempuru. Tang bup Sempekat Baru enggau terang madah pasal nya lalu endur nya endang udah bisi ba abad ti keterubah Masihi.

Mayuh pakar madahka balai gempuru berengkah bisi lebuh orang Judah nyadi orang tangkap di menua Babilon. Ku Encyclopaedia Judaica: “Lebuh orang Judah nyadi orang tangkap di menua bukai, sida nadai Rumah Sembiang. Lebuh sida begunaka pengelantang, sida begempuru maya Hari Sabat lalu macha jaku Petara.” Pengudah orang Judah dilepaska ari menua Babilon, sida agi terus begempuru ngambika ulih sama-sama besampi sereta macha jaku Petara, lalu sida mega bisi nirika balai gempuru ba dini-dini endur sida diau.

Ba abad ti keterubah Masihi, balai gempuru nyadi palan alai orang Judah nyembah Jehovah. Nya mega nyadi palan alai orang Judah ari Mediterranean, Timur Tengah, sereta ari menua Israel begempuru. Ku Profesor Lee Levine ari Hebrew University of Jerusalem madahka: “Balai gempuru nyadi palan alai belajar, alai nyediaka pemakai ke diempa maya Hari Sabat sereta pengerami ke bukai, alai ngatur pechara, alai meri enggau nyimpan pemeri, alai baum pasal politik, sereta alai begempuru.” Ku iya agi: “Endur tu kelebih agi dikena nyembah Petara.” Nya alai, kitai ulih nemu kebuah Jesus suah datai ngagai balai gempuru. (Mrk. 1:21; 6:2; Luk. 4:16) Dia, iya ngajar sereta meransang sida ke datai. Pia mega enggau rasul Paul. Iya nitihka teladan Jesus. Orang ke deka semak ngagai Petara, datai ngagai balai gempuru. Nya alai, endur keterubah dilawa Paul lebuh datai ba siti-siti nengeri nya balai gempuru. Iya mega nginjil dia.—SKR. 17:1, 2; 18:4.