1. Nama sekeda tanya ke ulih diperundingka seiku menyadi indu sebedau iya kawin?

JESUS nya kepala ti sempurna ke semua orang Kristian. Taja pia, lebuh menyadi Kristian ti indu kawin, iya dibaruh seiku lelaki ti enda sempurna. Tu ulih nyadi siti penanggul. Nya alai, sebedau iya jadi enggau seiku menyadi lelaki, iya patut berunding: ‘Nama nunjukka menyadi lelaki tu ulih nyadi tuai bilik ti manah? Kati iya ngenuluka Jehovah ba pengidup iya? Enti enda, nama kebuah aku ngumbai iya ulih nulung kami duai ngetanka kaul enggau Jehovah pengudah kami jadi?’ Taja pia, menyadi indu nya mega patut nanya diri empu: ‘Nama kualiti ke dikembuan aku ti ulih mai penguntung ba tikah? Kati aku orang ti sabar sereta gerah jari? Kati aku bisi kaul ti tegap enggau Jehovah?’ (P-jar. 4:9, 12) Enti seiku indu ngaga pemutus ti manah sebedau iya jadi, tu ulih nulung iya bisi tikah ti mujur sereta lantang.

2. Nama deka dipejuraika kitai ba artikel tu?

² Bejuta iku menyadi Kristian ke indu netapka teladan ti manah laban sida tunduk ngagai laki sida. Sida patut dipuji! Kitai gaga ati begulai enggau menyadi indu ti tetap ati tu nyembah Jehovah. Ba artikel tu, kitai deka bejuraika tiga iti tanya: (1) Nama sekeda penanggul ke ditapi bala bini? (2) Nama kebuah bini milih deka tunduk ngagai laki iya? (3) Nama ulih dipelajar laki bini pasal tunduk ari teladan Jesus, Abigail, enggau Maria, iya nya bini Josep?

3. Nama kebuah semua laki bini bisi napi penanggul?

³ Tikah nya pemeri ti pemadu badas ari Petara. Tang kitai mensia ti enda sempurna. (1 Jhn. 1:8) Nya kebuah Bup Kudus nangkan laki bini “deka dituntung penusah.” (1 Kor. 7: 28) Peratika sekeda ari penanggul ke ditapi bini.

4. Nama kebuah bini engka ngasaika diri dikemaruhka enti iya tunduk ngagai laki?

⁴ Kekadang bini ngasaika diri dikemaruhka enti iya tunduk ngagai laki. Iya engka ngembuan runding tu ketegal chara iya dibesaika. Ku seiku menyadi indu ke benama Marisol, ari Amerika Serikat madahka, “Ba endur aku dibesaika, bala indu seruran dikingatka sida sama enggau orang lelaki ba semua pekara. Tang aku nemu Jehovah udah meri kuasa ngagai laki, lalu netapka atur bini patut tunduk ngagai laki. Taja pia, bini mega patut dipebasa. Tang kekadang aku ngasaika tusah deka bebasaka kuasa ke dikembuan laki aku laban orang ke ngelingi aku madah aku enda ibuh ngereja nya.”

5. Nama runding ti salah ke dikembuan sekeda lelaki pasal orang indu?

⁵ Taja pia, bisi mega indu ke jadi enggau lelaki ti ngumbai orang indu nya baruh agi ari lelaki. Ku seiku menyadi indu ke benama Ivon, ari Amerika Selatan madahka, “Ba endur kami, lelaki makai dulu. Udah nya orang indu. Anak indu diasuh manduk sereta meresi, tang anak lelaki baka raja ba rumah, lalu nganti indai sereta menyadi indu iya ngereja pengawa ke iya.” Seiku menyadi indu ke benama Yingling, ke diau di Asia madah: “Dalam jaku Cina, bisi rambai jaku ke mai reti orang indu enda ibuh nyadi pandai tauka bisi penau. Sida semina ngereja pengawa ba rumah, lalu enda ulih madahka penemu diri ngagai laki sida.” Laki ke enda ngayanka pengerindu sereta enda nitihka utai ke dipadah Bup Kudus ngenusahka bini iya. Iya enda neladan Jesus, lalu enda ngelantangka ati Jehovah.—Eps. 5:28, 29; 1 Pet. 3:7.

6. Nama patut digaga bala bini kena negapka kaul sida enggau Jehovah?

⁶ Baka ke udah disebut ba artikel sebedau tu, Jehovah deka laki nyediaka utai ti diguna diri sebilik ba pengarap, emosi sereta utai ke diguna ninting hari. (1 Tim. 5:8) Taja pia, menyadi indu ke udah kawin patut ngiga awak ngambika sida ulih macha sereta belematika Bup Kudus, lalu besampi ngagai Jehovah. Tu engka tusah dikereja. Bini seruran bisi mayuh pengawa, nyadi sida engka ngasaika diri nadai awak tauka pengering ngereja pekara nya. Tang sida enda tau enda ngiga awak. Nama kebuah? Laban Jehovah deka tiap iku kitai ngembuan sereta ngetanka kaul enggau Iya.—SKR. 17:27.

7. Nama ulih nulung bini senang agi bebasa sereta ngasika laki iya?

⁷ Endang amat, bini patut bebendar tunduk ngagai laki iya ti enda sempurna. Nama ulih nulung bini senang agi ngereja nya? Enti iya mereti sereta nerima kebuah ari Bup Kudus, iya senang tunduk ngagai laki iya.

8. Nitihka Epesus 5:22-24, nama kebuah bini milih deka tunduk ngagai laki iya?

⁸ Bini milih deka tunduk ngagai laki iya laban nya utai ti dipinta Jehovah ari iya. (Bacha Epesus 5:22-24.) Iya andal Apai iya ti di serega rinduka iya, lalu semina minta iya ngereja utai ti manah ke iya.—U-dat. 6:24; 1 Jhn. 5:3.

9. Nama nyadi enti bini bebasaka penuduk laki iya?

⁹ Dunya tu meransang orang indu enda ibuh nitihka standard Jehovah, lalu ngumbai tunduk nya baka ngemaruhka sida. Tang orang ke meransang runding tu enda ngelala Petara kitai ti bepengerindu. Jehovah  tentu enggai meri pesan ti ulih ngemaruhka anak indu Iya ti dikesayau. Menyadi indu ti bebendar ngasika Jehovah enggau tunduk ngagai laki iya mai pemaik ngagai diri sebilik. (Mas. 119:165) Semua sida sebilik deka bulih penguntung.

10. Nama ulih dipelajarka kitai ari utai ke dipadah Carol?

¹⁰ Bini ke tunduk ngagai laki iya ti enda sempurna nunjukka iya rindu sereta bebasaka Jehovah. Ku Carol ari Amerika Selatan: “Aku nemu laki aku deka ngereja penyalah. Tang aku mega nemu utai ke digaga aku maya nya deka nunjukka enti aku ngemeratka kaul aku enggau Jehovah. Nya alai aku nguji tunduk, laban aku deka ngelantangka ati Apai aku di serega.”

11. Nama nulung Menyadi Aneese sedia ngampun, lalu nama ulih dipelajar kitai ari jaku iya?

¹¹ Bini engka ngasai tusah deka bebasa sereta tunduk ngagai laki enti laki iya enda ibuhka asai ati sereta pengirau iya. Tang peratika utai ku menyadi indu ke benama Aneese. Ku iya: “Aku nguji enda ngeransi lalu nemu semua kitai ngereja penyalah. Juluk ati aku nya ngampun baka Jehovah. Lebuh aku ngampun, aku berasai lantang baru.” (Mas. 86:5) Bini ke sedia ngampun deka senang agi tunduk ngagai laki.

12. Nama chunto ke bisi ba Bup Kudus?

¹² Sekeda orang ngumbai, orang ke tunduk nya lemi. Tang nya enda amat! Bup Kudus ngundan mayuh chunto pasal orang ke tunduk, tang mega ngayanka pemerani. Peratika utai ke ulih dipelajarka kitai ari Jesus, Abigail, enggau Maria.

13. (a) Nama kebuah Jesus tunduk ngagai Jehovah? (b) Baka ni teladan Jesus nunjukka orang ke tunduk nya ukai lemi?

¹³ Jesus tunduk ngagai Jehovah, ukai ketegal iya enda pandai tauka nadai penau. Chara iya ngajar ti senang sereta terang nunjukka iya amat pandai. (Jhn. 7:45, 46)  Jehovah bebasaka penau Jesus. Nya alai Iya ngemendarka Jesus gawa begulai enggau Iya lebuh ngaga utai ba serega enggau ba dunya. (J-lam. 8:30; Heb. 1:2-4) Lalu pengudah Jehovah ngangkatka Jesus idup baru, Iya meri Jesus ‘semua kuasa di serega enggau di dunya.’ (Mat. 28:18) Taja pan Jesus landik ba mayuh utai, iya agi ngiga iring ari Jehovah. Nama kebuah? Laban iya rinduka Apai iya.—Jhn. 14:31.

14. Nama ulih dipelajarka bala laki ari (a) runding Jehovah pasal orang indu? (b) utai ke ditulis ba Jaku Dalam 31?

¹⁴ Nama ulih dipelajarka bala laki? Jehovah ngasuh bini tunduk ngagai laki ukai ketegal Iya ngemaruhka orang indu. Baka ni kitai nemu? Laban Jehovah milih indu enggau lelaki sama merintah enggau Jesus. (Gal. 3:26-29) Jehovah nunjukka Iya andalka Anak Iya lebuh Iya meri Jesus sekeda kuasa. Sama mega, laki ti bepenemu-dalam andalka bini iya enggau meri sekeda kuasa ngagai bini iya. Bup Kudus bisi nerangka utai ke ulih dikereja bini ke nemu ngereja utai. Ambika chunto, iya ulih ngintu utai ba rumah, meli sereta nyual tanah, lalu ngereja pengawa dagang. (Bacha Jaku Dalam 31:15, 16, 18.) Iya enda baka ulun ke enda ulih madahka penemu diri. Laki arapka iya sereta ningaka penemu iya. (Bacha Jaku Dalam 31:11, 26, 27.) Lebuh laki ngereja tu enggau basa, bini iya deka gaga ati tunduk ngagai iya.

15. Nama ulih dipelajarka bala bini ari teladan Jesus?

¹⁵ Nama ulih dipelajarka bala bini? Taja pan Jesus ngereja mayuh pengawa ti besai, tang iya enda ngasaika diri dikemaruhka lebuh tunduk ngagai Jehovah. (Jhn. 6:38; 1 Kor. 15:28) Baka nya mega, bini ti landik ke nitihka teladan Jesus enda ngasaika diri baruh agi ari laki enti iya tunduk ngagai laki iya. Iya deka nyukung laki iya ukai semina ketegal iya rinduka laki, tang kelebih agi ketegal iya rindu sereta bebasaka Jehovah.

16. Nitihka 1 Samuel 25:2, 3, 23-28, nama penanggul ke ditapi Abigail? (Peda gambar ba mua majalah.)

¹⁶ Abigail nya bini seiku lelaki ke benama Nabal. Nabal nya orang ti berundingka diri empu, sumbung sereta enda nemu beterima kasih. Taja pia, Abigail enda ngiga chara mudah ngujungka tikah iya. Enti iya deka, iya ulih nejuka David enggau soldadu David munuh laki iya. Tang iya enda ngereja nya. Iya ngiga chara ngelindung Nabal sereta ruang bilik sida ti besai. Perundingka pemerani Abigail lebuh iya mansang ngagai 400 iku lelaki ti bebaika senyata sereta enggau basa berandau enggau David. Iya indah sanggup nanggung penyalah laki iya. (Bacha 1 Samuel 25:2, 3, 23-28.) David nyau nemu Jehovah udah ngena indu ti berani tu meri jaku lalau ngagai iya, lalu tu nulung iya enda ngereja penyalah ti besai.

17. Nama ulih dipelajarka bala laki ari David enggau Abigail?

¹⁷ Nama ulih dipelajarka bala laki? Abigail nya indu ti bepenemu-dalam. Ketegal David ningaka jaku lalau iya, David ulih nyeliah ari munuh orang ti enda bepenyalah. Baka nya mega, laki ti bepenemu-dalam enggau bejimat berundingka penemu bini iya lebuh ngaga pemutus ti besai. Engka penemu bini iya ulih nulung iya nyeliahka ari ngaga pemutus ti salah.

18. Nama ulih dipelajarka bala bini ari teladan Abigail?

¹⁸ Nama ulih dipelajarka bala bini? Bini ke rindu sereta bebasaka Jehovah ulih mai penguntung ngagai diri sebilik, taja pan laki  iya enda nyembah Jehovah tauka nitihka standard Jehovah. Bini enda ngiga chara mudah ngujungka tikah iya. Tang, lebuh iya ngayanka basa sereta nunduk ngagai laki, iya ulih meransang laki iya belajar pasal Jehovah. (1 Pet. 3:1, 2) Taja pan laki iya mutuska enggai nyembah Jehovah, Jehovah gaga ati meda bini ngasika laki sereta tetap ati ngagai Jehovah.

19. Ni maya bini enda ngasika laki iya?

¹⁹ Tang bini ke Kristian enda nyukung laki iya enti laki ngasuh iya ngereja utai ti enda sejalai enggau prinsip Bup Kudus. Ambika chunto, enti laki iya ke ukai Saksi ngasuh iya bula, ngenchuri tauka ngereja pengawa ti enda ngelantangka ati Jehovah, iya patut nulak, lalu nerangka kebuah iya enda ulih ngereja utai ke dipinta laki iya enggau chara ti nelap sereta berani. (SKR. 5:29) Kingatka, semua orang Kristian, nyengkaum menyadi indu ti udah kawin, patut ngasika Jehovah dulu.

20. Baka ni kitai nemu Maria bisi kaul ti rapat enggau Jehovah?

²⁰ Maria bisi kaul ti rapat enggau Jehovah. Iya nemu ayat Bup Kudus enggau manah. Lebuh iya berandau enggau Elisabet, indai John Pemaptisa, Maria nandu ari Sempekat Lama lebih ari 20 kali. (Luk. 1:46-55) Lalu perundingka tu: Taja pan Maria nya tunang Josep, tang melikat Jehovah enda pegari ngagai Josep dulu. Melikat nya terubah iya bejaku enggau Maria, lalu madahka Maria deka ngadaka Anak Petara. (Luk. 1:26-33) Jehovah nemu Maria enggau manah lalu andal Maria deka rindu sereta nyaga Anak Iya. Lalu Maria tentu bisi kaul ti manah enggau Jehovah, indah pengudah Jesus mati sereta diangkatka idup baru ngagai serega.—SKR. 1:14.

21. Nama ulih dipelajarka bala laki ari utai ke dipadah Bup Kudus pasal Maria?

²¹ Nama ulih dipelajarka bala laki? Laki ti bepenemu-dalam gaga ati enti bini iya nemu  Bup Kudus enggau manah. Iya enda ringat tauka ngumbai bini iya deka nyadi tuai bilik. Iya nemu bini ke bisi penemu pasal Bup Kudus sereta prinsip Bup Kudus enggau manah ulih mai penguntung ngagai diri sebilik. Taja pia, enti bini bepelajar agi ari laki, laki agi bisi tanggung pengawa ngiring diri sebilik iya nyembah Jehovah. Ambika chunto, iya ngatur belajarka Bup Kudus ba diri sebilik sereta pengawa teokratik ke bukai.—Eps. 6:4.

22. Nama ulih dipelajarka bala bini ari Maria?

²² Nama ulih dipelajarka bala bini? Bini enda tau enda tunduk ngagai laki. Tang iya bisi tanggung pengawa nentuka pengarap iya mengkang tegap. (Gal. 6:5) Nya alai, iya patut netapka awak belajar sereta belematika Bup Kudus. Nya deka nulung iya mengkang rindu sereta bebasaka Jehovah, lalu gaga ati nunduk ngagai laki.

23. Baka ni bini ke nunduk ngagai laki mai penguntung ngagai diri empu, diri sebilik sereta eklisia?

²³ Bini ke nunduk ngagai laki ketegal rinduka Jehovah deka bulih pengaga ati sereta puas ati. Sida mega netapka teladan ti manah ke lelaki sereta indu ke biak. Sida meransang pengerindu sereta pemaik, ukai semina ba diri sebilik tang mega ba eklisia. (Tit. 2:3-5) Kemayaharitu, mayuh ari nembiak Jehovah ke tetap ati nya orang indu. (Mas. 68:11) Semua kitai, enda ngira lelaki tauka indu bisi ungkup ti beguna ba eklisia. Artikel ke pengudah tu deka berandauka baka ni kitai ulih bejalaika tanggung pengawa kitai.