1. Nama utai ti dipadah Jesus ngagai bala murid iya pasal kemaya “pengujung dunya tu” deka datai? Nama jaku tangkan ke diberi Jesus ngagai sida?

 BEBERAPA hari sebedau Jesus mati, empat iku ari bala murid iya nanya iya: “Nama tanda . . . pengujung dunya tu?” (Mat. 24:3) Bala murid nya engka nanya pasal chara sida ulih nemu kemaya Jerusalem sereta Rumah Sembiang nya deka dirusak. Dalam saut ke dipadah Jesus, iya ukai semina nyebut pasal pengerusak Jerusalem enggau Rumah Sembiang nya, tang iya mega nyebut pasal “pengujung dunya tu,” iya nya timpuh jeman kitai diatu. Bekaul enggau penatai pengujung dunya tu, Jesus madahka: “Nadai orang nemu hari tauka jam iya. Melikat ke ba serega enda nemu. Indah Anak pan enda nemu. Semina Apai aja nemu.” Udah nya, Jesus nangkan bala murid iya ngambika “mengkang bejaga.”—Mrk. 13:32-37.

2. Nama kebuah orang Kristian ba abad keterubah patut mengkang bejaga?

² Orang Kristian bansa Judah ba abad keterubah patut mengkang bejaga ngambika sida ulih selamat. Jesus madah ngagai bala murid iya pasal utai ti patut diperatika sida ngambika sida ulih nemu kemaya Jerusalem enggau Rumah Sembiang nya deka dirusakka. Iya madah: “Lebuh kita meda Jerusalem dikelulung bala soldadu, tu reti iya nengeri nya deka dirusakka enda lama da agi.” Maya utai nya nyadi, sida patut nitihka jaku tangkan Jesus lalu “rari ngagai bukit.” (Luk. 21:20, 21) Sida ke beratika jaku tangkan tu selamat lebuh soldadu Rome ngerusak Jerusalem.

3. Nama deka dikerandauka kitai dalam artikel tu?

 ³ Kemayaharitu, kitai benung idup ba timpuh alai dunya ti jai tu deka dirusakka enda lama da agi. Nya alai, kitai patut nyaga runding kitai sereta mengkang bejaga. Dalam artikel tu, kitai deka berandauka chara kitai ulih nyaga runding kitai seraya kitai meda utai ke benung nyadi ba dunya tu, chara kitai ulih bejimat enggau utai ti dikereja kitai, sereta chara kitai ulih ngena semua awak ke agi dikembuan kitai enggau badas.

4. Nama kebuah kitai patut beminat enggau utai ti deka nyadi ba dunya tu ke deka ngamatka jaku benabi Bup Kudus?

⁴ Bisi kebuah ti manah kitai beminat enggau utai ti deka nyadi ba dunya tu ke deka ngamatka jaku benabi Bup Kudus. Ambika chunto, Jesus madahka kitai utai ti deka nyadi kena nemu ni maya pengujung sistem dunya Sitan nyau semak. (Mat. 24:3-14) Rasul Peter meransang kitai beratika jaku benabi ke benung dikeamatka ngambika pengarap kitai ulih mengkang tegap. (2 Pet. 1:19-21) Bup ti penudi dalam Bup Kudus berengkah enggau jaku tu: “Pemandang tu ari Jesus Kristus, lalu Petara udah meri tu ngagai iya, ngambika iya ulih mandangka ngagai bala ulun Petara pasal utai ke mesti nyadi enda lama da agi.” (Pem. 1:1) Nya alai, kitai tentu beminat enggau utai ke benung nyadi ba dunya diatu sereta baka ni semua utai tu ngamatka jaku benabi dalam Bup Kudus. Lalu kitai mega engka keran deka berandauka semua utai ke deka nyadi tu.

5. Nama patut diseliahka kitai, tang nama patut dikereja kitai? (Peda mega gambar.)

⁵ Tang lebuh berandauka jaku benabi ba Bup Kudus, kitai enda patut nguji neka utai ti deka nyadi. Nama kebuah? Laban kitai enggai nyebut utai ti ulih ngachau penyerakup dalam raban gempuru. Ambika chunto, kitai engka ninga bala pemerintah ba dunya bejaku pasal chara sida ulih mutarka sesiti penanggul lalu mai pengelantang enggau pengelikun. Kitai engka ngumbai jaku nya ngamatka jaku benabi ba 1 Tesalonika 5:3. Tang ari ke ngereja nya, kitai patut meretika agi penerang ti pemadu baru ke udah dikeluarka. Lebuh utai ti dikerandauka kitai bepelasarka utai ti dikeluarka gerempung Jehovah, kitai deka nulung raban gempuru mengkang beserakup sereta “sama runding.”—1 Kor. 1:10; 4:6.

6. Nama utai ti ulih dipelajarka kitai ari 2 Peter 3:11-13?

⁶ Bacha 2 Peter 3:11-13. Rasul Peter nulung kitai berunding pasal kebuah kitai patut beratika jaku benabi dalam Bup Kudus. Iya meransang kitai “seruran berundingka penatai hari Jehovah.” Nama kebuah? Tuju iya ukai kena nemu “hari enggau jam” Jehovah deka ngenataika Armagedon, tang ketegal kitai deka ngena awak kitai kena nentuka ‘ulah kitai kudus,’ sereta ‘ngayanka pengawa ke nunjukka kitai enda bebagi ati nyembah Petara.’ (Mat. 24:36; Luk. 12:40) Reti iya, kitai patut ngembuan ulah ti manah sereta nentuka semua utai ti dikereja kitai ngagai Jehovah nya ketegal pengerindu kitai ti dalam ngagai Iya. Ngambika ulih mengkang ngereja nya, kitai patut bejimat enggau utai ti dikereja kitai.

7. Baka ni kitai nunjukka diri bejimat enggau utai ti dikereja kitai? (Luke 21:34)

⁷ Jesus enda ngasuh bala murid iya semina beratika utai ti nyadi ba dunya tu aja, tang iya mega ngasuh sida beratika ulah diri. Utai tu terang dipeda ba tangkan ke ditulis di Luke 21:34. (Bacha.) Peratika jaku Jesus: “Bejimat kita.” Orang ke bejimat deka seruran beratika sebarang utai ti bahaya ke ulih  ngerusak kaul iya enggau Jehovah, lalu nguji nyeliahka nya. Enggau chara tu, iya deka meruan dalam pengerindu Petara.—J-lam. 22:3; Jud. 20, 21.

8. Nama utai ti dipadah rasul Paul ngagai orang Kristian?

⁸ Rasul Paul ngasuh orang Kristian bejimat enggau utai ti dikereja sida. Ambika chunto, iya madah ngagai orang Kristian ba Epesus: “Seruran bejaga sereta bejimat, ngambika kita enda idup baka orang ke beli, tang baka orang ke bepenemu-dalam.” (Eps. 5:15, 16) Sitan seruran nguji ngerusak kaul kitai enggau Jehovah. Nya kebuah Bup Kudus ngelalau kitai ngambika ‘terus meretika peneka Jehovah.’ Enggau chara tu, kitai ulih ngelindung diri ari semua serang Sitan.—Eps. 5:17.

9. Baka ni kitai ulih meretika peneka Jehovah ke kitai?

⁹ Bup Kudus enda madahka tiap iti utai ke ulih ngerusak kaul kitai enggau Jehovah. Kesuah iya, kitai patut ngaga pemutus pasal utai ti enda dipadah enggau nyemetak dalam Bup Kudus. Ngambika ulih ngaga pemutus ti manah, kitai patut meretika “peneka Jehovah.” Kitai ulih ngereja tu lebuh kitai enggau tetap belajarka Bup Kudus sereta belematika nya. Lebuh kitai meretika agi peneka Jehovah sereta nguji ngemansangka “runding Kristus,” kitai deka lebih agi nyadi “baka orang ke bepenemu-dalam,” indah lebuh nadai pesan ti nyemetak kena ngiring ulah kitai. (1 Kor. 2:14-16) Sekeda utai ti bahaya senang dipeda, tang ke bukai tusah.

10. Nama utai ti bahaya ke patut diseliahka kitai?

¹⁰ Sekeda utai ti bahaya ke patut diseliahka kitai, iya nya betundi enggau chara ti enda manah ngagai sida ke ukai kaling pengidup, udu ngirup, bam, nyebut utai ti ngemediska ati orang, sereta meda pemerindang ti kasar, pornografi enggau utai bukai ke sama enggau nya. (Mas. 101:3) Munsuh kitai Sitan, seruran ngiga peluang kena ngerusak kaul kitai enggau Jehovah. (1 Pet. 5:8) Enti kitai enda bejimat, Sitan ulih nanam utai ti enda manah dalam runding sereta ati kitai baka kepapas, nipu, amu, begedika pangan diri, sumbung, sereta dendam. (Gal. 5:19-21) Terubah iya, kitai engka ngumbai asai ati ke baka tu enda bahaya. Tang enti kitai enda jejampat muai iya, asai ati tu ulih tumbuh baka siti pun kayu ti berachun, lalu ngujungka penusah ke kitai.—Jas. 1:14, 15.

11. Nama siti utai ti bahaya ke tusah dipeda ti enda tau enda diseliahka kitai, lalu nama kebuah?

¹¹ Siti utai ti bahaya ke tusah dipeda nya kaul ti jai. Peratika situasi tu. Nuan engka gawa enggau siku orang ke ukai Saksi Jehovah. Nuan deka iya ngembuan runding ti manah pasal bala Saksi Jehovah. Nya alai, nuan manah enggau iya sereta mayuh nulung iya. Lalu, kekadang nuan makai begulai enggau iya. Tang enda lama udah nya, nuan berengkah suah agi makai begulai enggau iya. Kekadang, iya bejaku pasal utai ti enda manah. Terubah iya, nuan enda rindu tang lubah-lubah nuan biasa agi enggau jaku ke baka nya sereta enda kelalu kiruh pasal utai nya. Lalu bisi sekali, iya mai nuan ngirup pengudah gawa lalu nuan pan setuju. Nyau kelama, nuan berengkah berunding baka iya. Enti nuan majak ngembuan kaul ti baka tu, engka nuan pan berengkah ngereja utai ti sama baka iya. Endang amat, kitai ngayanka ulah ti manah sereta bebasaka semua orang, tang kitai patut ingat, orang ke suah enggau kitai begulai ulih meri kesan ba runding sereta ulah kitai. (1 Kor. 15:33) Enti kitai bejimat enggau utai ti dikereja kitai baka ke diasuh Jesus, kitai deka nyeliahka kaul ti enda patut dikembuan kitai enggau sida ke enda nitihka standard Jehovah. (2 Kor. 6:15) Kitai ulih meda penusah ke ulih nyadi sereta nyeliahka diri ari nya.

12. Nama utai ti patut dikereja bala murid Jesus seraya sida nganti maya Jerusalem enggau Rumah Sembiang nya deka dirusakka?

¹² Jesus deka bala murid iya mengkang kisuk seraya sida nganti maya Jerusalem enggau Rumah Sembiang nya deka dirusakka. Jesus meri sida pengawa kena dikereja. Iya ngasuh sida ngerembaika Berita Manah “ba Jerusalem, ba serata Judea enggau Samaria, sereta nyentuk ngagai ujung dunya.” (SKR. 1:6-8) Nya pengawa ti besai! Lebuh sida enggau naka ulih nginjil ngagai orang bukai, sida udah ngena semua awak ke dikembuan sida enggau badas.

13. Nama kebuah kitai patut ngena awak ke agi dikembuan kitai enggau badas? (Kolosi 4:5)

¹³ Bacha Kolosi 4:5. Kitai patut beratika chara kitai ngena awak ke agi dikembuan kitai enti kitai deka bejimat enggau utai ti patut dikereja. Nama kebuah? Laban utai ti enda dijangka ulih nyadi ba semua kitai. (P-jar. 9:11) Kitai engka ulih mati ba barang maya.

14-15. Baka ni kitai ulih ngena awak ke agi dikembuan kitai enggau badas? (Hebrew 6:11, 12) (Peda mega gambar.)

¹⁴ Kitai ulih ngena awak ke agi dikembuan kitai enggau badas. Baka ni kitai ulih ngereja nya? Kitai ulih ngereja peneka Jehovah sereta negapka agi kaul kitai enggau Iya. (Jhn.  14:21) Kitai patut “tegap, enda bekinsit, sereta seruran ngereja mayuh pengawa ke Tuan kitai.” (1 Kor. 15:58) Lebuh pengujung datai, enda ngira nya pengujung nyawa kitai tauka pengujung sistem dunya tu, kitai enda ngesal ati laban kitai nemu kitai udah ngena semua awak ke dikembuan kitai enggau badas.—Mat. 24:13; Rom. 14:8.

¹⁵ Kemayaharitu, Jesus terus ngiring bala murid iya seraya sida ngerembaika Berita Manah pasal Perintah Petara ba serata dunya. Jesus udah ngamatka semaya iya. Nengah gerempung Jehovah, Jesus ngajar kitai chara nginjil lalu iya nyediaka perengka ke diguna kitai kena nginjil pasal Berita Manah. (Mat. 28:18-20) Kitai ngereja utai ti diasuh Jesus kereja kitai lebuh kitai enggau bebendar nginjil enggau ngajar orang bukai, sereta lebuh kitai mengkang bejaga seraya kitai nganti maya Jehovah mai pengerusak ngagai sistem dunya tu. Lebuh kitai ngasika pesan ba Hebrew 6:11, 12, kitai deka bepegai tegut ba harapan kitai “nyentuk ke ujung.”—Bacha.

16. Nama utai ti keran deka dikereja kitai?

¹⁶ Jehovah udah netapka jam enggau hari alai Iya deka mai pengerusak ngagai dunya Sitan. Lebuh maya nya datai, Jehovah tentu deka ngamatka semua jaku benabi ke udah ditulis Iya dalam Bup Kudus. Tang kekadang kitai engka ngumbai pengujung dunya tu laun datai. Taja pia, hari Jehovah “tentu enda laun!” (Hab. 2:3, NWT) Nya alai, semua kitai keran deka nganti Jehovah enggau penuh pengarap laban Iya deka ngelepaska kitai.—Mik. 7:7.