1. Kemaya semua orang Kristian ke dipilih merintah enggau Kristus deka bisi ba serega magang?

 BETAUN-TAUN suba, nembiak Jehovah berunding, ‘Kemaya semua orang Kristian ke dipilih merintah enggau Kristus deka bisi ba serega magang?’ Suba kitai kala berunding sekeda orang Kristian ke dipilih nya deka mengkang ba dunya, lalu diau ba Paradais pengelama sesiti timpuh pengudah perang Armagedon. Tang nitihka majalah Menara Jaga, 15 Julai 2013, kitai belajar, sebedau perang Armagedon berengkah, semua orang Kristian ke dipilih merintah enggau Kristus deka bisi ba serega magang.​—Mat. 24:31.

2. Nama tanya ti engka diperundingka kitai, lalu nama utai ke deka dikerandauka kitai dalam artikel tu?

² Taja pia, sekeda ari kitai engka nanya: Nama deka nyadi ngagai raban “bedus ti bukai” ke nyembah Jehovah enggau tetap ati ba dunya maya “Penusah ti Besai”? (Jhn. 10:16; Mat. 24:21) Sekeda ari bedus ti bukai engka berasai irau pengudah semua orang Kristian ke dipilih niki ke serega magang. Kati agi bisi orang ke deka nulung sereta ngiring bala nembiak Petara ba dunya? Aram kitai berandauka dua iti cherita Bup Kudus ke engka ngasuh sida berunding baka nya. Lalu udah nya, kitai deka berandauka kebuah sida enda ibuh berasai irau.

NAMA UTAI TI TENTU ENDA NYADI NGAGAI BEDUS TI BUKAI?

3-4. Nama utai ti engka diperundingka sekeda orang, lalu nama kebuah?

³ Sekeda orang engka berunding, enti semua bala menyadi lelaki ari Raban ti Ngiring nadai agi ngiring sida, bedus ti bukai engka badu agi nyembah Jehovah. Sida engka ngasaika tu ketegal sekeda cherita Bup Kudus. Aram kitai beratika dua iti cherita nya. Cherita keterubah bekaul enggau Imam Besai Jehoiada.  Iya siku nembiak Petara ti tetap ati. Iya enggau bini iya, Jehoseba, nyaga siku nembiak lelaki ke benama Joas, sereta nulung Joas nyadi siku raja ti manah sereta tetap ati. Seagi-agi Jehoiada agi idup, Joas nyembah Jehovah sereta ngereja utai ti manah. Tang pengudah Jehoiada mati, Joas berengkah ngereja utai ti jai. Joas nitihka jaku bala tuai orang Judah ti jai, lalu ninggalka Jehovah.​—2 Ban. 24:​2, 15-19.

⁴ Cherita kedua nya pasal orang Kristian ke idup pengudah jeman bala rasul. Rasul ke penudi ke nadai nya, Rasul John. Lebuh iya agi idup, iya nulung mayuh orang Kristian mengkang tetap ati ngagai Jehovah. (3 Jhn. 4) Baka bala rasul Jesus ke bukai, John mega bebendar nyaga raban gempuru ari sida ke ngajar ajar ti pelesu. (1 Jhn. 2:18; 2 Tes. 2:7) Tang pengudah John mati, mayuh bala menyadi ba raban gempuru nitihka ajar ti pelesu nya. Ba taun-taun ke nangkanka nya, orang ti limpang sereta ngelaban Petara nya ngajar mayuh utai ti pelesu sereta ngemendarka ulah ti salah dalam semua raban gempuru.

5. Ari dua iti cherita nya, nama runding ke enda patut dikembuan kitai?

⁵ Kati dua iti cherita Bup Kudus tu nunjukka utai ti sama deka nyadi ngagai bedus ti bukai pengudah orang ke dipilih niki ke serega magang? Maya nya, kati orang Kristian ti tetap ati ba dunya deka nyadi baka Joas, lalu berengkah ngereja utai ti jai? Tauka, kati sida deka nyadi orang ke limpang sereta ngelaban Petara baka ke nyadi ngagai mayuh bala menyadi pengudah bala rasul mati? Saut iya, tentu enda! Kitai ulih yakin, pengudah orang ke dipilih niki ke serega magang, bedus ti bukai deka terus nyembah Jehovah enggau chara ti betul, lalu Jehovah deka terus nyaga sida. Nama kebuah kitai ulih yakin pasal utai tu?

NEMBIAK PETARA DEKA TERUS NYEMBAH IYA NITIHKA CHARA TI DIKEDEKAKA IYA

6. Nama tiga iti timpuh ti deka dikerandauka kitai?

⁶ Nama kebuah kitai ulih yakin nembiak Jehovah deka terus nyembah Iya nitihka chara ti dikedekaka Iya, taja pan ba maya ti tusah jemah ila? Laban Bup Kudus madah, jeman kitai diatu enda sama enggau jeman orang Israel sereta jeman pengudah bala rasul mati. Nya alai, aram beratika tiga iti timpuh nya enggau dalam agi: (1) Maya jeman orang Israel, (2) maya jeman pengudah bala rasul mati, sereta (3) maya jeman kitai, iya nya “maya semua utai diaduka baru.”—SKR. 3:21.

7. Nama kebuah orang Israel ti tetap ati enda ibuh lenyau harapan lebuh bala raja enggau mayuh orang ke bukai ngereja utai ti jai?

⁷ Maya jeman orang Israel. Enda lama sebedau Moses mati, iya madah ngagai orang Israel: “Aku nemu, lebuh aku udah mati, kita deka ngereja penyai, limpang ari pesan ti udah diberi aku ngagai kita.” (U-dat. 31:29) Moses mega nangkan, enti sida angkat ngelaban, sida deka ditabanka ngagai menua bukai. (U-dat. 28:​35, 36) Kati utai ti dipadah iya amat nyadi? Au. Pengelama beratus taun, mayuh raja ngereja utai ti jai ba mata Jehovah, lalu bala rayat sida mega nitihka sida nyembah petara ti pelesu. Ketegal nya, Jehovah ngukum orang Israel ti jai, lalu enda ngemendarka bala raja Israel merintah sida agi. (Esk. 21:​25-27) Lebuh orang Israel ti tetap ati meda utai ti dipadah Jehovah amat nyadi, tu meri sida pemerani ngambika terus nyembah Iya enggau tetap ati.​—Isa. 55:​10, 11.

8. Kati kitai patut tekenyit lebuh ajar ti pelesu tama ngagai raban gempuru Kristian ba abad kedua? Terangka.

⁸ Maya jeman pengudah bala rasul mati. Kati kitai patut tekenyit lebuh ajar ti pelesu tama ngagai raban gempuru Kristian ba abad kedua? Kitai enda ibuh tekenyit laban Jesus udah  madahka, utai tu deka nyadi. (Mat. 7:​21-23; 13:​24-30, 36-43) Rasul Paul, Rasul Peter, enggau Rasul John madahka, jaku benabi ari Jesus udah berengkah dikeamatka indah maya jeman abad keterubah M. (2 Tes. 2:​3, 7; 2 Pet. 2:1; 1 Jhn. 2:18) Enda lama pengudah rasul ti penudi mati, orang Kristian ti limpang sereta ngelaban Petara nyadi sebagi ari Babilon ti Besai, iya nya gerempung pengarap pelesu sedunya. Au, utai ke dipadah Jesus amat nyadi.

9. Nama kebuah jeman kitai diatu bebida ari jeman orang Israel sereta jeman raban gempuru Kristian ba abad kedua?

⁹ “Maya semua utai diaduka baru.” Jeman kitai diatu enda sama enggau jeman orang Israel sereta jeman raban gempuru Kristian ba abad kedua. Timpuh jeman kitai diatu kesuah iya dikumbai “hari ti penudi” sistem dunya ti jai tu. (2 Tim. 3:1) Tang Bup Kudus madahka, siti timpuh ti panjai sereta manah agi berengkah ba maya ti sama. Timpuh tu deka terus nyentukka Perintah Messiah ngaga semua mensia nyadi sempurna sereta ngubah dunya tu nyadi Paradais. Jeman tu dikumbai “maya semua utai diaduka baru.” (SKR. 3:21) Iya berengkah ba taun 1914. Nama utai ti diaduka baru? Jesus diletak nyadi raja ba serega. Nya alai, sekali agi Jehovah bisi siku raja ke deka ngarika Iya, iya nya siku ari peturun Raja David ti tetap ati. Tang, ukai atur pasal raja aja ke diaduka baru. Enda lama udah nya, sembah ti tuchi deka berengkah dipulaika baru. (Isa. 2:​2-4; Esk. 11:​17-20) Kati ajar ti pelesu deka tama lalu ngelekai baru dalam raban gempuru Kristian?

10. (a) Nama utai ti dipadah Bup Kudus pasal sembah ti tuchi maya jeman kitai? (Isaiah 54:17) (b) Nama kebuah jaku benabi ke baka nya ngelantangka ati?

¹⁰ Bacha Isaiah 54:17. Perundingka jaku benabi ti dipadah ba bup Isaiah nya: “Nadai senyata ti digaga ulih ngemediska nuan”! Jaku benabi nya benung dikeamatka diatu. Lalu bisi siti agi jaku benabi ti ngelantangka ati ke benung nyadi diatu. Jehovah madahka: “Aku Empu deka ngajar bala nembiak nuan lalu meri sida pengaya enggau pemaik. Atur ti betul enggau pengelurus deka ngasuh nuan kering. Nuan deka diau likun ari . . . utai ti balat ngenakut.” (Isa. 54:​13, 14) Indah Sitan, “petara sistem dunya tu,” enda ulih nagang nembiak Jehovah ari ngajar orang bukai pasal Jehovah. (2 Kor. 4:​4, nota kaki) Sembah ti tuchi udah dipulaika baru, lalu nadai ajar ti pelesu ke ulih ngamahka iya. Iya deka meruan belama iya. Nadai senyata ti digaga ulih ngemediska kitai!

 NAMA DEKA NYADI?

11. Nama kebuah kitai andal bedus ti bukai enda dilengkaka taja pan orang Kristian ke dipilih niki ke serega magang?

¹¹ Nama deka nyadi pengudah semua orang Kristian ke dipilih niki ke serega magang? Kingatka, Jesus nya Pengibun kitai. Iya Kepala raban gempuru Kristian. Jesus enggau terang madahka: “Kita semina bisi siku aja Kepala, iya nya Kristus.” (Mat. 23:10) Jesus ke benung merintah ba serega deka seruran nyaga bala murid iya ti bendar. Ketegal Kristus empu benung ngiring sida, bala murid iya ba dunya enda ibuh takutka nama-nama utai. Endang amat, kitai enda nemu enggau silik pasal chara Jesus deka ngiring bala murid iya ba maya nya. Nya alai, aram meh kitai berandauka sekeda teladan dalam Bup Kudus ke deka ngasuh kitai andal agi.

12. Baka ni Jehovah nyaga bala nembiak Iya (a) pengudah Moses mati? (b) pengudah Elijah nerima tanggung pengawa ti baru? (Peda mega gambar.)

¹² Moses mati sebedau orang Israel tama ngagai Menua ti Udah Disemaya. Nama nyadi ngagai bala nembiak Petara? Kati Jehovah badu agi nulung bala nembiak Iya pengudah lelaki ti tetap ati tu mati? Enda. Seagi-agi sida tetap ati, Jehovah deka nyaga sida. Sebedau Moses mati, Jehovah udah ngasuh iya ngatur ngambika Josua ulih ngiring bala nembiak Iya. Moses udah ngelatih Josua pengelama betaun-taun. (P-sut. 33:11; U-dat. 34:9) Nambahka nya, bisi mega mayuh bala lelaki ke ulih ngulu, iya nya tuai ke seribu iku orang, ke seratus iku, ke lima puluh iku, enggau ke sepuluh iku orang. (U-dat. 1:15) Nembiak Petara dijaga enggau manah. Tu mega utai ti nyadi ba Elijah. Pengelama betaun-taun, iya bebendar nulung orang Israel nyembah Jehovah. Tang udah nya, Jehovah meri iya tanggung pengawa ti baru ba menua Judah. (2 Raj. 2:1; 2 Ban. 21:12) Kati nembiak Jehovah ba menua Israel dilengkaka? Enda. Elijah udah ngelatih Elisa pengelama betaun-taun. Bisi mega “bala nabi” ke udah nerima latih. (2 Raj. 2:7) Nya alai, bisi mayuh bala lelaki ti tetap ati, ke ulih nulung ngulu nembiak Petara. Jehovah terus ngamatka tuju Iya, sereta nyaga bala penyembah Iya ti tetap ati.

13. Nama utai ti disemayaka Jehovah ngagai kitai ba Hebrew 13:5b? (Peda mega gambar.)

¹³ Pengudah berandauka semua chunto tadi, ba runding nuan, nama deka nyadi pengudah semua orang Kristian ke dipilih niki ke serega magang? Kitai enda ibuh irau. Bup Kudus bisi madahka siti semaya ari Jehovah: Jehovah enda sekali-kali ngelengkaka  bala nembiak Iya ba dunya. (Bacha Hebrew 13:5b.) Siti raban ti mit ari sida ke dipilih ngagai serega benung ngiring kemayaharitu. Baka Moses enggau Elijah, sida mega nemu kebuah nya penting ngelatih orang bukai. Pengelama betaun-taun, Raban ti Ngiring benung ngelatih bala menyadi lelaki ari bedus ti bukai ngambika ulih nguluka pengawa ba gerempung Jehovah. Ambika chunto, sida udah ngatur mayuh sekula kena ngelatih bala tuai gempuru, bala tuai ti ngabas, raban Komiti Pampang Opis, bala tuai gempuru ba Bethel, pengerintis ke dianjung ngagai menua bukai ba serata dunya, sereta sida ke bukai. Indah Raban ti Ngiring empu benung ngelatih bala penulung ke komiti-komiti Raban ti Ngiring. Lalu diatu bala penulung tu enggau tetap ati ngereja mayuh tanggung pengawa dalam gerempung. Sida udah besedia kena neruska pengawa ngibun bala bedus Kristus.

14. Nama poin ti penting ari utai ti udah dikerandauka kitai?

¹⁴ Tu meh poin ti penting ari utai ti udah dikerandauka kitai: Ba pengujung Penusah ti Besai, lebuh semua orang ke dipilih merintah enggau Kristus niki ke serega magang, di baruh iring Jesus Kristus, bala nembiak Jehovah ba dunya deka terus nyembah Jehovah enggau tetap ati. Endang amat, maya nya, kitai deka diserang Gok ari Magok, iya nya bemacham-macham bansa ti udah begempung. (Esk. 38:​18-20) Tang serang nya enda ulih nagang bala nembiak Jehovah ari nyembah Jehovah. Jehovah tentu deka nyelamatka sida! Ba utai ke dipandangka Petara dalam runding Rasul John, iya meda “seraban orang ti mayuh,” iya nya raban bedus Jesus ti bukai. Utai ti dipandangka dalam runding Rasul John mega madahka, “seraban orang ti mayuh” tu deka “selamat pansut ari Penusah ti Besai.” (Pem. 7:​9, 14) Au, sida tentu deka selamat!

15-16. Nitihka Pemandang 17:​14, nama utai ti deka dikereja orang ke dipilih merintah enggau Kristus maya perang Armagedon? Nama kebuah utai nya meransang kitai?

¹⁵ Tang sekeda orang engka berunding: ‘Nama utai ti deka dikereja orang ke dipilih merintah enggau Kristus pengudah sida niki ke serega?’ Bup Kudus bisi madahka saut  iya. Iya madahka, bala perintah ba dunya tu “deka beperang ngelaban Anak Bedus, tang sida deka dialahka.” Au, sida tentu alah! Sapa ke deka nulung Anak Bedus tu ngalahka sida? Ayat tu madahka saut iya: Sida nya “orang ke dikangau enggau ke dipilih Petara sereta ke setia.” (Bacha Pemandang 17:14.) Sapa sida tu? Orang Kristian ke dipilih ke udah diangkatka idup baru ba serega. Nyadi, ba pengujung Penusah ti Besai, lebuh semua orang ke dipilih merintah enggau Kristus udah ba serega magang, sida deka nerima tanggung pengawa ti baru. Siti ari tanggung pengawa sida ti keterubah nya beperang. Nya siti tanggung pengawa ti chukup besai! Sebedau nyadi Saksi-Saksi Jehovah, sekeda ari sida ke dipilih ngagai serega kala belaban enggau orang bukai. Sekeda ari sida indah kala nyadi soldadu. Tang udah nya, sida nyadi orang Kristian ti bendar, lalu belajar idup bebaik enggau orang bukai. (Gal. 5:22; 2 Tes. 3:16) Sida badu agi nyukung pengawa beperang. Taja pia, pengudah sida niki ke serega, sida deka enggau Jesus sereta bala melikat ke bukai beperang ngelaban bala munsuh Petara.

¹⁶ Perundingka tu: Ba dunya, sekeda ari sida ke dipilih merintah enggau Kristus nya tuai sereta lemi. Tang pengudah sida diangkatka idup baru ba serega, sida deka nyadi melikat ti bekuasa sereta ngembuan tubuh ke enda ulih dipunaska. Sida deka enggau Jesus, Raja ti kering sereta bekuasa, beperang. Pengudah perang Armagedon abis, sida deka gawa enggau Jesus, lalu nulung mensia nyadi sempurna. Endang amat, maya ba serega, sida ulih nulung bala menyadi Kristian ba dunya enggau mayuh agi enti dibandingka enggau maya sida agi mensia ti enda sempurna.

17. Baka ni kitai nemu semua bala nembiak Jehovah deka selamat maya perang Armagedon?

¹⁷ Kati nuan siku ari raban bedus ti bukai? Enti pia, nama patut digaga nuan lebuh perang ti pemadu penting, Armagedon, berengkah? Arapka Jehovah, lalu titihka iring Iya. Tu nyengkaum nama? Bup Kudus madahka: ‘Pulai ngagai rumah kita empu, kita ke nembiak aku, lalu tutup pintu kita. Belalai enda lama, nganti pengeringat Petara badu.’ (Isa. 26:20) Semua bala nembiak Petara ti tetap ati enda ngira ba serega tauka ba dunya, deka selamat ba maya nya. Baka Rasul Paul, kitai andal “bala perintah tauka utai ke diatu tauka utai ke jemah ila . . . enda ulih nyeraraka kitai ari pengerindu Petara.” (Rom. 8:​38, 39) Seruran ingat: Jehovah sayauka nuan, lalu Iya enda sekali-kali ngelengkaka nuan!