KENA Hari Tiga, 18 Januari 2023, siti jaku gerah ti spesial ayan ba jw.org. Jaku gerah nya madahka, Menyadi Gage Fleegle enggau Menyadi Jeffrey Winder udah dilantik nyadi sebagi ari Raban ti Ngiring Saksi-Saksi Jehovah. Seduai iya udah lama nyembah Jehovah enggau tetap ati.

Menyadi Fleegle dibesaika ba begian barat Pennsylvania, Amerika Serikat. Apai indai iya ngemesaika iya dalam pemendar. Lebuh iya agi nembiak, sida sebilik pindah ngagai siti bandar ti mit ke begunaka mayuh agi penginjil. Enda lama pengudah nya, iya dibaptisa kena 20 November 1988.

Apai indai Menyadi Fleegle seruran meransang iya gawa penuh jam ke Jehovah. Seduai iya suah mai tuai ti ngabas enggau bala menyadi ke gawa ba Bethel diau ba rumah sida. Menyadi Fleegle ulih meda pengaga ati bala menyadi tu. Enda lama pengudah dibaptisa, iya nyadi pengerintis biasa kena 1 September 1989. Dua taun pengudah nya, iya berengkah gawa ba Bethel Brooklyn kena Oktober 1991. Iya endang bisi juluk ati deka gawa ba Bethel, kenyau ari maya iya beumur 12 taun.

Ba Bethel, Menyadi Fleegle gawa ba Opis Penanggam pengelama lapan taun. Udah nya, iya diasuh gawa ba Opis Penginjil. Maya nya, iya enggau siti raban gempuru ke ngena jaku Rusia pengelama beberapa taun. Ba taun 2006, iya kawin enggau Nadia, ke udah nya enggau iya gawa ba Bethel. Seduai iya bisi nulung ba bansa jaku Portugis, lalu pengelama lebih ari sepuluh taun, seduai iya mega bisi nulung ba bansa jaku Sepanyol. Pengudah betaun-taun gawa ba Opis Penginjil, Menyadi Fleegle diasuh gawa ba Opis Komiti Ngajar, lalu udah nya ba Opis Komiti Nginjil. Kena Mac 2022, iya dilantik nyadi siku penulung Komiti Nginjil di baruh Raban ti Ngiring.

 Menyadi Winder dibesaika ba Murrieta, California, Amerika Serikat. Apai indai iya ngemesaika iya dalam pemendar, lalu iya dibaptisa kena 29 Mac 1986. Sebulan udah nya, iya berengkah nyadi pengerintis sukung. Iya amat rindu ngerintis lalu deka terus ngereja nya. Pengudah beberapa bulan nyadi pengerintis sukung, Menyadi Winder berengkah nyadi pengerintis biasa kena 1 Oktober 1986.

Lebuh Menyadi Winder agi nembiak, iya ngabas dua iku menyadi lelaki iya ke tuai agi, ke gawa ba Bethel maya nya. Tu meransang iya deka minta gawa ba Bethel lebuh iya udah besai. Lalu ba bulan Mei 1990, iya dikangau gawa ba Bethel di Wallkill.

Ba Bethel, Menyadi Winder gawa ba mayuh begian, nyengkaum Opis Pemeresi, Opis Ladang, sereta Opis Bethel. Ba taun 1997, iya kawin enggau Angela, lalu seduai iya terus gawa ba Bethel kenyau ari maya nya. Ba taun 2014, seduai iya dipindahka ngagai Warwick. Dia, Menyadi Winder nulung ba pengawa nirika bengunan indu opis. Ba taun 2016, seduai iya pindah ngagai Palan Belajar Watchtower ba Patterson. Dia, Menyadi Winder gawa ba Opis Audio/Video. Empat taun pengudah nya, seduai iya pindah baru ngagai Warwick, lalu Menyadi Winder diasuh gawa ba Opis Komiti Pekereja. Ba bulan Mac 2022, iya dilantik nyadi siku penulung Komiti Pekereja di baruh Raban ti Ngiring.

Kami besampi ngambika Jehovah terus merekatka seduai iya, ke baka “pemeri,” seraya seduai iya terus bebendar gawa ngenuluka peneka Perintah Petara.​—Eps. 4:8.