BISI nuan meda mayuh orang kemayaharitu ngasaika diri patut diintu enggau chara ti spesial agi ari orang bukai lalu patut bulih hak ti spesial? Taja pan sida udah diintu enggau chara ti spesial, tang sida agi enda puas ati. Orang ke baka tu semina berundingka diri empu aja sereta enda beterima kasihka utai ti udah dikembuan sida. Tu meh utai ke dipadah Bup Kudus pasal ulah sereta runding orang ba hari ti penudi.—2 Tim. 3:2.

Endang amat, orang ke semina berundingka diri empu aja seruran bisi. Ambika chunto, Adam enggau Awa deka bulih hak mutuska utai ti manah enggau utai ti jai kediri empu. Ketegal pemutus seduai iya, semua kitai merinsa. Siti agi chunto, iya nya Usiah, raja orang Judah. Iya ngumbai diri bisi hak nunu menyan ba Rumah Sembiang, tang kebendar iya Usiah nadai hak ngereja nya. (2 Ban. 26:​18, 19) Baka nya mega, orang Parisi enggau orang Saduki ngumbai Petara patut ngintu sida enggau chara ti spesial agi laban sida peturun Abraham.—Mat. 3:9.

Kemayaharitu, kitai mega dikelingi orang ke ngumbai diri manah agi ari orang bukai tauka semina berundingka diri empu aja. Ulah sereta runding sida ulih ngachau kitai. (Gal. 5:26) Kitai engka berengkah ngumbai diri patut nerima hak istimewa tauka diintu enggau chara ti spesial. Baka ni kitai ulih nyeliahka runding nya? Kitai patut ngembuan runding Jehovah pasal pekara tu. Dua iti prinsip Bup Kudus deka nulung kitai.

Jehovah ke mutuska utai ti patut diterima kitai. Peratika sekeda chunto tu.

•   Dalam ruang bilik, Jehovah dekaka laki ngasaika diri dipebasa bini iya, lalu bini ngasaika diri dikerindu laki iya. (Eps. 5:33) Jehovah madahka, laki bini semina patut ngayanka asai ati ti romantik ngagai pangan diri aja. (1 Kor. 7:3) Pia mega, apai indai bisi hak ngarapka anak sida ngasika sida. Lalu bala anak bisi hak ngarapka apai indai deka ibuh sereta ngayanka pengerindu ngagai sida.—2 Kor. 12:14; Eps. 6:2.

• Bala tuai gempuru patut nerima basa ketegal semua utai ti dikereja sida. (1 Tes. 5:12) Taja pia, sida nadai hak ngawal tiap iti utai ti dikereja bala menyadi.—1 Pet. 5:​2, 3.

• Petara udah meri perintah mensia hak minta chukai sereta bulih basa ari bala rayat sida.—Rom. 13:​1, 6, 7.

Jehovah enggau bepengerindu meri kitai mayuh agi ari ke patut diterima kitai. Ketegal kitai bedosa, kitai endang patut mati. (Rom. 6:23) Tang ketegal pengerindu Jehovah ti setia ke kitai, Iya udah meri kitai mayuh berekat. (Mas. 103:​10, 11) Tu ukai ketegal kitai layak nerima berekat nya, tang ketegal pemanah ati Iya ti besai.—Rom. 12:​6-8; Eps. 2:8.

Bejimat enggau runding orang ba dunya Sitan. Enti kitai enda bejimat, kitai engka ngumbai diri patut nerima mayuh agi ari orang bukai. Jesus kala madahka siti sempama ke nunjukka baka ni runding ke baka tu ulih enggau senang ngachau runding kitai. Dalam sempama nya, sekeda pekereja gawa ari tumu pagi lalu gawa apus hari ba baruh mata panas. Tang bisi bala pekereja ke semina gawa satu jam aja. Semua sida dibayar gaji ti sama, iya nya sesingkap duit seling denari. Raban pekereja ke gawa ari tumu pagi nya ngumbai diri patut dibayar gaji ti lebih agi laban sida udah gawa apus hari ba baruh mata panas. (Mat. 20:​1-16) Ari sempama tu Jesus ngajar, bala murid iya patut puas ati enggau utai ti diberi Petara.

Beterima kasih lalu anang ngarapka utai ari orang bukai. (1 Tes. 5:18) Titihka meh teladan Rasul Paul. Iya enda minta bala menyadi ba Korint meri iya utai ti diguna iya, taja pan iya bisi hak ngereja nya. (1 Kor. 9:​11-14) Kitai patut beterima kasihka utai ti diberi orang ngagai kitai, lalu enda ngarapka sida meri kitai lebih agi ari nya.

 Ngembuan sifat baruh ati. Lebuh sesiku orang ngumbai diri manah agi ari orang bukai, kesuah iya, iya deka berengkah ngasaika diri patut nerima mayuh agi ari ke udah diterima iya. Enti kitai baruh ati, nya deka nulung kitai nyeliah ari ngembuan runding ti bahaya nya.

Nabi Daniel netapka teladan ti manah pasal sifat pemaruh ati. Iya datai ari ruang bilik ti penting. Iya mega sigat, pintar, sereta ngembuan mayuh pengelandik. Nyadi, iya ulih ngasaika diri patut diintu enggau chara ti spesial sereta patut nerima semua utai ti manah nya. (Dan. 1:​3, 4, 19, 20) Taja pia, Daniel mengkang baruh ati, lalu sifat tu ngasuh iya berega ba Jehovah.—Dan. 2:30; 10:​11, 12.

Aram meh kitai nulak ulah ti semina berundingka diri empu aja sereta ngumbai diri manah agi ari orang bukai. Ulah tu bisi ba mayuh orang ke ngelingi kitai kemayaharitu. Arapka kitai terus gaga ati enggau tiap iti berekat ke diberi Jehovah ngagai kitai ketegal pemanah ati Iya ti besai.