KATI nuan kala napi penanggul lalu ngasaika nadai orang ulih nulung nuan? Kitai benung idup ba “maya ti balat jai sereta balat tusah,” lalu nya ulih ngasuh kitai berasai asa ati sereta kediri. (2 Tim. 3:1) Taja pia, lebuh kitai bisi penanggul, kitai enda ibuh napi nya kediri. Bup Kudus madahka, kaban ti bendar ulih nulung kitai “natka penusah.”—J-lam. 17:17.

Ba pejalai nginjil Rasul Paul, iya bisi begulai enggau sekeda ari bala kaban iya. Lalu sida nulung iya nengah mayuh macham chara. (Kol. 4:​7-11) Lebuh Paul dijil ba Rome, bala kaban iya nulung iya ngereja sekeda pengawa ke enda ulih digaga iya. Ambika chunto, Epafroditus meri utai ke diguna Paul, ke dikirum ari bala menyadi ba Pilipi. (Plp. 4:18) Tikikus nganjung surat Paul ngagai mayuh raban gempuru. (Kol. 4:7) Ketegal tulung ari bala kaban iya, Paul ulih meransang raban gempuru taja pan iya ditan ba rumah tauka dijil. Baka ni nuan ulih nyadi kaban ti bendar kemayaharitu?

Bisi chunto ari bala menyadi kemayaharitu ke nunjukka chara kitai ulih nyadi kaban ti bendar. Elisabet, siku pengerintis biasa ba Sepanyol, nerangka baka ni siku menyadi indu udah nulung iya ba maya ti tusah. Lebuh lutur madahka indai Elisabet bisi kanser ti raya, menyadi indu nya nganjung mayuh mesej ti meransang ke bepelasarka ayat Bup Kudus ngagai Elisabet. Elisabet madahka: “Lebuh aku nerima mesej iya, aku berasai gaga ati laban aku nemu bisi orang berundingka aku, lalu nya meri pengering ngagai aku kena ngereja utai ti patut digaga aku.”—J-lam. 18:24.

Kitai ulih ngerapatka kaul enggau bala menyadi lebuh kitai nulung sida datai begempuru tauka nurun nginjil. Ambika chunto, kati nuan ulih mai bala menyadi ke udah tuai datai begempuru tauka nurun nginjil? Enti nuan nulung sida nengah chara tu, nuan ulih meransang sida lalu sida mega ulih meransang nuan. (Rom. 1:12) Taja pia, sekeda menyadi kitai enda ulih ninggalka rumah sida. Baka ni kitai ulih nulung sida?

Sekeda menyadi kitai enda ulih datai begempuru ba Palan Gempuru, engka ketegal penanggul ba pengerai tauka penanggul ke bukai. Nya meh situasi ke ditapi David, ke bisi kanser. Pengelama lebih ari enam bulan, iya nerima rawatan kemoterapi. Sepemanjai rawatan nya, David enggau bini iya Lidia, datai begempuru nengah online.

Baka ni bala menyadi ba raban gempuru meransang seduai iya? Pengudah tiap iti gempuru, sekeda ari bala menyadi ba Palan Gempuru deka berusaha  berandau enggau David sereta Lidia nengah konferen video. Nambahka nya, lebuh David enggau Lidia bisi meri komen ba gempuru, bala menyadi deka nganjung mesej ngagai seduai iya pengudah abis gempuru. Sida madahka sida rindu ninga komen David enggau Lidia. Nama asil iya? David enggau Lidia berasai semak enggau bala menyadi.

Kati kitai ulih ngatur ngambika nginjil enggau bala menyadi ke enda ulih ninggalka rumah sida? Kitai ulih ngubah jadual kitai ngambika ulih gawa enggau sida. Enggau chara tu, kitai nunjukka kitai seruran ingatka sida. (J-lam. 3:27) Engka nuan ulih nulis surat tauka nginjil ngena talipun enggau sida. Bala tuai gempuru ulih ngatur ngambika bala menyadi ulih enggau gempuru sebedau nginjil nengah konferen video. David enggau Lidia amat beterima kasih laban raban gempuru seduai iya ngaga atur tu. Ku David nerangka: “Lebuh kami duai ulih enggau gempuru sebedau nginjil sereta sampi, nya pan udah chukup kena meransang kami.” Kekadang, nuan mega ulih nanya menyadi ke enda ulih ninggalka rumah iya enti nuan ulih mai pemelajar Bup Kudus nuan ngagai rumah iya lalu belajarka Bup Kudus begulai.

Lebuh kitai begulai enggau bala menyadi ke enda ulih ninggalka rumah sida, kitai deka ngelala sida enggau manah agi, beratika sifat sida ti manah, lalu nyadi kaban rapat sida. Ambika chunto, lebuh nuan beratika menyadi nya landik ngajar ngena Bup Kudus lalu nyapai ati orang ke ninga, nuan engka ngasaika diri deka rapat agi enggau iya. Lebuh nuan nulung bala menyadi datai begempuru tauka nurun nginjil, nuan deka bulih kaban ti baru.—2 Kor. 6:13.

Lebuh Paul napi penusah, kaban iya Titus betemu enggau iya. Tu nulung Paul berasai nyamai agi. (2 Kor. 7:​5-7) Endang manah enti kitai nyebut utai ti meransang ngagai bala menyadi kitai. Tang teladan Titus mega ngajar kitai, kitai ulih ngelantangka ati sida lebuh kitai ngena awak begulai enggau sida sereta nulung sida.—1 Jhn. 3:18.

Bala menyadi kitai ba Rusia nunjukka teladan ti manah pasal chara nyukung pangan diri. Peratika pengalaman Sergey enggau bini iya, Tatyana. Pengudah polis nyerungkai rumah sida, seduai iya dibai ngagai balai polis kena ditasat. Tatyana dilepaska dulu lalu pulai ke rumah. Sergey madahka: “Enda lama pengudah [Tatyana] datai ba rumah, siku menyadi indu ti berani ngabas iya. Udah nya, majak mayuh bala menyadi datai lalu nulung meresika apartment kami.”

Ku Sergey nampung baru: “Ari suba, aku endang rindu ayat Jaku-Dalam 17:​17, ke madah: ‘Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?’ Ayat tu bisi reti ti besai agi ba aku, kelebih agi lebuh aku diperinsa. Maya aku ngumbai diri enda ulih tan, Jehovah meri aku bala kaban ti berani kena nulung aku.” a

Seraya kitai napi situasi ti majak tusah, kitai begunaka tulung ari bala kaban. Kitai begunaka sida lebih agi maya Penusah ti Besai. Nyadi, tu meh maya iya kitai patut berusaha meransang sereta nulung bala kaban kitai.—1 Pet. 4:​7, 8.