1. Nama kebuah kitai tusah deka nemu reti ti bendar lebuh orang nyebut: “Aku ngampunka nuan”?

 NUAN tentu berasai nyamai lebuh sesiku orang nyebut: “Aku ngampunka nuan.” Jaku nya tentu ngelantangka ati nuan, kelebih agi enti nuan udah nyebut tauka ngereja utai ke ngemediska ati orang nya. Tang nama reti iya lebuh orang nya nyebut: “Aku ngampunka nuan”? Kati reti iya kaul seduai udah nyadi manah baru baka selama? Tauka, kati iya semina bejaku munyi nya laban iya enggai bejaku pasal pekara nya agi? Lebuh orang nyebut rambai jaku nya, kesuah iya kitai tusah deka nemu reti iya ti bendar.

 2. Baka ni Bup Kudus ngambarka chara Jehovah ngampun? (Peda mega nota kaki.)

² Chara Jehovah ngampunka mensia ti enda sempurna enda sama enggau chara kitai ngampunka pangan diri. Nadai orang ke ulih ngampun baka Jehovah. Pemasmur madahka tu pasal Jehovah: “Tang Nuan ngampun, ngambika kami nangika Nuan.” a (Mas. 130:4) Jehovah nunjukka kitai nama reti iya ngampunka orang bukai. Ba sekeda ayat dalam Bup Kudus Begian Jaku Hebrew, bala penulis Bup Kudus ngena siti leka jaku Hebrew kena ngambarka chara Jehovah ngampun. Sida enda ngena leka jaku tu kena ngambarka chara mensia ngampun.

 3. Nama kebuah kitai ngumbai chara Jehovah ngampun bebida ari chara kitai ngampun orang bukai? (Isaiah 55:​6, 7)

³ Lebuh Jehovah ngampunka orang bukai, dosa orang nya  dibuai abis. Kaul seduai iya nyadi manah baru. Kitai amat beterima kasih laban Jehovah seruran sedia deka ngampunka kitai bekali-kali.—Bacha Isaiah 55:​6, 7.

 4. Baka ni Jehovah nulung kitai faham nama reti ampun ti bendar?

⁴ Enti chara Jehovah ngampun bebida ari kitai, baka ni kitai ulih faham nama reti ampun ti bendar? Jehovah ngena sempama kena nulung kitai faham chara Iya ngampun kitai. Kitai deka beratika sekeda ari sempama nya dalam artikel tu. Sempama tu deka nulung kitai meda chara Jehovah muai dosa kitai lebuh kitai nesal ati, lalu ba maya ti sama ngemanahka baru kaul kitai enggau Iya. Seraya kitai berandauka sempama tu, kitai deka ngenalamka agi pengerindu enggau asai ati ti beterima kasih ngagai Apai kitai ti pengasih, ke ngampunka kitai enggau mayuh macham chara.

JEHOVAH MUAI DOSA

 5. Nama nyadi lebuh Jehovah ngampun dosa kitai?

⁵ Dalam Bup Kudus, dosa suah disemaka baka ma ti berat. Ku Raja David ngambarka dosa iya: “Aku lemas dilamun bah dosa aku. Dosa aku kelalu berat.” (Mas. 38:4) Tang Jehovah ngampun dosa orang ti nesal ati. (Mas. 25:18; 32:5) Leka jaku Hebrew ke disalin ngagai “ngampun” mai reti “ngangkat” tauka “mai.” Kitai ulih ngambarka Jehovah baka siku lelaki ti kering ke ngangkat ma dosa ari bau kitai, lalu mai nya jauh ari kitai.

 6. Ni penyauh Jehovah mai dosa kitai?

⁶ Bup Kudus ngena siti agi sempama kena nunjukka penyauh Jehovah mai dosa kitai. Masmur 103:12 madahka: “Baka timur ti jauh ari barat, baka nya meh penyauh Iya muai dosa kitai.” Timur nya arah ti bertentangan enggau barat. Timur enggau barat enda ulih ba arah ti sama. Reti iya, Jehovah mai tauka muai dosa kitai jauh ari ke ulih digambarka kitai. Endaka ati kitai berasai lantang lebuh nemu utai tu?

 7. Baka ni Bup Kudus ngambarka utai ke digaga Jehovah enggau dosa kitai? (Mikah 7:​18, 19)

⁷ Taja pan Jehovah udah muai dosa kitai, tang kati Iya deka terus ingatka dosa nya? Enda. Ku Raja Hesekiah nulis pasal Jehovah: “Nuan ngampun [‘muai,’ NWT] semua dosa aku.” (Isa. 38:​9, 17) Jehovah muai dosa orang ti nesal ati lalu enda agi ingatka dosa nya. Ayat tu mega ulih disalinka ngagai: “Nuan udah ngaga [dosa aku] baka ke nadai kala nyadi.” Bup Kudus ngena siti agi sempama kena nerangka poin tu, iya nya ba Mikah 7:​18, 19. (Bacha.) Ayat tu madahka, Jehovah baka ke muai dosa kitai ngagai tasik ti dalam. Ba jeman kelia, utai ti labuh ngagai tasik ti dalam enda ulih ditemu agi.

 8. Nyentukka diatu, nama utai ke udah dipelajarka kitai?

⁸ Nengah semua sempama tu, kitai udah belajar, lebuh Jehovah ngampun kitai, Iya muai abis dosa kitai ngambika kitai enda ibuh agi berasai besalah. Baka ku David: “Gaga ati meh orang ke ketegal penyalah sida udah diampunka Petara, lalu dosa sida udah enda dikingatka agi. Gaga ati meh orang ketegal dosa iya enda diperatika Jehovah agi.” (Rom. 4:​6-8) Nya meh ampun ti bendar!

JEHOVAH NUCHI DOSA KITAI

 9. Baka ni Bup Kudus nulung kitai faham, lebuh Jehovah ngampun, Iya ngampun enggau pengabis iya?

⁹ Nengah tebus, Jehovah ulih muai dosa orang ti nesal ati. Peratika chara Bup Kudus nerangka utai ke digaga Jehovah. Dalam  Bup Kudus, Jehovah digambarka baka benung nuchi tauka masu dosa kitai. Ketegal nya, kitai ulih nyadi tuchi. (Mas. 51:7; Isa. 4:4; Jer. 33:8) Jehovah Empu nerangka asil ari pengawa nya: “Kita nyau mirah dibalut dosa, tang Aku deka masu kita tuchi baka seleju. Taja pen kita nyau mirah-redam, kita deka nyadi burak baka bulu bedus.” (Isa. 1:18) Enti bisi tumpuk mirah ba kain, tumpuk nya amat tusah deka dibuai. Tang Jehovah ngena sempama tu kena madahka kitai, dosa kitai ulih dibasu nyentukka beresi ngambika enda ulih dipeda agi.

10. Baka ni Bup Kudus ngambarka pemesai pengerah jari Jehovah lebuh Iya ngampunka kitai?

¹⁰ Baka ke disebut ba artikel sebedau tu, dosa mega disemaka baka “utang.” (Mat. 6:12; nota kaki; Luk. 11:4) Nyadi, tiap kali kitai bedosa, tu baka ke utang kitai majak nambah. Ketegal nya, utang kitai ngagai Jehovah amat besai. Tang lebuh Jehovah ngampun kitai, nya baka ke Iya nginsil utang kitai. Iya enda minta kitai mayar baru utang ke udah dikinsil nya. Baka siku orang ke gaga ati lebuh utang iya dikinsil, kitai mega gaga ati lebuh Jehovah ngampun kitai.

11. Nama reti iya lebuh Bup Kudus madahka dosa kitai “dibuai”? (Surat Kereja Rasul 3:19)

¹¹ Jehovah ukai semina nginsil utang tauka dosa kitai, tang Iya mega muai utang nya. (Bacha Surat Kereja Rasul 3:19.) Gambarka sesiku orang ngengkahka tanda X ti besai ba keretas ke ngundan penyampau duit ke dipinjau kitai. Taja pia, penyampau nya agi ulih dipeda. Ba jeman kelia, dawat ke dikena orang senang dipadam ngena ai. Sida engka ngambi span ti basah, lalu madam tulisan nya. Ketegal nya, tulisan nya enda agi ulih dipeda. Nyadi, lebuh utang nya “dibuai,” utang nya nadai agi, lalu baka ke nadai kala bisi. Kitai berasai amat beterima kasih laban diatu kitai nemu, lebuh Jehovah ngampun dosa kitai, dosa nya baka ke enda kala nyadi.—Mas. 51:9.

12. Nama ulih dipelajarka kitai ari sempama pasal remang ti tebal?

¹² Jehovah ngena siti agi sempama kena ngambarka chara Iya muai dosa kitai. Ku Iya madah: “Aku deka muai penyalah kita baka ke nutup iya ngena remang, lalu ngelalaika dosa kita ngena remang ti tebal.” (Isa. 44:​22, NWT) Lebuh Jehovah ngampun, nya baka ke Iya ngena remang ti tebal ngelalaika dosa kitai ngambika dosa nya enda agi dipeda.

13. Nama asai ati kitai lebuh Jehovah ngampun dosa kitai?

¹³ Nama ulih dipelajarka kitai ari semua sempama nya? Lebuh Jehovah ngampun dosa kitai, kitai enda ibuh terus berasai besalah pasal penyalah ke udah dikereja kitai. Nengah genselan tebus Jesus Kristus, dosa kitai udah dikinsil magang. Lebuh Jehovah ngampun dosa kitai, nya baka ke kitai nadai kala ngereja dosa nya. Nya meh ampun ti bendar ke datai ari Jehovah lebuh kitai nesal ati ke dosa kitai.

JEHOVAH NGUMBAI KITAI KABAN RAPAT IYA BARU

14. Nama kebuah kitai ulih pechaya Jehovah deka ngampun kitai enggau pengabis iya? (Peda mega gambar.)

¹⁴ Lebuh Jehovah ngampun kitai, kitai ulih andal, Iya deka nyadi kaban kitai baru. Ketegal nya, kitai enda ibuh terus berasai besalah. Kitai enda ibuh irau Jehovah agi ringat enggau kitai, lalu benung ngiga chara kena ngukum kitai. Iya enda sekali-kali deka ngereja nya! Nama kebuah kitai  ulih pechayaka Jehovah lebuh Iya madah, Iya udah ngampunka kitai? Jehovah madah ngagai Nabi Jeremiah: “Aku deka ngampun dosa sida, lalu Aku enda agi ingatka penyalah sida.” (Jer. 31:34) Paul ngulang jaku nya lebuh iya madah: “Aku enda agi ingatka dosa sida.” (Heb. 8:12) Tang nama reti jaku nya?

15. Nama reti iya Jehovah enda agi ingatka dosa kitai?

¹⁵ Dalam Bup Kudus, leka jaku “ingat” ukai seruran merujuk ngagai orang ke berundingka utai ke kala nyadi suba. Tang leka jaku nya ulih merujuk ngagai orang ke deka ngereja sesiti utai. Penjenayah ke dipantang ba tiang sepiak Jesus madahka tu: “Jesus, kingatka aku lebuh nuan tama ngagai Perintah nuan.” (Luk. 23:​42, 43) Maya nya, iya benung minta Jesus ngereja sesiti utai ke iya. Jesus madah iya deka ngangkatka penjenayah nya idup baru. Nyadi, lebuh Jehovah madahka Iya enda agi ingatka dosa kitai, reti nya Iya udah ngampunka kitai. Lalu, Iya enda ngereja nama-nama utai kena ngukum kitai ke dosa nya jemah ila.

16. Bup Kudus mandingka kitai enggau nama?

¹⁶ Bup Kudus ngena siti agi sempama kena nulung kitai faham pasal pengelepas ke diasaika kitai lebuh Jehovah ngampunka kitai. Ketegal kitai enda sempurna, kitai disemaka baka “ulun dosa.” Tang lebuh Jehovah ngampun kitai, kitai baka ulun ke udah “dilepaska ari dosa.” (Rom. 6:​17, 18; Pem. 1:5) Au, lebuh kitai nemu Jehovah udah ngampunka kitai, kitai ulih gaga ati baka ulun ke udah dilepaska.

17. Baka ni kitai ulih digeraika lebuh Jehovah ngampunka dosa kitai? (Isaiah 53:5)

¹⁷ Bacha Isaiah 53:5. Bup Kudus madahka, ketegal kitai mensia ti bedosa, kitai baka ke bisi penyakit ti raya. Tang ketegal genselan tebus Jesus, kitai baka ke udah digeraika. (1 Pet. 2:24) Lebuh kitai bedosa, kaul kitai enggau Jehovah nyadi  enda manah. Tang nengah genselan tebus Jesus, Jehovah ulih ngampunka kitai. Ketegal nya, kitai ulih ngembuan kaul ti manah baru enggau Iya. Baka siku orang ti sakit raya ke berasai gaga ati lebuh digeraika, kitai mega berasai gaga ati laban ulih ngembuan kaul ti manah enggau Jehovah sereta nyadi kaban Iya baru.

NAMA KESAN IYA BA KITAI LEBUH JEHOVAH NGAMPUNKA KITAI?

18. Nama udah dipelajarka kitai ari semua sempama dalam Bup Kudus pasal chara Jehovah ngampun? (Peda mega kutak “Baka Ni Jehovah Ngampunka Kitai?”)

¹⁸ Nama udah dipelajarka kitai ari semua sempama dalam Bup Kudus pasal chara Jehovah ngampun? Lebuh Jehovah ngampun dosa kitai, nya baka ke dosa kitai enda kala nyadi. Lalu kitai ulih andal, Iya enda ngukum kitai ke dosa nya jemah ila. Ketegal nya, kitai ulih ngembuan kaul ti manah enggau Apai kitai ti ba serega, Jehovah. Ba maya ti sama, kitai sedar, lebuh Jehovah ngampun, nya baka siti pemeri ke kitai. Jehovah meri kitai pemeri nya ketegal pengerindu Iya sereta pemanah ati Iya, ukai ketegal kitai layak nerima pemeri nya.—Rom. 3:24.

19. (a) Nama utai ke ngasuh kitai berasai beterima kasih? (Rome 4:8) (b) Nama deka dikerandauka kitai ba artikel ke nangkanka tu?

¹⁹ Bacha Rome 4:8. Kitai amat beterima kasih laban Jehovah ngampun kitai. (Mas. 130:4) Tang ngambika dosa kitai diampun, kitai patut ngereja siti utai ti penting. Peratika utai ke dipadah Jesus: “Enti kita enggai ngampunka penyalah orang, Apai kita mega enggai ngampunka penyalah kita.” (Mat. 6:​14, 15) Nyadi, kitai mesti neladan Jehovah lalu ngampun orang bukai. Artikel ke nangkanka tu deka nunjukka chara kitai ulih ngereja nya.