Mary enggau laki iya John, a diau ba menua alai mayuh orang ari Pilipina datai gawa sereta diau. Lalu seduai iya gaga ati ulih nginjil ngagai sida. Maya pandemik COVID-19, Mary mujur ngepunka mayuh pengawa belajarka Bup Kudus, ukai aja ba menua iya, tang mega ba menua bukai. Baka ni iya ulih ngereja tu?

Mary deka nanya bala pemelajar Bup Kudus iya: “Kati nuan nemu sapa-sapa ke deka belajarka Bup Kudus?” Enti sida nyaut au, Mary lalu minta pemelajar iya nulung iya bekelala enggau sida. Tanya ti mudah tu suah mai asil ti manah. Nama kebuah? Laban orang ke rindu enggau utai ti dipelajarka sida ari Bup Kudus kesuah iya deka madah ngagai kaban belayan tauka bala kaban sida pasal utai ke dipelajar nya. Nya alai, nama nyadi lebuh Mary nanya tanya tu?

Pemelajar Bup Kudus Mary ke benama Jasmin, nulung iya bekelala enggau empat iku orang ke deka belajarka Bup Kudus. Siku ari sida nya Kristine. Iya amat rindu enggau utai ti dipelajar nya nyentukka iya minta Mary belajar enggau iya dua kali seminggu. Lebuh Mary nanya Kristine enti iya nemu sapa-sapa ke deka belajarka Bup Kudus, Kristine madah: “Au, aku deka nulung nuan bekelala enggau bala kaban aku.” Dalam timpuh beberapa minggu udah nya, Kristine nulung Mary bekelala enggau empat iku kaban iya ke deka belajarka Bup Kudus. Udah nya, Kristine nulung Mary bekelala enggau bala kaban iya ke bukai, lalu sekeda ari sida mega meri nama orang bukai ke engka bisi minat belajarka Bup Kudus.

Kristine mega deka ruang bilik iya ba Pilipina belajar pasal Bup Kudus. Nyadi, iya bejaku enggau anak indu iya ke benama Andrea. Terubah iya, Andrea ngumbai Saksi-Saksi Jehovah nya pengarap ti nyelai, enda pechayaka Jesus, sereta semina ngena Bup Kudus Begian Sempekat Lama. Tang pengudah belajar sekali aja, iya sedar runding iya pasal bala Saksi nya salah. Tiap kali iya belajar utai ti baru ari Bup Kudus, iya deka madah: “Enti utai nya ari Bup Kudus, nya tentu betul!”

Udah nya, Andrea nulung Mary bekelala enggau dua iku kaban iya sereta siku orang ke sama gawa enggau iya. Sida mega berengkah belajarka Bup Kudus. Andrea mega bisi siku ibu ke benama Angela. Angela nya buta lalu seruran ninga lebuh Mary belajar enggau Andrea, tang Mary enda nemu pasal tu. Bisi sekali, Angela nanya Andrea enti iya ulih minta Mary belajar enggau iya. Angela rindu enggau utai ti dipelajarka iya. Dalam timpuh sebulan aja, Angela udah ngafal mayuh ayat Bup Kudus sereta deka belajar empat kali seminggu! Lalu, enggau tulung ari Andrea, Angela ulih datai begempuru enggau tetap nengah konferen video.

 Lebuh Mary sedar laki Kristine ke benama Joshua, bisi semak Kristine lebuh seduai iya belajar, Mary nanya Joshua enti iya deka enggau seduai iya belajar. Joshua madah: “Aku semina ka ninga aja, tang anang nanya aku utai. Enti nuan nanya aku utai, aku enggai agi ninga.” Dalam timpuh lima minit aja maya seduai iya berengkah belajar, Joshua nanya mayuh agi utai ari Kristine, lalu iya pan deka belajarka Bup Kudus.

Tanya ari Mary ti mudah tu udah ngujungka iya bulih mayuh pemelajar Bup Kudus. Iya mega ngatur sekeda ari sida ngambika ulih belajar enggau bala Saksi ke bukai. Ketegal Mary nanya tanya ti mudah tu, 28 iku orang ari empat iti menua berengkah belajarka Bup Kudus.

Jasmin, pemelajar ti keterubah ke dipadah ba pengalaman tu, dibaptisa kena bulan April 2021. Kristine dibaptisa kena bulan Mei 2022, lalu iya udah pulai ngagai menua Pilipina ngambika ulih enggau diri sebilik iya. Dua iku kaban Kristine ke belajar Bup Kudus mega dibaptisa. Beberapa bulan pengudah Kristine dibaptisa, Angela pan dibaptisa lalu diatu iya siku pengerintis biasa. Laki Kristine, Joshua, enggau anak indu seduai iya, Andrea, sereta beberapa iku pemelajar ke bukai benung ngaga pemansang.

Ba abad keterubah, mayuh orang madah ngagai diri sebilik sereta bala kaban pasal utai ke dipelajarka sida pasal Jesus. (Jhn. 1:​41, 42a; SKR. 10:​24, 27, 48; 16:​25-33) Nyadi, tanya meh pemelajar Bup Kudus nuan sereta sida ke bisi minat belajarka Bup Kudus: “Kati nuan nemu sapa-sapa ke deka belajarka Bup Kudus?” Enti nuan nanya tanya ti mudah tu, nuan engka ulih betemu enggau mayuh agi orang ke deka belajarka Bup Kudus.