1-2. (a) Ni maya iya kitai ngasaika amat tusah deka ngampunka orang bukai? (b) Baka ni Denise ngampunka orang bukai?

 KATI nuan tusah deka ngampunka orang bukai? Mayuh ari kitai tusah deka ngampunka orang bukai, kelebih agi enti orang nya nyebut tauka ngereja utai ti balat ngemediska ati kitai. Taja pia, kitai ulih mutarka asai ati ti pedis nya, lalu ngampun orang bukai. Ambika chunto, peratika pengalaman siku menyadi indu ke benama Denise, a ke ngayanka ampun ti besai. Ba taun 2017, Denise enggau ruang bilik iya ba pejalai pulai pengudah ngabas Indu Opis Saksi-Saksi Jehovah ke baru dibuka. Maya nya, siku lelaki hilang kawalan kerita iya, lalu ngelantak kerita sida. Ketegal nya, Denise pan luput. Lebuh iya sedar, iya nyau nemu bala anak iya balat bakal, lalu laki iya, Brian, udah nadai. Lebuh iya ngenang baru, Denise madahka: “Aku balat tusah ati sereta charut runding.” Udah nya, iya nyau nemu, maya eksiden nya nyadi, lelaki ke deriba nya enda mabuk tauka ngena dadah, lalu lelaki nya mega enda limpang ketegal meda talipun tauka utai bukai. Utai ke nyadi nya endang enda sengaja. Nyadi, Denise besampi minta pengelantang ari Jehovah ngambika ulih ngawal emosi iya.

² Lelaki nya ditangkap lalu dipechara laban udah munuh laki Denise enggau enda sengaja. Enti kot mutuska iya besalah, lelaki nya deka dijil. Siku pegawai ba kot madah ngagai Denise, utai ke dipadah Denise ba pechara nya deka meri kesan ti besai sekalika lelaki nya deka dijil tauka enda. Denise madahka: “Aku ngasaika baka bisi orang muka abi telih aku, lalu nuangka mayuh garam ba telih nya laban aku patut ingatka baru utai ti pemadu pedis ke nyadi ba pengidup aku.” Beberapa minggu pengudah nya, Denise duduk ba bilik kot, sedia deka bejaku pasal lelaki ke udah mai pemedis ngagai sida sebilik. Nama utai ke  dipadah Denise? Iya minta hakim kasihka lelaki nya. b Pengudah Denise abis bejaku, hakim nya lalu nyabak. Ku hakim nya madah: “Udah 25 taun aku nyadi hakim, tang aku nadai kala ninga utai ke baka tu ba bilik kot aku. Aku nadai kala ninga ruang bilik mansa minta aku kasihka orang ke besalah nya. Aku nadai kala ninga sida nyebut jaku ti ngayanka pengerindu sereta ngampun ngagai orang ke besalah.”

 3. Nama utai ke nulung Denise ngampunka lelaki nya?

³ Nama utai ke nulung Denise ngampunka lelaki nya? Iya belematika chara Jehovah ngampun. (Mik. 7:18) Lebuh kitai menghargai ampun ke diayanka Jehovah ngagai kitai, kitai deka agi ngampun orang bukai.

 4. Jehovah deka kitai ngereja nama? (Epesus 4:32)

⁴ Jehovah deka kitai ngampunka orang bukai ari ati, baka Iya ke udah ngampunka kitai ari ati. (Bacha Epesus 4:32.) Iya ngarapka kitai sedia deka ngampun orang ti ngemediska ati kitai. (Mas. 86:5; Luk. 17:4) Dalam artikel tu, kitai deka berandauka tiga iti pekara ke ulih nulung kitai rindu ngampun.

ANANG ENDA PEDULIKA ASAI ATI NUAN

 5. Nitihka Jaku-Dalam 12:​18, nama asai ati kitai lebuh sesiku orang ngemediska ati kitai?

⁵ Kitai engka berasai balat pedis ati ketegal utai ke disebut tauka dikereja orang ngagai kitai, kelebih agi enti orang nya kaban rapat tauka diri sebilik kitai. (Mas. 55:​12-14) Kekadang, kitai engka berasai amat pedis ati, lalu ngasaika baka ke diachuk pedang. (Bacha Jaku-Dalam 12:18.) Kitai engka nguji enda pedulika asai ati kitai. Tang enti kitai ngereja nya, nya baka ke kitai diachuk pedang, lalu pedang nya ditinggalka dalam telih nya. Lalu, enti kitai enda pedulika asai ati nya, iya enda ulih disumanka.

 6. Nama reaksi kitai lebuh orang ngemediska ati kitai?

⁶ Lebuh orang ngemediska ati kitai, terubah iya kitai engka berasai ringat. Bup Kudus madahka, utai tu ulih nyadi. Taja pia, Bup Kudus nangkan kitai ari mengkang ringat. (Mas. 4:4; Eps. 4:26) Nama kebuah? Laban emosi kitai ulih mai kesan ngagai utai ti dikereja kitai. Enti kitai mengkang ringat, nya deka ngujungka kitai ngereja utai ti enda manah. (Jas. 1:20) Kingatka, kitai engka terubah iya berasai ringat, tang kitai ulih milih sekalika deka mengkang ringat tauka enda.

 7. Nama asai ati ke bukai ti diasaika kitai lebuh orang ngemediska ati kitai?

⁷ Kitai engka ngasaika emosi ke bukai lebuh orang balat ngemediska ati kitai. Ambika chunto, siku menyadi indu ke benama Ann madahka: “Lebuh aku agi mit, apai ninggalka indai lalu jadi enggau orang ke digaji buan aku. Aku ngasaika diri enda dikeibuhka. Lebuh apai enggau bini baru iya bisi anak, aku ngasaika diri baka ke udah diganti. Ketegal nya, seraya aku mansang besai, aku ngasaika diri enda diguna sapa-sapa.” Siku menyadi indu ke benama Georgette nerangka asai ati iya lebuh laki iya butang: “Kami bekaban ari mit. Iya kaling ngerintis aku. Ati aku balat anchur.” Siku menyadi indu ke benama Naomi madahka: “Aku enda nyangka laki aku ulih ngemediska ati aku. Lebuh iya ngaku diri meda pornografi lalu ngelalaika nya ari aku, aku berasai ditipu sereta dikhianati.”

 8. (a) Nama sekeda kebuah kitai patut ngampun orang bukai? (b) Nama penguntung ke diulih kitai lebuh kitai ngampun? (Peda kutak “ Baka Ni enti Kitai Trauma ketegal Sesiku Orang?”)

⁸ Kitai enda ulih ngawal utai ti disebut tauka  digaga orang ngagai kitai, tang kitai ulih ngawal reaksi kitai. Lalu kesuah iya, reaksi ti pemadu manah nya ngampunka sida. Nama kebuah? Laban kitai rinduka Jehovah, lalu Jehovah dekaka kitai ngampunka orang bukai. Enti kitai mengkang ringat lalu enggai ngampun, kitai engka ngereja utai ti beli ke engka ngemediska diri empu. (J-lam. 14:​17, 29, 30) Peratika utai ke nyadi ngagai siku menyadi indu ke benama Christine. Ku iya madahka: “Lebuh aku balat pedis ati, aku tusah deka tuchum. Aku makai pemakai ti enda manah ke pengerai aku. Aku mega tusah tinduk. Ketegal nya, aku tusah deka ngawal emosi aku. Lalu nya ngachau tikah aku sereta kaul aku enggau orang bukai.”

 9. Nama kebuah kitai patut badu ringat?

⁹ Baka ni enti orang ke ngemediska ati kitai enda minta ampun ari kitai? Kitai agi ulih ngurangka empas ari utai ke udah digaga orang nya ba kitai. Baka ni? Georgette, ke disebut tadi madahka: “Taja pan begunaka awak, tang aku badu agi ringat ngagai bekas laki aku. Asil iya, aku berasai lantang agi ati.” Enti kitai badu agi ringat, kitai ulih nagang ati kitai ari terus dikachau emosi ti enda manah. Tu deka mai penguntung ke kitai. Kitai badu agi berundingka pekara nya, lalu tetemuka pengaga ati baru. (J-lam. 11:17) Tang nama patut digaga nuan enti nuan bedau sedia deka ngampun?

CHARA MUTARKA ASAI ATI TI RINGAT

10. Nama kebuah kitai patut meri diri empu awak ngambika badu agi pedis ati? (Peda mega gambar.)

¹⁰ Nama ulih nulung nuan badu agi pedis ati? Siti chara iya nya meri diri empu awak. Ambika chunto, orang ke balat bakal ke udah nerima rawatan, agi begunaka awak ngambika ulih gerai. Baka nya mega, kitai engka agi begunaka awak sebedau kitai ulih ngampunka orang ari ati.—P-jar. 3:3; 1 Pet. 1:22.

11. Baka ni sampi nulung nuan ngampunka orang bukai?

¹¹ Besampi lalu minta Jehovah nulung nuan nyadi orang ti pengampun. c Ann, ke disebut tadi, nerangka baka ni sampi udah nulung iya. Iya madah: “Aku besampi ngagai Jehovah, minta Iya ngampun kami sebilik laban udah ngereja utai ti enda betul. Udah nya, aku nulis  siti surat ngagai apai enggau indai tiri aku, lalu madahka, aku udah ngampunka seduai iya.” Ann ngaku tu enda senang dikereja. Tang iya madah: “Aku arap lebuh aku neladan chara Jehovah ngampun, apai enggau bini iya deka belajar mayuh agi pasal Jehovah.”

12. Nama kebuah kitai patut arapka Jehovah, lalu enda bepanggai ba asai ati kitai? (Jaku-Dalam 3:​5, 6)

¹² Arap meh ke Jehovah, lalu anang bepanggai ba asai ati nuan. (Bacha Jaku-Dalam 3:​5, 6.) Jehovah seruran nemu utai ti pemadu manah ke kitai. (Isa. 55:​8, 9) Iya enda sekali-kali minta kitai ngereja utai ti ulih ngemediska kitai. Nyadi, lebuh Iya ngasuh kitai ngampunka orang bukai, kitai ulih andal, enti kitai ngereja nya, kitai deka bulih penguntung. (Mas. 40:4; Isa. 48:​17, 18) Tang enti kitai bepanggai ba asai ati kitai, kitai engka enggai ngampunka orang bukai. (J-lam. 14:12; Jer. 17:9) Naomi, ke disebut tadi madahka: “Keterubah iya, aku ngumbai diri enda ibuh ngampunka laki aku, ke meda pornografi. Aku takut iya deka ngemediska ati aku baru, tauka enda ingat semua pemedis ke udah digaga iya ngagai aku. Lalu aku berunding, Jehovah tentu faham asai ati aku. Tang aku sedar, taja pan Jehovah faham asai ati aku, tu ukai reti iya Jehovah setuju enggau asai ati aku. Iya nemu asai ati aku lalu faham aku begunaka awak ngambika badu agi ringat, tang Iya mega dekaka aku ngampun orang bukai.” d

CHARA NGEMANSANGKA ASAI ATI TI POSITIF

13. Nitihka Rome 12:​18-21, nama patut digaga kitai?

¹³ Lebuh kitai ngampun orang ke udah balat ngemediska ati kitai, kitai ukai semina badu agi bejaku pasal utai ke udah nyadi. Tuju kitai iya nya deka bebaik baru enggau sida, kelebih agi enti sida bala menyadi Kristian kitai. (Mat. 5:​23, 24) Ari ke mengkang ringat, kitai deka ngayanka pengasih sereta ngampunka sida. (Bacha Rome 12:​18-21; 1 Pet. 3:9) Nama ulih nulung kitai ngereja nya?

14. Kitai patut bebendar nguji ngereja nama, lalu nama kebuah?

¹⁴ Jehovah milih deka beratika sifat ti manah ba orang. Kitai patut bebendar neladan  Jehovah, lalu meda sifat ti manah ba orang ke udah ngemediska ati kitai. (2 Ban. 16:9; Mas. 130:3) Enti kitai ngumbai orang nya bisi sifat ti enda manah, nya aja meh utai ke deka dipeda kitai. Tu mega sama enti kitai ngumbai orang nya bisi sifat ti manah. Enti kitai ngiga pemanah orang bukai, kitai deka senang agi ngampunka sida. Ambika chunto, siku menyadi lelaki ke benama Jarrod madahka: “Ari ke berunding pasal penyalah orang nya, aku deka berundingka semua sifat manah ke dikembuan iya. Tu nulung aku senang agi ngampunka iya.”

15. Nama kebuah nya beguna madah ngagai orang ti udah ngemediska ati nuan, nuan udah ngampunka iya?

¹⁵ Siti agi utai ti penting ke ulih digaga kitai, iya nya madah ngagai orang nya kitai udah ngampunka iya. Peratika utai ke dipadah Naomi, ke disebut tadi: “Laki aku nanya, ‘Kati nuan udah ngampunka aku?’ Tang aku enda ulih nyebut, ‘Aku udah ngampunka nuan.’ Nyadi aku sedar, aku bedau ulih ngampunka iya ari ati. Tang nyau kelama, aku ulih nyebut, ‘Aku ngampunka nuan’ ngagai laki aku. Lebuh aku nyebut jaku nya, aku meda laki aku baka ke ka nyabak. Aku enda nyangka jaku nya ulih  ngasuh laki aku berasai nyamai, lalu ngasuh aku berasai lantang agi. Udah nya, aku belajar arapka iya baru, lalu kami duai nyadi kaban rapat baru.”

16. Nama utai ke udah dipelajarka nuan pasal ngampun?

¹⁶ Jehovah dekaka kitai ngampun orang bukai. (Kol. 3:13) Taja pia, kitai engka agi tusah deka ngampunka orang bukai. Nama ulih nulung kitai? Anang meh enda pedulika asai ati kitai, lalu enggau naka ulih badu agi ringat. Nya baru kitai ulih ngemansangka asai ati ti positif.—Peda kutak “ Tiga Langkah ngambika Ulih Ngampunka Orang.”

PERUNDINGKA PENGUNTUNG LEBUH NGAMPUN

17. Nama kebuah kitai patut ngampunka orang bukai?

¹⁷ Kitai bisi mayuh kebuah ngampunka orang bukai. Peratika sekeda ari kebuah nya. Kesatu, kitai neladan sereta ngelantangka ati Apai kitai ti pengasih, Jehovah. (Luk. 6:36) Kedua, kitai ngayanka diri beterima kasih laban Jehovah udah ngampunka kitai. (Mat. 6:12) Lalu ketiga, kitai bisi pengerai ti manah sereta kaul ti rapat enggau orang bukai.

18-19. Nama ulih nyadi enti kitai ngampunka orang bukai?

¹⁸ Lebuh kitai ngampun orang bukai, kitai engka nerima berekat ti enda dijangka. Peratika utai ke nyadi ngagai Denise, ke disebut tadi. Kebendar iya, lelaki ke ngasuh eksiden nya nyadi bisi runding deka munuh diri pengudah iya dipechara. Tang maya nya, Denise enda nemu pasal nya. Lelaki nya beterima kasih laban Denise sanggup ngampunka iya. Nyadi, iya belabuh belajarka Bup Kudus enggau Saksi-Saksi Jehovah.

¹⁹ Kitai engka ngasaika tusah deka ngampunka orang bukai. Taja pia, enti kitai ulih ngereja nya, kitai deka nerima mayuh penguntung. (Mat. 5:7) Nyadi, aram meh kitai enggau bebendar neladan Jehovah, ke rindu ngampun.