ARTIKEL DIPELAJAR 4
“Roh Kudus Petara enggau Ati Kitai Bela Besaksi”
“Roh kudus Petara enggau ati kitai bela besaksi madahka kitai tu anak Petara.”—ROM. 8:16, NWT.
LAGU 25 Nembiak ke Dipilih Petara
DALAM ARTIKEL TU *
Ba hari Pentikos, Jehovah meri roh kudus ngagai 120 iku nembiak Iya enggau chara ti ngalitka ati (Peda genteran 1-2)
1-2. Nama utai ti ngalitka ati nyadi ba hari Pentikos kena 33 M.?
MAYA nya, pagi Hari Minggu ba Jerusalem. Lalu sehari nya, hari Pentikos taun 33 M. Kira-kira 120 iku murid Jesus benung begempuru ba sadau sebuah rumah. (SKR. 1:13-15; 2:1) Beberapa hari sebedau nya, Jesus enda ngasuh sida ninggalka Jerusalem laban sida deka nerima siti pemeri ti badas. (SKR. 1:4, 5) Nama nyadi udah nya?
2 “Tekala nya utai ti munyi ribut biaubalai lalu datai ari langit.” Bunyi nya ngemenuhka rumah nya. Udah nya, “utai ti baka daun api” pegari ba atas pala bala murid Jesus, lalu semua sida ‘dipenuhka enggau roh kudus.’ (SKR. 2:2-4) Enggau chara ti ngalitka ati tu, Jehovah meri roh kudus Iya ngagai sida. (SKR. 1:8) Sida nyadi murid ti keterubah diiri ngena roh kudus * lalu bisi pengadang merintah enggau Jesus di serega.
NAMA NYADI LEBUH SIDA UDAH DIPILIH?
3. Nama kebuah bala murid Jesus amat pechayaka diri udah diiri ngena roh kudus ba hari Pentikos?
3 Nuan tentu ingatka utai ke nyadi enti nuan nya seiku ari murid ke bisi enggau ba sadau rumah sehari nya. Utai ti baka daun api inggap ba atas pala nuan, lalu nuan berengkah bejaku ngena bansa jaku bukai! (SKR. 2:5-12) Nuan tentu amat pechayaka diri udah diiri ngena roh kudus. Kati semua sida ke diiri ngena roh kudus deka diiri ngena chara ti sama sereta ba maya ti sama? Enda. Nama kebuah pia?
4. Kati semua sida ke diiri ngena roh kudus ba abad keterubah diiri ba maya ti sama? Terangka.
4 Aram kitai beratika kemaya sida diiri ngena roh kudus. Ukai semina sida 120 iku nya aja ti diiri ngena roh kudus ba hari Pentikos taun 33 M. Pengudah nya ba hari ti sama, kira-kira 3,000 iku bala murid ke bukai mega nerima roh kudus. Sida diiri ngena roh kudus lebuh sida dibaptisa. (SKR. 2:37, 38, 41) Tang beberapa taun udah nya, ukai semua bala murid diiri ngena roh kudus lebuh sida dibaptisa. Orang Samaria diiri nyau kelama pengudah sida dibaptisa. (SKR. 8:14-17) Tang iya ke ngalitka ati nya, Kornelius enggau sida sebilik diiri ngena roh kudus sebedau sida dibaptisa.—SKR. 10:44-48.
5. Nitihka 2 Korint 1:21, 22, nama nyadi lebuh sida udah diiri ngena roh kudus?
5 Aram kitai mega beratika nama nyadi lebuh sida udah diiri ngena roh kudus. Terubah iya, sekeda sida engka tusah deka pechayaka diri udah dipilih Petara Jehovah. Sida engka berunding, ‘Nama kebuah Petara milih aku?’ Sekeda ke bukai engka enda berunding baka nya. Enda ngira baka ni chara sida nerima pekara nya, rasul Paul madahka utai ke nyadi ba semua sida nya: ‘Lebuh kita udah arapka Iya, kita lalu ditanda * ngena roh kudus ti udah disemaya. Roh kudus nya nyadika jamin kitai deka nerima pesaka.’ (Eps. 1:13, 14; nota kaki ba Bup Kudus Baru.) Nya alai Jehovah ngena roh kudus Iya nyadika “jamin [semaya]” kena nunjukka sida udah dipilih Iya. Sida bisi peluang idup belama iya di serega jemah ila, ukai ba dunya.—Bacha 2 Korint 1:21, 22.
6. Nama patut digaga orang ke diiri ngena roh kudus enti iya deka nerima upah iya di serega?
6 Enti nembiak Jehovah udah diiri ngena roh kudus, kati iya deka terus ke serega nerima upah iya? Enda. Tang iya nemu diri udah dipilih ke serega. Taja pia, iya patut ingatka jaku tangkan tu: “Menyadi, awakka kita lebih agi ransing netapka diri amat udah dikangauka sereta udah dipilih, laban enti kita ngereja nya, kita enda ngelengkaka pengarap kita.” (2 Pet. 1:10) Nya alai, taja pan udah dipilih tauka dikangau ke serega, tang iya deka bulih upah nya enti iya mengkang tetap ati.—Plp. 3:12-14; Heb. 3:1; Pem. 2:10.
BAKA NI NEMBIAK JEHOVAH NEMU DIRI UDAH DIPILIH KE SEREGA?
7. Baka ni sida ke udah diiri ngena roh kudus nemu diri udah dikangau ke serega?
7 Tang baka ni nembiak Jehovah nemu diri udah nerima kangau ke serega? Peratika jaku ke dituju Paul ngagai bala menyadi ba Rome ke dikangauka nyadi nembiak ti tuchi. Ku Paul madahka: ‘Kita ukai nerima roh ti ngasuh kita nyadi ulun penakut baru, tang kita udah nerima roh ti ngiru kita nyadi anak Petara. Lebuh kitai ngangau, “Abba! Apai!” Roh kudus Petara enggau ati kitai bela besaksi madahka kitai tu anak Petara.’ (Rom. 1:7; 8:15, 16, NWT) Nya alai nengah roh kudus, Jehovah enggau terang nunjukka nembiak ke udah diiri ngena roh kudus nya amat udah nerima kangau ke serega.—1 Tes. 2:12.
8. Baka ni 1 John 2:20, 27 nunjukka sida ke udah diiri ngena roh kudus enda begunaka orang bukai madah ngagai sida pasal sida ke udah dikangau ke serega?
8 Jehovah nentuka orang ke udah diiri ngena roh kudus enda kakang ati enggau diri ke udah dikangau ke serega. (Bacha 1 John 2:20, 27.) Amat, sida patut diajar Jehovah nengah eklisia baka bala menyadi Kristian ke bukai. Tang, sida enda begunaka orang bukai madah ngagai sida pasal sida ke udah dikangau ke serega. Jehovah udah ngena kuasa ti pemadu besai ba dunya raya, iya nya roh kudus Iya, kena madahka sida amat udah dikangau ke serega!
SIDA “DIADAKA BARU”
9. Baka ke dipadah ba Epesus 1:18, nama ubah ke nyadi ba orang ke dipilih ke serega?
9 Mayuh ari nembiak Jehovah kemayaharitu engka ngasaika diri tusah deka meretika utai ke nyadi ba orang ke dipilih Petara ke serega. Tu enda ngenyitka ati laban sida empu enda dipilih Petara ke serega. Petara nempa mensia ngambika idup belama iya ba dunya, ukai di serega. (P-kal. 1:28; Mas. 37:29) Tang Jehovah udah milih sekeda orang diau di serega. Nya alai lebuh sida nya dipilih ke serega, pengadang enggau chara sida berunding deka ngenyit berubah. Enggau tu sida keran nganti peluang idup di serega.—Bacha Epesus 1:18.
10. Nama reti “diadaka baru”? (Peda mega nota kaki.)
10 Lebuh nembiak Jehovah diiri ngena roh kudus, sida “diadaka baru,” tauka “diadaka ari atas.” * Jesus mega madahka, tusah deka nerangka enggau nyemetak baka ni asai “diadaka baru” tauka diadaka ulih roh kudus, ngagai sida ke enda dipilih.—Jhn. 3:3-8; nota kaki ba Bup Kudus Baru.
11. Terangka ubah ke nyadi ba orang ke dipilih ke serega.
11 Nama ubah ba runding ke nyadi ba nembiak Jehovah ti dipilih ke serega? Sebedau Jehovah milih sida, sida ngembuan pengadang idup belama iya ba dunya. Sida keran nganti maya alai Jehovah deka muai semua penyai lalu ngaga dunya nyadi Paradais. Sida engka ngambarka diri nyambut diri sebilik tauka bakih ke udah nadai diangkatka idup baru. Tang pengudah sida dipilih ke serega, runding sida berengkah berubah. Nama kebuah? Nya ukai ketegal sida ngumbai pengadang ulih idup belama iya ba dunya enda badas agi. Nya mega ukai ketegal sida balat tusah ati tauka merinsa ketegal napi penanggul ti balat nyadi ba pengidup sida. Nya pan ukai ketegal sida ngasaika pengadang idup belama iya ba dunya enda agi ngerinduka ati. Iya ke amat, Jehovah ngena roh kudus Iya ngubah chara sida berunding sereta pengadang ke diterima sida.
12. Nitihka 1 Peter 1:3, 4, baka ni asai ati orang ke udah dipilih ke serega pasal berekat ke diulih iya?
12 Orang ke udah dipilih ke serega engka ngasaika diri enda layak bulih peluang ti badas tu. Tang ati iya mimit pan enda kakang pasal Jehovah ke udah milih iya. Ati iya deka balat gaga sereta beterima kasih lebuh ngenang pasal berekat ulih diau di serega jemah ila.—Bacha 1 Peter 1:3, 4.
13. Baka ni asai ati sida ke dipilih ke serega pasal pengidup sida ba dunya?
13 Nya alai, kati reti nya sida ke dipilih ke serega enggai agi idup? Rasul Paul nyaut tanya nya. Iya mandingka tubuh mensia sida enggau langkau kain lalu ku iya: “Laban seagi-agi kitai diau dalam langkau kain tu, kitai bedemuh mai ma ti berat laban kitai enggai dilepaska ari tubuh tu, tang laban kitai keran dekaka tubuh serega dirasukka ba kitai, ngambika tubuh ti nemu mati tu ditelan pengidup.” (2 Kor. 5:4) Sida agi deka idup. Sida rindu enggau pengidup diri lalu deka enggau diri sebilik sereta bala bakih nyembah Jehovah ninting hari. Tang enda ngira nama digaga sida, sida seruran ingatka berekat ti deka diulih sida jemah ila.—1 Kor. 15:53; 2 Pet. 1:4; 1 Jhn. 3:2, 3; Pem. 20:6.
KATI JEHOVAH MILIH NUAN KE SEREGA?
14. Nama nunjukka orang enda dipilih ke serega?
14 Nuan engka berunding sekalika nuan dipilih ke serega tauka enda. Enti pia, perundingka sekeda tanya tu: Kati nuan amat keran ngereja peneka Jehovah? Kati nuan balat ransing ba pengawa nginjil? Kati nuan balat rindu belajarka Bup Kudus sereta mansik runding Petara ti dalam? (1 Kor. 2:10) Kati nuan ngasaika Jehovah udah meri asil ti manah ngagai nuan ba pengawa nginjil? Kati nuan keran deka ngajar orang bukai pasal Jehovah? Kati nuan bisi meda bukti ke nunjukka Jehovah udah nulung nuan ngena mayuh chara ti nyemetak ba pengidup? Enti nuan nyaut “au” ngagai semua tanya nya, kati nya nunjukka nuan udah dikangau ke serega? Enda. Nama kebuah? Laban semua nembiak Petara ulih ngasaika tu, sekalika sida dipilih ke serega tauka enda. Lalu nengah roh kudus, Jehovah ulih meri kuasa ti sama ngagai tiap iku nembiak Iya enda ngira nama berekat ti deka diterima sida jemah ila. Iya ke amat, enti nuan bisi berunding sekalika nuan dipilih ke serega tauka enda, tu nunjukka nuan enda dipilih. Sida ke dikangau ke serega nadai berunding baka tu! Sida amat nemu diri deka kin!
Jehovah meri Abraham, Sarah, David, enggau John Pemaptisa roh kudus, iya nya kuasa ari Iya kena ngereja pengawa ti ngalitka ati. Tang Iya enda ngena roh kudus milih sida ke serega (Peda genteran 15-16) *
15. Baka ni kitai nemu ukai semua orang ke nerima roh kudus Petara dipilih ke serega?
15 Dalam Bup Kudus, bisi mayuh chunto pasal sida ke tetap ati ti nerima roh kudus Jehovah. Tang sida enda ke serega. Ambika chunto, Raja David diiring roh kudus Jehovah. (1 Sam. 16:13) Roh kudus nulung iya meretika penemu ti dalam pasal Jehovah sereta mega ngiring iya nulis sekeda bup mit ba Bup Kudus. (Mrk. 12:36) Taja pia, rasul Peter madahka David enda niki ke serega. (SKR. 2:34) John Pemaptisa mega “dipenuhka enggau roh kudus.” (Luk. 1:13-16) Jesus madahka nadai orang ke besai agi ari John, tang udah nya iya madahka, John enda nerima ungkup ba serega. (Mat. 11:10, 11) Jehovah meri sida roh kudus kena ngereja pengawa ti ngalitka ati. Tang Iya enda ngena roh kudus milih sida ke serega. Kati reti nya sida enda chukup tetap ati enti dibanding enggau sida ke dipilih merintah di serega? Enda. Ditu reti iya, Jehovah deka ngangkatka sida idup baru ba Paradais di dunya.—Jhn. 5:28, 29; SKR. 24:15.
16. Nama berekat ke dianti mayuh nembiak Jehovah kemayaharitu?
16 Mayuh ari nembiak Jehovah kemayaharitu enda dipilih ke serega. Sida nganti maya deka diau ba dunya ke dipegai Perintah Petara, sama baka Abraham, Sarah, David, John Pemaptisa, enggau mayuh nembiak Jehovah ke bukai maya jeman Bup Kudus.—Heb. 11:10.
17. Nama sekeda tanya ke deka dikerandauka kitai ba artikel pengudah tu?
17 Kemayaharitu, sekeda orang ke dipilih ke serega agi ba dunya tu. Nya alai kitai engka bisi sekeda tanya pasal sida. (Pem. 12:17) Ambika chunto, nama runding ke patut dikembuan sida ke dipilih ke serega pasal diri empu? Enti bisi menyadi Kristian ba eklisia kitai berengkah makai roti sereta ngirup wain maya Ngingatka Pemati Jesus, baka ni chara kitai begulai enggau iya? Lalu baka ni enti penyampau sida ke udah dipilih ke serega nya majak nambah? Patut nuan irau? Kitai deka nyaut tanya nya ba artikel pengudah tu.
LAGU 27 Petara Mandangka Bala Anak Iya
^ per. 5 Kenyau ari Pentikos 33 M., Jehovah udah meri sekeda nembiak Iya pengadang ti badas, iya nya merintah enggau Anak Iya, Jesus, di serega. Tang baka ni sida nemu diri udah dipilih nerima peluang ti badas tu? Nama nyadi lebuh sida udah dipilih ke serega? Artikel tu bepelasarka siti artikel dalam majalah Menara Jaga kena bulan Januari 2016. Ba artikel tu kitai deka nyaut tanya ke udah disebut tadi.
^ per. 2 PENERANG JAKU: Diiri ngena roh kudus: Jehovah ngena roh kudus Iya milih sekeda orang merintah enggau Jesus di serega. Nengah roh kudus, Jehovah meri sida siti semaya tauka siti “jamin” ke jemah ila. (Eps. 1:13, 14) Sida ke dipilih ke serega nya ulih ngumbai roh kudus “besaksi” ngagai sida, tauka enggau terang madahka upah sida nya di serega.—Rom. 8:16.
^ per. 5 PENERANG JAKU: Tanda. Tanda, chop, tauka kelai tu deka meruan ba sida ke diiri ngena roh kudus enti sida tetap ati nyentuk ngagai sida mati, tauka enda lama sebedau Penusah ti Besai berengkah.—Eps. 4:30; Pem. 7:2-4; peda “Nama kelai sereta jamin ke diberi Petara ngagai tiap iku orang Kristian ti dipilih ke serega?”—2 Kor. 1:21, 22, ba mwbr kena April, 2019.
^ per. 10 Kena nemu mayuh agi reti “diadaka baru,” peda ba majalah Menara Pengawal, kena 1 April 2009, lamb. 3-12, dalam jaku Indonesia.
^ per. 57 PENERANG PASAL GAMBAR: Sekalika kitai dijil ketegal pengarap tauka nadai penanggul lebuh nginjil sereta ngajar pemendar ari Bup Kudus, kitai keran nganti berekat idup belama iya lebuh dunya kitai tu ila dipegai Perintah Petara.
