1. Baka ni cheramah ti dikenataika ba siti konvensyen ba taun 1935 ngubah pengidup seiku nembiak lelaki?

BISI seiku nembiak lelaki ke beumur 18 taun lebuh iya dibaptisa ba taun 1926. Apai indai iya Nembiak Bup Kudus, nama ke dikena Saksi-Saksi Jehovah maya nya. Sida bisi tiga iku anak lelaki sereta dua iku anak indu, ke diajar nyembah Petara Jehovah sereta neladan Jesus Kristus. Baka semua Nembiak Bup Kudus maya nya, nembiak lelaki tu mega makai roti sereta ngirup wain ninting taun lebuh Makai Malam Tuan. Tang pengadang nya berubah lebuh Menyadi J. F. Rutherford ngenataika cheramah ke betajuk “The Great Multitude” ba siti konvensyen di Washington, D.C., Amerika Serikat ba taun 1935. Nama dipelajarka Nembiak Bup Kudus ba konvensyen nya?

2. Nama penemu baru ti diterangka Menyadi Rutherford ba cheramah iya?

² Ba cheramah iya, Menyadi Rutherford madahka sapa raban orang mayuh ke disebut ba Pemandang 7:9. Nyentukka ngagai maya nya, Nembiak Bup Kudus ngumbai raban nya deka ngagai serega, tang sida enda merintah nyadi raja enggau Jesus laban sida enda entu tetap ati. Menyadi Rutherford ngena ayat Bup Kudus nerangka raban orang mayuh nya enda dipilih diau ba serega. Tang sida dikumbai  bedus ti bukai * ke deka selamat pansut ari “penusah ti besai” lalu idup belama iya ba dunya. (Pem. 7:14) Jesus besemaya: ‘Aku bisi bedus ti bukai, ti ukai ari raban tu. Aku enda tau enda mega mai sida, lalu sida deka mendingka nyawa aku. Nya alai sida deka nyadi siti raban, enggau siku aja pengibun.’ (Jhn. 10:16) Bedus ti bukai dituju ngagai nembiak Jehovah ti tetap ati ke bisi peluang idup belama iya ba dunya Paradais. (Mat. 25:31-33, 46) Kitai deka beratika baka ni penemu baru tu ngubah pengidup mayuh ari nembiak Jehovah, nyengkaum menyadi lelaki ke biak tadi.—Mas. 97:11; J-lam. 4:18.

3-4. Ba konvensyen taun 1935, nama ditemu beribu iku orang pasal pengadang sida, lalu nama kebuah?

³ Amat ngagitka ati lebuh pencheramah nanya: “Sapa ke bisi pengadang idup belama iya ba dunya, ulih bediri?” Nitihka saksi ke meda, lebih setengah ari 20,000 iku orang ke datai bediri. Udah nya Menyadi Rutherford madah: “Peda! Raban orang mayuh!” Udah nya, orang ke datai manjung gaga ati. Sida ke bediri nyau nemu sida enda dipilih Jehovah diau ba serega. Ba hari siti, bisi 840 iku orang dibaptisa, lalu mayuh ari sida nya ari raban bedus ti bukai.

⁴ Pengudah cheramah nya, menyadi lelaki ke disebut tadi enggau beribu iku orang badu makai roti enggau ngirup wain maya ngintu Makai Malam Tuan. Seiku menyadi lelaki enggau baruh ati madahka: “Pengawa Ngingatka Pemati Jesus kena 1935 nya kali penudi aku makai roti sereta ngirup wain. Aku nemu Jehovah nadai ngena roh kudus Iya madahka aku bisi pengadang idup ba serega. Tang aku bisi pengadang idup ba dunya lalu ulih nulung ngaga dunya tu nyadi paradais.” Mayuh orang ngembuan asai ati baka menyadi tu. (Rom. 8:16, 17; 2 Kor. 1:21, 22) Kenyau ari nya, penyampau raban orang mayuh majak nambah, lalu sida besaup gawa enggau raban ke dipilih ke serega ke agi ba dunya.

5. Nama runding Jehovah pasal sida ke badu makai roti enggau ngirup wain?

⁵ Nama runding Jehovah pasal sida ke badu makai roti enggau ngirup wain pengudah taun 1935? Lalu nama runding Jehovah pasal menyadi Kristian kemayaharitu ke ngumbai iya patut makai roti sereta ngirup wain maya Makai Malam Tuan, tang udah nya nyau nemu iya enda dipilih roh kudus? (1 Kor. 11:28) Sekeda orang engka makai roti sereta ngirup wain ketegal sida saru enggau pengadang sida. Tang enti sida ngaku penyalah diri, badu makai roti sereta ngirup wain, lalu terus nyembah Jehovah enggau tetap ati, Iya tentu nerima sida nyadi sebagi ari bedus ti bukai. Taja pan sida nadai agi makai roti enggau ngirup wain, sida agi datai ngagai pengawa Ngingatka Pemati Jesus laban sida amat beterima kasih enggau utai ke udah digaga Jehovah enggau Jesus ke sida.

6. Jesus ngasuh bala melikat ngereja nama?

⁶ Enda lama agi, penusah ti besai deka  nyadi. Pemandang bagi 7 berandauka pasal orang Kristian ke dipilih ke serega sereta raban orang mayuh ari bedus ti bukai. Berandauka tu deka meransang kitai. Jesus ngasuh bala melikat nagang empat bengkah ribut ke mai pengerusak ari muput. Sida patut ngereja nya nyentukka semua orang Kristian ke dipilih ke serega udah dichop. Reti nya, Jehovah ngumbai sida tetap ati. (Pem. 7:1-4) Ketegal penetap ati sida, sida deka nyadi raja sereta imam enggau Jesus ba serega. (Pem. 20:6) Jehovah, Jesus enggau bala melikat tentu gaga ati lebuh meda 144,000 iku nya nerima upah sida ba serega.

7. Nitihka Pemandang 7:9, 10, sapa ke dipeda John ba genera iya, lalu nama digaga sida? (Peda gambar ba mua majalah.)

⁷ Pengudah John madahka pasal 144,000 ke nyadi raja enggau imam, John meda utai ti ngalitka ati. John tepedaka “mayuh amat orang” ke selamat pansut ari Armagedon. Penyampau sida mayuh agi ari 144,000 iku, lalu kitai enda nemu penyampau sida. (Bacha Pemandang 7:9, 10.) Sida begari “ngena baju panjai ti burak.” Reti tu sida udah “ngintu diri tuchi” ari dunya Sitan lalu taluk ngagai Petara enggau Kristus. (Jas. 1:27) Sida ngangau enggau nyawa ti inggar laban utai ti udah digaga Jehovah enggau Jesus, Anak Domba Petara. Sida megai dan engkerema kena nunjukka sida gaga ati nerima Jesus nyadi raja ke dipilih Jehovah.—Bandingka John 12:12, 13.

8. Nama utai ke dipadah Pemandang 7:11, 12 ngagai kitai pasal ruang bilik Jehovah ba serega?

⁸ Bacha Pemandang 7:11, 12. Nama nyadi ba serega lebuh sida meda raban orang mayuh? John meda ruang bilik Jehovah ba serega gaga ati lalu muji Petara lebuh sida meda raban orang mayuh. Sida tentu gaga ati lebuh meda genera tu dikeamatka maya raban orang mayuh selamat pansut ari penusah ti besai.

9. Nitihka Pemandang 7:13-15, nama digaga raban orang mayuh kemayaharitu?

⁹ Bacha Pemandang 7:13-15. Nitih ku John, raban orang mayuh “udah masu baju panjai sida, lalu ngaga baju nya burak ngena darah Anak Domba.” Tu nunjukka sida bisi ati ti beresi, lalu Jehovah gaga ati enggau sida. (Isa. 1:18) Sida udah nyerahka diri ngagai Jehovah lalu dibaptisa. Sida mega bisi pengarap ti kering ngagai tebus Jesus lalu bisi kaul ti manah enggau Jehovah. (Jhn. 3:36; 1 Pet. 3:21) Nya kebuah sida ulih bediri di mua kerusi diraja Petara lalu “nyembah Iya siang malam” ba dunya. Diatu sida amat ransing ngereja pengawa nginjil sereta ngaga orang nyadi murid laban Perintah Petara amat beguna ba sida.—Mat. 6:33; 24:14; 28:19, 20.

10. Nama ke diandal raban orang mayuh, lalu nama semaya ke deka dikeamatka?

¹⁰ Raban orang mayuh ke selamat pansut ari penusah ti besai andal “Iya ke duduk ba kerusi diraja nya deka nyaga sida.” Semaya ke dianti bedus ti bukai deka dikeamatka: “[Petara] deka ngendas semua ai mata ari mata sida. Nadai agi pemati, nadai agi tinggang pemerinsa tauka nyabak tauka pemedis. Utai ti lama udah lesap.”—Pem. 21:3, 4, Bup Kudus Berita Manah Ka Rebak Diatu.

11-12. (a) Nitihka Pemandang 7:16, 17, nama berekat ke deka diterima raban orang mayuh jemah ila? (b) Nama ulih digaga bedus ti bukai maya Ngingatka Pemati Jesus, lalu nama kebuah?

¹¹ Bacha Pemandang 7:16, 17. Diatu, sekeda ari nembiak Jehovah merinsa ketegal  lapar laban sida nadai chukup duit meli pemakai tauka bisi penyarut sereta perang ba menua sida. Ke bukai dijil ketegal pengarap sida. Taja pia, raban orang mayuh nemu pengudah sida selamat ari pengerusak dunya Sitan, sida deka seruran bisi mayuh pemakai sereta nerima iring ari Jehovah. Lebuh Jehovah ngerusak dunya Sitan, Iya deka nentuka raban orang mayuh dijaga ari pengeringat Iya ke baka “pengangat mata hari.” Pengudah penusah ti besai, Jesus deka ngiring sida ngagai “mata ai ti idup”, iya nya nulung sida bulih pengidup ti meruan belama iya. Uji perundingka, raban orang mayuh bisi pengadang ti ngerinduka ati. Ari bebiliun iku orang, sida bisi pengadang enda mati!—Jhn. 11:26.

¹² Bedus ti bukai beterima kasih ngagai Jehovah enggau Jesus ketegal pengadang ke diulih sida. Taja pan sida enda dipilih idup ba serega, tang sida agi berega ba Jehovah. Raban orang ke dipilih ke serega enggau bedus ti bukai deka sama bela muji Petara enggau Kristus. Siti chara sida nunjukka nya, sida datai enggau Makai Malam Tuan.

13-14. Nama kebuah semua orang datai ngagai Ngingatka Pemati Jesus?

¹³ Baru-baru tu, bisi kira-kira seiku ari seribu iku orang ke datai Ngingatka Pemati Jesus bisi makai roti sereta ngirup wain. Reti nya, mayuh eklisia ba serata dunya nadai bisi orang makai roti sereta ngirup wain lebuh Ngingatka Pemati Jesus. Mayuh orang ke datai Ngingatka Pemati Jesus bisi pengadang idup ba dunya. Tang nama kebuah sida datai ngagai Makai Malam Tuan? Kitai ulih nyemaka sida baka orang ke datai ngagai pengerami kawin bakih sida. Sida datai ketegal deka ngayanka pengerindu sereta sukung ngagai laki bini ke deka jadi. Sama mega, sida ke ari bedus ti bukai datai Ngingatka Pemati Jesus laban sida deka ngayanka pengerindu sereta sukung ngagai Kristus enggau raban ke dipilih ke serega. Sida mega datai laban deka ngayanka diri  beterima kasih ke genselan Jesus ti muka jalai ngambika sida ulih idup belama iya ba dunya.

¹⁴ Siti agi kebuah bedus ti bukai datai Ngingatka Pemati Jesus laban sida deka ngasika pesan Jesus. Lebuh Jesus ngepunka Makai Malam Tuan enggau bala rasul iya ke tetap ati, iya mesan sida: ‘Kereja tu kena ngingatka aku.’ (1 Kor. 11:23-26) Nya alai sida terus datai ngagai Makai Malam Tuan seagi-agi orang ke dipilih ke serega agi ba dunya. Lalu sida mai orang bukai datai Ngingatka Pemati Jesus.

15. Nama ulih digaga tiap iku kitai kena muji Petara enggau Kristus lebuh Ngingatka Pemati Jesus?

¹⁵ Maya Ngingatka Pemati Jesus, kitai bisi peluang muji Petara enggau Kristus nengah lagu sereta sampi. Tajuk cheramah ke deka diberi taun tu, iya nya “Beterima Kasih ke Utai ti Udah Digaga Petara enggau Kristus ke Nuan!” Cheramah tu deka nulung nuan beterima kasih agi ngagai Jehovah sereta Kristus. Lalu lebuh roti enggau wain disadung, kitai deka dikingatka utai ti digambarka sida, iya nya tubuh Jesus enggau darah iya. Kitai mega deka belematika pengerindu ti diayanka Jehovah lebuh Iya nejuka Anak Iya mati ke kitai ngambika kitai ulih idup. (Mat. 20:28) Nya alai, semua orang ke rinduka Jehovah enggau Anak Iya deka enggau Ngingatka Pemati Jesus.

16. Nama utai ti sama entara sida ke dipilih ke serega enggau bedus ti bukai?

¹⁶ Nama utai ti sama entara sida ke dipilih ke serega enggau bedus ti bukai? Ba Jehovah, dua iti raban tu sama bela berega. Kitai nemu tu laban Iya udah mayar rega ti sama ke sida, iya nya ngena nyawa Anak Iya ti dikesayau. Taja pan dua raban tu nerima pengadang ti enda sama, tang sida enda tau enda mengkang tetap ati ngagai Petara sereta Kristus. (Mas. 31:23) Lalu kingatka, Jehovah meri roh kudus Iya ngagai tiap iku kitai, nitihka penyampau ti diguna kitai, enda ngira enti kitai dipilih ke serega tauka kitai ari raban bedus ti bukai.

17. Nama dianti sida ke dipilih ke serega ke agi tinggal ba dunya?

¹⁷ Orang Kristian ke dipilih ke serega enda diada enggau pengadang nya. Petara ke meri sida pengadang nya. Sida berundingka pasal pengadang nya, besampi sereta keran deka nerima upah sida ba serega. Sida mega enda nemu nama gaya tubuh ke deka  dikembuan sida ba serega. (Plp. 3:20, 21; 1 Jhn. 3:2) Taja pia, sida keran deka begulai enggau Jehovah, Jesus, bala melikat sereta orang bukai ke dipilih merintah ba Perintah Petara di serega.

18. Nama pengadang ti dianti bedus ti bukai?

¹⁸ Bedus ti bukai bisi pengadang idup belama iya ba dunya. Tu meh utai ti dikedekaka semua mensia. Sida nganti maya ulih ngubah dunya nyadi paradais. Maya nya sida ulih ngaga rumah, bekebun enggau ngemesaika anak ti bepengerai. (Isa. 65:21-23) Sida ulih bejalai ngagai mayuh endur, meda rampa menua lalu ulih belajar ari semua utai ke ditempa Jehovah. Tang utai ke ngasuh sida gaga ati agi iya nya kaul sida enggau Jehovah majak tegap.

19. Nama peluang ke diulih kitai maya Ngingatka Pemati Jesus, lalu kemaya pengawa tu deka diintu taun tu?

¹⁹ Jehovah udah meri tiap iku nembiak Iya pengadang ti manah ke jemah ila. (Jer. 29:11) Ngingatka Pemati Jesus deka meri genap iku kitai peluang muji Petara enggau Kristus laban udah nyediaka tebus ke kitai. Pengawa tu amat beguna ke orang Kristian ninting taun. Taun tu kitai deka ngintu pengawa tu kena Hari Enam, 27 Mac 2021, pengudah mata panas padam. Mayuh ari kitai ulih enggau ba pengawa ke besai reti tu ketegal nadai utai nagang. Tang ke bukai engka disakal tauka dijil. Taja pia, sida agi ngintu pengawa tu. Lalu kingatka, Jehovah, Jesus enggau ruang bilik Petara ba serega bisi meda kitai. Arapka semua eklisia, raban enggau tiap iku kitai ulih gaga ati ngintu pengawa Ngingatka Pemati Jesus!