ARTIKEL DIPELAJAR 4
Kebuah Kitai Ngintu Pengawa Ngingatka Pemati Jesus
‘Kereja tu kena ngingatka aku.’—LUK. 22:19.
LAGU 20 Nuan Meri Anak ti Dikerinduka
DALAM ARTIKEL TU *
1-2. (a) Ni maya kitai kelebih agi ngenang orang ke dikesayauka kitai ke udah nadai? (b) Nama pengawa ke dipunka Jesus ba malam sebedau iya mati?
TAJA PAN orang ke dikesayauka kitai udah lama nadai, tang kitai agi ngenang sida. Kitai kelebih agi berundingka sida ba hari sida nadai.
2 Ninting taun, kitai enggau bejuta iku orang ba serata dunya begempuru ngingatka pemati orang ke amat dikesayauka kitai, iya nya Jesus Kristus. (1 Pet. 1:8) Kitai sama begempuru ngingatka Jesus ti udah nyerahka nyawa diri nyadika tebus kena ngelepaska kitai ari dosa enggau pemati. (Mat. 20:28) Nya alai, Jesus dekaka semua murid iya ngingatka pemati iya. Ba malam sebedau iya mati, Jesus ngepunka siti pengawa ke dikumbai Makai Malam Tuan lalu meri pesan tu: ‘Kereja tu kena ngingatka aku.’—Luk. 22:19.
3. Nama deka dikerandauka kitai ba artikel tu?
3 Semina mimit aja sida ke enggau pengawa Ngingatka Pemati Jesus dipilih idup ba serega. Tang bejuta iku orang ke bisi peluang idup ba dunya Paradais mega enggau pengawa nya. Ba artikel tu, kitai deka bejuraika kebuah dua iti raban tu keran deka enggau pengawa Ngingatka Pemati Jesus ninting taun. Kitai mega deka berandauka baka ni kitai bulih penguntung ari pengawa nya. Diatu, kitai deka berandauka sekeda kebuah orang ke dipilih ke serega enggau pengawa Ngingatka Pemati Jesus.
KEBUAH SIDA KE DIPILIH KE SEREGA ENGGAU PENGAWA NGINGATKA PEMATI JESUS
4. Nama kebuah sida ke dipilih ke serega makai roti sereta ngirup wain maya Ngingatka Pemati Jesus?
4 Ninting taun, sida ke dipilih ke serega makai roti sereta ngirup wain maya Ngingatka Pemati Jesus. Nama kebuah sida ngereja nya? Kena nyaut tanya nya, peratika utai ke nyadi ba malam ti penudi Jesus ba dunya. Pengudah Pengerami Paska, Jesus ngepunka pengawa ti dikumbai Makai Malam Tuan. Iya nyuaka roti enggau wain ngagai 11 iku bala rasul ti tetap ati. Udah nya, Jesus ngasuh sida makai roti sereta ngirup wain nya. Jesus madah ngagai sida pasal dua iti sempekat, iya nya sempekat baru enggau sempekat Perintah. * (Luk. 22:19, 20, 28-30) Ketegal dua iti sempekat tu, bala rasul sereta orang ke dipilih, deka nerima peluang nyadi raja enggau imam ba serega. (Pem. 5:10; 14:1) Semina sida ke dipilih ngagai serega ke agi bisi ba dunya bisi kaul enggau dua iti sempekat tu. Lalu sida makai roti sereta ngirup wain maya Ngingatka Pemati Jesus.
5. Nama utai ke ditemu sida ke dipilih ngagai serega pasal peluang ke diterima sida?
5 Bisi siti agi kebuah sida ke dipilih ke serega keran deka enggau pengawa Ngingatka Pemati Jesus. Pengawa tu meri sida peluang berundingka harapan sida. Sida bisi peluang ngembuan tubuh ti enda nemu mati sereta enda nemu buruk. Sida mega bisi peluang sama merintah enggau Jesus Kristus sereta enggau orang ke ari raban 144,000 iku ke bisi peluang ti sama baka sida. Lalu berekat ti pemadu besai ke diulih sida nya, sida ulih meda Jehovah! (1 Kor. 15:51-53; 1 Jhn. 3:2) Sida ke dipilih tu nemu sida udah dikangau ngambika nerima berekat tu ba serega. Tang ngambika sida ulih nerima berekat nya, sida enda tau enda mengkang tetap ati nyentukka ujung. (2 Tim. 4:7, 8) Sida tentu amat gaga ati lebuh berundingka pengadang sida ba serega. (Tit. 2:13) Tang baka ni enggau “bedus ti bukai”? (Jhn. 10:16) Nama kebuah sida enggau pengawa Ngingatka Pemati Jesus?
KEBUAH BEDUS TI BUKAI ENGGAU PENGAWA NGINGATKA PEMATI JESUS
6. Nama kebuah bedus ti bukai enggau pengawa Ngingatka Pemati Jesus ninting taun?
6 Bedus ti bukai enggau pengawa Ngingatka Pemati Jesus. Tang sida enda makai roti sereta enda ngirup wain. Taja pia sida agi gaga ati ulih enggau pengawa nya. Kena taun 1938, sida ke bisi peluang idup ba dunya dibai Ngingatka Pemati Jesus. Nya meh keterubah kali sida enggau pengawa nya. Menara Jaga kena 1 Mac 1938 madahka: “Sida [bedus ti bukai] endang patut datai sereta meda utai ke nyadi. . . . Sida patut gaga ati enggau orang ke dipilih ke serega ngintu pengawa nya.” Baka bala temuai ke gaga ati ulih enggau pengerami kawin, bedus ti bukai mega gaga ati ulih enggau Ngingatka Pemati Jesus lalu meda pengawa nya dipejalaika.
7. Nama kebuah bedus ti bukai keran deka ningaka cheramah Ngingatka Pemati Jesus?
7 Baka sida ke dipilih ke serega, bedus ti bukai mega berundingka harapan sida ba jemah ila. Sida mega keran deka ningaka cheramah lebuh pengawa Ngingatka Pemati Jesus. Cheramah nya deka berandauka utai ke deka digaga Kristus enggau 144,000 iku orang ke deka merintah enggau iya maya Seribu Taun Kristus Merintah. Dibaruh iring Raja Jesus Kristus, sida ke merintah enggau iya deka ngubah dunya tu nyadi Paradais lalu nulung mensia belubah-lubah nyadi sempurna. Bejuta iku sida ke datai Ngingatka Pemati Jesus berasai gagit ati lebuh sida ngambarka semaya Bup Kudus ke deka dikeamatka jemah ila, baka semaya ba Isaiah 35:5, 6; 65:21-23; sereta Pemandang 21:3, 4. Lebuh sida ngambarka diri enggau orang ke dikesayauka sida ba dunya baru, harapan sida ke jemah ila deka dikeringka lalu pengeran sida deka nyembah Jehovah majak nambah.—Mat. 24:13; Gal. 6:9.
8. Nama siti agi kebuah bedus ti bukai enggau pengawa Ngingatka Pemati Jesus?
8 Peratika siti agi kebuah bedus ti bukai enggau pengawa Ngingatka Pemati Jesus. Sida deka nunjukka pengerindu sereta sukung sida ngagai raban orang ke dipilih ke serega. Bup Kudus madahka, sida ke dipilih ngagai serega enggau sida ke bisi peluang idup ba dunya deka ngembuan kaul ti rapat. Nama reti iya? Aram kitai meda sekeda chunto.
9. Baka ni jaku ti benabi ba Sekariah 8:23 nunjukka asai ati bedus ti bukai ngagai sida ke dipilih ke serega?
9 Bacha Sekariah 8:23. Jaku ti benabi tu nunjukka asai ati bedus ti bukai ngagai bala menyadi sida ke dipilih ke serega. Rambai jaku “siku orang Judah” sereta “kita” dituju ngagai sida ke dipilih ke serega, tang agi tinggal ba dunya. (Rom. 2:28, 29) “Sepuluh iku orang ari bansa bukai” dituju ngagai bedus ti bukai. Rambai jaku “mansang ngagai,” reti iya bedus ti bukai deka tetap ati nyukung sida ke dipilih ke serega, lalu enggau sida ba pengawa sembah ti bendar. Nya alai maya pengawa Ngingatka Pemati Jesus, bedus ti bukai sama begulai enggau sida ke dipilih ke serega. Tu nunjukka sida bisi kaul ti rapat enggau pangan diri.
10. Nama udah digaga Jehovah kena ngamatka jaku ti benabi ba Esekiel 37:15-19, 24, 25?
10 Bacha Esekiel 37:15-19, 24, 25. Jehovah ngamatka jaku ti benabi tu lebuh Iya nulung sida ke dipilih ke serega enggau bedus ti bukai besaup gawa. Jaku ti benabi tu nyebut pasal dua iti kayu. Sida ke bisi peluang diau di serega nya baka kayu ti bisi leka jaku “Perintah menua Judah” (raja orang Israel dipilih ari raban bansa Judah), lalu sida ke bisi peluang idup ba dunya nya baka kayu ti bisi leka jaku “Perintah menua Israel.” * Jehovah nyerakupka dua iti raban tu ngambika sida ulih nyadi “siti kayu.” Reti iya sida deka gawa enggau beserakup dibaruh seiku Raja, iya nya Jesus Kristus. Nya kebuah, lebuh sida ke dipilih ke serega enggau bedus ti bukai datai enggau pengawa Ngingatka Pemati Jesus, sida nyadi “siti raban” dibaruh ‘siku pengibun.’—Jhn. 10:16.
11. Baka ni “bedus” ke disebut ba Matthew 25:31-36, 40 nunjukka sida nyukung bala menyadi Jesus?
11 Bacha Matthew 25:31-36, 40. “Bedus” ke disebut Jesus dituju ngagai sida ke lurus ati. Sida diau ba maya hari ti penudi lalu bisi peluang idup ba dunya. Sida dikumbai bedus ti bukai. Sida ke tetap ati tu nyukung bala menyadi Jesus, iya nya sida ke dipilih ke serega ke agi bisi ba dunya. Kena nyukung bala menyadi Jesus, sida nulung ba pengawa nginjil sereta ngaga orang nyadi murid.—Mat. 24:14; 28:19, 20.
12-13. Nama agi sekeda chara bedus ti bukai ulih nunjukka diri nyukung bala menyadi Jesus?
12 Ninting taun, beberapa minggu sebedau pengawa Ngingatka Pemati Jesus, bedus ti bukai enggau kimpin mai orang ke bisi minat enggau pengawa nya. Tu meh siti ari chara sida nyukung bala menyadi Jesus Kristus. (Peda kutak “ Udah Nuan Ngaga Pelan kena Musin Ngingatka Pemati Jesus?”) Sida mega nulung ngaga atur ti patut ngambika pengawa nya ulih dipejalaika ba tiap iti eklisia di serata dunya. Sida tetap ngereja tu taja pan ba eklisia sida nadai orang ke dipilih ke serega. Bedus ti bukai nemu Jesus beterima kasih enggau pengawa sida ti bebendar nyukung bala menyadi iya. Ba Jesus, pengawa ke digaga sida baka ke dikereja ngagai iya.—Mat. 25:37-40.
13 Nama agi kebuah ke bukai semua kitai enggau pengawa Ngingatka Pemati Jesus, enda ngira sekalika pengadang kitai ba serega tauka ba dunya Paradais?
NAMA KEBUAH SEMUA KITAI DATAI NGINGATKA PEMATI JESUS?
14. Baka ni Jehovah enggau Jesus nunjukka pengerindu ti besai ngagai kitai?
14 Kitai beterima kasihka pengerindu ti udah diayanka Jehovah enggau Jesus. Jehovah udah nunjukka pengerindu Iya ngagai kitai nengah mayuh chara. Tang pengerindu ti pemadu besai ke udah diayanka Iya ngagai kitai, iya nya Iya udah nganjung Anak Iya ti dikesayau ngambika merinsa sereta mati ke kitai. (Jhn. 3:16) Lalu Jesus mega nunjukka pengerindu ti besai lebuh iya sanggup nyerahka nyawa diri ke kitai. (Jhn. 15:13) Kitai enda ulih malas pengerindu Jehovah enggau Jesus. Tang, nengah chara kitai ngena pengidup kitai ninting hari, kitai ulih nunjukka diri beterima kasihka pengerindu seduai iya. (Kol. 3:15) Kitai enggau pengawa Ngingatka Pemati Jesus ngambika kitai ulih ingatka pengerindu seduai iya ngagai kitai. Lalu tu mega siti chara kitai nunjukka pengerindu ngagai Jehovah enggau Jesus.
15. Nama kebuah sida ke dipilih ke serega enggau bedus ti bukai ngumbai genselan tebus Jesus nya amat berega?
15 Kitai amat beterima kasihka tebus. (Mat. 20:28) Genselan tebus Jesus amat berega ba sida ke dipilih ke serega. Tu ketegal tebus muka jalai ngambika sida ulih diau ba serega. Ketegal sida bisi pengarap ba tebus Jesus, Jehovah ngumbai sida lurus lalu udah ngiru sida nyadika anak Iya. (Rom. 5:1; 8:15-17, 23) Bedus ti bukai mega amat beterima kasihka tebus. Ketegal sida arapka tebus Jesus, sida ngembuan ati ti beresi ba mua Petara sereta ulih gawa ke Iya. Pia mega, sida bisi peluang “pansut ari penusah ti besai.” (Pem. 7:13-15) Nya alai, siti chara sida ke dipilih ke serega enggau bedus ti bukai nunjukka diri beterima kasih ke tebus, iya nya sama enggau pengawa Ngingatka Pemati Jesus ninting taun.
16. Nama siti agi kebuah kitai enggau pengawa Ngingatka Pemati Jesus?
16 Siti agi kebuah kitai enggau pengawa Ngingatka Pemati Jesus nya laban kitai deka ngasika Jesus. Enda ngira nama pengadang kitai, tiap iku kitai deka ngasika pesan ke diberi Jesus ba malam maya iya ngepunka pengawa tu. Ku iya madah: ‘Kereja tu kena ngingatka aku.’—1 Kor. 11:23, 24.
NAMA PENGUNTUNG KE DIULIH KITAI ARI PENGAWA NGINGATKA PEMATI JESUS?
17. Baka ni pengawa Ngingatka Pemati Jesus nulung kitai majak semak ngagai Jehovah?
17 Kitai datai semak ngagai Jehovah. (Jas. 4:8) Baka ke udah dipelajarka kitai, pengawa Ngingatka Pemati Jesus meri kitai peluang berundingka harapan ti udah diberi Jehovah ngagai genap iku kitai. Pia mega, kitai ulih berunding enggau dalam pengerindu ti besai ke udah diayanka Jehovah ngagai kitai semua. (Jer. 29:11; 1 Jhn. 4:8-10) Lebuh kitai belematika pengidup kitai ke jemah ila sereta pengerindu Petara ngagai kitai, pengerindu sereta kaul kitai enggau Iya mega deka majak dalam sereta tegap.—Rom. 8:38, 39.
18. Baka ni kitai tau bulih peransang enti kitai berundingka teladan Jesus?
18 Kitai diperansang deka nitihka teladan Jesus. (1 Pet. 2:21) Beberapa hari sebedau pengawa Ngingatka Pemati Jesus, kitai macha ayat Bup Kudus pasal utai ke digaga Jesus ba minggu ti penudi iya ba dunya, pemati iya, sereta pengangkat iya ari pemati. Udah nya, maya malam hari lebuh Ngingatka Pemati Jesus, kitai deka ninga cheramah ti ngingatka kitai pasal pengerindu Jesus ke kitai. (Eps. 5:2; 1 Jhn. 3:16) Lebuh kitai macha sereta belematika teladan Jesus ke sanggup merinsa ke penguntung orang bukai, kitai diperansang “idup baka Jesus Kristus.”—1 Jhn. 2:6.
19. Baka ni kitai ulih meruan dalam pengerindu Petara?
19 Kitai keran agi deka meruan dalam pengerindu Petara. (Jud. 20, 21) Kitai ulih meruan dalam pengerindu Petara enti kitai enggau naka ulih ngasika Iya, nguduska nama Iya, sereta ngagaka ati Iya. (J-lam. 27:11; Mat. 6:9; 1 Jhn. 5:3) Pengawa Ngingatka Pemati Jesus deka ngasuh kitai keran agi nentuka pengidup kitai ninting hari seruran meruan dalam pengerindu Jehovah.
20. Nama sekeda kebuah kitai enggau pengawa Ngingatka Pemati Jesus?
20 Enda ngira sekalika pengadang kitai ba serega tauka ba dunya, semua kitai bisi kebuah ti manah deka enggau pengawa Ngingatka Pemati Jesus. Ninting taun, lebuh kitai begempuru ba hari nya, kitai ngenang pemati orang ke amat dikesayauka kitai, iya nya Jesus Kristus. Kelebih agi, kitai deka ingatka pengerindu Jehovah ti besai ke udah nganjung Anak Iya nyadika tebus. Taun tu, pengawa Ngingatka Pemati Jesus deka diintu kena malam Hari Lima, 15 April 2022. Kitai sayauka Jehovah enggau Anak Iya. Nya alai, kitai deka nentuka nadai utai nagang kitai ari Ngingatka Pemati Jesus.
LAGU 16 Puji meh Jehovah enggau Anak ke Dipilih Iya
^ Semua kitai keran deka Ngingatka Pemati Jesus ninting taun, enda ngira kitai nerima peluang diau ba serega tauka ba dunya Paradais. Artikel tu deka bejuraika kebuah ti manah ari Bup Kudus ke meransang kitai ngambika enggau pengawa Ngingatka Pemati Jesus sereta nama penguntung ke diulih kitai ari pengawa nya.
^ Kena nemu mayuh agi pasal sempekat baru sereta sempekat Perintah, peda artikel “Kamu akan Menjadi Kerajaan Imam” kena 15 Oktober 2014, ba Menara Jaga, lamb. 15-17 dalam jaku Melayu enggau artikel “Jehovah Madahka Pasal Sempekat ti Baru” ba Bup Kereja Kena Gempuru kena April 2017, lamb. 8.
^ Kena nemu mayuh agi pasal jaku ti benabi bekaul enggau dua iti kayu ke bisi ba Esekiel bagi 37, peda Ibadat Sejati kepada Yehuwa Akhirnya Dipulihkan!, lamb. 130-135, gent. 3-17 dalam jaku Melayu.
