1. Baka ni kitai ulih meri awak begulai enggau Jehovah?

 KITAI rindu begulai enggau orang ke dikesayauka kitai. Laki bini rindu begulai enggau pangan diri. Sida ke biak rindu begulai enggau pangan rapat sida. Lalu semua kitai rindu begulai enggau bala menyadi Kristian. Tang kelebih agi, kitai rindu begulai enggau Petara kitai. Kitai ngereja nya lebuh kitai besampi ngagai Iya, macha Bup Kudus sereta belematika tuju Iya enggau pemanah ke dikembuan Iya. Jam ke dikena kitai enggau Jehovah amat berega!—Mas. 139:17.

2. Nama utai ke ulih nekul kitai ari begulai enggau Jehovah?

² Taja pan kitai rindu begulai enggau Jehovah, tang bisi utai ke ulih nekul kitai. Pengidup kitai amat kisuk. Nya alai, kitai engka tusah ngiga awak ngereja pengawa ke ulih negapka kaul kitai enggau Jehovah. Kitai begunaka awak kena bekereja, bejalaika tanggung pengawa ba diri sebilik sereta pengawa bukai. Ketegal nya, kitai ngumbai diri nadai awak endur besampi, belajarka Bup Kudus tauka belemati.

3. Nama utai bukai ke ulih ngachau awak kitai enggau Jehovah?

³ Bisi siti agi utai ke ulih ngachau awak kitai enggau Jehovah. Ambika chunto, kitai tentu begunaka awak endur belelak. Utai ke digaga kitai maya belelak nya engka manah. Tang  enti kitai ngena kelalu mayuh jam ba pengawa nya, kitai engka nadai entu awak endur nyembah Jehovah. Kebendar iya, bisi agi pengawa bukai ke enda salah. Tang enti kitai enda bejimat, jam ke dikena ba pengawa nya ulih ngachau awak kitai enggau Jehovah.—J-lam. 25:27; 1 Tim. 4:8.

4. Nama deka dipejuraika kitai?

⁴ Ba artikel tu, kitai deka bejuraika kebuah kitai patut nentuka utai ti pemadu penting ba pengidup kitai. Kitai mega deka berandauka baka ni kitai ulih ngena awak kitai enggau manah lebuh begulai enggau Jehovah, lalu baka ni kitai tau bulih penguntung lebuh ngena awak enggau badas.

5. Baka ni jaku lalau ba Epesus 5:15-17 ulih nulung orang ke biak milih jalai pengidup ti pemadu manah?

⁵ Pilih meh jalai pengidup ti pemadu manah. Orang ke biak suah irau pasal baka ni sida ulih ngena pengidup enggau manah. Bala pengajar sereta diri sebilik ke ukai Saksi engka meransang sida ngulihka pelajar tinggi ngambika bulih kereja ti manah sereta begaji besai. Tang pengawa nya tentu begunaka mayuh awak. Ba situasi ke bukai, apai indai sereta bala bakih ba eklisia engka meransang sida ke biak ngena pengidup sida gawa ke Jehovah. Nama ulih nulung orang ke biak ke rinduka Jehovah ngaga pemutus ti manah? Iya tau bulih penguntung lebuh macha Epesus 5:15-17 lalu belematika nya. (Bacha.) * Pengudah macha ayat nya, iya tau nanya diri empu: ‘Nama “peneka Jehovah”? Nama pemutus ke ulih ngelantangka ati Iya? Nama pemutus ke ulih nulung aku ngena jam enggau badas?’ Kingatka, tu “maya hari ti jai,” lalu dunya ke dipegai Sitan deka abis enda lama da agi. Nya alai, enti kitai ngena pengidup kitai enggau chara ti ngelantangka ati Jehovah, tu nunjukka kitai bepenemu-dalam.

6. Nama pemutus ke digaga Maria, lalu nama kebuah nya pemutus ti manah?

⁶ Tentuka utai ti pemadu penting. Ngambika kitai ulih ngena jam kitai enggau manah, kitai patut milih entara dua iti pengawa, lalu kekadang kedua-dua iti pengawa tu ukai utai ti salah. Kitai ulih meda tu ari utai ke nyadi lebuh Jesus nemuai ngagai Maria enggau Marta. Marta amat gaga ati laban Jesus datai nemuai ngagai iya. Nya alai, iya nyediaka mayuh pemakai. Tang, Maria ngena peluang nya duduk semak Jesus lalu mendingka utai ke diajar iya. Taja pan utai ke digaga Marta nya enda salah, tang Jesus madahka Maria “udah milih utai ti manah agi.” (Luk. 10:38-42) Nyau kelama, Maria engka enda ingat utai ke diempa sida maya nya. Tang kitai andal iya tentu ingat utai ke dipelajar iya ari Jesus. Baka Maria ke ngumbai awak iya enggau Jesus nya berega, kitai mega deka ngumbai awak kitai begulai enggau Jehovah nya berega. Baka ni kitai tau ngena awak kitai enggau pemadu badas?

7. Nama kebuah besampi, belajarka Bup Kudus sereta belemati nya penting?

⁷ Sampi, belajarka Bup Kudus sereta belemati nya sebagi ari sembah kitai ngagai Jehovah. Lebuh besampi, kitai benung berandau enggau Apai kitai Jehovah, ke amat rinduka kitai. (Mas. 5:7) Lebuh kitai belajarka Bup  Kudus, kitai ‘belajarka pasal Petara.’ Iya Pun semua penemu-dalam. (J-lam. 2:1-5) Lebuh kitai belemati, kitai berundingka pasal pemanah ke dikembuan Jehovah. Pia mega, kitai berunding pasal utai ke deka digaga Iya ke kitai sereta orang bukai. Endaka tu chara ti pemadu manah ngena awak kitai? Tang baka ni kitai tau bulih penguntung ari semua pengawa tu?

8. Nama digaga Jesus lebuh iya ba menua puang, lalu nama ulih dipelajarka kitai?

⁸ Enti ulih, pilih meh endur ti sunyi. Peratika utai ke digaga Jesus. Sebedau iya berengkah ngereja pengawa nginjil, Jesus ngena awak iya ba menua puang pengelama 40 hari. (Luk. 4:1, 2) Ketegal endur nya sunyi, Jesus ulih besampi ngagai Jehovah lalu belematika peneka Apai iya ke iya. Tu tentu udah nulung Jesus besedia lebuh napi penguji ke deka datai. Nama ulih dipelajarka nuan ari teladan Jesus? Enti nuan datai ari ruang bilik ke besai, nuan tentu ngasaika tusah deka ngiga endur ti sunyi ba rumah. Enti pia, kati ulih nuan ngiga endur ti sunyi ba luar? Nya meh utai ke digaga Julie lebuh iya deka ngena awak besampi ngagai Jehovah. Iya enggau laki iya diau ba siti apartmen ti mit ba Perancis. Ketegal apartmen nya mit, iya tusah deka ngiga endur ti sunyi sereta awak endur kediri. Ku Julie madah: “Nya alai aku bejalai ngagai taman ninting hari. Ba dia aku ulih kediri, enda dikachau lalu ulih besampi ngagai Jehovah.”

9. Taja pan iya kisuk, baka ni Jesus nunjukka kaul iya enggau Jehovah utai ti berega?

⁹ Pengidup Jesus amat kisuk. Lebuh iya ngereja pengawa nginjil, mayuh orang nitihka iya, lalu sida deka begulai enggau iya. Bisi sekali, “semua orang di nengeri nya begelumu di mua rumah” laban sida deka betemu enggau iya. Taja pia, Jesus seruran nentuka iya bisi awak besampi ngagai Jehovah. Sebedau rerak tawas, Jesus ngagai “siti endur ti sunyi” lalu besampi ngagai Apai iya.—Mrk. 1:32-35.

10-11. Nitihka Matthew 26:40, 41, nama jaku lalau ke diberi Jesus ngagai bala rasul iya ba kebun Getsemani, tang nama nyadi?

¹⁰ Pengawa nginjil Jesus ba dunya nyauka abis. Ba malam ti penudi, iya ngiga endur ti sunyi alai iya ulih belemati sereta besampi. Nya alai, iya ngagai kebun Getsemani. (Mat. 26:36) Ba malam nya, Jesus meri bala rasul iya jaku lalau bekaul enggau besampi.

¹¹ Peratika utai ke nyadi. Lebuh sida datai ba kebun Getsemani, maya nya udah laun, engka pengudah tengah malam. Jesus ngasuh bala rasul iya “bejaga,” lalu iya mupuk besampi. (Mat. 26:37-39) Tang lebuh iya benung  besampi, bala rasul iya tinduk. Lebuh iya meda sida tinduk, Jesus sekali agi meransang sida “bejaga sereta besampi.” (Bacha Matthew 26:40, 41.) Iya nemu sida benung balat stres sereta lelak. Enggau siru Jesus madahka sida, “ati amat deka, tang tubuh lemi.” Udah nya, iya mupuk sereta besampi dua kali agi. Lalu tiap kali iya pulai, iya tetemuka sida enda besampi tang agi tinduk.—Mat. 26:42-45.

12. Nama ulih digaga kitai enti bisi maya kitai berasai kelalu stres tauka kelalu lelak deka besampi?

¹² Pilih jam ti ngena. Kekadang, kitai engka berasai kelalu stres tauka kelalu lelak deka besampi. Enti utai tu nyadi ba nuan, kingatka, orang bukai mega kala ngasaika utai ti sama. Nyadi, nama ulih digaga nuan? Sekeda menyadi engka biasa besampi ngagai Jehovah sebedau sida tinduk. Tang sida ngaga ubah lalu nguji besampi tumu agi maya sida enda entu lelak. Ke bukai sedar sida ulih besampi enggau manah agi enti sida duduk tauka besugang. Tang baka ni enti nuan tusah deka besampi ketegal balat irau tauka balat asa ati? Padahka meh ngagai Jehovah asai ati nuan. Nuan ulih pechaya, Apai kitai ti pengasih tentu nemu utai ke diasaika nuan.—Mas. 139:4.

13. Baka ni perengka elektronik ulih ngelimpangka kitai lebuh kitai besampi, belajarka Bup Kudus tauka datai begempuru?

¹³ Seliahka ari utai ti tau ngelimpangka nuan lebuh nuan belajar. Kelimpah ari besampi, bisi chara bukai ke ulih negapka kaul kitai enggau Jehovah. Kitai ulih majak semak enggau Petara enti kitai belajarka Bup Kudus sereta datai begempuru. Nama ulih digaga nuan ngambika tau bulih penguntung ari jam ke dikena nuan belajarka Bup Kudus sereta datai begempuru? Tanya diri empu, ‘Nama utai ke ulih ngelimpangka aku lebuh aku benung begempuru tauka lebuh aku belajarka Bup Kudus?’ Ambika chunto, nuan engka nerima kol, email, SMS ba talipun binching tauka ba perengka elektronik ke bukai. Kemayaharitu, bebiliun iku orang bisi ngena perengka elektronik. Sekeda pemansik madahka kitai senang dilimpangka taja pan bisi siti aja talipun binching semak kitai. Ku seiku pakar madahka, “Nuan enda ulih fokus ba pengawa nuan . . . runding nuan ba endur bukai.” Sebedau gempuru besai tauka  konvensyen, kitai suah dilalau ngaduka perengka elektronik ngambika enda bemunyi, awakka enda ngachau orang bukai. Ulih kitai ngereja utai ti sama lebuh kitai meri jam begulai enggau Jehovah ngambika enda dikachau?

14. Nitihka Pilipi 4:6, 7, baka ni Jehovah nulung kitai enda dilimpangka maya belajarka Bup Kudus tauka benung begempuru?

¹⁴ Minta Jehovah nulung nuan enda dilimpangka. Lebuh nuan berengkah berunding pasal utai bukai maya belajarka Bup Kudus tauka maya benung begempuru, pinta meh tulung ari Jehovah. Lebuh nuan balat irau, engka enda senang ba nuan deka muai pengirau nya lalu befokus ba Jaku Petara. Tang, nuan enda tau enda ngereja nya. Besampi meh ke pemaik ti ukai semina nyaga ati nuan tang mega “runding” nuan.—Bacha Pilipi 4:6, 7.

15. Nama penguntung lebuh nuan meri awak begulai enggau Jehovah?

¹⁵ Enti nuan ngena awak berandau, mendingka sereta belematika pasal Jehovah, tu deka mai penguntung ngagai nuan. Baka ni? Kesatu, nuan deka ngaga pemutus enggau manah agi. Bup Kudus madahka: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam.” (J-lam. 13:20) Nya alai, majak nuan begulai enggau Pun penemu-dalam, iya nya Jehovah, majak agi nuan bepenemu-dalam. Nuan deka nemu agi chara ngelantangka ati Iya sereta baka ni nyeliahka pemutus ti ngenusahka ati Iya.

16. Baka ni awak ke dikena kitai begulai enggau Jehovah nulung kitai ngemanahka agi chara ngajar?

¹⁶ Kedua, nuan deka nyadi pengajar ti landik agi. Lebuh kitai ngajar Bup Kudus, siti ari juluk ati kitai, iya nya nulung pemelajar kitai majak semak ngagai Jehovah. Majak kitai besampi ngagai Jehovah lalu belajar pasal Iya, majak dalam agi pengerindu kitai ke Iya. Tu ulih nulung kitai nemu agi chara ngajar pemelajar kitai rinduka Iya. Peratika teladan Jesus. Lebuh iya bejaku pasal Apai iya, iya suah ngena leka jaku ti ngerinduka ati. Ketegal nya, bala murid iya pan diperansang rinduka Jehovah.—Jhn. 17:25, 26.

17. Baka ni sampi enggau belajarka Bup Kudus nulung negapka pengarap kitai?

¹⁷ Ketiga, pengarap nuan deka majak tegap. Perundingka utai ke nyadi lebuh nuan minta iring, sukung sereta pengelantang ba ati ari Petara. Genap kali Jehovah nyaut sampi nuan, pengarap nuan ngagai Iya deka majak tegap. (1 Jhn. 5:15) Nama utai bukai ke ulih nulung negapka pengarap nuan? Belajarka  Bup Kudus kediri empu. Kingatka, “pengarap datai ari ke ningaka pesan.” (Rom. 10:17) Taja pia, kena bulih pengarap ti kering, kitai ukai semina bepanggai ba penemu. Nama utai bukai ke patut digaga kitai?

18. Nama kebuah pengawa belemati nya beguna? Beri siti chunto.

¹⁸ Kitai patut belematika utai ke dipelajar kitai. Perundingka utai ke nyadi ngagai penulis Masmur 77. Iya balat tusah ati laban iya ngasaika Jehovah udah nulak iya enggau bansa Israel. Ketegal pengirau nya, iya tusah deka tinduk. (Ayat 2-8) Nama digaga iya? Iya madah ngagai Jehovah: “Aku deka berundingka semua utai ti udah dikereja Nuan. Aku deka belematika semua pengawa Nuan ti besai.” (Ayat 12) Taja pan pemasmur nemu utai ke udah digaga Jehovah ke bala nembiak Iya kelia, tang iya agi irau: ‘Kati Petara enda ingat kasihka kitai? Kati pengeringat Iya udah dibali Iya nyadi penyiru?’ (Ayat 9) Pemasmur tu belematika pengawa Jehovah lalu baka ni Jehovah udah ngayanka pengasih sereta penyiru kelia menya. (Ayat 11) Nama asil iya? Pemasmur nyadi andal agi Jehovah enda sekali-kali ninggalka nembiak Iya. (Ayat 15) Enggau chara ti sama, pengarap nuan mega deka majak tegap lebuh nuan belematika chara Jehovah udah nulung bala nembiak Iya lalu baka ni Iya udah nulung nuan.

19. Nama agi penguntung ke diulih kitai lebuh kitai meri awak begulai enggau Jehovah?

¹⁹ Keempat, enggau ti pemadu penting, pengerindu nuan ke Jehovah deka majak nambah. Pengerindu deka meransang nuan ngasika Jehovah, ngelengkaka utai ngambika ngelantangka ati Iya sereta tan natka sebarang penguji. (Mat. 22:37-39; 1 Kor. 13:4, 7; 1 Jhn. 5:3) Nadai utai ke berega agi ari kaul kitai ti rapat enggau Jehovah!—Mas. 63:1-8.

20. Baka ni nuan nentuka diri bisi awak begulai enggau Jehovah?

²⁰ Kingatka, sampi, belajarka Bup Kudus sereta belemati nya sebagi ari sembah kitai ngagai Jehovah. Baka Jesus, giga meh endur ti sunyi. Seliahka sebarang utai ti tau ngelimpangka nuan. Pinta meh tulung ari Jehovah ngambika nuan enda dilimpangka lebuh nuan begulai enggau Iya. Enti nuan ngena jam nuan enggau badas diatu, Jehovah tentu deka merekatka nuan enggau pengidup ti meruan belama iya ba dunya baru Petara.—Mrk. 4:24.