1. Nama penanggul ke ditapi David?

 DAVID benung ngerarika diri. Saul, raja menua Israel, deka munuh iya. Lebuh David begunaka pemakai, iya ngetu ba nengeri Nop. Ba dia, David semina minta lima iti tuku roti. (1 Sam. 21:1, 3) Udah nya, David enggau orang ke enggau iya belindung ba siti gua. (1 Sam. 22:1) Nama kebuah David ulih napi penanggul ke baka tu?

2. Nama utai ke jai ke digaga Saul? (1 Samuel 23:16, 17)

² Saul amat kepapaska David laban mayuh orang rinduka David sereta muji iya laban iya udah menang ba mayuh perang. Saul mega nemu Jehovah udah nulak iya laban iya enda ngasika Jehovah. Ketegal nya, Jehovah milih David nyadi raja orang Israel. (Bacha 1 Samuel 23:16, 17.) Taja pia, Saul agi raja orang Israel, lalu iya bisi raban soldadu ti besai sereta mayuh orang nyukung iya. Nya alai, David patut ngerarika diri. Kati Saul ngumbai diri ulih nagang Petara ari nyadika David raja? (Isa. 55:11) Bup Kudus nadai madah, tang kitai nemu utai ke digaga Saul semina ngenusahka diri empu. Orang ke ngelaban Petara seruran alah!

3. Nama asai ati David lebuh napi penanggul nya?

³ David orang ke amat baruh ati. Iya enda kala berunding deka nyadi raja menua Israel. Tang Jehovah ke milih iya nyadi raja. (1 Sam. 16:1, 12, 13) Ketegal tu, Saul begedika David. Taja pan David patut ngerarika diri ari Saul, tang iya enda  kala nyalahka Jehovah. David enda kala mutap ketegal iya suntuk pemakai sereta patut belalai ba gua. Lalu lebuh David belalai ba lubang gua, nya engka maya iya nulis lagu puji ngagai Petara, ke nyengkaum ayat tema kitai: ‘Orang ke ngasika Jehovah, nadai suntuk utai.’—Mas. 34:10.

4. Nama tanya ke deka dipejuraika kitai, lalu nama kebuah kitai patut berundingka tanya nya?

⁴ Kemayaharitu, mayuh ari nembiak Jehovah kekadang enda chukup pemakai tauka suntuk utai bukai ke diguna sida ba pengidup. * Tu meh utai ke nyadi maya penyakit berampit COVID-19 ngelekai. Lalu, kitai deka napi balat agi penanggul lebuh “penusah ti besai” majak semak. (Mat. 24:21) Nya alai, aram meh kitai ngiga saut ke empat iti tanya tu: (1) Nama reti David “nadai suntuk utai”? (2) Nama kebuah kitai patut puas ati enggau utai ke dikemisi kitai? (3) Nama kebuah kitai andal Jehovah ulih nyaga kitai? Lalu (4) baka ni kitai ulih nyikap diri ke utai ke deka nyadi jemah ila?

5-6. Baka ni Masmur 23:1-6 nulung kitai meretika jaku David lebuh iya madah nembiak Petara “nadai suntuk utai”?

⁵ Nama reti ku David lebuh iya madah nembiak Petara “nadai suntuk utai”? Lebuh David nulis Masmur 23, iya ngena rambai jaku ti sama. Nya alai, Masmur 23 ulih nulung kitai meretika utai ku iya. (Bacha Masmur 23:1-6.) David ngepunka masmur nya enggau madahka: ‘Jehovah Pengibun aku. Aku nadai suntuk utai.’ Ba ayat ke bukai dalam masmur nya, David nyebut pasal utai ti berega iya nya, berekat ke diulih iya ketegal nerima Jehovah nyadi Pengibun iya. Jehovah ngiring iya “nengah jalai ti ngena” lalu Iya seruran nyukung David ba maya ti senang sereta enda ninggalka David ba maya ti tusah. Di baruh jaga Jehovah, David sempama diau ba “padang rumput ti galak.” Taja pia, iya nemu, pengidup iya tentu deka bisi  penanggul. Lalu kekadang, iya engka berasai asa ati baka ke benung bejalai “nengah darung kelemayang pemati,” lalu iya deka bisi mayuh munsuh. Ketegal Jehovah nya Pengibun iya, David “enda takut.”

⁶ Diatu, kitai udah tetemuka saut ngagai tanya tu: Nama reti David “nadai suntuk utai”? Iya bisi semua utai ke diguna ngambika ulih mengkang semak enggau Jehovah. Pengaga ati iya enda bepanggai ba utai ke dikemisi iya. David puas ati enggau utai ke disediaka Jehovah ngagai iya. Ba David, utai ke berega nya Jehovah merekat sereta nyaga iya.

7. Nitihka Luke 21:20-24, nama penanggul ke ditapi sekeda orang Kristian ba abad keterubah ke diau ba Judea?

⁷ Ari utai ke disebut David, kitai nemu kebuah kitai patut ngembuan runding ti ngena pasal utai ke dikemisi kitai. Enda salah kitai ngena utai ke dikemisi kitai, tang kitai enda patut ngenuluka nya ba pengidup kitai. Nya meh utai ke dipelajar orang Kristian ba abad keterubah ke diau di Judea. (Bacha Luke 21:20-24.) Jesus udah nangkan sida, bisi maya Jerusalem deka “dikelulung bala soldadu.” Lebuh nya nyadi, sida enda tau enda “rari ngagai bukit.” Enti sida ninggalka Jerusalem, sida ulih nyelamatka diri empu. Tang, sida patut ninggalka mayuh utai. Beberapa taun ti udah, siti Menara Jaga madahka: “Sida ninggalka ladang sereta rumah, lalu nadai mai barang sida. Sida andal Jehovah deka nyaga sereta nulung sida. Lalu, sida ngenuluka sembah ngagai Jehovah lebih agi ari utai bukai ba pengidup.”

8. Nama ulih dipelajarka kitai ari utai ke nyadi ngagai orang Kristian ba abad keterubah ke diau di Judea?

⁸ Nama ulih dipelajarka kitai ari utai ke nyadi ngagai orang Kristian ba abad keterubah ke diau di Judea? Menara Jaga ke disebut tadi madahka: “Ba jemah ila, kitai deka napi penguji bekaul enggau utai ke dikemisi kitai. Kati nya deka nyadi utai ti pemadu penting ba kitai? Tauka, kati kitai milih deka tetap ati ngagai Petara ngambika ulih diselamatka? Lebuh pengujung datai, kitai engka patut napi sekeda penusah sereta ngelengkaka sekeda utai. Kitai patut besedia ngereja nama-nama aja baka ke digaga orang Kristian ba abad keterubah.” *

9. Baka ni jaku lalau Paul ngagai orang Kristian bansa Hebrew meransang nuan?

⁹ Ulih nuan ngambarka penusah orang Kristian ba abad keterubah? Sida patut ninggalka semua utai ke dikemisi sida lalu ngidupka diri ba endur ke baru. Sida mega begunaka pengarap kena bepanggai ba Jehovah, lalu andal Iya ulih nyediaka utai ke diguna sida. Tang bisi utai ke ulih nulung sida. Lima taun sebedau soldadu Rome ngelulung Jerusalem, rasul Paul meri lalau tu ngagai orang Kristian bansa Hebrew: ‘Anang angkunka duit. Kita patut nemu puas ati ke utai ti dikemisi kita, laban Petara udah nyebut, “Aku enggai sekali-kali ninggalka kita, tauka ngelengkaka kita.” Nya alai, kitai kempang ati nyebut, “Jehovah endang penyaup aku, nya alai aku enda takut. Nama utai ulih dikereja orang ngagai aku?”’ (Heb. 13:5, 6) Sida ke nitihka jaku lalau Paul senang agi deka puas ati enggau utai ke dikemisi sereta idup enggau pengumbas iya ba endur ti baru. Sida andal Jehovah deka nyediaka utai ke diguna sida. Jaku lalau Paul mega nulung kitai andal Jehovah tentu ulih nyediaka utai ke diguna kitai.

10. Nama “resia” ke dipadah Paul ngagai kitai?

¹⁰ Paul meri jaku lalau ti sama ngagai Timoti,  lalu kitai mega ulih nitihka nya. Paul nulis: “Enti kitai bisi pemakai enggau gari, kitai patut nemu puas ati ke nya.” (1 Tim. 6:8) Kati nya reti iya kitai enda ulih makai pemakai ti nyamai, bisi rumah ti nyamai endur diau, tauka meli gari ti baru? Nya ukai reti ku Paul. Paul madah kitai patut puas ati enggau nama-nama utai ke dikemisi kitai. (Plp. 4:12) Nya meh “resia” ke dipadah Paul. Utai ti pemadu berega ke dikembuan kitai nya, kaul kitai enggau Petara, ukai utai ke dikemisi kitai.—Hab. 3:17, 18.

11. Nama ulih dipelajarka kitai ari jaku Moses ngagai orang Israel bekaul enggau puas ati?

¹¹ Utai ke dikumbai kitai beguna engka enda sama enggau runding Jehovah. Peratika utai ke dipadah Moses ngagai orang Israel pengudah sida bejalai pengelama 40 taun ba menua puang: ‘Jehovah Petara kita udah merekatka kita dalam semua utai ti dikereja kita. Iya udah ngintu kita lebuh kita segau-segau bejalai nengah menua puang ti besai rampa. Iya udah begulai enggau kita empat puluh taun, lalu kita nadai suntuk utai.’ (U-dat. 2:7) Sepemanjai 40 taun, Jehovah nyediaka mana nyadika pemakai ke orang Israel. Jehovah mega nentuka gari sida enda luya. Nya alai, sida agi ulih terus ngena gari ke dikena sida lebuh sida pansut ari menua Ejip. (U-dat. 8:3, 4) Taja pan sekeda orang engka ngumbai utai ke disedia tu enda chukup, tang Moses ngingatka orang Israel sida nadai kala suntuk utai. Jehovah gaga ati enti kitai belajar puas ati enggau utai ke dikemisi.  Iya dekaka kitai beterima kasih enggau utai ke disediaka Iya, taja pan utai nya biasa aja lalu ngumbai utai nya berekat ke datai ari Iya.

12. Baka ni David nunjukka diri andalka Jehovah, ukai ba diri empu?

¹² David nemu Jehovah nya Petara ti tetap ati sereta amat ibuhka sida ke rinduka Iya. Taja pan David benung ngerarika diri lebuh iya nulis Masmur 34, tang ketegal pengarap iya ngagai Jehovah amat tegap, iya andal ‘melikat Jehovah’ benung “nyaga” iya. (Mas. 34:7) David engka nyemaka melikat Jehovah baka seiku soldadu ke seruran bejaga. David seiku soldadu ke berani. Lalu Jehovah mega udah besemaya David deka nyadi raja. Tang David nadai bepanggai ba pengelandik diri empu lebuh iya ngalahka bala munsuh. (1 Sam. 16:13; 24:12) David andalka Petara, sereta pechaya melikat Jehovah ‘ngelepaska sida ke ngemesaika Jehovah.’ Endang amat, kitai enda ngarapka Jehovah deka nyaga kitai ari utai ti tau nganu nyawa. Tang kitai andal, orang ke arapka Jehovah tentu deka nerima pengidup ti meruan belama iya, taja pan sida engka lenyau nyawa diatu.

13. Lebuh Gok nyerang, nama kebuah kitai baka ke nadai daya, tang nama kebuah kitai enda patut takut? (Peda gambar ba mua majalah.)

¹³ Enda lama da agi, pengarap kitai ngagai Jehovah deka diuji. Orang ari bemacham-macham bansa deka begempung enggau bala pemerintah nyerang nembiak Jehovah, lalu sida nyadi siti raban ke dikumbai Gok. Maya nya, nyawa kitai tentu dalam bahaya. Kitai patut andal Jehovah deka sereta ulih nyelamatka kitai. Ba Gok, kitai baka bedus ke enda dijaga sereta nadai daya. (Esk. 38:10-12) Maya nya kitai nadai senyata sereta enda dilatih beperang. Nya alai, sida ngumbai kitai senang dialahka. Sida enda nemu bala melikat Jehovah sedia deka nyaga kitai. Tang kitai nemu laban kitai bisi pengarap. Ketegal sida nadai pengarap ba Petara, sida tentu tekenyit lebuh bala melikat belaban ngarika kitai!—Pem. 19:11, 14, 15.

14. Nama patut digaga kitai diatu?

¹⁴ Nama patut digaga kitai diatu kena nyikap diri ke jemah ila? Keterubah, kitai patut bisi runding ti ngena pasal utai ke dikemisi kitai. Kingatka, maya deka datai lebuh kitai deka ninggalka semua utai tu. Kitai mega patut puas ati enggau utai ke dikemisi sereta gaga ati laban kitai bisi kaul ti manah enggau Jehovah. Majak kitai ngelala Petara, majak agi kitai deka andal Iya tentu deka nyaga kitai lebuh Gok nyerang.

15. Baka ni David nemu Jehovah tentu deka seruran nulung iya?

¹⁵ Peratika utai bukai ke nulung David sereta ke ulih nyikap kitai napi penguji. David madahka: ‘Awakka kita empu ngasaika pemadas Jehovah. Beberekat meh orang ke nemu pengelikun lebuh sida begulai enggau Iya.’ (Mas. 34:8) Ayat nya nerangka kebuah David nemu iya ulih bepanggai ba sukung ari Jehovah. Lebuh iya agi biak, David belaban enggau Goliat. Ku iya madah ngagai soldadu ti kering nya: ‘Sehari tu Jehovah deka nyerahka nuan ngagai jari aku.’ (1 Sam. 17:46) Udah nya, lebuh David gawa ke Saul, Saul nguji mayuh kali deka munuh iya. Tang ‘Jehovah bisi enggau’ David. (1 Sam. 18:12) Ketegal David kala ngasaika tulung ari Jehovah, iya nemu Jehovah tentu deka nulung iya lebuh iya napi penanggul.

16. Baka ni kitai ulih “ngasaika” pemadas Jehovah?

 ¹⁶ Majak kitai bepanggai ba iring Jehovah diatu, majak agi kitai deka andalka Jehovah deka nyelamatka kitai jemah ila. Ambika chunto, kitai engka patut minta chuti enti kitai deka enggau gempuru besai tauka konvensyen. Tauka kitai minta jadual kereja kitai diubah ngambika ulih enggau semua gempuru sereta enggau pengawa nginjil. Baka ni enti tuke kitai enggai ningaka peminta kitai, lalu kitai dibuai ari kereja? Kati kitai arap Jehovah enda sekali-kali deka ninggalka kitai tauka ngelengkaka kitai? Kati kitai pechaya Iya seruran deka nyediaka utai ke diguna kitai? (Heb. 13:5) Mayuh menyadi ke gawa penuh jam udah ngasaika tulung ari Jehovah. Sida tentu gaga ati bekunsika peneleba sida enggau nuan. Jehovah nya Petara ti tetap ati.

17. Nama ayat taun 2022, lalu nama kebuah nya amat ngena?

¹⁷ Ketegal Jehovah bisi enggau kitai, kitai enda ibuh takut ke utai ke deka nyadi jemah ila. Petara deka seruran nulung kitai, seagi-agi kitai ngenuluka peneka Iya ba pengidup kitai. Kena ngingatka kitai kebuah kitai patut nyikapka diri ari diatu, sereta andal Jehovah enda sekali-kali deka ninggalka kitai, Raban ti Ngiring udah milih Masmur 34:10 nyadika ayat taun 2022 kitai: ‘Orang ke ngasika Jehovah, nadai suntuk utai.’