1-3. Nama sekeda utai ke ngasuh kitai nyabak?

 NI MAYA ke penudi iya nuan nyabak? Kekadang, kitai nyabak ketegal kitai gaga ati. Tang kesuah iya kitai nyabak laban kitai tusah ati. Ambika chunto, kitai engka nyabak lebuh orang ke dikesayauka kitai udah nadai. Lorilei, seiku menyadi indu ba Amerika Serikat madahka: “Kekadang aku berasai balat tusah ati lebuh ngenang anak indu aku ke udah nadai. Lebuh asai ati nya datai, aku ngumbai diri enda ulih natka pemerinsa nya.” *

² Kitai engka nyabak ketegal kebuah ke bukai. Hiromi, seiku pengerintis indu ba Jepun madahka: “Aku berasai tusah ati lebuh orang enda beminat ningaka pesan Bup Kudus. Kekadang, enggau ai mata aku besampi. Aku minta tulung Jehovah ngambika ulih tetemuka orang ke bisi minat ngagai pemendar.”

³ Kati nuan kekadang bisi ngasaika utai ti sama baka sida menyadi indu tu? Mayuh ari kitai kala ngasaika nya. (1 Pet. 5:9) Kitai deka ‘nyembah Jehovah enggau ati ti gaga.’ Tang kekadang kitai engka nyabak lebuh orang ke dikesayauka kitai udah nadai, lebuh berasai asa ati, tauka lebuh napi penanggul ke nguji penetap ati kitai ngagai Petara. (Mas. 6:6; 100:2) Nyadi, nama ulih digaga kitai lebuh napi asai ati ke baka nya?

4. Nama deka dipejuraika kitai ba artikel tu?

 ⁴ Kitai ulih belajar ari teladan Jesus. Kekadang, iya mega napi utai ke ngasuh iya “nyabak.” (Jhn. 11:35; Luk. 19:41; 22:44; Heb. 5:7) Aram kitai berandauka utai ke ngasuh iya nyabak. Lebuh kitai berandauka nya, kitai deka nemu utai ke ulih dipelajarka kitai ari Jesus enggau Apai iya Jehovah. Kitai mega deka berandauka utai ke ulih digaga kitai lebuh napi utai ke ngasuh kitai nyabak.

5. Nama ulih dipelajarka kitai pasal Jesus ari John 11:32-36?

⁵ Maya musin chelap kena taun 32 Masihi, kaban rapat Jesus iya nya Lasarus sakit lalu mati. (Jhn. 11:3, 14) Lasarus bisi dua iku menyadi indu, iya nya Maria enggau Marta. Jesus amat rinduka ruang bilik tu. Dua iku menyadi indu tu balat tusah ati laban menyadi lelaki seduai iya udah nadai. Pengudah Lasarus mati, Jesus mupuk ngagai Betani, alai Maria enggau Marta diau. Lebuh Marta nemu Jesus bisi datai, iya jejampat ngambat Jesus. Gambarka penusah ati iya lebuh iya madahka: ‘Tuan, enti nuan bisi ditu lebuh maya nya, menyadi aku tentu enda mati!’ (Jhn. 11:21) Lebuh Jesus meda Maria enggau orang bukai nyabak, iya pan “nyabak.”—Bacha John 11:32-36.

6. Nama kebuah Jesus nyabak maya nya?

⁶ Nama kebuah Jesus nyabak maya nya? Bup Pemahaman Alkitab madahka: “Pemati kaban iya Lasarus enggau penusah ati ke diasaika bala menyadi indu Lasarus ngasuh Jesus ‘balat sinu sereta nyabak.’” * Jesus engka berundingka pemedis ke diasaika kaban iya Lasarus sereta asai ati Lasarus lebuh nemu diri deka mati. Jesus mega nyabak lebuh iya meda Maria enggau Marta balat tusah ati ketegal pemati menyadi lelaki seduai iya. Enti sema nuan bisi kaban rapat tauka diri sebilik ke udah nadai, nuan tentu kala ngasaika utai  ti sama. Peratika tiga iti utai ke ulih dipelajarka nuan ari utai ke nyadi tu.

7. Nama dipelajarka kitai pasal Jehovah ari sabak Jesus ke bala kaban iya?

⁷ Jehovah meretika asai ati nuan. Jesus “betul-betul sebaka” enggau Apai iya. (Heb. 1:3) Lebuh Jesus nyabak, iya nunjukka asai ati Jehovah lebuh orang ke dikesayauka kitai udah nadai. (Jhn. 14:9) Enti orang ke dikesayauka nuan udah nadai, nuan ulih pechaya Jehovah ukai semina meda penusah ati nuan tang Iya mega nemu penusah ati ke diasaika nuan. Iya deka nyumanka ati nuan ti telih.—Mas. 34:18; 147:3.

8. Nama kebuah kitai pechaya Jesus deka ngangkatka orang ke dikesayauka kitai idup baru?

⁸ Jesus keran deka ngangkatka orang ke dikesayauka kitai idup baru. Sebedau Jesus nyabak, iya madah ngagai Marta: “Menyadi nuan deka angkat idup baru.” Marta pechayaka utai ku Jesus. (Jhn. 11:23-27) Ketegal Marta nyembah Jehovah, iya nemu nabi Elijah enggau Elisha kala ngangkatka orang idup baru. (1 Raj. 17:17-24; 2 Raj. 4:32-37) Lalu iya mega engka nemu Jesus kala ngangkatka orang idup baru. (Luk. 7:11-15; 8:41, 42, 49-56) Nuan mega ulih andal nuan tentu deka betemu enggau orang ke dikesayauka nuan idup baru. Nya alai, nama ulih dipelajarka kitai ari sabak Jesus lebuh iya ngelantangka ati bala kaban iya ke benung tusah ati? Jesus keran deka ngangkatka orang ke udah mati idup baru!

9. Baka Jesus, baka ni nuan ulih ngelantangka ati orang ke benung tusah ati? Beri siti chunto.

⁹ Nuan ulih ngelantangka ati orang ke benung tusah ati. Jesus ukai semina nyabak enggau Marta sereta Maria, tang iya mega ninga sereta nyebut utai ti ngelantangka ati seduai iya. Kitai mega ulih ngereja utai ti sama ba sida ke benung tusah ati. Dan, seiku tuai gempuru ke diau ba Australia madahka: “Pengudah bini aku nadai, aku begunaka sukung. Mayuh bala menyadi sereta bini sida seruran sedia deka mendingka aku. Sida ngelakka aku mantaika penusah ati aku sereta nyabak. Sida mega nulung aku, baka nuchi kerita, meli barang, sereta manduk ke aku lebuh aku enda ulih ngereja utai tu. Lalu sida suah besampi enggau aku. Sida nunjukka diri kaban ti bendar sereta menyadi ke ulih sama ‘enggau natka penusah.’”—J-lam. 17:17.

10. Nama utai ke nyadi ba Luke 19:36-40?

¹⁰ Jesus datai ba Jerusalem kena 9 Nisan, 33 Masihi. Lebuh iya nyau semak nengeri nya, mayuh orang begelumu sereta nganchau gari sida ba jalai kena nunjukka sida nerima iya nyadi Raja. Nya maya ti ngagaka ati! (Bacha Luke 19:36-40.) Nya kebuah bala murid iya enda nyadang utai ke nyadi pengudah nya. ‘Lebuh [Jesus] nyau datai semak lalu meda nengeri nya, iya nyabakka nengeri nya.’ Lalu Jesus madah pasal pengerusak ke deka nyadi ngagai orang ba Jerusalem.—Luk. 19:41-44.

11. Nama kebuah Jesus nyabak ke orang ba Jerusalem?

¹¹ Jesus berasai balat tusah ati. Taja pan orang Judah gaga ati nyambut penatai iya, tang iya nemu mayuh ari sida deka nulak pesan Perintah Petara ke dibai iya. Ketegal nya, Jerusalem deka dirusak lalu orang Judah ke selamat ari pengerusak nya deka dibai nyadi orang tangkap. (Luk. 21:20-24) Sayau amat, baka ke dipadah Jesus, mayuh orang nulak iya. Kati orang deka nerima pesan Perintah Petara ba kandang endur nuan diau? Enti semina mimit aja orang nerima pemendar,  nama ulih dipelajarka nuan ari sabak Jesus? Peratika tiga iti utai ke ulih dipelajarka kitai.

12. Nama ulih dipelajarka kitai pasal Jehovah lebuh Jesus nyabak ke orang ba Jerusalem?

¹² Jehovah ibuhka orang. Sabak Jesus ngingatka kitai, Jehovah amat ibuhka orang. “Iya enggai nejuka indah siku kita dirusak, tang semua nesal ati.” (2 Pet. 3:9) Kemayaharitu, kitai nunjukka diri rinduka orang lebuh kitai enggau naka ulih nulung sida belajar pasal Berita Manah.—Mat. 22:39. *

13-14. Baka ni Jesus nunjukka diri siruka orang, lalu baka ni kitai ulih ngemansangka penyiru?

¹³ Jesus bebendar ngereja pengawa nginjil. Iya nunjukka pengerindu ngagai orang lebuh ngajar sida ba sebarang maya. (Luk. 19:47, 48) Nama meransang Jesus ngereja nya? Iya berasai siru ke sida. Kekadang, mayuh orang deka ningaka ajar Jesus nyentukka iya enggau bala murid iya “nyau enda ulih makai.” (Mrk. 3:20) Lalu lebuh bisi seiku lelaki ke deka betemu enggau Jesus maya malam hari, Jesus mega sanggup meri awak berandau enggau iya. (Jhn. 3:1, 2) Lebuh Jesus berengkah bejalaika pengawa nginjil, mayuh orang ninga pesan ke dibai iya. Tang, mayuh ari sida nya enda nyadi murid iya. Taja pia, semua sida udah ninga pasal pesan nya. Kemayaharitu, kitai deka meri semua orang peluang ngambika ninga Berita Manah. (SKR. 10:42) Kena ngereja tu, kitai engka patut ngubah chara kitai nginjil.

¹⁴ Sedia deka ngaga ubah ti patut. Enti kitai seruran nginjil ba maya ti sama aja, kitai engka enda ulih betemu enggau orang ke bisi minat enggau Berita Manah. Seiku pengerintis ke benama Matilda madahka: “Aku enggau laki aku nguji nginjil ba maya ti enda sama. Maya pagi hari, kami nginjil ba endur bisnis. Lalu maya tengah hari, lebuh mayuh orang nadai ba rumah, kami nginjil ngena troli litaricha. Maya lemai hari, kami nginjil ari rumah ke rumah. Maya nya, mayuh orang bisi ba rumah.” Ari pengalaman Matilda kitai belajar, kitai patut sedia ngubah jadual nitihka maya orang mayuh agi ulih betemu enggau  kitai. Enti kitai ngereja nya, kitai andal Jehovah tentu deka gaga ati.

15. Nitihka Luke 22:39-44, nama utai ke nyadi ba malam sebedau Jesus dibunuh?

¹⁵ Ba malam 14 Nisan 33 Masihi, Jesus ngagai kebun Getsemani. Ba dia, iya mantaika asai ati iya ngagai Jehovah. (Bacha Luke 22:39-44.) Ba maya nya, Jesus “besampi . . . ngena sabak ti inggar, sereta enggau ai mata.” (Heb. 5:7) Nama utai ke disampika Jesus ba malam sebedau iya dibunuh? Iya besampi minta pengering ngambika ulih mengkang tetap ati ngagai Jehovah sereta terus ngereja peneka Iya. Jehovah ningaka sampi Jesus lalu nganjung seiku melikat kena ngeringka iya.

16. Nama kebuah Jesus balat tusah ati lebuh iya besampi ba kebun Getsemani?

¹⁶ Lebuh iya besampi ba kebun Getsemani, Jesus nyabak laban iya balat tusah ati. Iya irauka jaku tuduh orang pasal iya ke enda bebasaka nama Petara. Iya nemu iya bisi tanggung pengawa ti berat, iya nya mengkang tetap ati sereta ngetanka nama Apai iya. Enti nuan benung napi penanggul ke nguji penetap ati nuan ngagai Jehovah, nama ulih dipelajarka nuan ari sabak Jesus? Peratika tiga iti agi pekara ke ulih dipelajarka kitai.

17. Nama ulih dipelajarka kitai ari chara Jehovah nyaut sampi Jesus?

¹⁷ Jehovah ningaka sampi nuan. Nama kebuah Jehovah ningaka sampi Jesus? Laban Jesus keran deka tetap ati sereta ngetanka nama Apai iya. Enti kitai ngembuan pengirau ti sama baka Jesus, kitai andal Jehovah mega tentu deka nyaut sampi kitai ti minta tulung ari Iya.—Mas. 145:18, 19.

18. Nama kebuah Jesus ulih dikumbai kaban ke meretika asai ati nuan?

¹⁸ Jesus meretika asai ati nuan. Maya kitai tusah ati, kitai tentu berasai nyamai lebuh bisi kaban ke ulih meretika asai ati kitai. Kelebih agi enti iya kala napi penanggul ti sama baka kitai. Jesus meh kaban ke baka nya. Iya kala berasai lemi sereta begunaka bantu. Iya nemu pengelemi kitai, lalu iya mega nentuka kitai nerima sukung “lebuh kitai begunaka iya.” (Heb. 4:15, 16) Baka Jesus ke  nerima tulung ari seiku melikat ba kebun Getsemani, kitai mega patut sedia nerima tulung ari Jehovah. Iya engka ngena litaricha, video, cheramah tauka jaku peransang ke datai ari seiku tuai gempuru tauka bala menyadi Kristian ke tegap ba pengarap.

19. Baka ni nuan tau bulih pengering? Beri siti chunto.

¹⁹ Jehovah deka meri nuan ‘pemaik Petara.’ Baka ni Jehovah ngeringka kitai? Lebuh kitai besampi, kitai deka nerima ‘pemaik Petara, ti ngelui peragam mensia.’ (Plp. 4:6, 7) Pemaik ke diberi Petara ulih ngasuh kitai berasai lantang sereta ngembuan runding ti betul. Tu meh utai ke nyadi ngagai menyadi indu ke benama Luz. Ku iya: “Aku suah belaban enggau asai sunyi. Kekadang asai ati ke baka nya ngasuh aku ngumbai Jehovah enda rinduka aku. Tang lebuh nya nyadi, aku jejampat madahka asai ati ngagai Jehovah. Sampi nulung aku berasai lantang agi ati.” Baka Luz, kitai mega ulih tetemuka pengelantang ba ati nengah sampi.

20. Nama udah dipelajarka kitai ari kebuah Jesus nyabak?

²⁰ Kitai udah belajar kebuah Jesus nyabak. Tu tentu ngasuh kitai berasai lantang ati. Ari utai ke udah dikerandauka kitai ba artikel tu, kitai diperansang nyukung bala bakih kitai ke benung tusah ati ketegal orang ti dikesayauka sida udah nadai. Kitai mega ulih pechaya Jehovah enggau Jesus deka nyukung kitai lebuh kitai napi penusah ke baka nya. Kitai diperansang nginjil sereta ngajar enggau siru laban Jehovah enggau Jesus mega nunjukka penyiru. Lalu kitai berasai lantang ati laban nemu Jehovah enggau Anak Iya meretika asai ati kitai sereta pengelemi kitai. Seduai iya deka nulung kitai tan natka penusah. Aram meh kitai terus nitihka utai ke dipelajarka kitai nyentukka Jehovah ngamatka semaya Iya ke deka ‘ngendas semua ai mata ari mata kitai’!—Pem. 21:4.