1. Nama kebuah mayuh orang kemayaharitu enda pechayaka Bup Kudus?

 MAYUH orang kemayaharitu enda nemu sapa ke ulih dipechayaka sida. Sida enda nemu sekalika orang ti dipebasaka sida nya baka—orang politik, bala saintis, sereta orang ke bedagang—deka seruran ngereja utai ti manah ke sida tauka enda. Nambahka nya, sida enda bebasaka bala tuai pengarap ke madahka diri Kristian sereta nitihka Bup Kudus. Nya meh kebuah kitai enda tekenyit lebuh mayuh orang enda pechayaka Bup Kudus.

2. Nitihka Masmur 119:160, nama utai ke patut diandalka kitai?

² Semua nembiak Jehovah nemu, Jehovah nya ‘Petara ti enda ulih bula’ lalu Iya seruran dekaka utai ti pemadu manah ke kitai. (Isa. 48:17; Heb. 6:18) Kitai nemu kitai ulih pechayaka utai ti dibacha kitai dalam Bup Kudus—kitai pechaya ‘semua adat [tauka, jaku] Petara endang amat magang.’ (Bacha Masmur 119:160.) Kitai setuju enggau utai ti ditulis siku pakar Bup Kudus: “Nadai utai ti dipadahka Petara nya bula tauka enda ulih dikeamatka. Nembiak Petara ulih pechayaka utai ti dipadah Iya laban sida pechayaka Petara ti nyebut utai nya.”

3. Nama deka dikerandauka kitai dalam artikel tu?

³ Baka ni kitai ulih nulung orang bukai pechayaka Jaku Petara sama baka kitai ke pechayaka Jaku Petara? Kitai deka beratika tiga kebuah kitai ulih pechayaka Bup Kudus. Kitai deka beratika (1) utai ti dipadah Bup Kudus enda kala diubah, (2) jaku benabi ba Bup Kudus udah dikeamatka, sereta (3) Bup Kudus bisi kuasa ngubah pengidup.

4. Nama kebuah sekeda orang ngumbai Bup Kudus udah diubah?

⁴ Petara Jehovah udah ngena kira-kira 40 iku lelaki ti tetap ati kena nulis bup dalam Bup Kudus. Taja pia, nadai manuskrip ti asal ke agi bisi kemayaharitu. b Utai ke dikembuan kemayaharitu semina salin ke datai ari salin ke bukai. Tu ngasuh sekeda orang berunding sekalika utai ti dibacha sida dalam Bup Kudus kemayaharitu sama enggau salin ti asal nya. Kala nuan berunding baka ni kitai ulih nentuka utai ti bisi dalam Bup Kudus kemayaharitu sama enggau manuskrip ti asal nya?

5. Baka ni Bup Kudus begian Sempekat Lama dikupi? (Peda gambar ba mua majalah.)

⁵ Kena nyaga pesan Bup Kudus, Jehovah ngasuh nembiak Iya ngupi pesan nya. Jehovah ngasuh bala raja orang Israel ngaga siti salin bup Adat ke dikupi sida empu. Lalu, Iya mega ngasuh orang Lewi ngajar Adat nya ngagai orang bukai. (U-dat. 17:18; 31:24-26; Neh. 8:7) Pengudah orang Judah dilepaska ari nyadi orang tangkap ba Babilon, seraban orang ti landik ngupi berengkah ngaga beberapa iti salin Bup Kudus begian Sempekat Lama. (Esr. 7:6) Raban tu amat bejimat. Nyau kelama, orang ke ngupi tu berengkah ngira ukai semina penyampau leka jaku, tang mega penyampau urup kena nentuka semua utai dikupi enggau betul magang. Tang ketegal sida enda sempurna, sekeda salin tu bisi penyalah ti mit. Taja pia, mayuh salin teks ti sama digaga. Nyadi, penyalah tu ulih ditemu. Baka ni?

6. Baka ni penyalah ba salin Bup Kudus ditemu?

⁶ Bala pakar kemayaharitu udah tetemuka siti chara ti manah kena ngiga penyalah ke digaga orang ke ngupi teks Bup Kudus. Gambarka enti bisi 100 iku lelaki ke diasuh ngupi siti lambar teks ngena jari sida empu. Siku ari sida bisi ngereja penyalah ti mit ba utai ke dikupi iya. Siti chara kitai ulih tetemuka penyalah nya, iya nya enggau mandingka salin iya enggau salin orang bukai. Enggau nya, lebuh beberapa iti manuskrip Bup Kudus dibandingka, bala pakar ulih tetemuka utai ti tetinggal tauka penyalah ke digaga siku tukang ngupi nya.

7. Kati orang ke ngupi Bup Kudus nya ngereja pengawa sida enggau bejimat? Terangka.

⁷ Sida ke ngupi manuskrip Bup Kudus bebendar ngereja nya enggau bejimat. Peratika siti chunto kena nunjukka tu. Manuskrip Bup Kudus begian Sempekat Lama ti pemadu tuai ke penuh nya digaga ba taun 1008 tauka 1009 M. Iya dikumbai Leningrad Codex. Taja pia, baru-baru tu sekeda manuskrip Bup Kudus sereta begian manuskrip ke bukai udah ditemu. Semua manuskrip nya kira-kira 1,000 taun tuai agi ari Leningrad Codex. Sekeda orang engka berunding, pengudah manuskrip nya dikupi mayuh kali sekumbang timpuh ti lebih ari 1,000 taun, utai ke ditulis ba Leningrad Codex nya engka amat bebida enggau manuskrip ti asal. Tang nya enda amat. Lebuh bala pakar mandingka manuskrip ti lama enggau ti baru, sida semina tetemuka mimit aja bida ba leka jaku ke dikena. Tang, reti ba pesan ari Bup Kudus nya enda diubah.

8. Nama bida entara Salin Bup Kudus begian Sempekat Baru enggau salin bup kelia ke bukai?

⁸ Orang Kristian kelia mega nitihka chunto orang ke ngupi Bup Kudus begian Sempekat Lama. Sida enggau bejimat ngaga salin ke 27 iti bup ba Bup Kudus begian Sempekat Baru ke udah nya dikena sida ba gempuru sereta ba pengawa nginjil. Siku pakar ke mandingka  manuskrip Bup Kudus begian Sempekat Baru enggau bup bukai ari jeman ti sama madahka tu pasal manuskrip Bup Kudus: “Secara keseluruhan mayuh agi [manuskrip Bup Kudus begian Sempekat Baru] ke bisi kemayaharitu enti dibandingka enggau bup bukai, . . . lalu manuskrip tu kesuah iya penuh.” Bup Anatomy of the New Testament madahka: “Kitai ulih pechaya utai ti dibacha kitai ba salin [Bup Kudus begian Sempekat Baru] kemayaharitu nya ngenataika mesej ti sama enggau utai ti ditulis bala penulis kelia.”

9. Nitihka Isaiah 40:8, nama utai ti ditemu kitai pasal pesan ari Bup Kudus?

⁹ Pengelama beratus taun, mayuh tukang ngupi udah bebendar ngereja pengawa sida enggau bejimat ngambika ulih ngasilka salin Bup Kudus, nya kebuah kitai bisi salin Bup Kudus ti betul ke ulih dibacha sereta dipelajarka kitai kemayaharitu. c Kitai nemu Jehovah meh ke nentuka jaku Iya ti betul ulih datai ba kitai kemayaharitu. (Bacha Isaiah 40:8.) Endang amat, sekeda orang engka madah taja pan pesan Bup Kudus enda diubah tang tu ukai reti iya jaku Bup Kudus nya datai ari Petara. Nya alai, aram kitai meda sekeda bukti ke nunjukka Bup Kudus nya datai ari Petara.

10. Beri chunto jaku benabi ti udah dikeamatka ke nunjukka utai ti dibacha kitai ba 2 Peter 1:21 nya amat. (Peda gambar.)

¹⁰ Bup Kudus ngundan mayuh jaku benabi ke udah dikeamatka. Sekeda ari jaku benabi tu ditulis beratus taun sebedau iya dikeamatka. Sejarah nunjukka semua jaku benabi nya amat nyadi. Lalu kitai enda tekenyit laban kitai nemu semua jaku benabi dalam Bup Kudus datai ari Jehovah. (Bacha 2 Peter 1:21.) Perundingka jaku benabi ke madahka pasal Babilon ke deka dialahka. Kira-kira ba abad kelapan S.M., nengah kuasa kudus Petara nabi Isaiah nulis pasal Babilon ti bekuasa ke deka dialahka. Iya mega madahka siku lelaki ke benama Sairus deka ngalahka menua nya, lalu iya mega nerangka chara  Sairus deka ngereja nya. (Isa. 44:27–45:2) Isaiah mega madahka Babilon deka dirusakka lalu nadai orang deka diau dia. (Isa. 13:19, 20) Lalu nya meh utai ke amat nyadi. Orang Media enggau Persia ngalahka Babilon kena taun 539 S.M., lalu endur alai menua ti bekuasa nya diatu semina tinggal tembawai aja.—Peda video Bup Kudus Madahka Pengelabuh Babilon ba edisi elektronik bup Idup enggau Lantang Belama Iya! Pelajar 03 poin 5.

11. Terangka baka ni Daniel 2:41-43 benung dikeamatka kemayaharitu.

¹¹ Jaku benabi ba Bup Kudus ukai semina dikeamatka ba jeman kelia; kitai mega ulih meda jaku benabi dikeamatka kemayaharitu. Ambika chunto, perundingka pasal jaku benabi ke dipadah Daniel pasal Kuasa Dunya Anglo-Amerika. (Bacha Daniel 2:41-43.) Jaku benabi nya enggau betul madahka Kuasa Dunya Anglo-Amerika “kering” baka besi tang “bisi mega pengelemi” baka tanah liat. Lalu diatu kitai ulih meda utai nya endang amat. Britain enggau Amerika udah ngayanka kuasa ti besai baka besi. Sida bisi begian ti besai ba pemenang ke diulih di dua iti Perang Dunya lalu terus bisi kuasa bala soldadu ti besai. Taja pia, bala rayat sida empu udah ngasuh kuasa sida nyadi lemi, sida suah angkat ngelaban pengawa bedagang sereta perintah. Siku pakar ba politik dunya madahka: “Nadai menua demokratik ba dunya kemayaharitu ke balat agi bepechah-belah ari segi politik enti dibandingka enggau Amerika Serikat.” Lalu pengelama beberapa taun ti udah, Britain ke mega sebagi ari Kuasa Dunya Anglo-Amerika, mega bepechah-belah laban sida enda sepenemu pasal kaul ti patut dikembuan sida enggau menua bukai ba Kesatuan Eropah. Tu udah ngasuh Kuasa Dunya Anglo-Amerika enda ulih ngereja utai sepeneka ati.

12. Jaku benabi ba Bup Kudus ngasuh kitai andal pasal nama?

¹² Mayuh jaku benabi ba Bup Kudus ke udah dikeamatka suba ngasuh kitai andal agi ngagai semaya Petara ke jemah ila, tentu deka dikeamatka. Kitai ngasaika utai ti sama baka pemasmur ke besampi ngagai Jehovah: ‘Jehovah, aku nyau lelak nganti Nuan ngelepaska aku. Aku manggaika diri ba jaku Nuan.’ (Mas. 119:81) Ba Bup Kudus, Jehovah udah meri kitai “pengidup enggau pengadang ke jemah ila.” (Jer. 29:11) Pengadang tauka harapan kitai ke jemah ila enda bepanggai ba mensia, tang bepanggai ba semaya ari Jehovah. Arapka kitai terus ngemansangka pengarap kitai ba Jaku Petara enggau bebendar agi belajarka jaku benabi dalam Bup Kudus.

13. Nitihka Masmur 119:66, 138, nama siti agi kebuah kitai ulih arapka Bup Kudus?

¹³ Siti agi kebuah kitai ulih arapka Bup Kudus laban jaku lalau Bup Kudus nulung orang lebuh sida nitihka jaku lalau nya. (Bacha Masmur 119:66, 138.) Ambika chunto, laki-bini ke nyau deka sarak diatu gaga ati laban sida nitihka jaku lalau ari Bup Kudus. Bala anak sida gaga ati dalam ruang bilik Kristian ke bisi apai indai ti ibuh sereta sayauka sida.—Eps. 5:22-29.

14. Beri siti chunto ke nunjukka baka ni nitihka jaku lalau ari Bup Kudus udah nulung orang ngembuan pengidup ti manah agi.

¹⁴ Indah penjenayah ti amat jai udah ngubah pengidup sida lebuh sida nitihka jaku lalau ari Bup Kudus. Peratika baka ni jaku lalau ari Bup Kudus udah nulung siku lelaki ke dijil ke benama Jack. d Entara orang ke deka diukum mati, Jack nya penjenayah ti pemadu jai. Tang bisi  sekali, Jack enggau pengawa belajarka Bup Kudus. Ati iya balat ditegu enggau penyiru ke diayanka bala menyadi lelaki ke ngajar Bup Kudus nya, lalu iya pan berengkah belajarka Bup Kudus. Seraya iya nitihka pemendar Bup Kudus dalam pengidup iya, Jack berengkah ngayanka ulah ti manah agi lalu nyadi orang ke manah ati. Nyau kelama, Jack layak nyadi penginjil ke bedau dibaptisa, lalu udah nya iya mega ulih dibaptisa. Iya enggau ransing nginjil pasal Perintah Petara ngagai orang bukai ke dijil lalu udah nulung abis nadai empat iku orang belajarka Bup Kudus. Ba maya iya patut diukum bunuh, Jack udah nyadi orang ti amat bebida. Siku ari bala luyar iya madahka: “Jack ke ditemu aku diatu enda sama enggau Jack ke ditemu aku 20 taun suba. Ajar ari bala Saksi Jehovah udah ngubah pengidup iya.” Taja pan Jack diukum bunuh, tang teladan iya nunjukka kitai ulih arapka Jaku Petara lalu Jaku Petara bisi kuasa ngubah orang nyadi manah agi.—Isa. 11:6-9.

15. Baka ni nitihka pemendar Bup Kudus ngasuh nembiak Jehovah kemayaharitu bebida enggau orang bukai? (Peda gambar.)

¹⁵ Nembiak Jehovah beserakup laban sida nitihka pemendar ari Bup Kudus. (Jhn. 13:35; 1 Kor. 1:10) Pemaik enggau penyerakup entara kitai amat tampak dipeda laban mayuh orang kemayaharitu bepechah-belah ketegal bansa, status sosial, tauka penemu politik ti enda sebaka. Lebuh siku lelaki ti biak ke benama Jean meda penyerakup entara bala nembiak Jehovah, iya berasai amat alit ati. Iya dibesaika ba siti ari menua di Afrika. Lebuh perang sivil nyadi, iya nyadi soldadu tang udah nya rari ngagai menua bukai ti semak dia. Dia, iya betemu enggau Saksi-Saksi Jehovah. Jean madahka: “Aku belajar, orang ke megai pengarap ti bendar enda masuk champur ba politik sereta enda bepechah-belah. Tang sida rinduka pangan diri.” Ku iya agi: “Aku udah ngena pengidup aku ngetanka menua. Tang lebuh aku belajarka pemendar ari  Bup Kudus, aku ngaga pemutus deka ngena pengidup aku gawa ke Jehovah.” Pengidup Jean berubah abis. Ari ke belaban enggau orang bukai ke enda sama enggau iya, diatu Jean madah pasal pemendar ari Bup Kudus ke mai penyerakup ngagai semua orang ke ditemu iya. Jaku lalau ari Bup Kudus udah nulung mayuh orang ari bemacham bansa. Tu bukti ti besai ke nunjukka kitai ulih arapka Jaku Petara.

16. Nama kebuah penting negapka pengandal kitai ngagai Jaku Petara?

¹⁶ Seraya gaya ba dunya tu majak jai-sejai, pengandal kitai ngagai pemendar deka diuji. Orang engka deka ngasuh kitai kakang sekalika Bup Kudus nya amat tauka enda. Lalu bisi mega orang ngasuh kitai kakang sekalika Jehovah udah milih ulun ke tetap ati sereta bepenemu-dalam kena ngiring bala penyembah Iya kemayaharitu. Tang enti kitai yakin Jaku Jehovah nya seruran amat, kitai ulih ngelaban serang ke baka tu ti nyerang pengarap kitai. Kitai “mutuska runding deka ngasika adat [Jehovah] belama iya datai ke ujung.” (Mas. 119:112) Kitai “enda malu” madah ngagai orang bukai pasal pemendar sereta meransang sida idup sejalai enggau nya. (Mas. 119:46) Lalu kitai ulih “enggau sabar sereta gaga ati” tan napi situasi ti pemadu tusah nyengkaum diperinsa.—Kol. 1:11; Mas. 119:143, 157.

17. Ayat taun 2023 ngingatka kitai pasal nama?

¹⁷ Kitai amat beterima kasih ngagai Jehovah laban Iya udah ngemendarka kitai nemu pasal pemendar tu! Pemendar tu nulung kitai berasai tenang, yakin sereta enggau terang nunjuk ngagai kitai chara idup ba dunya ti balat charut tu. Pemendar tu mega meri kitai harapan ti manah ke jemah ila di baruh Perintah Petara. Ayat taun kitai kena 2023 deka nulung kitai mengkang andal semua Jaku Petara nya endang amat!—Mas. 119:160.