1-2. Nama kebuah kitai enggau pengawa Ngingatka Pemati Jesus ninting taun?

 NYAUKA 2,000 taun kelia, Jesus nyerahka nyawa iya ke kitai. Tu ngasuh kitai tau bulih pengidup ti meruan belama iya. Ba malam sebedau iya mati, Jesus ngasuh bala murid iya ngingatka utai ti bepengerindu ke udah dikereja iya. Iya ngasuh sida ngereja siti pengawa ti mudah ke begunaka roti enggau wain.—1 Kor. 11:23-26.

² Kitai ngasika pesan Jesus laban kitai amat rinduka iya. (Jhn. 14:15) Ninting taun, ba musin Ngingatka Pemati Jesus, kitai ngayanka diri beterima kasih ke utai ti udah dikereja iya. Kitai ulih ngereja tu enggau berunding sereta besampi pasal reti pemati Jesus ke semua mensia. Kitai mega gaga ati ngereja mayuh agi ba pengawa nginjil lalu mai mayuh orang ngagai pengawa ti istimewa tu. Pia mega, kitai enggai nejuka sebarang utai nagang kitai ari enggau pengawa Ngingatka Pemati Jesus.

3. Nama deka dipejuraika kitai dalam artikel tu?

³ Bala nembiak Jehovah udah ngereja utai enggau naka ulih ngambika sida ulih ngintu pemati Jesus. Dalam artikel tu, kitai deka bejuraika tiga chara sida ngereja nya: (1) ngintu pengawa Ngingatka Pemati Jesus sama baka chara ti udah diajar Jesus, (2) mai orang bukai enggau pengawa tu, sereta (3) ngintu pengawa tu taja pan napi situasi ti tusah.

4. Nama tanya ke disaut ninting taun ba pengawa Ngingatka Pemati Jesus? Nama kebuah nemu saut ngagai tanya tu amat istimewa ke kitai? (Luke 22:19, 20)

⁴ Ninting taun ba pengawa Ngingatka Pemati Jesus, kitai ningaka siti cheramah ti bepelasarka Bup Kudus. Cheramah nya meri saut ti terang ngagai beberapa iti tanya. Kitai belajarka kebuah mensia begunaka genselan tebus sereta baka ni pemati siku orang ulih mayar dosa ke semua orang. Kitai diingatka pasal reti roti enggau wain sereta sapa ke ulih makai enggau ngirup wain nya. (Bacha Luke 22:19, 20.) Lalu kitai berundingka pengidup jemah ila ti manah ke sida ti bisi harapan idup belama iya ba dunya. (Isa. 35:5, 6; 65:17, 21-23) Saut ngagai tanya tu amat istimewa ke kitai. Mayuh orang enda nemu utai tu, lalu sida enda beterima kasih ke pemesai reti genselan tebus Jesus. Sida mega enda ngintu pengawa Ngingatka Pemati iya nitihka chara ti udah diajar Jesus ngagai bala murid iya. Nama kebuah?

5. Pengudah nyauka semua bala rasul mati, baka ni chara orang ngintu pemati Jesus?

⁵ Enda lama pengudah nyauka semua bala rasul Jesus mati, orang Kristian ti pelesu berengkah nyadi sebagi ari raban gempuru Kristian. (Mat. 13:24-27, 37-39) Sida nyebut pasal “ajar ti tesat ke ngasuh bala murid limpang lalu nitihka sida.” (SKR. 20:29, 30) Siti ari “ajar ti tesat” ke diajar orang Kristian ti pelesu iya nya, Jesus enda nyerahka pengidup iya “sekali aja ke belama iya kena muai dosa mayuh orang” baka ke udah dipadah ba Bup Kudus, tang genselan tebus iya patut diberi mayuh kali. (Heb. 9:27, 28) Kemayaharitu, mayuh orang ti lurus pechayaka ajar ti tesat tu. Sida ngagai gerija ninting minggu—kekadang ninting hari—kena ngintu pengawa Ngingatka Pemati Jesus. Ba gerija Katolik, bala penyembah sida pechaya, maya sida ngintu pengawa tu, roti enggau wain nya berubah nyadi tubuh sereta darah Jesus. Sida ngumbai tubuh enggau darah Jesus dikorbanka tiap kali sida ngambi begian ba pengawa tu. Gerija Kristian ke bukai kurang agi ngintu pengawa Ngingatka Pemati Jesus. Tang sida enda entu meretika reti genselan tebus Jesus. Sekeda orang engka berunding, ‘Kati dosa aku amat ulih diampun ketegal pemati Jesus?’ Nama kebuah sida nanya tanya tu? Laban runding sida udah dikachau enggau orang ke madahka dosa enda ulih diampun nengah pemati Jesus. Baka ni bala murid Jesus ti bendar mutarka semua pekara tu?

6. Ba taun 1872, nama utai ti ditemu seraban Nembiak Bup Kudus?

⁶ Ba ujung abad ke-19, Charles Taze Russell nguluka seraban Nembiak Bup Kudus kena mansik utai dalam Bup Kudus. Sida deka nemu utai ti bendar pasal reti genselan tebus Jesus sereta baka ni pemati iya patut diintu. Ba taun 1872, sida nemu Jesus endang udah meri genselan tebus ke semua mensia. Sida enda nyimpan utai ti udah dipelajarka sida kediri empu tang sida nusui pemendar tu nengah bup, surat khabar, sereta majalah. Enda lama udah nya, sama baka orang Kristian ba abad keterubah, sida berengkah begempuru sekali aja setaun kena ngintu pengawa Ngingatka Pemati Jesus.

7. Baka ni kitai tau bulih penguntung ari pansik ke digaga bala Nembiak Bup Kudus nya?

⁷ Kemayaharitu kitai bulih penguntung ari pansik ke digaga bala Nembiak Bup Kudus suba. Baka ni? Jehovah udah nulung kitai meretika reti genselan tebus Jesus sereta baka ni genselan tebus tu mai penguntung ngagai kitai sereta semua orang. (1 Jhn. 2:1, 2) Kitai mega udah belajar pasal utai ti diajar Bup Kudus bekaul enggau dua harapan ngagai orang ke ngelantangka ati Petara. Pengidup belama iya ba  serega ke 144,000 iku orang sereta pengidup belama iya ba dunya ke bejuta iku orang ke bukai. Kaul kitai enggau Jehovah majak rapat seraya kitai berundingka pemesai pengerindu Iya ke kitai sereta penguntung ke diulih kitai ari genselan tebus Jesus. (1 Pet. 3:18; 1 Jhn. 4:9) Nya alai baka bala menyadi Kristian kitai suba ti tetap ati, kitai mai orang enggau kitai ngintu pengawa Ngingatka Pemati Jesus sama baka chara ti udah diajar Jesus.

8. Nama udah dikereja nembiak Jehovah kena mai orang datai ngagai pengawa Ngingatka Pemati Jesus? (Peda gambar.)

⁸ Kenyau ari suba, nembiak Jehovah udah mai orang enggau pengawa Ngingatka Pemati Jesus. Berengkah enggau taun 1881, siti jaku gerah ba majalah Menara Jaga mai bala menyadi Kristian begempuru ba siti rumah di Allegheny, Pennsylvania, kena ngintu pengawa ti istimewa nya. Pengudah nya, tiap iti raban gempuru ngintu pengawa Ngingatka Pemati Jesus kediri empu. Ba bulan Mac 1940, bala penginjil dipadah sida ulih mai sapa-sapa ba kandang endur nginjil sida ke bisi ngayanka minat. Ba taun 1960, Betel terubah kali nyediaka surat mai datai ti udah dichelak ngagai raban gempuru. Kenyau ari maya nya, bebiliun iti surat mai datai Ngingatka Pemati Jesus udah disadung. Nama kebuah kitai bebendar mai orang enggau pengawa tu?

9-10. Sapa bulih penguntung ari pengawa kitai ti mai orang datai ngagai pengawa Ngingatka Pemati Jesus? (John. 3:16)

⁹ Siti kebuah kitai mai orang datai ngintu pengawa Ngingatka Pemati Jesus iya nya ngambika sida ti terubah kali datai ulih belajarka pemendar pasal utai ti udah dikereja Jehovah  enggau Jesus ke semua kitai. (Bacha John 3:16.) Kitai ngarapka utai ti dipeda sereta didinga sida ba pengawa Ngingatka Pemati Jesus deka meransang sida belajar mayuh agi sereta nyadi nembiak Jehovah. Tang bisi mega orang bukai ke bulih penguntung.

¹⁰ Kitai mega mai bala menyadi Kristian ti enda aktif agi. Kitai ngereja nya kena ngingatka sida pasal Jehovah ti agi rinduka sida. Mayuh ari sida deka enggau pengawa tu lalu kitai gaga ati lebuh meda sida. Lebuh sida datai ngagai pengawa Ngingatka Pemati Jesus, sida deka ingat baru pasal pengaga ati ti diasaika sida lebuh nyembah Jehovah suba. Peratika chunto Monica. b Iya berengkah nginjil baru lebuh pandemik COVID-19 nyadi. Pengudah enggau pengawa Ngingatka Pemati Jesus kena taun 2021, iya madah: “Pengawa Ngingatka Pemati Jesus kali tu amat istimewa ba aku. Keterubah kali dalam kandang 20 taun, aku ulih nginjil ngagai orang sereta mai sida ngagai pengawa Ngingatka Pemati Jesus. Aku enggau naka ulih mai orang bukai laban aku amat beterima kasih ke utai ti udah dikereja Jehovah enggau Jesus ke aku.” (Mas. 103:1-4) Enda ngira sekalika orang nerima tauka enda, kitai bebendar mai orang ngagai pengawa Ngingatka Pemati Jesus, lalu kitai andal Jehovah beterima kasih ke usaha kitai.

11. Baka ni Jehovah udah merekatka usaha kitai ti bebendar mai orang ngagai pengawa Ngingatka Pemati Jesus? (Hagai 2:7)

¹¹ Jehovah udah meri kitai mayuh berekat lebuh kitai mai orang ngagai pengawa Ngingatka Pemati Jesus. Kena taun 2021, taja pan bisi sekat ketegal pandemik COVID-19, penyampau orang ke datai chukup mayuh iya nya, 21,367,603 iku orang. Penyampau nya nyauka 2.5 kali ganda penyampau Saksi-Saksi Jehovah di serata dunya! Endang amat, Jehovah ukai semina ibuhka penyampau orang ti datai tang Iya ibuhka tiap iku orang ke datai. (Luk. 15:7; 1 Tim. 2:3, 4) Kitai ulih yakin lebuh kitai mai orang datai enggau pengawa tu, Jehovah benung nulung kitai ngiga sida ti ngembuan ati ti manah.—Bacha Hagai 2:7.

12. Nama ulih ngasuh kitai tusah deka ngintu pengawa Ngingatka Pemati Jesus? (Peda gambar.)

¹² Jesus madahka, ba Hari ti Penudi, kitai deka napi mayuh penusah —sakal ari diri sebilik, diperinsa, perang, penyakit berampit, enggau mayuh agi. (Mat. 10:36; Mrk. 13:9; Luk. 21:10, 11) Kekadang, situasi tu ngasuh kitai tusah deka ngintu pengawa Ngingatka Pemati Jesus. Nama udah dikereja bala menyadi kitai kena mutarka penusah nya? Lalu baka ni Jehovah udah nulung sida?

13. Baka ni Jehovah merekatka pemerani enggau pengeran Artem ti deka ngintu pengawa Ngingatka Pemati Jesus taja pan dijil?

¹³ Dijil. Bala menyadi Kristian kitai ke dijil ketegal pengarap sida enggau naka ulih ngintu pengawa Ngingatka Pemati Jesus. Peratika chunto Artem. Kena musin Ngingatka Pemati Jesus ba taun 2020, iya dikurung dalam bilik jil ke pemesai 17 meter persegi. Lima iku orang ke dijil ulih ditepuka ba bilik jil ti sama. Taja pan iya dijil, tang iya ngena utai ti dikemisi iya nyadika roti enggau wain, lalu iya ngaga pelan meri cheramah Ngingatka Pemati Jesus ke penguntung iya empu. Tang orang bukai ke sama dalam bilik jil iya balat nginsap sereta ngena jaku ti kamah. Nama digaga Artem? Iya nanya sekalika sida ulih ngetu ngena jaku ti kamah sereta ngetu nginsap pengelama sejam aja. Artem tekenyit laban sida setuju enggau peminta iya. Artem madahka, “Aku madahka diri  deka nerang ngagai sida pasal pengawa Ngingatka Pemati Jesus.” Taja pan sida madahka diri enggai ninga pasal pengawa nya, tang pengudah sida meda sereta ninga Artem ngintu pengawa Ngingatka Pemati Jesus, sida nyau belabuh nanya iya pasal pengawa nya.

14. Baka ni nembiak Jehovah ngintu pengawa Ngingatka Pemati Jesus taja pan napi pandemik COVID-19?

¹⁴ Pandemik COVID-19. Ketegal pandemik tu, nembiak Jehovah enda ulih betunga mua ngintu pengawa Ngingatka Pemati Jesus. Tang tu enda nagang sida ari ngintu pengawa nya. c Raban gempuru ti bisi internet ulih ngintu pengawa Ngingatka Pemati Jesus nengah konferen video. Tang baka ni enggau bejuta iku orang ke nadai internet? Ba sekeda menua, atur digaga ngambika cheramah nya ulih dimainka nengah televisyen tauka radio. Nambahka nya, pampang opis mega ngerikut cheramah nya dalam lebih ari 500 bansa jaku ngambika sida ti diau ba endur pesisir mega ulih ngintu pengawa Ngingatka Pemati Jesus.  Lalu bala menyadi lelaki ti tetap ati ngatur ngambika utai ti dirikut tu ulih dianjung ngagai sida ti begunaka nya.

15. Nama ulih dipelajarka nuan ari teladan siku pemelajar Bup Kudus ti benama Sue?

¹⁵ Sakal ari diri sebilik. Ba sekeda orang, cabaran ti pemadu besai kena ngintu pengawa Ngingatka Pemati Jesus iya nya sakal ari diri sebilik. Peratika teladan siku pemelajar Bup Kudus ti benama Sue. Kena taun 2021, ba hari sebedau pengawa Ngingatka Pemati Jesus, Sue madah ngagai pengajar Bup Kudus iya pasal sakal ari sida sebilik. Ketegal nya, iya enda ulih enggau pengawa Ngingatka Pemati Jesus. Pengajar Bup Kudus iya macha Luke 22:44. Udah nya, pengajar iya nerang ngagai iya, lebuh kitai napi penusah kitai patut neladan Jesus lalu bepanggai ba Jehovah enggau besampi sereta arapka Iya enggau pengabis ati. Ba hari siti, Sue nyediaka roti enggau wain lalu meda program sembah pagi ti istimewa ke disediaka ba jw.org. Lemai nya, Sue tama ngagai bilik iya kediri, lalu ningaka program Ngingatka Pemati Jesus nengah telefon iya. Pengudah nya, Sue nuliska tu ngagai pengajar Bup Kudus iya: “Nuan mayuh meransang aku kemari. Aku ngereja semua utai ti ulih kena aku ngintu pengawa Ngingatka Pemati Jesus, lalu Jehovah nulung aku. Aku amat gaga ati sereta beterima kasih!” Ba runding nuan, kati Jehovah ulih nulung nuan enti nuan napi situasi ti sebaka?

16. Nama kebuah kitai ulih andal Jehovah deka merekatka usaha kitai ti bebendar deka ngintu pengawa Ngingatka Pemati Jesus? (Rome 8:31, 32)

¹⁶ Jehovah amat beterima kasih ke usaha kitai ti bebendar deka ngintu pengawa Ngingatka Pemati Jesus. Kitai ulih andal Iya deka merekatka kitai lebuh kitai ngayanka diri beterima kasih ke utai ti udah dikereja Iya ke kitai. (Bacha Rome 8:31, 32.) Nya alai, aram meh semua kitai keran deka ngintu pengawa Ngingatka Pemati Jesus taun tu. Lalu ba musin Ngingatka Pemati Jesus, semua kitai tentu deka ngereja mayuh agi ke Jehovah.