LEKA JAKU asal ke disalin ngagai “kerita kuda” dalam Bup Kudus Salin Dunya Baru ulih merujuk ngagai beberapa iti bansa kerita kuda. (SKR. 8:​28, 29, 38) Pegawai Etiopia nya ngena kerita kuda ti besai agi. Kerita kuda iya ukai mit baka kerita kuda ke dikena bala soldadu tauka kerita kuda ke dikena belumba. Peratika sekeda kebuah ke nyukung penemu tu.

Pegawai Etiopia nya siku pegawai tinggi ke udah bejalai jauh. “Iya gawa ke Kandas, iya nya kuin orang Etiopia. Lalu iya bisi tanggung pengawa ngemataka semua reta kuin nya.” (SKR. 8:27) Menua Etiopia kelia nyengkaum menua Sudan enggau begian pemadu selatan menua Ejip kemayaharitu. Taja pan pegawai nya engka enda ngena kerita kuda ti sama sepemanjai pejalai iya, tang iya tentu bisi mai mayuh utai enggau iya ba pejalai ti jauh nya. Ba abad keterubah Masihi, sekeda ari kerita kuda ke dikena nganjung orang, iya nya kerita kuda tertutup ke bisi empat roda. Ku bup Acts—An Exegetical Commentary madahka: “Kerita kuda ke baka nya ulih mai mayuh agi utai, selesa agi, sereta engka ulih bejalai jauh agi.”

Pegawai Etiopia nya benung macha lebuh Philip mansang betemu enggau iya. Bup Kudus madahka: “Philip belanda ba sepiak kerita kuda nya lalu ninga pegawai nya macha bup Nabi Isaiah.” (SKR. 8:30) Kerita kuda ke dikena mai penumpang ari siti endur ngagai endur ke bukai, enda digaga kena bejalai enggau laju. Ketegal kerita kuda ke baka tu bejalai enggau lubah, tu ngasuh pegawai nya ulih macha, lalu Philip mega ulih belanda ngagai kerita kuda nya.

Pegawai Etiopia nya “ngasuh Philip nepan kerita kuda iya, lalu duduk enggau iya.” (SKR. 8:31) Ba kerita kuda ke dikena belumba, orang ke nepan kerita kuda nya patut bediri. Tang ba kerita kuda ke dikena bejalai, bisi endur duduk ke pegawai Etiopia nya enggau Philip.

Ketegal utai ti dipadah Surat Kereja Rasul bagi 8 sereta fakta sejarah ke bukai, litaricha kitai baru-baru tu ngayanka pegawai Etiopia nya benung nepan kerita kuda ti besai agi ari kerita kuda bala soldadu tauka kerita kuda ke dikena belumba.