1-2. Nama penusah ke engka ditapi nembiak Jehovah ti tetap ati?

 LEBUH kitai napi penusah, pengidup kitai deka berubah tekala nya. Ambika chunto, Luis, a siku menyadi lelaki ti tetap ati, nyau nemu iya bisi kanser. Lutur madahka, iya semina ulih idup beberapa bulan aja. Monika enggau laki iya kisuk gawa ke Jehovah. Tang udah nya, Monika nyau nemu laki iya, ke mega siku tuai gempuru, udah lama belalai ngereja dosa. Olivia, siku menyadi indu ke bedau kawin, patut ninggalka rumah iya laban bisi kabut ti balat deka datai. Pengudah iya pulai baru, iya meda rumah iya udah rusak ketegal kabut nya. Enda memukai, pengidup Luis, Monika, enggau Olivia, berubah tekala nya. Kati nuan kala napi penusah ke udah ngubah pengidup nuan tekala nya?

² Taja pan kitai nyembah Jehovah enggau tetap ati, tang kitai agi napi penusah sereta nyadi sakit baka orang bukai. Kitai mega engka napi sakal tauka perinsa ari sida ke begedika nembiak Petara. Taja pan Jehovah enda ngelindung kitai ari penusah ke baka nya, tang Iya besemaya deka nulung kitai. (Isa. 41:10) Enggau tulung ari Iya, kitai ulih mengkang gaga ati, ngaga pemutus ti manah, sereta terus setia ngagai Iya taja pan napi situasi ti tusah. Dalam artikel tu, kitai deka berandauka empat iti chara Jehovah nulung kitai maya kitai napi penusah. Kitai mega deka berandauka utai ke ulih dikereja kitai ngambika tau bulih penguntung ari tulung ke disediaka Jehovah.

 JEHOVAH DEKA NYAGA NUAN

 3. Lebuh kitai napi situasi ti tusah, nama utai ti tusah dikereja kitai?

³ Lebuh kitai napi penusah, kitai tusah deka berunding sereta ngaga pemutus ti manah. Maya nya, ati kitai balat pedis. Kitai tusah deka berunding laban balat irau. Kitai charut runding lalu enda nemu nama utai ke patut digaga. Peratika asai ati dua iku menyadi indu ke dipadah tadi, lebuh seduai iya napi penusah. Olivia madahka: “Pengudah rumah aku rusak ketegal kabut nya, aku charut runding sereta balat irau.” Monika madahka asai ati iya pasal utai ke digaga laki iya: “Aku ukai semina berasai asa ati aja. Ati aku anchur ketegal utai ti udah digaga iya. Aku tusah deka ngereja pengawa ninting hari. Aku enda nyangka utai tu ulih nyadi ba aku.” Baka ni Jehovah besemaya deka nulung kitai lebuh kitai tusah deka berunding sereta balat irau?

 4. Nitihka Pilipi 4:​6, 7, Jehovah besemaya deka ngereja nama?

⁴ Baka ni Jehovah nulung kitai? Jehovah besemaya deka meri kitai “pengelantang ari Petara.” (Bacha Pilipi 4:​6, 7.) Pengelantang tu merujuk ngagai asai ati ti tenang ke diasaika kitai laban bisi kaul ti rapat enggau Jehovah. Pengelantang tu “ngelui ari utai ke ulih dimeretika kitai.” Reti iya, pengelantang tu jauh manah agi ari ke ulih digambarka kitai. Ambika chunto, kala nuan bebendar besampi ngagai Jehovah, lalu udah nya nuan berasai tenang? Nya meh “pengelantang ari Petara.”

 5. Baka ni pengelantang ari Petara nyaga ati enggau runding kitai?

⁵ Pilipi 4:7 mega madahka, pengelantang ari Petara “deka nyaga ati enggau runding kita.” Dalam jaku asal, leka jaku “nyaga” dikena lebuh nyebut pasal bala soldadu ke nyaga kuta sereta nentuka kuta nya selamat ari serang munsuh. Orang ke diau ba kuta nya berasai selamat, laban sida nemu bisi bala soldadu ke nyaga sida. Baka nya mega, lebuh pengelantang ari Petara nyaga ati enggau runding kitai, kitai berasai tenang, laban kitai nemu kitai likun. (Mas. 4:8) Baka Hanah, taja pan situasi kitai enda berubah tekala nya, tang kitai agi ulih berasai lantang. (1 Sam. 1:​16-18) Lalu lebuh kitai berasai lantang, kesuah iya kitai senang deka berunding sereta ngaga pemutus ti manah.

 6. Nama ulih dikereja kitai ngambika bulih penguntung ari pengelantang ari Petara? (Peda mega gambar.)

⁶ Nama patut dikereja kitai? Lebuh nuan berasai tusah ati, pinta meh Jehovah nyaga nuan. Nuan ulih besampi nyentukka nuan ngasaika pengelantang ari Petara. (Luk. 11:9; 1 Tes. 5:17) Luis, ke disebut tadi, madahka baka ni iya enggau bini iya Ana, ulih tan  lebuh seduai iya nemu iya semina ulih idup beberapa bulan aja. Ku Luis: “Maya nya, amat tusah deka ngaga pemutus pasal chara berubat sereta pekara bukai. Tang sampi nulung kami duai bulih pengelantang taja pan napi situasi ti tusah tu.” Luis enggau bini iya madahka, seduai iya bebendar besampi mayuh kali. Seduai iya minta Jehovah meri pengelantang ba ati enggau ba runding sereta penemu-dalam ngambika ulih ngaga pemutus ti manah. Lalu seduai iya bisi ngasaika tulung ari Jehovah. Enti nuan bisi napi penusah, anang ngetu besampi. Enggau nya, nuan deka ngasaika pengelantang ari Jehovah ke deka nyaga ati enggau runding nuan.—Rom. 12:12.

JEHOVAH DEKA NGASUH NUAN ENTAP

 7. Nama utai ti engka diasaika kitai lebuh napi situasi ti tusah?

⁷ Lebuh kitai napi situasi ti tusah, asai ati, runding, enggau ulah kitai enda baka selama. Maya nya, kitai engka ngasaika mayuh macham emosi. Ana, ke dipadah tadi madahka, iya ngasaika mayuh macham emosi pengudah Luis nadai. Ku iya madah: “Kekadang aku berasai balat tusah ati, lalu aku berengkah kasihka diri empu. Aku mega berasai ringat laban iya udah nadai. Ba maya bukai, aku mega berasai sunyi. Suba, Luis suah ngaga pemutus pasal sekeda utai. Tang pengudah iya nadai, aku berasai stres laban patut ngaga pemutus nya. Bisi maya iya, aku ngasaika diri baka ke dipangka ribut ba tasik.” Baka ni Jehovah deka nulung kitai lebuh kitai dikachau enggau mayuh macham emosi?

 8. Nitihka 1 Peter 5:​10, Jehovah besemaya deka ngereja nama ke kitai?

⁸ Baka ni Jehovah nulung kitai? Jehovah besemaya Iya deka ngasuh kitai entap tauka stabil. (Bacha 1 Peter 5:10.) Lebuh kapal dipangka kabut ba tasik, tu tau ngujungka kapal nya begilik enggau balat. Situasi tu amat bahaya. Kena nentuka kapal nya stabil, kapal nya digaga enggau sirip penstabil ti spesial. Sirip nya ba baruh kapal sereta ba kedua belah kapal nya. Sirip nya nulung kapal enda begilik enggau balat. Enggau nya, orang ba dalam kapal berasai selesa sereta selamat agi. Taja pia, sirip nya bekesan agi enti kapal benung mansang ke depan. Baka nya mega, Jehovah deka ngasuh kitai entap tauka stabil lebuh kitai terus nyembah Iya enggau tetap ati taja pan napi situasi ti tusah.

 9. Baka ni perengka kena mansik ulih nulung kitai mengkang stabil? (Peda mega gambar.)

⁹ Nama patut dikereja kitai? Lebuh nuan enda ulih tan agi ketegal dikachau mayuh macham emosi, enggau naka ulih datai begempuru, nginjil sereta besampi. Endang amat, nuan engka enda ulih ngereja mayuh baka  suba. Tang kingatka, Jehovah enda ngarapka kitai ngereja utai lebih agi ari ke ulih dikereja kitai. (Banding Luke 21:​1-4.) Pia mega, tetapka awak ngambika nuan ulih belajarka Bup Kudus kediri empu sereta belemati. Nengah gerempung Iya, Jehovah udah nyediaka mayuh artikel enggau video ke ulih nulung kitai ngawal emosi kitai maya napi situasi ti tusah. Kena nulung nuan ngiga utai ke diguna nuan, nuan ulih ngena perengka kena mansik baka aplikasi JW Library^® enggau Bup Dikena Saksi-Saksi Jehovah Ngiga Pansik. Monika, ke disebut tadi madahka, iya ngena perengka tu lebuh iya ngasaika emosi ti enda manah balat ngachau iya. Ambika chunto, iya ngiga utai ke bekaul enggau topik “pengeringat.” Ba maya bukai, iya ngiga utai ke bekaul enggau topik “dikhianati” tauka “setia.” Udah nya, iya deka macha utai ke udah dipansik iya nyentukka iya berasai nyamai agi. Ku iya: “Maya aku berengkah ngaga pansik, aku berasai amat irau. Tang seraya aku majak macha utai ke dipansik, aku ulih ngasaika baka Jehovah benung merap aku. Lalu aku sedar, Jehovah faham asai ati aku sereta benung nulung aku.” Tulung ke baka tu mega ulih nulung nuan ngawal emosi nyentukka nuan berasai tenang agi.—Mas. 119:​143, 144.

JEHOVAH DEKA NYUKUNG NUAN

10. Nama utai ke engka diasaika kitai pengudah napi utai ti balat ngenusahka ati?

¹⁰ Enti kitai napi utai ke balat ngenusahka ati, bisi maya iya kitai berasai lemi sereta lelak ba emosi. Kitai engka ngasaika diri baka siku atlet ke bisi bakal. Suba atlet nya ulih belanda enggau jampat. Tang diatu kaki iya pinchat. Baka nya mega, kitai engka senang deka ngereja sekeda utai suba. Tang diatu, kitai ngasaika diri tusah deka ngereja utai nya. Tauka kitai engka lembau deka ngereja utai ke dikerinduka kitai. Baka Elijah, kitai mega engka ngasaika tusah deka angkat, lalu semina deka tinduk aja. (1 Raj. 19:​5-7) Nyadi, nama semaya ke diberi Jehovah ngagai kitai lebuh kitai berasai lemi?

11. Nama siti agi chara Jehovah nulung kitai? (Masmur 94:18)

¹¹ Baka ni Jehovah nulung kitai? Iya besemaya deka nyukung kitai. (Bacha Masmur 94:18.) Baka siku atlet ke bakal, ke begunaka sukung ngambika ulih mindah kin kia, kitai mega begunaka tulung ngambika ulih terus ngereja pengawa ke Jehovah. Ba maya ke baka nya, Jehovah madah: ‘Aku tu Jehovah Petara kita. Aku ngasuh kita kering lalu madahka ngagai kita, “Anang takut. Aku deka  nulung kita.”’ (Isa. 41:13) Raja David kala ngasaika tulung ke baka tu. Lebuh David napi penguji sereta bala munsuh ke deka munuh iya, iya madah ngagai Jehovah: “Nuan udah ngibun aku.” (Mas. 18:35) Tang, baka ni Jehovah ulih nyukung kitai?

12. Lebuh kitai berasai lemi, sapa ulih dikena Jehovah nulung kitai?

¹² Kesuah iya, Jehovah nyukung kitai enggau meransang orang bukai nulung kitai. Ambika chunto, bisi sekali, lebuh David berasai lemi, kaban iya Jonatan ngabas iya ngambika ulih ngeringka iya sereta meransang iya. (1 Sam. 23:​16, 17) Pia mega, Jehovah milih Elisa kena nulung Elijah. (1 Raj. 19:​16, 21; 2 Raj. 2:2) Kemayaharitu, Jehovah ulih ngena diri sebilik, bala kaban, tauka bala tuai gempuru kena nulung kitai. Taja pia, lebuh kitai benung balat tusah ati, kitai engka enggai begulai enggau orang bukai. Kitai enggai dikachau orang. Nya reaksi ti biasa. Nama ulih dikereja kitai ngambika ulih nerima sukung ari Jehovah?

13. Nama patut digaga kitai ngambika bulih penguntung ari sukung Jehovah? (Peda mega gambar.)

¹³ Nama patut dikereja kitai? Seliahka pengingin deka kediri aja. Lebuh kitai ngenyauhka diri ari orang bukai, kitai engka semina berundingka diri empu sereta penanggul ke benung ditapi kitai. Ketegal nya, kitai engka enda ulih ngaga pemutus ti manah. (J-lam. 18:1) Endang amat, semua kitai begunaka awak kediri, kelebih agi lebuh situasi ti balat ngenusahka ati nyadi ba pengidup kitai. Taja pia, lebuh kitai ngenyauhka diri ari orang bukai ba timpuh ti lama, kitai engka benung nulak orang ke dikena Jehovah nulung kitai. Nyadi, taja pan tusah, terima meh tulung ari diri sebilik, bala kaban, enggau bala tuai gempuru. Sida meh ke dikena Jehovah nyukung nuan.—J-lam. 17:17; Isa. 32:​1, 2.

JEHOVAH DEKA NGELANTANGKA ATI NUAN

14. Nama situasi ke ulih ngasuh kitai takut?

¹⁴ Kitai engka napi situasi ke ngasuh kitai berasai takut. Dalam Bup Kudus, bisi sekeda nembiak Petara ti tetap ati madah pasal maya sida berasai balat irau sereta takut ketegal bala munsuh tauka tekanan ke bukai. (Mas. 18:4; 55:​1, 5) Baka nya mega, kitai engka napi sakal ba sekula, ba endur gawa, ari diri sebilik, tauka ari perintah. Lalu ketegal kitai bisi penyakit, kitai engka takut deka mati. Maya napi utai ke baka nya, kitai engka ngasaika diri baka anak mit ke enda ulih ngereja nama-nama.  Baka ni Jehovah nulung kitai ba maya nya?

15. Nitihka Masmur 94:​19, nama utai ke deka dikereja Jehovah ke kitai?

¹⁵ Baka ni Jehovah nulung kitai? Jehovah ngelantangka ati kitai. (Bacha Masmur 94:19.) Masmur tu engka ngasuh kitai berunding pasal siku anak mit indu ke takut sereta tusah tinduk ketegal bunyi guntur. Udah nya, apai iya datai, ngangkat iya, lalu merap iya nyentukka iya tinduk. Taja pan bunyi guntur agi bisi, tang iya berasai nyamai sereta selamat agi lebuh diberap apai iya. Baka anak mit indu ke takut nya, lebuh kitai napi situasi ti ngenakutka, kitai engka begunaka Apai kitai ti ba serega, Jehovah, merap kitai nyentukka kitai berasai tenang agi. Baka ni kitai ulih nerima tulung ke baka nya ari Jehovah?

16. Nama ulih dikereja kitai ngambika Jehovah ulih ngelantangka ati kitai? (Peda mega gambar.)

¹⁶ Nama patut dikereja kitai? Suah agi besampi ngagai Jehovah sereta macha Bup Kudus. (Mas. 77:​1, 12-14) Enti nuan bisi tebiat tu, utai keterubah ke engka dikereja nuan lebuh nuan balat irau, iya nya minta tulung ari Jehovah. Padahka Jehovah utai ke ngasuh nuan takut sereta irau. Udah nya, awakka Iya bejaku enggau nuan nengah Bup Kudus. Enggau nya, nuan deka bulih pengelantang ba ati. (Mas. 119:28) Lebuh nuan berasai takut, nuan mega ulih macha sekeda begian dalam Bup Kudus. Ambika chunto, nuan ulih macha bup Jop, Masmur, Jaku-Dalam, sereta jaku Jesus ba Matthew bagi 6 kena ngulihka pengelantang. Lebuh nuan besampi ngagai Jehovah sereta macha Bup Kudus, nuan deka ngasaika pengelantang ba ati.

17. Nama utai ke ulih dikeandalka kitai?

¹⁷ Kitai ulih andal Jehovah deka seruran nulung kitai lebuh kitai napi utai ti balat ngenusahka ati. Kitai enda kediri. (Mas. 23:4; 94:14) Jehovah besemaya Iya deka nyaga kitai, ngasuh kitai entap, nyukung kitai, sereta ngelantangka ati kitai. Ku Isaiah 26:3 madah pasal Jehovah: ‘Nuan, Jehovah, meri pemaik ti pemadu menyana ngagai orang ke ngembuan juluk ati ti tegap, sereta manggaika pengarap sida ba Nuan.’ Nyadi, arap meh ngagai Jehovah, lalu kereja utai ke ulih nuan ngambika bulih penguntung ari tulung ke disediaka Iya. Enggau nya, nuan deka bulih pengering taja pan napi situasi ti tusah.