1. Nama kebuah Ngingatka Pemati Jesus nya hari ti pemadu penting? (Luke 22:​19, 20)

 BA NEMBIAK Jehovah, Ngingatka Pemati Jesus nya hari ti pemadu penting ninting taun. Semina pengawa nya aja ke diasuh Jesus intu bala murid iya. (Bacha Luke 22:​19, 20.) Bisi mayuh kebuah kitai enda sabar deka ngintu pengawa nya. Aram kitai berandauka sekeda ari kebuah nya.

 2. Nama sekeda kebuah kitai enda sabar deka ngintu pengawa Ngingatka Pemati Jesus?

² Pengawa Ngingatka Pemati Jesus nulung kitai berunding enggau dalam pasal kebuah tebus nya amat berega. Pengawa tu mega ngingatka kitai pasal chara kitai ulih nunjukka diri beterima kasih ngagai genselan tebus Jesus. (2 Kor. 5:​14, 15) Maya nya mega, semua bala menyadi ulih sama “bela diperansang.” (Rom. 1:12) Kelimpah ari nya, ninting taun mayuh ari bala menyadi ke enda aktif bisi enggau pengawa nya. Ketegal sida dikelalu enggau manah ba pengawa nya, sekeda ari sida nyau pulai baru ngagai Jehovah. Lalu mayuh orang ke bisi minat berasai diperansang deka belajarka Bup Kudus ketegal utai ke dipeda sereta didinga sida ba pengawa nya. Nya meh kebuah pengawa Ngingatka Pemati Jesus amat spesial ba kitai!

 3. Baka ni pengawa Ngingatka Pemati Jesus nyerakupka semua menyadi Kristian ba serata dunya? (Peda mega gambar.)

³ Kitai mega enda sabar deka ngintu pengawa Ngingatka Pemati Jesus laban kitai nemu pengawa nya nyerakupka semua menyadi Kristian ba serata dunya. Ba serata dunya, Saksi-Saksi Jehovah begempuru ngintu pengawa tu pengudah mata panas padam. Semua kitai ningaka siti cheramah ke nerangka pasal kebuah tebus nya berega. Kitai nyanyi dua iti lagu puji, nyadung roti enggau wain, lalu enggau pengabis ati nyebut “amin”  ngagai empat iti sampi. Dalam timpuh 24 jam, semua raban gempuru ngereja utai ti sama. Gambarka pengaga ati Jehovah enggau Jesus lebuh seduai iya meda semua kitai beserakup ngemuliaka seduai iya ngena chara tu.

 4. Nama deka dikerandauka kitai ba artikel tu?

⁴ Ba artikel tu, kitai deka berandauka tanya tu: Baka ni kitai ulih nyediaka ati kitai ke pengawa Ngingatka Pemati Jesus? Baka ni kitai ulih nulung orang bukai bulih penguntung ari pengawa tu? Lalu baka ni kitai ulih nulung bala menyadi ke enda aktif? Saut ngagai tanya tu deka nulung kitai besedia ke pengawa ti penting tu.

BAKA NI KITAI ULIH NYEDIAKA ATI KITAI KE PENGAWA NGINGATKA PEMATI JESUS?

 5. (a) Nama kebuah kitai patut berunding enggau dalam pasal kebuah tebus nya berega? (Masmur 49:​7, 8) (b) Nama utai ke dipelajarka nuan ari video Nama Kebuah Jesus Mati?

⁵ Baka ni kitai ulih nyediaka ati kitai ke pengawa Ngingatka Pemati Jesus? Siti chara ti pemadu penting iya nya, berunding enggau dalam pasal rega genselan tebus Jesus Kristus. Nadai siku pan ari kitai ulih ngereja nama-nama kena ngelepaska diri ari dosa enggau pemati. (Bacha Masmur 49:​7, 8; peda mega video Nama Kebuah Jesus Mati?) a Nya alai, Jehovah ngaga atur ngambika Jesus ulih nyerahka nyawa diri kena ngelepaska kitai. Tu pengorbanan ti chukup besai ke udah digaga Jehovah enggau Jesus ke kitai. (Rom. 6:23) Majak kitai belematika utai ke udah dikereja Jehovah enggau Jesus ke kitai, majak agi kitai deka beterima kasihka tebus. Kitai deka berandauka sekeda ari utai ke sanggup digaga Jehovah enggau Jesus ke kitai. Tang terubah iya, kitai deka berandauka nama utai ke disengkaum dalam tebus tu.

 6. Nama reti tebus, lalu nama kebuah Jesus patut nyediaka tebus tu?

⁶ Tebus nya rega ke dibayar kena meli baru utai ke lenyau. Lebuh mensia ti keterubah, Adam, digaga, iya sempurna. Tang, lebuh iya bedosa, iya lenyau peluang idup belama iya ukai aja ke diri empu, tang mega ke bala peturun iya. Kena ngulihka baru utai ke dilenyauka Adam, Jesus nyerahka nyawa diri ti sempurna nyadika tebus. Sepemanjai pengidup iya ba dunya, Jesus “enda ngereja dosa sereta enda nyebut utai ti bula.” (1 Pet. 2:22) Lebuh Jesus mati, iya sempurna, sama baka Adam sebedau iya bedosa. Nyadi, lebuh Jesus nyerahka nyawa iya nyadika tebus, iya ulih mayar rega nyawa ke dilenyauka Adam.—1 Kor. 15:45; 1 Tim. 2:6.

 7. Nama sekeda penguji ke ditapi Jesus lebuh iya ba dunya?

⁷ Lebuh Jesus ba dunya, iya ngasika Jehovah ba semua pekara taja pan bisi maya nya tusah. Lebuh iya agi mit, Jesus patut ngasika apai indai iya ti enda sempurna taja pan iya sempurna. (Luk. 2:51) Lebuh iya nembiak, iya patut belaban enggau tekanan ari orang bukai ke enggai iya ngasika apai indai tauka tetap ati ngagai Jehovah. Lalu lebuh iya besai, Jesus patut belaban enggau penguji ari Sitan, indah penguji ari Sitan ke deka iya badu agi setia ngagai Petara. (Mat. 4:​1-11) Sitan keran deka ngasuh Jesus bedosa ngambika Jesus enda ulih mayar tebus nya.

 8. Nama penusah ti bukai ke patut ditapi Jesus?

⁸ Sepemanjai pengawa nginjil iya ba dunya, Jesus napi mayuh penusah ke bukai. Bala munsuh iya merinsaka iya sereta nguji deka munuh iya. (Luk. 4:​28, 29; 13:31) Iya patut sabar enggau pengelemi bala murid iya. (Mrk. 9:​33, 34) Lebuh iya dipechara, iya diperinsa sereta dipechat. Udah nya, iya diukum bunuh baka siku penjenayah, lalu mati enggau chara  ti amat pedis. (Heb. 12:​1-3) Lalu ba begian ujung penguji nya, iya patut tan kediri empu. Maya nya, Jehovah enda ngelindung iya. b—Mat. 27:46.

 9. Nama asai ati kitai pasal genselan tebus ke disediaka Jesus? (1 Peter 1:8)

⁹ Endang amat, Jesus balat merinsa ketegal deka nyediaka tebus ke kitai. Lebuh kitai berundingka semua pengorbanan ke sanggup digaga Jesus ke kitai, tu ngasuh kitai majak agi rinduka iya.—Bacha 1 Peter 1:8.

10. Nama pengorbanan ke patut digaga Jehovah kena nyediaka tebus?

¹⁰ Nama pengorbanan ke sanggup digaga Jehovah ngambika Jesus ulih mayar tebus nya? Jehovah enggau Jesus bisi kaul ti amat rapat, baka kaul entara siku apai enggau siku anak. (J-lam. 8:30) Gambarka asai ati Jehovah lebuh Iya meda Jesus merinsa napi mayuh penguji ba dunya. Jehovah tentu berasai amat pedis lebuh Iya meda Anak Iya diintu enggau chara ti enda lurus, enda diterima orang, sereta balat merinsa.

11. Beri siti chunto ke nunjukka asai ati Jehovah lebuh Jesus diukum bunuh.

¹¹ Apai indai ke kala lenyau anak dalam pemati nemu pemalat pemedis ke diasaika maya nya. Amat, kitai amat pechayaka harapan pengangkat ari mati. Taja pia, lebuh orang ti dikesayauka kitai mati, kitai agi berasai pedis. Chunto tu nulung kitai faham asai ati Jehovah lebuh Iya meda Anak ti dikesayauka Iya merinsa sereta mati kena 14 Nisan 33 M. c—Mat. 3:17.

12. Nama ulih digaga kitai beberapa minggu sebedau pengawa Ngingatka Pemati Jesus?

¹² Ari diatu nyentuk ngagai hari Ngingatka Pemati Jesus, uji belajarka mayuh agi pasal tebus lebuh nuan belajarka Bup Kudus kediri empu tauka enggau diri sebilik. Kena meh Bup Dikena Saksi-Saksi Jehovah Ngiga Pansik tauka perengka belajarka Bup Kudus ke bukai kena mansik topik tu enggau dalam agi. d Pia mega, titihka jadual ayat ke dibacha maya Ngingatka Pemati Jesus ke bisi disediaka ba Pengidup enggau Pengawa Kristian Kitai—Bup Kereja Kena Gempuru. Lalu ba hari Ngingatka Pemati Jesus, peda meh program Sembah Pagi ti spesial ke udah disediaka. Lebuh kitai nyediaka ati kitai ke pengawa Ngingatka Pemati Jesus, kitai ulih nulung orang bukai bulih penguntung ari pengawa tu mega.—Esr. 7:10.

 NULUNG ORANG BUKAI BULIH PENGUNTUNG

13. Nama utai ti keterubah ke ulih digaga kitai kena nulung orang bukai bulih penguntung ari pengawa Ngingatka Pemati Jesus?

¹³ Baka ni kitai ulih nulung orang bukai bulih penguntung ari pengawa Ngingatka Pemati Jesus? Keterubah, kitai patut mai sida enggau pengawa tu. Kelimpah ari mai orang ke ditemu kitai ba pengawa nginjil, kitai mega ulih ngaga lis orang ke dikelala kitai ngambika kitai ulih mai sida mega. Orang ke dalam lis tu ulih nyengkaum kaban belayan kitai, orang ke sama kereja, kawan ba sekula, sereta orang bukai ke dikelala kitai. Enti sema kitai enda chukup surat mai datai ke dichelak, kitai ulih nganjung link surat mai datai versi elektronik ngagai sida. Ni nemu, semua usaha ke digaga kitai nya, ulih mai mayuh agi orang datai enggau pengawa tu.—P-jar. 11:6.

14. Padahka pemanah iya enti kitai meri surat mai datai secara peribadi ngagai orang ke dikelala kitai.

¹⁴ Lebuh nuan secara peribadi meri surat mai datai ngagai orang ke dikelala nuan, sida engka berasai diperansang deka enggau pengawa tu. Peratika pengalaman tu. Siku menyadi indu tekenyit lebuh laki iya ke ukai Saksi madahka, iya deka enggau pengawa Ngingatka Pemati Jesus. Nama kebuah iya tekenyit? Laban suba iya udah mayuh kali meransang laki iya sama ngintu pengawa tu, tang laki iya enggai. Nama kebuah kali tu laki iya ngubah runding iya? Ku laki iya: “Aku bisi nerima surat mai datai ngagai pengawa tu.” Udah nya iya nerangka, siku tuai gempuru ke dikelala iya udah mai iya secara peribadi ngagai pengawa tu. Asil iya, laki iya udah enggau pengawa Ngingatka Pemati Jesus ba taun nya sereta terus ngereja nya, indah betaun-taun udah nya.

15. Nama patut dikingatka kitai lebuh mai orang ngagai pengawa Ngingatka Pemati Jesus?

¹⁵ Kingatka, lebuh kitai mai orang ngagai pengawa Ngingatka Pemati Jesus, sida engka bisi tanya, kelebih agi enti sida nadai kala enggau gempuru kitai. Nyadi, kitai ulih berundingka utai ke deka ditanya sida, lalu nyediaka saut ngagai tanya sida. (Kol. 4:6) Ambika chunto, sekeda ari sida engka nanya: ‘Nama deka nyadi ba pengawa nya?’ ‘Berapa lama pengawa nya?’  ‘Nama gari ke patut dikena aku?’ ‘Kati aku patut mayar nama-nama enti ka enggau pengawa tu?’ ‘Kati kita bisi ngumpul duit pupu?’ Lebuh kitai mai orang ngagai pengawa tu, kitai ulih nanya sida, “Kati nuan bisi tanya?” lalu udah nya kitai ulih nyaut tanya iya. Kitai mega ulih ngena video Ngingatka Pemati Jesus enggau Nama Nyadi ba Palan Gempuru? kena nulung orang nya nemu chara gempuru kitai dipejalaika. Lalu ba pelajar 28 ari bup Idup enggau Lantang Belama Iya! bisi mayuh poin ti manah ke ulih dikunsika kitai.

16. Nama agi tanya ke bukai ke deka ditemu sida ke baru enggau pengawa Ngingatka Pemati Jesus?

¹⁶ Pengudah Ngingatka Pemati Jesus, orang ke baru enggau pengawa nya engka bisi tanya ke bukai. Sida engka berunding: ‘Nama kebuah nadai orang makai roti enggau ngirup wain?’ Tauka enti bisi pan, ‘Nama kebuah semina mimit aja?’ ‘Ni penyuah kita ngintu pengawa Ngingatka Pemati Jesus?’ ‘Kati semua gempuru Saksi-Saksi Jehovah dipejalaika enggau chara ti sama?’ Taja pan tanya tu bisi dikerandauka ba cheramah Ngingatka Pemati Jesus, tang sida engka begunaka mayuh agi penerang. Ba jw.org, bisi siti artikel ke betajuk “Nama Kebuah Chara Saksi-Saksi Jehovah Ngingatka Hari Pemati Jesus Bebida ari Pengarap Bukai?” ke ulih nulung kitai nyaut sekeda ari tanya sida. Sebedau, lebuh, enggau pengudah pengawa nya, kitai deka ngereja nama-nama aja kena nulung sida “ke bisi pengingin deka nengah jalai ke nuju ngagai pengidup ti meruan belama iya” bulih penguntung ari pengawa tu.—SKR. 13:48.

TULUNG SIDA KE ENDA AKTIF

17. Baka ni bala tuai gempuru ulih nulung sida ke enda aktif? (Esekiel 34:​12, 16)

¹⁷ Maya musin Ngingatka Pemati Jesus, baka ni bala tuai gempuru ulih nulung sida ke enda aktif? Ayanka meh pengibuh ngagai bala menyadi ke enda aktif. (Bacha Esekiel 34:​12, 16.) Sebedau hari Ngingatka Pemati Jesus, giga meh semua sida enti ulih. Padahka ngagai sida, nuan ibuhka sida lalu nuan enggau naka ulih deka nulung sida. Bai sida datai ngagai pengawa Ngingatka Pemati Jesus. Enti sida bisi  datai, terima meh sida enggau manah. Pengudah pengawa nya, anang ngetu ngabas tauka nelefon sida, lalu enggau naka ulih nulung sida pulai baru ngagai Jehovah.—1 Pet. 2:25.

18. Baka ni semua kitai ulih nulung bala menyadi ke enda aktif? (Rome 12:10)

¹⁸ Semua kitai ulih nulung sida ke enda aktif ke datai ngagai pengawa Ngingatka Pemati Jesus. Kitai ulih ngayanka pengerindu, pemanah ati, sereta basa ngagai sida. (Bacha Rome 12:10.) Kingatka, sida engka tusah deka datai baru ngagai gempuru. Sida engka berasai takut, enggaika sida enda diterima enggau manah. e Nyadi, anang meh nanya utai ke ulih ngemaluka sida tauka nyebut utai ti ulih ngemediska sida. (1 Tes. 5:11) Sida ke enda aktif tu bala menyadi Kristian kitai. Lalu kitai gaga ati ulih begulai baru enggau sida nyembah Jehovah!—Mas. 119:176; SKR. 20:35.

19. Nama penguntung iya lebuh kitai ngingatka pemati Jesus?

¹⁹ Kitai beterima kasih laban Jesus ngasuh kitai ngingatka pemati iya ninting taun. Kitai nemu kebuah pengawa tu amat penting. Lebuh kitai enggau pengawa Ngingatka Pemati Jesus, kitai mai mayuh penguntung ngagai diri empu enggau orang bukai. (Isa. 48:​17, 18) Pengerindu kitai ke Jehovah enggau Jesus deka nyadi majak dalam. Kitai nunjukka diri beterima kasih enggau utai ke udah digaga seduai iya ke kitai. Kaul kitai enggau bala menyadi Kristian deka nyadi majak rapat, lalu kitai mega nulung orang bukai belajar chara sida mega tau bulih penguntung ari tebus nya. Aram meh kitai nyediaka diri ke hari ti pemadu penting tu, iya nya hari Ngingatka Pemati Jesus!