1. Baka ni kitai ulih ngagaka ati Jehovah?

 GAMBARKA nuan meri sesiku orang siti pemeri ti amat manah sereta beguna. Nuan tentu berasai tusah ati enti iya nyimpan pemeri nuan dalam kutak, lalu enda agi ibuhka pemeri nuan. Tang nuan tentu gaga ati enti iya ngena pemeri nya, lalu ngayanka diri beterima kasih. Nama kaul sempama tu enggau pemeri tebus ari Jehovah? Jehovah udah meri Anak Iya nyadika tebus ke kitai. Nyadi, Jehovah tentu gaga ati lebuh kitai ngayanka diri beterima kasihka pemeri ti berega nya sereta ke pengerindu Iya ke udah meransang Iya nyediaka tebus nya.—Jhn. 3:16; Rom. 5:​7, 8.

2. Nama deka dikerandauka kitai dalam artikel tu?

² Nyau kelama, kitai engka badu agi ngumbai tebus nya pemeri ti berega. Enti utai tu nyadi, nya baka ke kitai nepu pemeri ti berega ari Petara tu dalam siti kutak, lalu enda berundingka pemeri nya agi. Kena nagang utai tu nyadi, kitai patut suah berundingka utai ti udah digaga Petara enggau Jesus ke kitai. Nya meh tuju artikel tu. Kitai deka berandauka berekat ke deka diulih kitai diatu sereta ke jemah ila ari tebus. Kitai mega deka beratika baka ni kitai ulih ngayanka diri beterima kasihka pengerindu Jehovah, kelebih agi diatu maya musin Ngingatka Pemati Jesus.

BEREKAT KE DIULIH KITAI DIATU

3. Nama siti berekat ke diulih kitai ari tebus diatu?

³ Kitai udah bulih berekat ari genselan tebus Jesus diatu. Ambika chunto, ketegal tebus nya, Jehovah ulih ngampunka dosa kitai. Jehovah enda ibuh ngampunka dosa kitai, tang Iya  deka ngereja nya. Siku pemasmur madahka asai beterima kasih iya laban Jehovah udah ngampunka dosa iya. Ku iya madah: “Nuan endang manah enggau kami, sereta ngampun.”—Mas. 86:5; 103:​3, 10-13.

4. Jehovah nyediaka tebus ke sapa? (Luke 5:32; 1 Timoti 1:15)

⁴ Sekeda orang engka ngasaika diri enda layak diampun Jehovah. Kebendar iya, nadai siku pan ari kitai ke layak diampun. Rasul Paul nemu iya “enda layak dikumbai rasul.” Taja pia, iya madahka: “Ketegal pemanah ati Petara ti besai, aku ulih nyadi rasul.” (1 Kor. 15:​9, 10) Jehovah ngampunka kitai lebuh kitai nesal ati ke dosa kitai. Nama kebuah? Laban Jehovah rinduka kitai, ukai ketegal kitai layak nerima ampun ari Iya. Nyadi, enti nuan berasai asa laban ngumbai diri enda layak nerima ampun ari Jehovah, kingatka meh, Jehovah ukai meri tebus ngagai orang ti sempurna. Tang Iya meri tebus ngagai orang ti enda sempurna, ke nesal ati ke dosa sida.—Bacha Luke 5:32; 1 Timoti 1:15.

5. Kati Jehovah mesti ngampunka kitai? Terangka.

⁵ Nadai siku pan ari kitai ulih ngumbai Jehovah mesti ngampunka kitai ketegal kitai udah betaun-taun gawa ke Iya. Endang amat, Jehovah menghargai semua utai ke digaga kitai ke Iya. (Heb. 6:10) Tang Iya meri genselan tebus Anak Iya ke kitai secara pechuma, ukai kena mayar pengawa kitai ke Iya. Nyadi, kitai enda patut ngumbai Jehovah mesti ngampunka kitai ketegal kitai udah ngereja mayuh utai ke Iya. Enti kitai bisi runding ke baka nya, tu nunjukka Jesus enda ibuh mati ke kitai.—Banding Galatia 2:21.

6. Nama kebuah Paul bebendar gawa ke Jehovah?

⁶ Paul nemu, enda ngira pemayuh pengawa Iya ke Jehovah, tu ukai reti iya Jehovah mesti ngampunka iya. Nyadi, nama kebuah iya bebendar gawa ke Jehovah? Iya ngereja nya laban iya deka ngayanka asai beterima kasih ngagai Jehovah laban udah ngayanka pemanah ati sereta pengasih ngagai iya. (Eps. 3:7) Baka Paul, kitai mega enggau ransing gawa ke Jehovah ketegal kitai deka ngayanka asai beterima kasih, ukai ketegal kitai deka ngulihka pengasih ari Jehovah.

7. Nama siti agi berekat ke diulih kitai ari tebus diatu? (Rome 5:1; James 2:23)

⁷ Siti agi berekat ke diulih kitai ari tebus diatu, iya nya kitai ulih ngembuan kaul ti rapat enggau Jehovah. a Baka ke dipadah ba artikel sebedau tu, lebuh kitai ada, kitai bedau bisi kaul enggau Petara. Tang ketegal tebus, kitai ulih “bebaik enggau Petara” lalu ngembuan kaul ti rapat enggau Iya.—Bacha Rome 5:1; James 2:23.

8. Nama kebuah kitai beterima kasih laban ulih besampi ngagai Jehovah?

⁸ Ketegal kitai bisi kaul ti rapat enggau Jehovah, kitai ulih besampi ngagai Iya. Jehovah ukai semina ninga sampi kitai lebuh kitai begempuru, tang Iya mega ninga sampi ke dipadah tiap iku kitai lebuh kitai kediri. Lebuh kitai besampi, pengirau kitai majak kurang. Tang ukai nya aja penguntung ke diulih kitai. Sampi mega ulih ngerapatka agi kaul kitai enggau Petara. (Mas. 65:2; Jas. 4:8; 1 Jhn. 5:14) Lebuh Jesus ba dunya, iya suah besampi ngagai Jehovah laban iya nemu Jehovah mendingka sampi iya. Iya mega nemu sampi ulih ngasuh kaul iya enggau Apai iya mengkang tegap. (Luk. 5:16) Kitai amat beterima kasihka genselan tebus Jesus laban udah muka jalai ngambika kitai ulih nyadi kaban Jehovah, lalu bejaku enggau Iya nengah sampi.

 BEREKAT KE DIULIH KITAI JEMAH ILA

9. Nama berekat ke deka diulih nembiak Jehovah jemah ila ari tebus?

⁹ Nama berekat ke deka diulih nembiak Jehovah jemah ila ari tebus? Jehovah deka meri sida pengidup ti meruan belama iya. Mayuh orang enda pechaya mensia ulih idup belama iya laban kenyau ari suba mensia mati. Tang tuju asal Jehovah, iya nya ngambika mensia idup belama iya. Enti sema Adam enda bedosa, kitai tentu ulih idup belama iya, lalu nadai orang deka ngumbai pengidup ke baka nya enda ulih nyadi. Taja pan kitai tusah deka ngambarka pengidup ti meruan belama iya, tang kitai pechaya utai tu ulih nyadi. Tu ketegal kitai nemu, Jehovah udah mayar rega ti pemadu tinggi, iya nya nyawa Anak Iya Empu ngambika utai tu ulih nyadi.—Rom. 8:32.

10. Nama berekat ke dianti sida ke dipilih ngagai serega sereta raban bedus ti bukai?

¹⁰ Taja pan pengidup ti meruan belama iya berekat ke jemah ila, tang Jehovah deka kitai berunding pasal nya diatu. Sida ke dipilih ke serega gaga ati nganti pengidup sida ba serega, alai sida enggau Kristus deka merintah dunya. (Pem. 20:6) Raban bedus ti bukai enda sabar deka idup belama iya ba dunya Paradais. Maya nya, nadai agi pedis, pemerinsa, tauka tusah ati. (Pem. 21:​3, 4) Kati nuan siku ari raban bedus ti bukai, ke bisi harapan idup belama iya ba dunya? Harapan nuan ukai kurang agi berega ari harapan sida ke dipilih idup ba serega. Jehovah ngaga kitai ngambika idup ba dunya. Nyadi, kitai tentu gaga ati laban ulih idup belama iya ba dunya.

11-12. Nama sekeda berekat ke dianti kitai ba dunya Paradais? (Peda mega gambar.)

¹¹ Gambarka pengidup nuan ba dunya Paradais. Nuan enda agi irau pasal sakit tauka mati. (Isa. 25:8; 33:24) Jehovah deka meri nuan semua utai ti manah ti dikinginka nuan. Nama utai ke deka dipelajarka nuan? Kati nuan deka belajar mayuh agi pasal jelu? Kati nuan deka belajar main siti perengka musik? Kati nuan deka belajar chara ngelukis? Ba Paradais, kitai begunaka orang ke nemu ngaga reka bentuk  rumah, nirika rumah, sereta betanam. Pia mega, kitai begunaka orang kena nyediaka pemakai, ngaga perengka, sereta nyaga rampa menua. (Isa. 35:1; 65:21) Enti nuan ulih idup belama iya, nuan bisi awak ngereja semua utai tu sereta utai bukai.

¹² Gambarka mega pengaga ati kitai lebuh kitai betemu baru enggau orang ke diangkatka idup baru! (SKR. 24:15) Nuan mega deka gaga ati belajar mayuh agi pasal Jehovah lebuh nuan mansik utai ke udah digaga Iya. (Mas. 104:24; Isa. 11:9) Lalu utai ti manah agi ari semua utai tu, iya nya nuan enda agi ngereja dosa. Nyadi, nuan ulih nyembah Jehovah lalu enda ibuh agi minta pengampun ari Iya. Kati nuan sanggup ngelepaska semua utai tu ketegal deka “ngelantangka diri enggau pengidup ti bedosa enda lama”? (Heb. 11:25) Tentu enda! Pengidup ba dunya Paradais jauh manah agi ari sebarang utai ke bisi ba dunya tu. Kingatka meh, dunya Paradais ukai siti harapan ke dianti kitai belama iya. Enda lama da agi, harapan nya deka dikeamatka. Semua utai tu ulih nyadi ketegal Jehovah amat rinduka kitai nyentukka Iya sanggup meri Anak Iya mati ke kitai.

AYANKA DIRI BETERIMA KASIHKA PENGERINDU JEHOVAH

13. Baka ni kitai ulih ngayanka diri beterima kasihka pengerindu Jehovah? (2 Korint 6:1)

¹³ Baka ni kitai ulih ngayanka diri beterima kasih ngagai Jehovah laban udah meri kitai tebus? Kitai ulih ngenuluka pengawa Jehovah ba pengidup kitai. (Mat. 6:33) Bup Kudus madah, Jesus mati “ngambika orang ti idup enda agi idup ke diri empu, tang ke Kristus ke udah mati ke sida sereta ke udah diidupka baru.” (2 Kor. 5:15) Nyadi, kitai tentu enggai masau pemanah ati Petara ti besai ke udah diayanka Iya ngagai kitai.—Bacha 2 Korint 6:1.

14. Baka ni kitai nunjukka diri arap ngagai iring ke diberi Jehovah?

¹⁴ Kitai mega ulih ngayanka diri beterima kasihka pengerindu Jehovah lebuh kitai arapka iring ari Iya. Baka ni? Kitai ulih ngayanka nya ari pemutus ke digaga kitai. Ambika chunto, kitai engka patut ngaga pemutus pasal pelajar tinggi tauka kereja. Kitai mesti berundingka utai ti dikedekaka Jehovah kereja kitai. (1 Kor. 10:31; 2 Kor. 5:7) Lebuh kitai ngaga pemutus bepelasarka pengarap kitai ba Jehovah, tu deka nulung negapka agi pengarap kitai sereta kaul kitai enggau Iya. Lalu harapan kitai ke deka idup belama iya deka nyadi nyata agi.—Rom. 5:​3-5; Jas. 2:​21, 22.

15. Baka ni kitai ulih ngayanka diri beterima kasih maya musin Ngingatka Pemati Jesus?

¹⁵ Bisi siti agi chara kitai ulih ngayanka diri beterima kasihka pengerindu Jehovah. Kitai ulih ngereja semua utai ke ulih kitai maya musin Ngingatka Pemati Jesus. Kelimpah ari ngaga pelan ngambika ulih datai ngagai pengawa Ngingatka Pemati Jesus, kitai mega ulih mai orang bukai sama enggau kitai. (1 Tim. 2:4)  Nuan ulih nerang ngagai sida ke dibai nuan utai ke deka nyadi ba pengawa nya. Nuan engka ulih nunjuk ngagai sida video Nama Kebuah Jesus Mati? sereta Ngingatka Pemati Jesus ba jw.org. Bala tuai gempuru mega patut mai menyadi ke enda aktif datai ngagai pengawa nya. Gambarka pengaga ati ba serega sereta pengaga ati bala nembiak Jehovah ba dunya lebuh sekeda ari bedus Jehovah ti lenyau pulai baru ngagai raban bedus Iya! (Luk. 15:​4-7) Maya Ngingatka Pemati Jesus, kitai ukai aja deka ngelaluka pangan diri, tang mega sida ke baru datai, tauka sida ke udah lama enda enggau pengawa nya. Kitai tentu deka sida ngasaika diri diintu enggau manah.—Rom. 12:13.

16. Nama kebuah kitai patut berunding sekalika kitai ulih ngereja mayuh agi ba pengawa nginjil maya musin Ngingatka Pemati Jesus?

¹⁶ Kati nuan ulih ngereja mayuh agi ba pengawa nginjil maya musin Ngingatka Pemati Jesus? Tu siti chara ti manah kena nunjukka nuan beterima kasihka semua utai ti udah dikereja Jehovah enggau Jesus ke nuan. Enti kitai suah agi nginjil, kitai deka senang agi meda Jehovah nulung kitai, lalu nya deka ngasuh kitai andal agi ngagai Iya. (1 Kor. 3:9) Pia mega, anang enda ingat nitihka ayat ke dibacha maya Ngingatka Pemati Jesus, ke bisi ba bup mit Meresa Ayat Bup Kudus Ninting Hari tauka ba carta ke bisi ba bup kereja tengan minggu. Nuan mega ulih ngena ayat Bup Kudus nya nyadika projek belajarka Bup Kudus kediri empu.

17. Nama utai ti ngagaka ati Jehovah? (Peda mega kutak “ Chara Ngayanka Diri Beterima Kasihka Pengerindu Jehovah.”)

¹⁷ Ketegal situasi nuan, nuan engka enda ulih ngereja semua utai ke dipadah ba artikel tu. Tang kingatka meh, Jehovah meda utai ke bisi ba ati nuan. Iya enda mandingka utai ke ulih dikereja nuan enggau orang bukai. Iya gaga ati lebuh Iya meda nuan ngayanka diri beterima kasihka pemeri tebus.—1 Sam. 16:7; Mrk. 12:​41-44.

18. Nama kebuah kitai beterima kasih ngagai Jehovah sereta Jesus?

¹⁸ Ketegal tebus, dosa kitai ulih diampun, kitai ulih nyadi kaban Jehovah, sereta bisi harapan idup belama iya. Arapka semua kitai ngayanka diri beterima kasihka pengerindu Jehovah, ke udah meransang Iya meri kitai semua berekat ti manah. (1 Jhn. 4:19) Arapka kitai mega ngayanka diri beterima kasih ngagai Jesus, ke amat rinduka kitai nyentukka iya sanggup mati ke kitai!—Jhn. 15:13.