1. Mayuh orang kemayaharitu befokus ngagai sapa?

 ENGKA nuan bisi beratika mayuh orang kemayaharitu ibuhka diri empu lebih agi ari orang bukai. Ambika chunto, sekeda orang bejaku begah pasal diri empu enggau utai ke dijapai sida dalam media sosial. Taja pia, mimit aja orang ke ngemuliaka Petara Jehovah. Dalam artikel tu, kitai deka berandauka nama reti meri Jehovah mulia, lalu nama utai ke deka meransang kitai ngereja nya. Kitai mega deka belajar baka ni kitai ulih meri Petara mulia ke endang enggi Iya sereta baka ni Iya Empu deka ngemuliaka nama Iya jemah ila.

NAMA RETI MERI JEHOVAH MULIA?

2. Baka ni Jehovah mandangka mulia ba Gunung Sinai? (Peda mega gambar.)

² Nama reti mulia? Dalam Bup Kudus, leka jaku “mulia” ulih merujuk ngagai sebarang utai ke ngasuh sesiku orang tampak hebat. Beberapa hari pengudah Jehovah ngelepaska orang Israel ari menua Ejip, Iya mandangka mulia Iya ngagai sida. Gambarka tu: Bejuta iku orang Israel begelumu ba kaki Gunung Sinai. Sida deka ninga utai ke deka dipadah ngagai sida. Udah nya, gunung nya dibalut remang ti tebal. Enda memukai, asap ngelingi gunung nya. Tanah balat amat begegar, lalu bisi kilat, guntur, enggau bunyi terumpit ti amat inggar. (P-sut. 19:​16-18; 24:17; Mas. 68:8) Lebuh Jehovah mandangka mulia Iya, tu tentu ngasuh orang Israel amat alit ati.

3. Baka ni kitai ulih ngemuliaka Jehovah?

 ³ Mensia mega ulih meri mulia ngagai Jehovah. Siti ari chara kitai meri Jehovah mulia, iya nya madah ngagai orang bukai pasal kuasa Iya ti besai sereta sifat-sifat Iya. Kelimpah ari nya, kitai mega ngemuliaka Jehovah lebuh kitai muji Iya laban udah nulung kitai mujur ngereja sesiti utai. (Isa. 26:12) Raja David ngayanka teladan ti manah pasal ngemuliaka Jehovah. Lebuh iya besampi ngagai Jehovah ba depan orang Israel, iya madah: “Nuan endang besai sereta bekuasa, bemulia, pemadu manah, lalu endang Raja. Semua utai di serega enggau di dunya endang enggi Nuan magang.” Pengudah David abis besampi, ‘semua orang ke begempuru lalu muji Jehovah.’—1 Ban. 29:​11, 20.

4. Baka ni Jesus meri mulia ngagai Jehovah?

⁴ Lebuh Jesus ba dunya, iya ngemuliaka Apai iya lebuh iya madahka, Jehovah ke meri iya kuasa ngaga kereja ajih. (Mrk. 5:​18-20) Jesus mega ngemuliaka Jehovah ari chara iya bejaku pasal Apai iya sereta chara iya ngintu orang bukai. Bisi sekali, Jesus ngajar ba balai gempuru. Ba dia, bisi siku indu ke sakit pengelama 18 taun ketegal dirasuk melikat ti jai. Ketegal nya, indu nya bungkuk lalu enda ulih bediri rurus. Indu nya tentu balat merinsa. Jesus faham utai ke diasaika indu nya, lalu deka nulung iya. Nyadi, Jesus ngangauka indu nya, lalu bejaku enggau nelap ngagai iya. Jesus madah: “Endu, nuan udah digeraika ari penyakit nuan.” Udah nya, Jesus ngengkahka jari iya ba atas indu nya. Tekala nya, indu nya ulih bediri rurus lalu ngemuliaka Petara. Indu nya amat beterima kasih laban Jehovah udah ngeraika iya! (Luk. 13:​10-13) Indu nya bisi kebuah ti manah ngemuliaka Jehovah, lalu pia mega enggau kitai.

NAMA MERANSANG KITAI NGEMULIAKA JEHOVAH?

5. Nama sekeda kebuah kitai bebasaka Jehovah?

⁵ Kitai ngemuliaka Jehovah laban kitai amat bebasaka Iya. Kitai bisi mayuh kebuah bebasaka Iya. Jehovah nya Petara ti pemadu bekuasa, lalu kuasa Iya enda nemu abis. (Mas. 96:​4-7) Penemu-dalam Iya terang dipeda ari utai ke digaga Iya. Iya udah meri kitai pengidup sereta semua utai ke diguna kitai ngambika ulih idup. (Pem. 4:11) Iya setia. (Pem. 15:4) Tiap iti utai ke digaga Iya tentu mujur, lalu Iya selalu ngamatka semaya Iya. (Jos. 23:14) Nya meh kebuah Nabi Jeremiah madahka tu pasal Jehovah: “Nadai orang ke baka Nuan ari bala orang ke bepenemu-dalam ari semua bansa, tauka ari bala raja sida.” (Jer. 10:​6, 7) Endang amat, kitai bisi mayuh kebuah bebasaka Apai kitai Jehovah, tang kitai ukai semina bebasaka Jehovah. Kitai rinduka Iya.

6. Nama kebuah kitai rinduka Jehovah?

⁶ Kitai ngemuliaka Jehovah laban kitai amat rinduka Iya. Peratika sekeda sifat Jehovah ke ngasuh kitai amat rinduka Iya. Iya nelap sereta siru. (Mas. 103:13; Isa. 49:15) Jehovah nemu asai ati kitai. Lebuh kitai berasai pedis, Iya pan pedis. (Sek. 2:8) Iya nulung kitai ngelala Iya sereta nyadi kaban Iya. (Mas. 25:14; SKR. 17:27) Iya mega baruh ati. Bup Kudus madah: “Iya mungkukka Diri kena meda langit enggau dunya. Iya ngangkatka orang ti lemi ari debu.” (Mas. 113:​6, 7, NWT) Ketegal semua sifat Jehovah nya, kitai tentu deka ngemuliaka Iya.—Mas. 86:12.

7. Nama basa ti besai ke dikembuan kitai?

⁷ Kitai ngemuliaka Jehovah laban kitai deka orang bukai nemu pasal Iya. Mayuh orang enda nemu utai ti bendar pasal Jehovah. Nama kebuah? Laban Sitan udah  ngerembaika pemula pasal Jehovah, lalu mayuh orang pechayaka pemula nya. (2 Kor. 4:4) Sitan madahka, Jehovah nya Petara ti ringat, enda ibuhka kitai, sereta udah ngasuh kitai balat merinsa ba dunya tu. Tang kitai nemu utai ti bendar pasal Jehovah! Kitai bisi basa ti besai nulung orang ngelala sapa Jehovah ke bendar iya, lalu nulung sida muji Iya. (Isa. 43:10) Masmur 96 bejaku pasal meri mulia ngagai Jehovah. Ari Masmur tu kitai deka belajar, baka ni kitai ulih meri Jehovah mulia ke endang patut diterima Iya.

BAKA NI KITAI ULIH MERI JEHOVAH MULIA KE ENDANG PATUT DITERIMA IYA?

8. Nama siti chara kitai ulih ngemuliaka Jehovah? (Masmur 96:​1-3)

⁸ Bacha Masmur 96:​1-3. Kitai ulih ngemuliaka Jehovah ari utai ke disebut kitai pasal Iya. Ayat tu ngasuh kitai ‘belagu ke Jehovah,’ ‘muji Iya,’ ‘madahka berita manah pasal Iya ti udah ngelepaska kitai,’ sereta ‘madahka mulia Iya ngagai semua bansa.’ Semua tu chara kitai ulih ngemuliaka Apai kitai Jehovah nengah jaku kitai. Bala nembiak Jehovah kelia keran deka madah ngagai orang bukai pasal sifat Jehovah ti manah sereta semua utai ke udah digaga Jehovah ke sida. (Dan. 3:​16-18; SKR. 4:29) Baka ni kitai ulih ngereja utai ti sama?

9-10. Nama utai ke dipelajarka nuan ari pengalaman Angelena? (Peda mega gambar.)

⁹ Peratika pengalaman Angelena, a siku menyadi indu ke diau ba Amerika Serikat. Iya enggau berani bejaku pasal Jehovah ba endur alai iya gawa. Iya baru berengkah gawa ba kompeni nya. Ketegal nya, iya dibai ngagai siti aum alai semua orang ke baru gawa ba kompeni nya diberi peluang bejaku pasal latar belakang sida. Angelena nyediaka sekeda gambar kena nunjukka pengaga ati iya nyadi siku ari Saksi-Saksi Jehovah. Taja pia, chun-chun sebedau iya bejaku, siku pekereja madahka diri kala dibesaika sebagai Saksi-Saksi Jehovah. Iya berengkah bejaku jai pasal bala Saksi sereta utai ke dipechayaka kitai. Ku Angelena madah: “Aku amat takut! Tang aku nemu, utai ke disebut iya pasal Jehovah enda betul. Nyadi aku berunding: ‘Aku mesti bejaku! Aku mesti madah ngagai sida sapa Jehovah ke bendar iya.’”

¹⁰ Pengudah pekereja nya abis bejaku, Angelena besampi dalam ati. Udah nya, iya enggau nelap madah ngagai pekereja nya:  “Latar belakang aku pan sama ngau nuan. Aku dibesaika sebagai Saksi-Saksi Jehovah, lalu aku agi siku Saksi.” Taja pan situasi nya tegang, tang Angelena mengkang tenang. Iya nunjukka gambar iya enggau bala kaban iya ke gaga ati nyembah Jehovah. Iya mega enggau basa nerang pasal pengarap iya. (1 Pet. 3:15) Nama asil iya? Lebuh Angelena abis bejaku, pekereja nya udah tenang. Iya indah nyebut sekeda pengingat ti manis lebuh iya dibesaika sebagai Saksi-Saksi Jehovah. Ku Angelena madah: “Nama Jehovah endang patut dijaga. Aku ngasaika nya siti basa laban ulih nusui utai ti bendar pasal Iya.” Au, taja pan orang bukai enda bebasaka Jehovah, tang kitai bisi basa ti besai laban ulih muji sereta ngemuliaka Iya.

11. Ari suba nyentukka diatu, baka ni nembiak Jehovah nitihka prinsip ba Masmur 96:8?

¹¹ Bacha Masmur 96:8. Kitai ulih ngemuliaka Jehovah ngena utai ti dikemisi kitai. Bala nembiak Jehovah seruran ngemuliaka Iya nengah chara tu. (J-lam. 3:9) Ambika chunto, orang Israel meri duit sereta utai ti berega kena nulung nirika sereta nyaga Rumah Sembiang. (2 Raj. 12:​4, 5; 1 Ban. 29:​3-9) Bala murid Jesus nulung iya enggau bala rasul iya “ngena reta sida.” (Luk. 8:​1-3) Orang Kristian ba abad keterubah mega nganjung duit ngagai bala menyadi sida ke napi lapar pungkang. (SKR. 11:​27-29) Kemayaharitu, kitai mega ulih ngemuliaka Jehovah nengah pemeri sukarela kitai.

12. Baka ni duit pemeri kitai ulih ngemuliaka Jehovah? (Peda mega gambar.)

¹² Peratika siti pengalaman ke nunjukka baka ni duit pemeri kitai ulih ngemuliaka Jehovah. Ba taun 2020, menua Zimbabwe bisi kemarau ti panjai. Mayuh orang nyauka mati ketegal nadai pemakai. Tu mega nyengkaum siku menyadi indu ke benama Prisca. Taja pan bisi kemarau, Prisca tetap nurun nginjil tiap Hari Tiga enggau Hari Lima. Iya ngereja nya indah maya musin ngeradu tanah. Bala jiran iya ngeleseka iya laban iya nurun nginjil ari ke betanam. Sida madah: “Nadai utai empa dek ila!” Prisca enggau yakin nyaut: “Jehovah nadai kala ninggalka bala nembiak Iya.” Enda lama udah nya, iya nerima bantu ari gerempung kitai. Iya nerima pemakai sereta utai bukai ke diguna iya asil ari duit pemeri ke diberi kitai. Bala jiran Prisca amat kagum, lalu sida madah ngagai iya: “Petara seruran nulung nuan. Kami pan ka belajar  pasal Iya.” Asil iya, tujuh iku ari jiran iya berengkah datai ngagai gempuru.

13. Nama patut digaga kitai ngambika kitai ulih ngemuliaka Jehovah? (Masmur 96:9)

¹³ Bacha Masmur 96:9. Kitai ulih ngemuliaka Jehovah ari ulah kitai. Bala imam ke gawa ba Rumah Jehovah patut beresi. (P-sut. 40:​30-32) Tang utai ti penting agi, ukai semina beresi ba tubuh, tang ngembuan ulah ti tuchi. (Mas. 24:​3, 4; 1 Pet. 1:​15, 16) Kitai patut bebendar ‘muai pendiau ti lama,’ iya nya ulah sereta pengawa ti enda tuchi. Lalu ‘ngerasukka diri ngena pendiau ti baru,’ iya nya belajar chara berunding sereta ngereja utai ti nunjukka kitai benung neladan Jehovah enggau sifat Iya. (Kol. 3:​9, 10) Enggau tulung ari Jehovah, indah sida ke kala ngereja utai ti amat jai ulih berubah lalu ngerasukka pendiau ti baru.

14. Nama ulih dipelajarka nuan ari pengalaman Jack? (Peda mega gambar.)

¹⁴ Peratika pengalaman Jack. Iya siku lelaki ti mangah sereta bahaya nyentukka iya dikumbai “Antu Sitan.” Ketegal pengawa jai ke udah dikereja iya, iya diberi ukum mati. Tang seraya Jack nganti ukum nya dipejalaika, siku menyadi lelaki ke ngabas rumah jil nya, mai iya belajarka Bup Kudus. Jack pan setuju. Taja pan Jack udah ngereja mayuh utai ti jai tang iya ngaga ubah, lalu nyau kelama dibaptisa nyadi siku ari Saksi Jehovah. Ba hari Jack diukum mati, sekeda ari bala jejaga nyabak. Siku pegawai ke gawa ba rumah jil nya madahka: “Suba Jack orang ti pemadu jai ba jil tu. Tang diatu iya siku ari orang ke pemadu manah.” Seminggu pengudah Jack diukum mati, bala menyadi lelaki datai ngagai rumah jil baka selama. Sida ngulu pengawa begempuru ninting minggu. Maya nya sida betemu enggau siku orang ke dijil, ke datai ngagai gempuru nya keterubah kali. Nama utai ke meransang iya datai? Iya amat alit ati meda ulah Jack mayuh berubah, lalu iya deka nemu nama utai ke patut digaga iya kena nyembah Jehovah. Au, ulah kitai ulih ngemuliaka Apai kitai, Jehovah.—1 Pet. 2:12.

BAKA NI JEHOVAH DEKA NGEMULIAKA NAMA IYA JEMAH ILA?

15. Enda lama da agi, baka ni Jehovah deka nunjukka semina Iya aja ke patut disembah? (Masmur 96:​10-13)

¹⁵ Bacha Masmur 96:​10-13. Empat ayat ti penudi ba Masmur 96 ngambarka Jehovah  baka siku Hakim enggau Raja ti lurus. Nyadi, baka ni Jehovah deka ngemuliaka nama Iya enda lama da agi? Iya deka mai pengelurus. Enda lama da agi Iya deka ngerusak Babilon ti Besai, iya nya semua pengarap ti pelesu, ke udah ngenyaika nama Iya ti kudus. (Pem. 17:​5, 16; 19:​1, 2) Sekeda orang ke meda Babilon ti Besai dirusakka engka berengkah nyembah Jehovah begulai enggau kitai. Lalu maya Armagedon, Jehovah deka ngerusakka dunya Sitan ti jai. Semua orang ti begedika Jehovah sereta ngerembaika pemula pasal Iya deka dipunaska. Tang sida ke rinduka Iya, ngasika Iya, sereta keran deka ngemuliaka Iya, deka diselamatka. (Mrk. 8:38; 2 Tes. 1:​6-10) Pengudah penguji ti penudi ba pengujung Seribu Taun Kristus Merintah, Jehovah deka nunjukka Iya endang layak disembah semua orang. (Pem. 20:​7-10) Maya nya, ‘dunya deka penuh laban penemu pasal mulia Jehovah, baka tasik ti penuh laban ai.’—Hab. 2:14.

16. Nama utai ke deka digaga nuan? (Peda mega gambar.)

¹⁶ Enda lama da agi semua orang deka meri Jehovah mulia ke endang patut diterima Iya. Maya nya tentu maya ti ngagitka ati! Tang nyentuk ngagai maya nya, aram meh kitai bebendar ngemuliaka Petara ba tiap iti peluang ke bisi. Kena nulung kitai fokus ngagai pengawa ti penting tu, Raban ti Ngiring udah milih Masmur 96:8 nyadika ayat taun 2025 kitai: ‘Puji meh nama Jehovah ti bemulia.’