1. Nama siti kebuah Jehovah ngaga atur tikah?

 JEHOVAH nya “Petara ti gaga ati,” lalu Iya mega dekaka kitai gaga ati. (1 Tim. 1:11) Iya udah meri kitai mayuh pemeri ngambika kitai ulih gaga ati ba pengidup. (Jas. 1:17) Siti ari pemeri nya atur tikah. Lebuh siku lelaki enggau siku indu kawin, seduai iya besemaya deka rindu sereta bebasaka pangan diri. Enti pengerindu laki bini majak dalam, seduai iya deka amat gaga ati.—J-lam. 5:18.

2. Nama nyadi ngagai mayuh tikah kemayaharitu?

² Sayau amat, mayuh laki bini kemayaharitu enda ingatka semaya ke digaga seduai iya maya seduai iya kawin. Ketegal nya, seduai iya enda gaga ati. Siti riput ari Gerempung Pengerai Sedunya (WHO) madahka, mayuh laki nyamah bini, bejaku kasar enggau bini sida, tauka ngereja utai ti jai ke bukai ngagai bini sida. Laki ke baka tu engka pepura ngelayan bini iya enggau manah ba depan orang, tang ngelayan bini iya enggau chara ti jai ba rumah. Mayuh laki mega meda pornografi, lalu tu ngasuh bini berasai enda dikesayau sereta enda gaga ati.

3. Nama kebuah sekeda laki ngelayan bini sida enggau chara ti enda manah?

³ Nama kebuah sekeda laki ngelayan bini sida enggau chara ti enda manah? Apai sida engka udah ngelayan indai sida enggau chara ti kasar. Nyadi, sida engka ngumbai utai tu enda salah. Ke bukai engka jai enggau bini sida laban nya meh utai ti kesuah iya dikereja bala lelaki ba budaya sida. Sida ngumbai, sida mesti kasar enggau bini sida ngambika bini sida nemu sapa “boss.” Bisi mega enda diajar chara ngawal emosi, baka pengeringat sida. Sekeda lelaki bisi runding ti enda betul pasal  orang indu sereta pengawa seks laban sida suah meda pornografi. Nambahka nya, mayuh pakar madahka, maya pandemik COVID-19, mayuh laki berengkah ngereja utai ti jai ngagai bini sida. Taja pia, nadai siti ari kebuah tu ke ulih nyadi alasan ngambika laki ulih ngereja utai ti jai ngagai bini sida.

4. Nama utai ke enda patut dikereja laki ke nyembah Jehovah, lalu nama kebuah?

⁴ Laki ke nyembah Jehovah mesti bejimat ngambika enda ngembuan runding dunya pasal orang indu. a Nama kebuah? Laban kesuah iya, chara kitai berunding ulih meri kesan ngagai ulah kitai. Rasul Paul nangkan bala menyadi Kristian ba Rome ke dipilih ngagai serega ngambika “badu agi nitihka chara dunya tu.” (Rom. 12:​1, 2) Lebuh Paul nulis ngagai bala menyadi ba Rome, raban gempuru ba dia udah bisi pengelama beberapa taun. Taja pia, jaku Paul nunjukka sekeda ari sida ba raban gempuru nya agi nitihka adat sereta runding dunya tu. Nya kebuah iya ngelalau sida ngambika ngubah runding sereta ulah sida. Jaku lalau nya mega ditujuka ngagai laki ke nyembah Jehovah kemayaharitu. Sayau amat, sekeda ari sida agi nitihka runding dunya tu, sereta indah ngelayan bini sida enggau chara ti jai. b Ba Jehovah, baka ni siku laki patut ngintu bini iya? Kitai ulih tetemuka saut iya ari ayat tema artikel tu.

5. Nitihka 1 Peter 3:​7, baka ni laki patut ngintu bini?

⁵ Bacha 1 Peter 3:7. Jehovah ngasuh bala laki bebasaka bini sida. Laki ke bebasaka bini iya deka ngintu iya enggau chara ti manah sereta bepengerindu. Dalam artikel tu, kitai deka berandauka baka ni laki ulih ngayanka basa ngagai bini. Tang keterubah iya, kitai deka berandauka utai ti enda patut dikereja laki ngagai bini iya.

ANANG NGEREJA UTAI TI NGEMEDISKA BINI NUAN

6. Nama asai ati Jehovah pasal laki ke nyamah bini? (Kolosi 3:19)

⁶ Laki enda patut kasar enggau bini. Jehovah begedika orang ti kasar. (Mas. 11:5) Jehovah kelebih agi begedika laki ke nyamah bini. (Mal. 2:16; bacha Kolosi 3:19 enggau nota kaki.) Nitihka ayat tema kitai, iya nya 1 Peter 3:​7, enti laki enda ngintu bini iya enggau manah, tu deka ngerusakka kaul iya enggau Petara. Jehovah mega enda ningaka sampi iya.

7. Nitihka Epesus 4:​31, 32, nama jenis jaku ke mesti diseliahka bala laki? (Peda mega “Penerang Jaku.”)

⁷ Laki enda patut merak tauka nyebut utai ti jai ngagai bini. Sekeda laki merak tauka nyebut utai ti amat ngemediska ati bini sida. Tang Jehovah begedika pengeringat, ‘ati ti ngeransi, merak pangan diri, sereta jaku ti kasar.’ c (Bacha Epesus 4:​31, 32.) Iya ningaka semua utai. Jehovah ibuhka chara laki bejaku enggau bini, indah lebuh nadai orang ngelingi seduai iya. Laki ke bejaku kasar enggau bini iya, ukai semina ngerusakka kaul iya enggau bini iya, tang mega kaul iya enggau Petara.—Jas. 1:26.

8. Nama asai ati Jehovah pasal pornografi, lalu nama kebuah?

⁸ Laki enda patut meda pornografi. Nama asai ati Jehovah pasal pornografi? Iya begedika nya. Nyadi, laki ke meda pornografi ngerusakka kaul iya enggau Jehovah sereta  enda bebasaka bini iya. d Jehovah dekaka laki mengkang setia ngagai bini iya ukai semina nengah ulah, tang mega ari runding. Jesus madahka, laki ke majak merening ngagai indu enggau ati ti kamah udah butang enggau indu nya “dalam ati iya.” e—Mat. 5:​28, 29.

9. Nama kebuah Jehovah begedika laki ke mejal bini ngereja ulah seks ti ngasuh bini berasai kamah sereta enda dikerindu?

⁹ Laki enda patut mejal bini ngereja utai ti ngasuh bini berasai enda selesa lebuh seduai iya besetubuh. Sekeda laki mejal bini ngereja ulah seks ti ngasuh bini berasai kamah sereta enda dikerindu. Jehovah begedika ulah ke baka nya, ke berundingka diri empu sereta enda ibuhka asai ati bini. Jehovah dekaka laki rinduka bini, ngintu iya enggau manah, sereta bebasaka asai ati iya. (Eps. 5:​28, 29) Baka ni enti siku laki udah ngereja ulah ke baka tu, tauka nyamah bini, tauka meda pornografi? Baka ni iya ulih ngubah runding sereta ulah iya?

NAMA ULIH NULUNG LAKI NGUBAH ULAH IYA TI ENDA MANAH?

10. Nama ulih dipelajarka laki ari teladan Jesus?

¹⁰ Nama ulih nulung laki ngubah ulah iya ti enda manah, ke dikerandauka sebedau tu? Iya ulih bebendar neladan Jesus. Taja pan Jesus nadai kala kawin, tang chara iya ngintu bala murid iya nya teladan ti manah pasal baka ni laki patut ngintu bini sida. (Eps. 5:25) Ambika chunto, peratika utai ti ulih dipelajarka bala laki ari chara Jesus ngintu sereta bejaku enggau bala murid iya.

11. Baka ni Jesus ngintu bala rasul iya?

¹¹ Jesus seruran manah enggau bala rasul iya, lalu ngintu sida enggau basa. Iya enda kala kasar enggau sida. Taja pan Jesus Tuan sida, tang iya enda kala ngena kuasa iya ngasuh sida berasai lemi tauka takut. Tang Jesus ngintu sida enggau baruh ati. (Jhn. 13:​12-17) Iya madah ngagai bala murid iya: “Belajar ari aku, laban aku nelap sereta baruh ati, lalu kita deka bulih pengering baru.” (Mat. 11:​28-30) Ayat nya madah, Jesus nya nelap. Orang ke nelap ukai orang ti lemi. Tang iya bisi pengering kena nagang diri. Lebuh iya pedis ati, iya mengkang tenang sereta ulih ngawal emosi iya.

12. Baka ni chara Jesus bejaku enggau orang?

¹² Jaku Jesus seruran ngelantang sereta meransang orang bukai. Iya enda bejaku kasar ngagai bala murid iya. (Luk. 8:​47, 48) Indah lebuh bala munsuh ngelese sereta nguji deka ngasuh iya ringat, Jesus “enda malas ngena jaku kelese.” (1 Pet. 2:​21-23) Kekadang, Jesus milih enda bemunyi ari ke nyaut enggau chara ti kasar. (Mat. 27:​12-14) Nya teladan ti amat manah ke bala laki ke nyembah Jehovah!

13. Baka ke dipadah ba Matthew 19:​4-6, baka ni laki ulih “mengkang begulai enggau bini iya”? (Peda mega gambar.)

¹³ Jesus ngasuh bala laki mengkang setia ngagai bini sida. Iya ngulang utai ti dipadah Apai iya, iya nya laki patut “mengkang begulai enggau bini iya.” (Bacha Matthew 19:​4-6.) Dalam jaku Gerika, rambai jaku “mengkang begulai” reti iya bepegai rat, baka ke lekat ba siti-siti utai. Nya alai, pengerindu entara laki bini patut amat kuat nyentukka seduai iya ulih disemaka baka lekat enggau pangan diri. Enti siku ari seduai iya ngereja utai ti ngemediska kaling iya, seduai iya bela deka merinsa. Laki ke amat rinduka bini iya deka nulak semua jenis pornografi. Iya enggai  sekali-kali “merening ngagai utai ti [‘nadai guna,’ NWT].” (Mas. 119:37) Baka Jop, iya enggai sekali-kali meda indu bukai enggau ati ti kamah.—Jop 31:1.

14. Nama patut digaga laki ke ngemediska bini iya ngambika ulih ngemanahka baru kaul iya enggau Jehovah sereta enggau bini iya?

¹⁴ Laki ke ngemediska bini iya ari segi fisikal tauka nengah jaku, patut ngereja sekeda utai tu ngambika ulih ngemanahka baru kaul iya enggau Jehovah sereta enggau bini iya. Kesatu, iya mesti sedar utai ke digaga iya nya jai. Nadai utai ke ulih dilalaika ari Petara. (Mas. 44:21; P-jar. 12:14; Heb. 4:13) Kedua, iya mesti badu agi ngemediska bini iya sereta ngubah ulah iya. (J-lam. 28:13) Ketiga, iya mesti minta ampun ari bini iya sereta ari Jehovah. (SKR. 3:19) Iya mega mesti minta Jehovah meri iya pengingin deka ngaga ubah sereta nulung iya ngawal runding, jaku, sereta ulah iya. (Mas. 51:​10-12; 2 Kor. 10:5; Plp. 2:13) Keempat, iya mesti ngereja utai sejalai enggau sampi iya, lalu bebendar begedika semua jenis ulah sereta jaku ti kasar. (Mas. 97:10) Kelima, iya mesti jejampat minta tulung ari bala tuai gempuru. (Jas. 5:​14-16) Keenam, iya mesti ngaga pelan ke deka nulung iya nyeliahka ulah ke baka nya dudi hari. Laki ke meda pornografi mega mesti nitihka enam iti langkah ke dipadah ditu. Jehovah deka nulung iya seraya iya ngubah ulah iya. (Mas. 37:5) Tang, enda chukup enti laki semina badu ngereja utai ti ngemediska bini iya. Iya mega patut belajar ngayanka basa ngagai bini iya. Baka ni iya ulih ngereja nya?

BAKA NI LAKI ULIH NGAYANKA BASA NGAGAI BINI IYA?

15. Baka ni laki ulih ngayanka penyayau ngagai bini iya?

¹⁵ Ayanka penyayau. Sekeda menyadi lelaki ke bisi tikah ti ngagaka ati nentuka diri ngereja utai ninting hari kena ngayanka penyayau ngagai bini sida. (1 Jhn. 3:18) Laki ulih ngayanka penyayau nengah chara ti mit baka megai jari tauka merap bini iya. Iya engka ulih nganjung mesej lalu madahka “Miss you  sayang,” tauka nanya “Udah makai nuan, sayang?” Iya mega ulih nulis kad kena madah iya sayauka bini iya. Lebuh laki ngereja utai ke baka tu, iya bebasaka bini iya sereta negapka tikah seduai iya.

16. Nama kebuah laki patut madah ngagai bini utai ti dikerinduka iya pasal bini iya?

¹⁶ Padah ngagai bini nuan, iya amat berega ba nuan. Laki ke bebasaka bini deka madahka utai ti dikerinduka iya pasal bini iya sereta meransang bini iya. Siti chara iya ulih ngereja tu, iya nya madahka terima kasih ngagai bini iya ke udah mayuh nulung iya. (Kol. 3:15) Lebuh laki madah utai ti dikerindu iya pasal bini iya, bini deka berasai dikesayau sereta dipebasa.—J-lam. 31:28.

17. Baka ni laki ulih ngayanka basa ngagai bini iya?

¹⁷ Ayanka pemanah ati sereta basa. Laki ke rinduka bini deka menghargai bini iya. Iya ngumbai bini iya pemeri ti berega ari Jehovah. (J-lam. 18:22; 31:10) Ketegal nya iya deka ngintu bini iya enggau manah sereta basa, indah lebuh seduai iya besetubuh. Iya enda ngansak bini iya ngereja ulah seks ti ngasuh bini iya berasai enda selesa, kamah, tauka ngachau penemu ati bini iya. f Laki mega bebendar ngetanka ati ti beresi ba mua Jehovah.—SKR. 24:16.

18. Nama utai ke patut digaga bala laki? (Peda mega kutak “ Empat Chara Nyadi Laki ke Bebasaka Bini.”)

¹⁸ Kita ke laki, Jehovah gaga ati lebuh Iya meda nuan bebendar bebasaka bini nuan ari jaku sereta ulah nuan. Nya alai, seliahka meh sebarang utai ke ulih ngemediska bini nuan. Ayanka meh pemanah ati, basa, sereta penyayau, ngagai bini nuan. Enggau chara nya, nuan deka nunjukka diri sayau sereta ngumbai iya berega ba nuan. Lebuh nuan bebasaka bini nuan, nya deka nyaga kaul nuan ti pemadu penting, iya nya kaul nuan enggau Jehovah.—Mas. 25:14.