1. Nama penguntung ke diulih kitai lebuh kitai enggau pengawa Ngingatka Pemati Jesus ninting taun?

 NUAN tentu setuju, tebus nya siti pemeri ti amat berega! (2 Kor. 9:15) Ketegal Jesus mati ke kitai, kitai ulih nyadi kaban Jehovah. Kitai mega bisi harapan idup belama iya. Kitai bisi mayuh kebuah beterima kasihka Jehovah. Iya udah nyediaka tebus laban Iya amat rinduka kitai. (Rom. 5:8) Kena nulung kitai mengkang beterima kasih sereta seruran ingatka utai ti udah digaga Jehovah enggau Jesus ke kitai, Jesus ngasuh kitai enggau pengawa Ngingatka Pemati iya ninting taun.—Luk. 22:​19, 20.

2. Nama deka dikerandauka kitai dalam artikel tu?

² Taun tu, kitai deka ngintu pengawa Ngingatka Pemati Jesus kena Hari Enam, 12 April 2025. Semua kitai tentu deka enggau pengawa nya. Maya musin Ngingatka Pemati Jesus, kitai deka bulih penguntung lebuh kitai belematika a utai ti udah digaga Jehovah enggau Jesus ke kitai. Dalam artikel tu, kitai deka berandauka utai ti ulih dipelajarka kitai ari tebus pasal Jehovah enggau Jesus. Ba artikel ke nangkanka tu, kitai deka berandauka baka ni kitai tau bulih penguntung ari tebus nya sereta baka ni kitai ulih ngayanka diri beterima kasih.

NAMA ULIH DIPELAJARKA KITAI PASAL JEHOVAH ARI TEBUS?

3. Baka ni pemati siku lelaki ulih ngelepaska bejuta iku mensia ari dosa enggau pemati? (Peda mega gambar.)

³ Tebus ngajar kitai Jehovah nya Petara ti adil. (U-dat. 32:4) Lebuh Adam enda ngasika Petara, iya bedosa lalu mati. Ketegal  kitai peturun iya, kitai mega bedosa lalu mati. (Rom. 5:12) Kena ngelepaska kitai ari dosa enggau pemati, Jehovah nganjung Jesus nyadika tebus. Tang, baka ni pemati siku lelaki ti sempurna ulih ngelepaska bejuta iku mensia ari dosa enggau pemati? Rasul Paul nerangka: “Ketegal siku orang [Adam] enda ngasi, mayuh orang bedosa. Pia mega, ketegal siku orang [Jesus] ngasi, mayuh orang deka dikumbai Petara lurus.” (Rom. 5:19; 1 Tim. 2:6) Nyadi, reti ku Paul nya, semua mensia ke bedosa patut mati laban siku lelaki ti sempurna enda ngasika Petara. Nya alai, ngambika ulih dilepaska ari dosa enggau pemati, siku agi lelaki ti sempurna patut ngasika Petara.

4. Nama kebuah Jehovah enda nejuka aja bala peturun Adam ke ngasika Iya idup belama iya?

⁴ Kati Jesus endang patut mati kena nyelamatka kitai? Nama kebuah Jehovah enda nejuka aja bala peturun Adam ke ngasika Iya idup belama iya? Kitai engka ngumbai tu chara ti manah kena mutarka penanggul nya. Tang ba Jehovah, nya ukai chara ti adil. Enti Jehovah ngereja nya, nya baka ke Adam enda kala ngereja dosa ti besai lalu peturun iya sempurna magang. Tang kitai nemu, utai tu enda amat.

5. Nama kebuah kitai yakin Jehovah deka seruran ngereja utai ti betul?

⁵ Enti Jehovah enda nyediaka tebus, lalu nejuka bala peturun Adam idup belama iya taja pan sida enda sempurna, tu reti iya Jehovah udah ngelanggar standard Iya Empu bekaul enggau utai ti betul enggau utai ti salah. Ketegal nya, orang engka berunding sekalika Petara deka ngelanggar standard Iya baru pasal pekara bukai. Ambika chunto, orang engka kakang ati, sekalika Jehovah deka ngamatka semua semaya Iya. Tang kitai enda ibuh irau pasal utai nya. Nama kebuah? Laban Jehovah ngereja utai ti adil, taja pan tu reti iya Jehovah patut nyerahka Anak Iya Empu nyadika tebus. Nya alai, kitai ulih yakin Jehovah deka seruran ngereja utai ti betul.

6. Nama siti agi sifat ti meransang Jehovah nganjung Anak Iya? (1 John 4:​9, 10)

⁶ Bisi siti agi sifat ke meransang Jehovah nganjung Jesus mati ke kitai, iya nya pengerindu Iya. (Jhn. 3:16; bacha 1 John 4:​9, 10.) Jehovah nganjung Anak Iya mati ke kitai laban Iya dekaka kitai idup belama iya sereta nyadi sebagi ari ruang bilik Iya. Perundingka tu: Lebuh Adam bedosa, iya enda ulih agi nyadi sebagi ari ruang bilik Jehovah. Ketegal nya, lebuh kitai ada, kitai mega ukai sebagi ari ruang bilik Petara. Tang ketegal tebus, semua mensia ke arapka Petara sereta ngasika Iya ulih nyadi sebagi ari ruang bilik Iya. Indah diatu, Jehovah ulih ngampunka dosa kitai lalu kitai tau ngembuan kaul ti rapat enggau  Iya sereta enggau bala menyadi Kristian kitai. Au, Jehovah amat rinduka kitai!—Rom. 5:​10, 11.

7. Baka ni pemerinsa ke ditapi Jesus nulung kitai faham penalam pengerindu Jehovah ke kitai?

⁷ Kitai ulih faham agi penalam pengerindu Jehovah ke kitai lebuh kitai berundingka pemedis ke diasaika Jehovah lebuh Iya meda Anak Iya merinsa. Sitan madahka, nadai nembiak Petara deka mengkang tetap ati ngagai Petara enti sida napi penusah. Kena nunjukka utai ti dipadah Sitan nya bula, Jehovah nejuka Jesus merinsa sebedau Jesus mati. (Jop 2:​1-5; 1 Pet. 2:21) Jehovah meda lebuh orang ngeleseka Jesus, bala soldadu malu iya, lalu mantang iya ba tiang. Udah nya, Jehovah mega meda Anak ti dikerinduka Iya mati enggau chara ti amat pedis. (Mat. 27:​28-31, 39) Jehovah bisi kuasa nagang semua utai tu ari nyadi. Ambika chunto, Jehovah ulih nyelamatka Jesus lebuh bala penyakal madahka: “Awakka Petara meh ngelepaska iya, enti Petara deka nerima iya.” (Mat. 27:​42, 43) Tang enti Jehovah ngereja nya, Jesus enda ulih meri nyawa iya nyadika tebus, lalu kitai nadai harapan. Nyadi, Jehovah nejuka Anak Iya tan ngenatka pemerinsa nyentukka Anak Iya mati.

8. Nama kebuah kitai nemu Jehovah berasai tusah ati lebuh meda Anak Iya merinsa? (Peda mega gambar.)

⁸ Ketegal Jehovah nya Petara ti pemadu bekuasa, tu ukai reti iya Jehovah nadai asai ati. Iya ngaga mensia ngambika bisi asai ati. Lalu Bup Kudus madahka, kitai digaga sama baka Iya. Nyadi, Jehovah tentu bisi asai ati. Bup Kudus mega madahka, Jehovah bisi berasai tusah ati. (Mas. 78:​40, 41) Peratika mega cherita pasal Abraham enggau Isak. Jehovah ngasuh Abraham nyerahka anak tunggal iya nyadika pemeri tunu. (P-kal. 22:​9-12; Heb. 11:​17-19) Perundingka penusah ati Abraham lebuh iya nyediaka diri sebedau munuh anak iya empu. Nyadi, gambarka asai ati Jehovah lebuh Iya meda orang merinsaka sereta munuh Anak Iya. Iya tentu berasai balat agi tusah ati!—Peda video Neladan Pengarap Sida—Abraham, Begian 2, ba jw.org.

9. Nama ulih dipelajarka nuan ari Rome 8:​32, 38, 39 pasal pengerindu Jehovah?

⁹ Tebus nya ngajar kitai, nadai orang, nyengkaum kaban belayan ti semak enggau kitai tauka kaban rapat kitai, ke rinduka kitai lebih agi ari Jehovah. (Bacha Rome 8:​32, 38, 39.) Kitai ulih yakin, Jehovah rinduka kitai lebih agi ari kitai rinduka diri empu. Kati nuan deka idup belama iya? Jehovah dekaka nya ke nuan lebih agi ari nuan empu. Kati nuan dekaka dosa nuan diampun? Jehovah keran agi deka ngampunka dosa nuan. Iya semina ngarapka kitai ngayanka asai beterima kasih ke utai ti udah digaga Iya ke kitai, arapka  Iya, sereta ngasika Iya. Tebus nya siti pemeri ti berega ke nunjukka penalam pengerindu Jehovah ke kitai. Lalu ba dunya baru, kitai deka belajar mayuh agi pasal pengerindu Jehovah.—P-jar. 3:11.

NAMA DIPELAJARKA KITAI PASAL JESUS ARI TEBUS?

10. (a) Nama kebuah Jesus balat tusah ati pasal ukum mati iya? (b) Baka ni Jesus nunjukka utai ti dipadah Jehovah nya betul? (Peda mega kutak “ Penetap Ati Jesus Nunjukka Jehovah Nya Betul.”)

¹⁰ Jesus amat ibuhka reputasi Apai iya. (Jhn. 14:31) Jesus deka diukum mati sebagai orang ke enda bebasaka Petara sereta sebagai siku penjenayah. Nya ngasuh Jesus amat tusah ati, enggaika orang bisi runding ti enda manah pasal Apai iya. Nya kebuah iya besampi: “Apai, enti ulih, ambi meh mangkuk tu ari aku.” (Mat. 26:39) Ketegal Jesus mengkang tetap ati ngagai Jehovah nyentukka iya mati, Jesus nunjukka utai ti dipadah Sitan pasal Apai iya bula magang.

11. Baka ni Jesus nunjukka pengerindu ti dalam ngagai orang bukai? (John 13:1)

¹¹ Tebus mega ngajar kitai, Jesus amat ibuhka orang, kelebih agi sida ke nitihka iya. (J-lam. 8:31; bacha John 13:1.) Ambika chunto, Jesus nemu sekeda ari utai ke patut digaga iya ba dunya amat tusah, kelebih agi lebuh iya patut mati enggau chara ti amat merinsa. Tang Jesus ngereja semua utai nya ukai semina ketegal Jehovah ngasuh iya ngereja nya, tang ketegal pengerindu iya ke orang. Jesus nunjukka pengerindu ti dalam ngagai orang lebuh iya nginjil ngagai sida, ngajar sida, sereta nulung sida. Indah ba malam sebedau Jesus mati, iya ngena awak masu kaki bala rasul iya, ngajar sida, sereta meransang enggau ngelantangka ati sida. (Jhn. 13:​12-15) Udah nya, taja pan iya balat pedis ketegal dipantang  ba tiang, tang Jesus agi meri harapan ngagai penjenayah ba sepiak iya, lalu madahka lelaki nya deka tama ngagai Paradais. Iya mega ngayanka pengibuh ngagai indai iya lebuh iya ngasuh John nyaga indai iya. (Luk. 23:​42, 43; Jhn. 19:​26, 27) Au, pengerindu Jesus ti dalam ukai semina diayanka nengah pemati iya, tang mega nengah chara pengidup iya ba dunya.

12. Nama utai ke benung dikereja Jesus ke kitai diatu?

¹² Taja pan Jesus mati “sekali aja kena muai dosa belama iya,” tang iya agi ngereja mayuh utai ke kitai diatu. (Rom. 6:10) Nama utai ke digaga iya? Iya agi gawa kena meri kitai mayuh utai ti manah, ke tau diulih kitai diatu ketegal tebus. Perundingka utai ti benung dikereja iya. Iya nyadi Raja kitai, Imam Besai, sereta kepala raban gempuru. (1 Kor. 15:25; Eps. 5:23; Heb. 2:17) Iya mega nguluka pengawa ngempuruka sida ke dipilih ke serega sereta sida ke ari raban orang ti mayuh. Lalu pengawa tu semina deka tembu maya Penusah ti Besai abis. b (Mat. 25:32; Mrk. 13:27) Iya mega nulung ulun ke tetap ati meri kitai utai ke diguna kitai kena nyembah Jehovah enggau tetap ati ba hari ti penudi tu. (Mat. 24:45) Lalu lebuh iya merintah kitai pengelama seribu taun, iya deka terus ngereja utai ke kitai. Lebuh Jehovah meri Anak Iya ke kitai, Iya ukai semina meri Jesus mati ke kitai, tang Iya mega meri Jesus ngereja mayuh agi utai ke penguntung kitai.

TERUS BELAJARKA UTAI TI BARU

13. Baka ni nuan ulih terus belajar pasal pengerindu Petara enggau Kristus ke kitai?

¹³ Nuan ulih terus belajar pasal pengerindu Petara Jehovah enggau Jesus Kristus ke nuan enti nuan berunding enggau dalam pasal utai ke udah dikereja seduai iya ke nuan. Ba musin Ngingatka Pemati Jesus taun tu, nuan engka ulih macha bup Injil. Tang tiap kali nuan macha, anang macha kelalu mayuh bagi. Nuan ulih ngena mayuh agi awak beratika kebuah nuan patut rinduka Jehovah enggau Jesus. Lalu kunsika meh utai ke dipelajarka nuan enggau orang bukai.

14. Baka ni ngaga pansik ulih nulung kitai terus belajar pasal tebus enggau ajar ke bukai? (Masmur 119:97) (Peda mega gambar.)

¹⁴ Enti nuan udah dibaptisa pengelama betaun-taun, nuan engka berunding sekalika bisi utai ti baru ke ulih dipelajarka nuan pasal  sifat Jehovah ti adil, pengerindu Iya, enggau tebus. Kebendar iya, kitai seruran bisi utai ti baru ke ulih dipelajarka kitai bekaul enggau pekara tu. Nyadi, nama ulih dikereja nuan? Bacha sereta belajarka penerang ti bepelasarka Bup Kudus ke bisi dalam litaricha kitai. Lebuh nuan macha utai dalam Bup Kudus ke enda entu dimeretika nuan, gaga meh pansik. Lalu sepemanjai hari nya, belematika meh utai ke udah dipelajarka nuan pasal Jehovah, Anak Iya, sereta pengerindu seduai iya ke nuan.—Bacha Masmur 119:97.

15. Nama kebuah nya penting terus belajarka utai ti baru ari Bup Kudus?

¹⁵ Anang asa ati enti nuan enda tetemuka utai ti baru tauka ngalitka ati tiap kali nuan macha Bup Kudus tauka ngaga pansik. Nuan ulih ngambarka diri baka siku orang ke ngiga emas. Kesuah iya, orang ke ngiga emas begunaka mayuh jam tauka hari sebedau iya ulih tetemuka emas. Tang iya enda putus asa lalu terus enggau sabar ngiga laban emas ke ditemu iya, taja pan nya mit, amat berega ba iya. Utai ti baru ke dipelajarka kitai ari Bup Kudus berega agi ari emas! (Mas. 119:127; J-lam. 8:10) Nyadi, sabar meh lalu terus nitihka jadual macha Bup Kudus nuan.—Mas. 1:2.

16. Baka ni kitai ulih neladan Jehovah enggau Jesus?

¹⁶ Lebuh nuan belajar, perundingka meh chara nuan ulih ngena utai ti dipelajarka nuan ba pengidup. Ambika chunto, nuan ulih neladan sifat Jehovah ti adil lebuh nuan enda bepilih mata ngintu orang bukai. Nuan ulih neladan pengerindu Jesus ke Apai iya sereta ke orang bukai lebuh nuan ngereja utai ti dikedekaka Jehovah sereta nulung orang bukai, taja pan kekadang utai tu tusah ba nuan. Pia mega, nuan ulih neladan Jesus lebuh nuan nginjil ngagai orang bukai ngambika sida nemu utai ti manah ke udah dikereja Jehovah ke mensia, sereta ngayanka pengarap ngagai tebus.

17. Nama deka dipelajarka kitai ba artikel ke nangkanka tu?

¹⁷ Majak kitai belajar pasal tebus, dalam agi pengerindu kitai ke Jehovah enggau Jesus. Ketegal nya, seduai iya mega deka majak rinduka kitai. (Jhn. 14:21; Jas. 4:8) Nyadi, terus meh ngena utai ti udah disediaka Jehovah ngambika ulih belajar mayuh agi pasal tebus. Ba artikel ke nangkanka tu, kitai deka beratika sekeda chara kitai tau bulih penguntung ari tebus sereta baka ni kitai ulih ngayanka terima kasih ke pengerindu Jehovah.