1. Nama cabaran ke ditapi semua kitai?

 TIAP hari kitai patut ngaga pemutus. Sekeda pemutus engka senang digaga, baka nama deka diempa tauka kemaya deka tinduk. Tang bisi sekeda pemutus tusah deka digaga. Sekeda pemutus nya engka bisi kesan ngagai pengerai kitai, pengaga ati kitai, orang ke dikesayauka kitai, tauka sembah kitai ngagai Jehovah. Kitai dekaka pemutus kitai mai penguntung ngagai kitai sereta ruang bilik kitai. Tang ke pemadu penting, kitai deka pemutus kitai ngelantangka ati Jehovah.—Rom. 12:​1, 2.

2. Nama ulih nulung nuan ngaga pemutus ti manah?

² Nuan ulih ngaga pemutus ti manah enti nuan (1) ngumpul semua fakta, (2) beratika runding Jehovah pasal pekara nya, sereta (3) berundingka pilihan ke bisi. Artikel tu deka berandauka tiga iti utai nya sereta baka ni kitai ulih ngelatih runding kitai.—J-lam. 2:11.

NGUMPUL SEMUA FAKTA

3. Nama kebuah nuan patut ngumpul semua fakta sebedau ngaga pemutus? Padahka siti sempama.

³ Utai ti keterubah ke patut digaga nuan ngambika ulih ngaga pemutus ti manah, iya nya ngumpul semua fakta. Nama kebuah tu penting? Gambarka siku pesakit ke betemu enggau lutur laban iya bisi penyakit ti balat. Kati lutur nya deka terus meri pesakit nya ubat tanpa meresa pesakit nya tauka nanya iya pasal penyakit iya? Tentu enda. Baka lutur ti manah, nuan mega ulih ngaga pemutus ti manah agi enti nuan beratika semua fakta ke bisi kaul enggau situasi nuan. Baka ni nuan ulih ngereja nya?

4. Sejalai enggau Jaku-Dalam 18:​13, nama ulih digaga nuan ngambika ulih ngumpul semua fakta? (Peda mega gambar.)

 ⁴ Kesuah iya, nuan ulih ngumpul semua fakta enti nuan nanya utai. Ambika chunto, nuan dibai ngagai siti parti. Patut nuan enggau parti nya? Enti nuan enda ngelala orang ke ngatur parti nya tauka enda nemu utai ke deka digaga ba parti nya, nuan ulih nanya iya tanya ke baka tu: “Ba dini enggau ni maya parti nya? Berapa mayuh orang deka datai? Sapa deka ngemataka pengawa ba maya nya? Sapa ke dibai? Nama aktiviti maya parti nya? Kati nuan deka nyediaka ai bisa?” Saut ngagai semua tanya tu deka nulung nuan ngaga pemutus ti manah.—Bacha Jaku-Dalam 18:13.

5. Nama patut digaga nuan pengudah nuan ngumpul semua fakta?

⁵ Pengudah nuan ngumpul semua fakta, perundingka situasi nya enggau dalam agi. Ambika chunto, baka ni enti nuan nemu sekeda orang ke dibai ngagai parti nya enda ngasika standard Jehovah, tauka baka ni enti ai bisa disediaka tang nadai orang ke betanggungjawap kena nentuka nadai orang ngirup kelalu mayuh? Kati parti tu ulih ngasuh orang berami nyentukka enda tetagangka ulah diri? (1 Pet. 4:3) Tauka, baka ni enti parti tu diatur maya nuan bisi gempuru tauka pengawa nginjil? Lebuh nuan beratika semua fakta ke bisi kaul enggau situasi tu, nya deka nulung nuan senang agi ngaga pemutus ti manah.  Tang bisi siti agi utai ke patut digaga nuan. Nuan nemu asai ati nuan pasal situasi nya, tang tanya diri empu: ‘Nama asai ati Jehovah?’—J-lam. 2:6.

PERATIKA RUNDING JEHOVAH

6. Nitihka James 1:​5, nama kebuah kitai patut besampi minta tulung ari Jehovah?

⁶ Minta Jehovah nulung nuan meretika runding Iya pasal sesiti pekara. Jehovah besemaya deka meri kitai penemu-dalam kena nulung kitai nemu sekalika sesiti pemutus nya ngelantangka ati Iya tauka enda. Bup Kudus madahka: “Petara enda nganu, tang Iya deka meri [penemu-dalam] enggau gerah jari ngagai semua orang.”—Bacha James 1:5.

7. Baka ni nuan ulih nemu runding Jehovah pasal sesiti pekara? Padahka siti sempama.

⁷ Pengudah nuan besampi minta iring ari Jehovah, peratika meh saut ke diberi Iya. Peratika sempama tu: Enti nuan tesat ba endur ti baru, nuan engka minta tulung ari orang ke diau ba endur nya. Tang kati nuan deka terus mupuk sebedau orang nya nyaut nuan? Tentu enda. Nuan tentu deka ningaka iya enggau manah. Baka nya mega, pengudah nuan minta penemu-dalam ari Jehovah, uji ngiga saut Iya lebuh nuan belajarka prinsip Bup Kudus ke ngena ba situasi nuan. Ambika chunto, lebuh nuan berundingka sekalika deka enggau parti ke dipadah tadi tauka enda, nuan engka beratika utai ke dipadah Bup Kudus pasal  pengawa berami nyentukka enda tetagangka ulah diri, kaul ti enda manah, sereta kebuah nya penting agi ngenuluka Perintah Petara ari ke ngenuluka peneka diri empu.—Mat. 6:33; Rom. 13:13; 1 Kor. 15:33.

8. Nama ulih digaga nuan enti nuan begunaka tulung ngiga penerang ke diguna nuan? (Peda mega gambar.)

⁸ Bisi maya iya, nuan agi begunaka tulung ngiga penerang ke diguna nuan. Nuan ulih minta nasihat ari menyadi Kristian ti bepeneleba. Lalu, nuan mega ulih ngaga pansik kediri empu. Bisi mayuh penerang ke beguna ba perengka ke dikena kitai mansik, baka Bup Dikena Saksi-Saksi Jehovah Ngiga Pansik. Kingatka meh, tuju nuan iya nya deka ngaga pemutus ti ngelantangka ati Jehovah.

9. Baka ni kitai ulih yakin pemutus kitai deka ngelantangka ati Jehovah? (Epesus 5:17)

⁹ Baka ni kitai ulih yakin pemutus kitai deka ngelantangka ati Jehovah? Keterubah iya, kitai patut ngelala Jehovah enggau manah. Bup Kudus madah: “Enti nuan nemu Iya ti Kudus, nuan ulih meretika utai.” (J-lam. 9:10) Au, kitai ulih meretika utai lebuh kitai nemu sifat Jehovah, tuju Iya, sereta utai ti dikerindu tauka dipegedika Iya. Nuan ulih nanya diri empu: ‘Ari utai ke ditemu aku pasal Jehovah, nama pemutus ke ulih digaga aku ke deka ngelantangka ati Iya?’—Bacha Epesus 5:17.

10. Nama kebuah prinsip Bup Kudus penting agi ari tradisi ruang bilik tauka budaya tempatan?

¹⁰ Kekadang, lebuh kitai deka ngelantangka ati Jehovah, kitai engka patut ngasaka ati orang ke semak enggau kitai. Ambika chunto, sekeda apai indai ke bisi tuju ati ti manah, engka mejal anak indu sida kawin enggau lelaki ti kaya taja pan lelaki nya enda tegap ba pengarap. Amat, sida dekaka anak indu sida bisi pengidup ti selesa, tang anak indu nya patut nanya diri empu: ‘Kati lelaki tu ulih nulung aku ngembuan kaul ti rapat enggau Jehovah?’ Nama runding Jehovah pasal pekara tu? Saut iya bisi ba Matthew 6:33. Dia, Jesus meransang orang Kristian terus “ngenuluka Perintah Petara.” Taja pan kitai bebasaka apai indai kitai sereta orang ke diau ngelingi kitai, tang utai ti pemadu penting ba kitai nya ngagaka ati Jehovah.

PERUNDINGKA PILIHAN KE BISI

11. Nitihka Hebrew 5:​14, nama ulih nulung nuan beratika pilihan ke bisi?

¹¹ Pengudah nuan tetemuka prinsip Bup Kudus ti ngena, nuan patut berunding enggau manah pasal pilihan ke bisi. (Bacha Hebrew 5:14) Enti nuan nemu berunding, nya deka nulung nuan ngambarka utai ke engka ulih nyadi ari tiap iti pilihan ke bisi. Kekadang pemutus nya senang digaga, tang bisi mega pemutus ke tusah digaga. Nya meh maya iya kitai patut lebih agi berunding enggau dalam ngambika ulih ngaga pemutus ti manah.

12-13. Baka ni berunding enggau dalam ulih nulung nuan ngaga pemutus ti manah bekaul enggau kereja?

¹² Gambarka situasi tu: Nuan benung ngiga kereja, lalu bisi dua iti pilihan kereja. Nuan udah berunding pasal semua fakta, baka nama jenis pengawa nya, jadual kereja, penyauh tempat kereja nya ari rumah nuan, sereta ke bukai. Dua iti kereja nya bela enda ngelanggar prinsip Bup Kudus. Engka nuan rindu kereja ke siti agi ketegal jenis kereja nya tauka ketegal gaji iya tinggi agi. Taja pia, bisi sekeda utai ke patut diperundingka sebedau ngaga pemutus.

¹³ Ambika chunto, kati kereja nya deka ngachau jadual begempuru nuan? Kati kereja nya ngena mayuh ari awak nuan nyentukka nuan nadai awak begulai enggau diri sebilik sereta negapka pengarap sida? Tanya ke baka tu deka nulung nuan ngenuluka “utai ke beguna agi,” iya nya sembah nuan ngagai Jehovah  sereta utai ke diguna diri sebilik nuan, ari ke ngulih mayuh agi duit. (Plp. 1:10) Nya baru nuan ulih ngaga pemutus ke deka diberekat Jehovah.

14. Baka ni berunding enggau dalam sereta pengerindu ulih nulung kitai enda ngasuh orang lenyau pengarap?

¹⁴ Enti kitai nemu berunding enggau dalam, nya deka nulung kitai beratika baka ni pemutus kitai bisi kesan ngagai orang bukai. Enggau chara nya, kitai ulih nyeliah ari “ngasuh orang lenyau pengarap.” (Plp. 1:10) Utai tu penting lebuh kitai ngaga pemutus peribadi, baka chara begari sereta chara ngias diri. Ambika chunto, kitai engka rinduka sesiti stail begari tauka ngias diri. Tang baka ni enti bala menyadi tauka orang bukai enda selesa enggau pemutus kitai? Nemu berunding enggau dalam deka nulung kitai bebasaka asai ati sida. Pengerindu deka meransang kitai ngereja utai ke penguntung “orang  bukai” sereta begari enggau pengumbas iya. (1 Kor. 10:​23, 24, 32; 1 Tim. 2:​9, 10) Udah nya, kitai deka ngaga pemutus ke ngayanka pengerindu sereta basa ngagai orang bukai.

15. Nama patut diperundingka nuan sebedau nuan berengkah ngereja utai nitihka pemutus ke udah digaga nuan?

¹⁵ Enti nuan benung ngaga pemutus ti besai, perundingka utai ke patut digaga nuan enti nuan nitihka pemutus nya. Jesus ngajar kitai “ngira ungkus utai nya.” (Luk. 14:28) Nyadi, perundingka penyampau jam, duit, sereta usaha ke diguna nuan ngambika pemutus nya mujur. Ba sekeda situasi, nuan engka patut berandau enggau diri sebilik pasal utai ke patut digaga sida ngambika ulih nyukung pemutus nya. Nama kebuah tu penting? Nuan engka sedar, pemutus nuan patut diubah tauka engka bisi pilihan ti manah agi. Lalu enti nuan nanya sereta ningaka runding diri sebilik nuan, sida deka sedia agi nyukung nuan ngambika pemutus ke digaga nuan nya ulih mujur.—J-lam. 15:22.

GAGA PEMUTUS KE ULIH MUJUR

16. Nama langkah ke ulih nulung nuan ngaga pemutus ti ulih mujur? (Peda mega kutak “ Baka Ni Ngaga Pemutus ti Manah?”)

¹⁶ Enti nuan udah nitihka semua langkah ke dipadah tadi, nuan ulih ngaga pemutus ti manah. Nuan udah ngumpul semua fakta sereta meresa prinsip Bup Kudus ke ulih nulung nuan ngaga pemutus ti ulih ngelantangka ati Jehovah. Diatu, nuan ulih minta Jehovah nulung nuan ngemujurka pemutus nuan.

17. Nama utai ti penting ke deka nulung nuan ngaga pemutus ti manah?

¹⁷ Taja pan nuan udah ngaga mayuh pemutus ti manah suba, tang kingatka meh, utai ti penting ke deka nulung nuan ngaga pemutus ti manah, iya nya bepanggai ba penemu-dalam ari Jehovah, ukai ba pemintar tauka pengalaman diri empu. Kingatka meh, semina Jehovah aja ke ulih meri nuan penemu, nulung nuan meretika utai, sereta ngembuan runding ti dalam. Semua tu deka nulung kitai bisi penemu-dalam. (J-lam. 2:​1-5) Au, Jehovah ulih nulung nuan ngaga pemutus ti ngelantangka ati Iya.—Mas. 23:​2, 3.