1-3. (a) Kemaya Masmur 147 ditulis? (b) Nama ulih ditemu kitai ari belajarka Masmur 147?

KITAI suah muji orang enti kitai rindu enggau utai ti disebut sereta dikereja iya. Kitai tentu deka agi muji Petara Jehovah! Kitai muji Iya ketegal pemesai kuasa Iya, ke ulih dipeda kitai ari utai ti ditempa Iya, lalu kitai muji Iya ketegal penalam pengerindu Iya ke kitai, ke ulih dipeda kitai ari genselan tebus Anak Iya Empu.

² Lebuh kitai macha Masmur 147, kitai nemu penulis amat keran deka muji Jehovah. Iya mega meransang orang bukai muji Petara enggau iya.—Bacha Masmur 147:1, 7, 12.

³ Kitai enda nemu sapa ke nulis Masmur 147. Tang penulis nya engka idup maya jeman lebuh orang Israel pulai baru ngagai Jerusalem pengudah Jehovah ngelepaska sida ari Babilon. (Mas. 147:2) Pemasmur muji Jehovah laban nembiak Iya ulih nyembah Iya baru di menua sida empu. Udah nya, pemasmur indah meri mayuh agi kebuah deka muji Jehovah. Nama kebuah nya? Lalu nama kebuah nuan patut nyebut “Puji Jah!”?

4. Lebuh Raja Sairus ngelepaska orang Israel, baka ni asai ati sida, lalu nama kebuah?

⁴ Uji gambarka asai ati orang Israel lebuh sida nyadi orang tangkap ngagai menua Babilon. Orang ke mai sida kia ngeleseka sida lalu ngasuh sida: “Nyanyi ke kami lagu nengeri Sion.” Tang orang Judah nadai ati deka belagu. Jerusalem, ke ngasuh sida gaga amat ati, udah dirusak. (Mas. 137:1-3, 6) Sida balat tusah ati, lalu sida begunaka pengelantang. Baka ke udah dipadah jaku Petara, Jehovah nulung nembiak Iya. Baka ni? Raja Sairus ari menua Persia ngalahka Babilon lalu nyebut pasal Jehovah: ‘Jehovah . . . udah meri ngagai aku tanggungjawap ngaga sebuah Rumah Sembiang ke Iya di Jerusalem.’ Sairus mega madah ngagai orang Israel: ‘Nya alai semua kita ke nembiak Petara, enda tau enda kin; awakka Jehovah Petara kita meruan enggau kita.’ (2 Ban. 36:23) Utai tu tentu ngelantangka ati orang Israel ke di Babilon!

5. Nama dipadah pemasmur pasal Jehovah ke ulih nyumanka penusah ati kitai?

⁵ Jehovah ukai semina ngelantangka ati bansa Israel tang mega tiap iku sida. Jehovah ngereja utai ti sama ke kitai kemaya hari tu. Pemasmur nulis, Petara “ngeraika orang ke tusah ati lalu malut telih sida.” (Mas. 147:3) Lebuh kitai sakit tauka berasai ditekan, kitai ulih pechaya Jehovah ibuhka kitai. Jehovah keran deka ngelantangka ati sereta nyumanka penusah ati kitai. (Mas. 34:18; Isa. 57:15) Iya meri kitai penemu-dalam sereta pengering ngambika kitai ulih mutarka sebarang penanggul ke dikemisi kitai.—Jas. 1:5.

6. Baka ni kitai tau bulih penguntung ari jaku pemasmur ba Masmur 147: 4? (Peda gambar ba pun artikel.)

⁶ Udah nya pemasmur engkadah ke langit lalu madahka Jehovah ngitung “pemayuh bintang” lalu ngangauka nama “tiap igi bintang nya.” (Mas. 147:4) Pemasmur ulih meda bintang, tang iya enda nemu penyampau sida ke amat. Kemaya hari tu, bala saintis nemu galaksi bisi lebih ari 100 biliun igi bintang. Lalu ba dunya raya bisi beberapa triliun igi galaksi! Mensia enda ulih ngitung semua bintang, tang Penempa ulih. Indah Iya ngelala tiap igi bintang nyentukka Iya udah meri nama ngagai tiap igi bintang. (1 Kor. 15:41) Petara ke nemu dini alai tiap igi bintang mega ngelala nuan. Iya seruran nemu dini alai nuan, baka ni asai ati nuan, sereta nama utai ti diguna nuan!

7, 8. (a) Nama ulih ditemu Jehovah pasal kitai? (b) Beri siti chunto ke nunjukka Jehovah nya pengasih.

⁷ Jehovah nemu utai ke benung ditapi nuan, lalu Iya bisi kuasa kena nulung nuan mutarka penanggul. (Bacha Masmur 147:5.) Nuan engka ngasaika penanggul ke ditapi nuan kelalu mar, lalu nuan enda ulih mutarka iya. Petara  nemu pengurang kitai, “Iya ingatka kitai tu endang amau.” (Mas. 103:14) Kitai enda sempurna, nya alai kitai suah ngaga penyalah ti sama, lalu kitai berasai enda diperansang. Kitai nesal ati enggau sekeda utai ti udah disebut kitai, pengingin ti salah ke diasai kitai, tauka asai ati ti kepapas ke dikembuan kitai! Jehovah nadai ngembuan sebarang pengelemi, tang Iya nemu asai ati kitai, laban “penalam penemu Iya endang enda ulih disukat.”

⁸ Kati nuan empu bisi ngasaika Jehovah nulung nuan lepas ari sekeda penguji? (Isa. 41:10, 13) Tu nyadi ba seiku pengerintis ke benama Kyoko. Pengudah iya pindah ngagai endur baru, iya berasai amat enda diperansang. Tang baka ni Kyoko nemu Jehovah meretika penanggul iya? Ba eklisia ke baru, dia bisi mayuh orang ke nemu asai ati iya. Iya ngasaika Jehovah madahka: “Aku sayauka nuan, ukai ketegal nuan nya pengerintis, tang ketegal nuan nya anak indu Aku sereta udah nyerahka diri ngagai Aku. Aku deka nuan gaga ati enggau pengidup nuan ke nyadi Saksi Aku!” Baka ni Jehovah udah ngayanka “penalam penemu Iya endang enda ulih disukat”?

9, 10. Nama utai ti dulu disendiaka Jehovah kena nulung kitai? Beri siti chunto.

⁹ Semua kitai begunaka pemakai, gari, sereta endur diau. Nuan engka irauka diri enda chukup pemakai ke diempa. Tang Jehovah ngaga dunya ngambika ulih ngasilka chukup pemakai ke semua orang, indah ke “burung kak ti agi mit lebuh sida ngangau.” (Bacha Masmur 147:8, 9.) Enti Jehovah nupi burung kak, kitai ulih pechaya Iya deka nyendiaka utai ti diguna kitai.—Mas. 37:25.

¹⁰ Keberat agi, Jehovah nyendiaka utai ti diguna kena ngeringka pengarap kitai, lalu Iya meri kitai ‘pemaik Petara, ti ngelui peragam mensia.’ (Plp. 4:6, 7) Seiku menyadi Kristian lelaki ke benama Mutsuo enggau bini iya meda chara Jehovah nulung seduai iya. Lebuh tsunami mangka Jepun kena taun 2011, seduai iya nyelamatka diri enggau niki ke atas perabung rumah seduai iya. Ba hari nya, seduai iya lenyau nyauka semua utai. Seduai iya bemalam ba bilik ti petang sereta chelap di tingkat dua rumah seduai iya. Kena pagi hari siti, seduai iya ngiga utai ke ulih meransang seduai iya. Utai ke ulih ditemu seduai iya, iya nya Buku Kegiatan Saksi-Saksi Yehuwa 2006-IN. Lebuh Mutsuo nyilakka lambar bup nya, iya tepedaka siti tajuk “Tsunami Terdahsyat yang Pernah Dicatat.” Begian nya madah pasal tanah berenyang di Sumatra kena taun 2004 ke mai balat amat pengerusak ke kala dirikut. Mutsuo enggau bini iya nyabak lebuh macha peneleba bala menyadi Kristian. Seduai iya ngasaika Jehovah meri seduai iya peransang ti sama ke diguna seduai iya. Jehovah mega ngintu seduai iya ngena chara bukai. Bala menyadi Kristian ba begian bukai di Jepun nyendiaka pemakai sereta gari ke seduai iya. Tang utai ti amat ngeringka seduai iya, iya nya bala menyadi Kristian ke dianjung gerempung Jehovah datai ngelawa eklisia. Mutsuo madahka: “Aku ngasaika Jehovah bisi ngimbai tiap iku kitai sereta ibuhka kitai. Tu amat ngelantangka ati!” Petara dulu agi nyendiaka utai ti diguna ngambika pengarap kitai kering, lalu udah nya  nyendiaka utai ti diguna kitai besehari-hari.

11. Nama patut digaga kitai ngambika bulih penguntung ari tulung Petara?

¹¹ Jehovah ngelantangka “orang ke baruh ati.” Iya rinduka kitai, lalu seruran sedia deka nulung kita. (Mas. 147:6a) Baka ni kitai tau bulih penguntung ari tulung Iya? Kitai patut ngembuan kaul ti teguh enggau Iya. Kena bulih nya, kitai patut baruh ati. (Sep. 2:3) Orang ke baruh ati bepanggai ba Jehovah kena mutarka sebarang pengawa ke enda lurus, lalu muai pemerinsa sida. Jehovah nerima sida.

12, 13. (a) Ngambika bulih penguntung ari tulung Petara, nama patut diseliahka kitai? (b) Ngagai sapa Jehovah gaga ati?

¹² Kelimpah ari nya, Petara ngemaruhka “orang ke jai ngagai tanah.” (Mas.  147:6b) Kitai enggai tu nyadi ba kitai! Kitai deka Petara ngayanka pengerindu Iya ti meruan ngagai kitai. Nya alai kitai enda tau enda begedika utai ti dipegedika Iya. (Mas. 97:10) Ngambika chunto, kitai enda tau enda begedika ulah seks ti kamah. Tu reti iya kitai patut nyeliahka sebarang utai ke ulih mai kitai ngagai ulah nya, nyengkaum pornografi. (Mas. 119:37; Mat. 5:28) Tu engka tusah, tang bisi asil ti manah laban kitai deka nerima berekat ari Jehovah.

¹³ Kitai enda ulih ba perang tu kediri empu. Kitai patut bepanggai ba Jehovah. Kati Iya deka gaga ati enti kitai bepanggai ba utai ke digiga orang mayuh lebuh begunaka tulung? Enda. Jehovah enda “gaga ati ke kuda ti kering.” Patut kitai bepanggai ba pengering diri empu tauka ba orang bukai? Jehovah enda “rinduka soldadu ti berani.” (Mas. 147:10) Tang, kitai terus besampi minta tulung ari Jehovah sereta minta Iya nyelamatka kitai ari pengelemi diri. Jehovah enda nemu lelak ningaka sampi ti baka tu. “Jehovah lantang ati enggau orang ke nangika Iya, orang ke nganti pengerindu Iya ti meruan belama iya.” (Mas. 147:11, NW) Ketegal Iya taluk sereta rinduka kitai, nya alai kitai nemu, Iya deka terus nulung kitai ngalahka pengingin ti salah.

14. Nama utai ti dipechaya pemasmur?

¹⁴ Jehovah madahka, Iya deka nulung kitai lebuh kitai bisi penanggul. Lebuh orang Israel pulai ke Jerusalem, pemasmur berundingka pasal chara Jehovah nulung sida. Ku pemasmur belagu: “Iya ngasuh semua pintu nuan tegap. Iya merekatka bala nembiak Nuan. Iya nyaga garis entara menua nuan enggau likun.” (Mas. 147:13, 14) Ketegal nemu Jehovah deka negapka pintu kuta ngasuh pemasmur berasai likun. Tu ngasuh pemasmur pechaya, Jehovah deka nyaga nembiak Iya.

15-17. (a) Kekadang baka ni asai ati kitai pasal penanggul ke ditapi kitai, tang baka ni Jehovah ngena Jaku Iya nulung kitai? (b) Beri siti chunto ke nunjukka baka ni jaku Petara “nyadi enggau jampat” kena nulung kitai.

¹⁵ Nuan engka berasai irau ketegal penanggul ke ditapi nuan, tang Jehovah  ulih meri nuan penemu-dalam kena mutarka iya. Pemasmur madahka, Petara “bejaku ngagai tanah, lalu utai ti disebut Iya nyadi enggau jampat.” Udah nya, pemasmur nyebut pasal seleju, ais, enggau ujan batu, lalu madahka: “Nadai orang ulih natka penyelap ti dikirumka Iya!” Pemasmur udah nya madahka, Jehovah “bejaku, lalu batu ais nya lela nyadi ai.” (Mas. 147:15-18) Petara kitai, ke nemu semua utai sereta ulih ngereja semua utai, ke bekuasa atas ujan batu sereta seleju, tentu ulih nulung nuan ngalahka nama-nama penanggul.

¹⁶ Kemaya hari tu, Jehovah ngiring kitai ngena Jaku Iya, Bup Kudus. Pemasmur madahka, jaku Jehovah “nyadi enggau jampat” kena nulung kitai. Petara ngiring kitai ba jalai sereta ba jam ti ngena. Pikirka baka ni nuan bulih penguntung ari Bup Kudus, litaricha ke dikeluarka “ulun ke tetap ati sereta bepenemu-dalam,” Berita JW, jw.org, bala tuai gempuru, sereta bala menyadi Kristian. (Mat. 24:45) Bisi nuan meda Jehovah jampat ngiring nuan ba pengidup?

¹⁷ Seiku menyadi Kristian indu ke benama Simone udah ngasaika Jaku Petara nulung iya. Iya berasai enda beguna, lalu ngumbai Jehovah enda lantang ati enggau iya. Taja pia, lebuh iya berasai lemi, iya majak besampi sereta minta tulung ari Jehovah. Iya mega terus belajarka Bup Kudus. Simone madahka: “Aku seruran ngasaika pengering sereta iring ari Jehovah.” Tu udah nulung iya ngembuan runding ke positif agi.

18. Nama kebuah nuan ngasaika Jehovah semak enggau nuan, lalu nama kebuah nuan patut ‘Muji Jah!’?

¹⁸ Pemasmur nemu, Jehovah udah milih bansa Israel kelia nyadika nembiak Iya ari semua bansa ke bisi ba dunya. Semina bansa sida aja ke udah nerima “pesan” sereta “atur” ari Petara. (Bacha Masmur 147:19, 20.) Kemaya hari tu, kitai bisi basa ti besai ulih dikangau ngena nama Petara. Kitai berasai gaga laban ngelala Iya, kitai bisi Jaku Iya kena ngiring kitai, sereta kitai ulih ngembuan kaul ti rapat enggau Iya. Baka penulis Masmur 147, nuan bisi mayuh kebuah deka ‘Muji Jah!’ sereta meransang orang bukai ngereja utai ti sama.