Tanya Ari Pemacha
Patut orang Kristian ngembuan senapang, baka handgun tauka rifle, kena nyaga diri empu ari orang bukai?
Orang Kristian nitihka prinsip Bup Kudus lebuh milih chara sida deka nyaga sereta ngetanka diri empu. Prinsip tu nunjukka, orang Kristian enda tau ngena senyata baka handgun, rifle, tauka bansa senapang ke bukai kena nyaga diri empu ari orang bukai. Pikirka pekara di baruh tu:
Nyawa mensia kudus ba mata Jehovah. Ku pemasmur David nulis pasal Jehovah: “Nuan endang pun pengidup.” (Masmur 36:9) Nya alai, enti orang Kristian milih deka ngetanka diri empu tauka reta iya, iya deka enggau naka ulih nyeliah ari berutang darah, iya nya, betanggungjawapka pemati orang bukai.—Ulang Adat 22:8.
Endang amat, sebarang utai ke dikena orang ngetanka diri tau ngasuh iya berutang darah. Taja pia, senapang tau ngasuh orang bukai senang kena bunuh, sekalika enggau sengaja tauka enda. * (Peda nota kaki.) Pia mega, orang ke nyerang engka udah takut, nya alai enti iya meda senapang, gaya utai engka balat agi tusah lalu orang engka kena bunuh.
Lebuh Jesus ngasuh bala murid iya mai pedang kena malam sebedau iya mati, tu ukai ketegal sida patut nyaga diri empu. (Luke 22:36, 38) Tang Jesus deka ngajar sida siti utai: Bala murid iya enda patut kasar, indah lebuh sida betunga mua enggau seraban orang ke mai senyata. (Luke 22:52) Pengudah Peter ngena pedang iya nyerang ulun imam besai, Jesus ngasuh Peter: “Selitka pedang nuan.” Udah nya Jesus madahka prinsip ke ngiring orang Kristian mega kemaya hari tu: “Semua orang ke ngena pedang deka mati laban pedang.”—Matthew 26:51, 52.
Baka ke dipadah ba Mikah 4:3 nembiak Petara “nempa pedang sida nyadika pengeradu tanah lalu sangkuh sida digaga nyadika duku kena nyarau dan kayu.” Orang Kristian ti bendar dikelala orang ketegal ngembuan pemaik. Sida nitihka pesan Petara ke diberi nengah rasul Paul ke ngasuh ‘enda malas penyai ngena penyai’ sereta ngasuh “diau bebaik enggau semua orang.” (Rome 12:17, 18) Taja pan Paul napi penanggul, nyengkaum “nyau deka bebadi . . . laban perumpak,” iya enda kala ngelaban prinsip Bup Kudus lebuh nyaga diri empu. (2 Korint 11:26) Tang, iya bepanggai ba Petara, lalu nemu jaku lalau ti badas ari Bup Kudus nya “beguna agi ari senyata perang.”—Pengajar 9:18, NW.
Ba orang Kristian, nyawa berega agi ari reta. Kitai nemu “pengidup mensia ukai bepanggai ba pemayuh reta tengkira.” (Luke 12:15) Nya alai, enti bejaku enggau chara ti manah enda ulih nagang perumpak, kitai nitihka jaku ajar Jesus: “Anang ngelaban orang ke jai.” Tu engka reti nya kitai nejuka iya ngambi sebarang utai ti dikedekaka iya. (Matthew 5:39, 40; Luke 6:29) * (Peda nota kaki.) Endang amat, manah agi nyeliahka diri ari nyadi tagit penjenayah. Sida engka enda entu deka nyerang kitai enti kitai nitihka jaku ajar Bup Kudus sereta nyeliah ari mandangka “pengaya” ti dikemisi diri. (1 John 2:16) Kitai mega enda kena kachau enti orang ke berimbai pendiau enggau kitai nemu kitai nya Saksi-Saksi Jehovah ke ngembuan pemaik.—Jaku Dalam 18:10.
Orang Kristian bebasaka pengasai ati orang bukai. (Rome 14:21) Sekeda bala menyadi Kristian engka tekenyit tauka enda nyamai ati, enti sida nemu seiku ari bala menyadi Kristian sida ngembuan senapang kena nyaga diri empu ari orang bukai. Kitai engka dikemendarka undang-undang ngembuan senapang, tang ketegal kitai rinduka bala menyadi Kristian kitai, kitai enggai ngereja utai ke ditemu kitai tau ngasuh sida enda nyamai ati.—1 Korint 10:32, 33; 13:4, 5.
Orang Kristian deka nyadi chunto ti manah ke orang bukai. (2 Korint 4:2; 1 Peter 5:2, 3) Enti orang Kristian ngembuan senapang kena nyaga diri empu ari orang bukai, bala tuai gempuru deka meri iya jaku lalau ari Bup Kudus. Enti iya deka ngembuan senapang nya, iya enda ulih nyadi chunto ti manah. Ketegal tu, iya enda ulih ngembuan sebarang tanggung pengawa ba eklisia. Sama mega enggau orang Kristian ke terus mai senapang lebuh iya bejalaika pengawa sekular. Manah agi iya nguji ngiga kereja bukai. *—Peda nota kaki.
Orang Kristian enda tau enda ngaga pemutus kediri empu pasal chara iya deka nyaga diri, diri bilik, sereta reta iya, nyengkaum alai iya deka bekereja. Tang lebuh iya ngaga pilih, utai ke dipilih iya patut bepelasarka prinsip Bup Kudus. Petara kitai ti pintar meri kitai prinsip tu laban Iya rinduka kitai. Nya kebuah orang Kristian ke ngembuan kaul ti tegap enggau Jehovah milih enggai ngembuan senapang kena nyaga diri ari orang bukai. Sida nemu, enti sida bepanggai ba Petara sereta nitihka prinsip Bup Kudus ba pengidup, sida deka ngembuan pengelikun ti bendar belama iya.—Masmur 97:10; Jaku Dalam 1:33; 2:6, 7.
Lebuh maya penusah ti besai, orang Kristian deka bepanggai ba Jehovah sereta enda nguji deka ngetanka diri empu
^ per. 3 Orang Kristian engka berunding deka ngembuan senapang (baka rifle tauka shotgun) kena ngasu jelu ke pemakai tauka nyaga diri ari jelu siga. Taja pan iya enda ngena senapang nya, iya patut mansutka seterum, engka mega muka senapang nya, lalu nyimpan iya ba endur ti likun sereta bekunchi. Ba endur ke enda dikemendarka ngembuan senapang, tauka perintah nyekat tauka netapka atur ke patut ngagai orang ke bempu senapang, orang Kristian ngasika undang-undang nya.—Rome 13:1.
^ per. 6 Kena nemu chara ngetanka diri ari kena pasung, peda artikel “Cara Mencegah Pemerkosaan”-IN kena 8 Mac 1993, dalam majalah Sedarlah!
^ per. 2 Ke penerang mayuh agi pasal kereja ke bisi bebaika senapang, peda The Watchtower kena 1 November 2005, lambar 31, sereta 15 Julai 1983, lambar 25-26.
