1, 2. Ba sistem dunya tu, nama kebuah deka seruran bisi orang ke seranta?

 KEMAYA hari tu, sistem ekonomi enda manah sereta enda lurus. Ngambika chunto, mayuh orang ke biak tusah deka ngiga kereja. Sekeda orang berambunka nyawa diri pindah ngagai menua ti kaya. Lalu ba menua ti kaya, bisi mayuh orang ke seranta. Di serata dunya, orang ke kaya majak kaya lalu orang ke seranta majak seranta. Nitihka riput baru-baru tu, pengaya 1 peratus orang sama enggau 99 peratus penyampau duit semua orang. Amat, taja pan sekeda orang ngembuan mayuh duit lalu ulih dikena nyentuk ngagai beberapa serak peturun, tang bebiliun iku orang ke bukai balat seranta. Jesus nemu pasal utai tu lebuh iya madahka: “Kita deka seruran bisi orang ke seranta enggau kita.” (Mrk. 14:7) Nama kebuah utai ke enda lurus tu bisi nyadi?

² Jesus nemu, semina Perintah Petara aja ke ulih ngubah sistem pengawa dagang ba dunya. Bup Kudus madahka “bala sedagar,” tauka sistem pengawa dagang, nyengkaum sistem politik enggau pengarap, nya sebagi ari dunya Sitan.  (Pem. 18:3) Nembiak Petara ulih nyeraraka diri ari politik sereta pengarap pelesu. Taja pia, mayuh nembiak Petara enda entu ulih nyeraraka diri ari pengawa dagang ba dunya Sitan tu.

 3. Nama tanya ti deka dikerandauka kitai?

³ Ketegal nyadi orang Kristian, kitai patut meresa ulah kitai bekaul enggau sistem pengawa dagang ba dunya. Kena ngereja tu, kitai ulih nanya diri empu: ‘Baka ni aku ulih ngayanka penetap ati ngagai Petara ari chara aku ngena reta? Baka ni aku ulih kurang agi enggau pengawa dagang ba dunya? Nama peneleba ke nunjukka nembiak Petara kemaya hari tu arap bendar ke Iya?’

4, 5. (a) Nama nyadi ngagai pemesai ba cherita Jesus? (b) Nama diasuh Jesus gaga bala murid iya?

⁴ Bacha Luke 16:1-9. a Cherita Jesus pasal pemesai ke enda lurus patut ngasuh semua kitai berunding. Orang bisi bejaku madahka pemesai nya masau duit tuan iya, lalu tuan iya deka muai iya ari kereja. b (Peda nota kaki.) Tang pemesai nya ngena “pemintar.” Sebedau iya badu kereja, iya bebakih enggau orang ke ulih nulung iya dudi hari. Jesus ukai nusui cherita tu ketegal dekaka bala murid iya ngereja utai ti enda lurus kena beridup. Tu meh utai ti dikereja orang ba dunya tu. Tang, Jesus ngena cherita nya ngajar siti utai ti beguna bendar.

⁵ Jesus nemu, baka pemesai ke napi penanggul enggau ngenyit, mayuh ari bala murid iya deka balat tusah ngidupka diri ba dunya ti enda lurus. Nya alai iya ngasuh sida: “Gaga orang nyadika pangan kita ngena pengaya dunya [pengaya ti enda lurus, NW].” Jaku tu meransang kitai nyadi pangan Jehovah enggau Jesus ngena reta tengkira kitai. Nama kebuah? Lebuh reta tengkira udah abis, Jehovah enggau Jesus ke nyadi pangan kitai, deka nerima kitai “ke dalam rumah ti meruan belama iya.” Nama ulih dipelajarka kitai ari jaku lalau Jesus?

 6. Baka ni kitai nemu sistem pengawa dagang kemaya hari tu ukai sebagi ari tuju Petara?

⁶ Taja pan Jesus nadai madahka kebuah iya nyebut reta tengkira nya “enda lurus,” tang Bup Kudus enggau terang madahka, ngulihka mayuh duit ari reta ukai sebagi ari tuju Petara. Ngambika chunto, Jehovah meri Adam seduai Hawa lebih ari ti diguna seduai iya ba Kebun Eden. (P-kal. 2:15, 16) Lebuh Petara meri roh kudus Iya ngagai orang ke dipilih ngagai serega, “nadai siku sida ngumbai utai ti dikemisi sida semina diempu sida kediri, tang semua sida bekunsika semua utai ti dikemisi sida enggau pangan diri.” (SKR. 4:32) Nabi Isaiah madahka, bisi siti timpuh alai semua mensia deka gaga ati enggau semua asil ba dunya enggau bibas. (Isa. 25:6-9; 65:21, 22) Tang sebedau jam nya datai, bala murid Jesus deka begunaka “pemintar.” Sida enda ulih nyeliahka diri ari ngena pengaya ti enda lurus ba dunya tu, lalu ba  maya ti sama sida mega nguji deka ngelantangka ati Petara.

 7. Nama jaku lalau ke diberi Jesus ba Luke 16:10-13?

⁷ Bacha Luke 16:10-13. Ba cherita Jesus, pemesai nya deka begulai manah enggau orang bukai ketegal deka bulih penguntung ke diri empu. Taja pia, Jesus deka bala murid iya nyadi pangan Jehovah enggau iya, tang ukai ke penguntung diri empu. Jesus deka kitai nemu, chara kitai ngena pengaya ti enda lurus ulih nunjukka sekalika kitai tetap ati ngagai Petara. Baka ni kitai ulih ngereja nya?

8, 9. Beri sekeda chunto pasal baka ni sekeda menyadi Kristian nunjukka diri tetap ati lebuh ngena pengaya sida ti enda lurus.

⁸ Siti chara kena nunjukka diri tetap ati enggau reta ti dikemisi kitai iya nya enggau meri pemeri ngagai pengawa nginjil di serata dunya ke udah dipadahka Jesus deka nyadi. (Mat. 24:14) Seiku anak mit indu di menua India ngembuan siti tabung duit ke mit, lalu iya mupuk-mupuk nyimpan duit siling dalam tabung nya. Iya mega sanggup enda meli ayam. Pengudah tabung duit nya penuh, iya meri semua duit ke disimpan iya ngambika dikena ba pengawa nginjil. Seiku menyadi Kristian lelaki di menua India bisi ladang buah nyiur. Iya meri mayuh buah nyiur ngagai opis penyalin jaku Malayalam. Ketegal opis nya patut meli buah nyiur, iya ngasaika pemeri iya beguna agi ari ke meri duit. Nya meh “pemintar.” Pia mega, bala menyadi di menua Greece selalu meri minyak kana, kiju, sereta pemakai bukai ngagai ruang bilik Betel.

⁹ Seiku agi menyadi Kristian lelaki udah ngemendarka reta iya di Sri Lanka nyadi endur alai begempuru ninting minggu sereta gempuru besai lalu alai nembiak Jehovah ke gawa penuh jam diau. Tu engka ngasuh iya nadai bulih penguntung ba duit, tang tu ulih meri bantu ti besai ngagai bala penginjil ba dia, ke nadai mayuh duit. Ba menua alai pengawa nginjil disekat, bala menyadi ngena rumah sida nyadi Palan Gempuru. Tu ngasuh bala pengerintis enggau bala penginjil ke nadai mayuh duit bisi alai begempuru ti enda ibuh disua.

10. Nama sekeda penguntung ke diulih kitai enti meri enggau gerah jari?

¹⁰ Chunto ke baka tu nunjukka nembiak Petara “tau dikarapka ngemataka utai ti mimit.” (Luk. 16:10) Sida ngena reta sida ke penguntung orang bukai. Baka ni asai ati bala pangan Jehovah pasal pekara tu? Sida balat gaga ati laban lebuh sida gerah jari, sida bulih pengaya ti “bendar” di serega. (Luk. 16:11) Seiku menyadi Kristian indu ke meri duit pemeri enggau tetap kena nulung  pengawa Perintah Petara madahka, bisi utai udah nyadi ba iya dalam timpuh nya. Iya nerangka: “Aku beratika, mayuh agi utai diberi aku, bendar agi aku deka meri utai ngagai orang bukai. Aku deka agi ngampun, sabar enggau orang bukai, sereta ulih nerima pengurang enggau jaku lalau.” Mayuh bala menyadi Kristian nemu, gerah jari udah meri penguntung ngagai sida seiku-seiku.—Mas. 112:5; J-lam. 22:9.

11. (a) Baka ni ulah kitai ke gerah jari nunjukka “pemintar”? (b) Nama nyadi ba bala nembiak Petara kemaya hari tu? (Peda gambar ba pun artikel.)

¹¹ Kitai mega nunjukka “pemintar” lebuh kitai ngena reta kitai nyukung orang bukai ba pengawa nginjil. Enti kitai enda ulih gawa penuh jam tauka pindah ngagai endur ke begunaka mayuh penginjil, kitai agi ulih meri penguntung ngagai orang bukai. (J-lam. 19:17) Ngambika chunto, pemeri kitai nulung nyendiaka litaricha sereta nyukung pengawa nginjil ba endur ke seranta ke alai mayuh orang nerima pemendar. Baka di menua Congo, Madagascar, sereta Rwanda, rega Bup Kudus mar amat. Kekadang rega siti Bup Kudus sama enggau gaji seminggu tauka sebulan. Betaun-taun, bala menyadi Kristian patut milih sekalika deka meli pemakai ke diri sebilik tauka meli Bup Kudus. Diatu, ketegal bisi pemeri ari orang bukai lalu duit nya dibagi sama bela, gerempung Jehovah nyalin sereta nyadung Bup Kudus enggau pechuma ngagai tiap iku diri sebilik sereta pelajar Bup Kudus. (Bacha 2 Korint 8:13-15.) Nya alai, orang ke meri enggau ke nerima bela ulih nyadi pangan Jehovah.

12. Baka ni Abraham nunjukka diri arapka Petara?

¹² Kitai mega ulih nyadi pangan Jehovah lebuh kitai kurang agi enggau pengawa dagang ba dunya sereta ngiga pengaya ti “bendar.” Nya meh utai ti digaga Abraham ke tetap ati. Iya ngasika Jehovah lalu ninggalka nengeri Ur ti kaya ngambika ulih diau ba langkau kain laban iya deka nyadi pangan Jehovah. (Heb. 11:8-10) Abraham seruran arapka Petara, ukai arapka reta. (P-kal. 14:22, 23) Jesus meransang sida ke bukai neladan pengarap ke baka nya. Bisi sekali, Jesus madah ngagai seiku lelaki biak ti kaya: ‘Enti nuan deka nyadi pemadu badas, mupuk nuan lalu jual semua reta tengkira nuan, lalu beri duit nya ngagai orang ke seranta, lalu nuan deka bisi pengaya di serega. Udah nya datai lalu titihka aku.’ (Mat. 19:21) Lelaki nya nadai ngembuan pengarap baka Abraham. Tang bisi orang bukai ke arapka Petara.

13. (a) Nama jaku lalau ke diberi Paul ngagai Timoti? (b) Baka ni kitai ulih nitihka jaku lalau Paul kemaya hari tu?

¹³ Timoti nya orang ke ngembuan pengarap. Pengudah ngumbai Timoti “soldadu Jesus Kristus,” ku Paul madah ngagai iya: “Nadai orang ke nyadi soldadu malut diri enggau [‘pengawa ninting hari ba pengidup,’ NW], laban tuju ati iya endang  keran deka ngelantangka ati komandant iya.” (2 Tim. 2:3, 4) Bala murid Jesus kemaya hari tu, nyengkaum lebih ari satu juta iku pengereja pengawa penuh jam, enggau naka ulih nitihka jaku lalau Paul. Sida nulak iklan ke datai ari dunya ti amu tu. Sida ingatka prinsip Bup Kudus: “Enti nuan nginjau duit, nuan nyadi ulun orang ke nyali nuan duit nya.” (J-lam. 22:7) Sitan deka kitai ngena semua jam enggau pengering kitai bekereja ke pengawa dagang ba dunya iya. Sekeda orang nginjau mayuh duit kena mayar rumah, kerita, pelajar, tauka indah pengawa jadi melaki-bini. Enti kitai enda bejimat, kitai deka berutang betaun-taun. Kitai nunjukka pemintar enti kitai idup enggau pengumbas iya, nyeliahka utang, sereta ngena mimit aja duit. Enggau tu, kitai deka senang gawa ke Jehovah ari ke nyadi ulun sistem pengawa dagang kemaya hari tu.—1 Tim. 6:10.

14. Nama utai ti deka digaga kitai? Beri sekeda chunto.

¹⁴ Ngambika ulih idup enggau pengumbas iya, kitai enda tau enda ngenuluka Perintah Petara. Sepasang laki bini ngembuan bisnis ti besai sereta bulih mayuh untung. Taja pia, seduai iya deka enggau pengawa penuh jam baru. Nya alai, seduai iya nyual bisnis, bot, sereta reta ti bukai. Udah nya, seduai iya sukarela mantu ba pengawa nirika indu opis di Warwick, New York. Tu utai ti spesial ba seduai iya laban ulih gawa ba Betel enggau anak indu sereta menantu seduai iya, lalu beberapa minggu enggau apai indai laki iya ke mega gawa ba projek Warwick. Seiku menyadi Kristian indu ke nyadi pengerintis di Colorado, U.S.A., bulih kereja part-time ba bank. Bala pengaji gaga amat ati enggau pengawa iya, nya alai iya diasuh gawa penuh jam ke dibayar gaji tiga kali lipat. Taja pia, ketegal kereja nya ngasuh iya tusah deka betumpu ba pengawa nginjil, iya enggai nerima kereja nya. Tu semina beberapa iti chunto ari mayuh utai ti dilengkaka bala nembiak Jehovah. Lebuh kitai keran deka ngenuluka Perintah Petara, tu nunjukka kitai ngemeratka kaul kitai enggau Petara sereta pengaya ti bendar ari reta kitai.

15. Nama pengaya ti pemadu ngemuaska ati?

¹⁵ Ngembuan reta ukai reti kitai diterima Petara. Jehovah merekatka orang ti “kaya dalam pengawa ti badas.” (Bacha 1 Timoti 6:17-19.) Ngambika chunto, seiku menyadi Kristian indu ke benama Lucia nemu, menua Albania begunaka bala penginjil. c (Peda nota kaki.) Nya alai iya pindah kia ari menua Itali ba taun 1993. Iya nadai kereja tang arapka Jehovah deka nyendiaka utai ti diguna iya. Iya belajarka jaku Albania lalu udah nulung lebih ari 60 iku orang nyerahka diri ngagai Jehovah. Semua kitai engka enda bulih asil ti sama ari pengawa nginjil ba kandang endur kitai. Tang semua utai ke digaga kitai kena nulung orang bukai belajar pasal Jehovah sereta nyadi pangan Iya nya utai ti deka dikenang kitai belama iya.—Mat. 6:20.

16. (a) Nama deka nyadi enggau sistem pengawa dagang kemaya hari tu? (b) Baka ni tu bekaul enggau runding kitai pasal reta?

¹⁶ Jesus madah enggau terang, sistem  pengawa dagang deka nadai agi. Iya madahka: ‘Lebuh pengaya nya udah abis,’ ukai madahka ‘enti pengaya nya udah abis.’ (Luk. 16:9) Ba hari ti penudi, sekeda bank udah enda mujur lalu sekeda menua napi penanggul ti besai ba ekonomi. Tang ba maya ti deka datai, gaya utai deka majak jai. Politik, pengarap, sereta sistem pengawa dagang ke nyadi sebagi ari dunya Sitan deka puntan. Nabi Esekiel enggau Sepaniah madahka emas enggau pirak, ke seruran nyadi utai beguna ba sistem pengawa dagang, deka nadai rega agi. (Esk. 7:19; Sep. 1:18) Baka ni asai ati kitai enti kitai nyau tuai lebuh diau ba dunya tu lalu nemu diri udah ngelengkaka pengaya ti bendar ketegal reta? Kitai engka ngasaika diri baka orang ke udah ngena sepemanjai pengidup gawa ngulihka mayuh duit, tang udah nya nyau nemu semua duit nya pelesu. (J-lam. 18:11) Reta ba dunya tu deka abis. Nya alai, anang masau peluang ngena reta nuan nyadi pangan Jehovah enggau Jesus. Utai ti digaga kitai ke Jehovah enggau Perintah Iya deka ngasuh kitai gaga amat ati.

17, 18. Nama dianti bala pangan Petara?

¹⁷ Pengudah Perintah Petara datai, orang badu agi mayar sua tauka minjau duit. Pemakai deka mayuh sereta pechuma, lalu tau enda ibuh agi mayar bala lutur tauka ubat. Bala pangan Jehovah deka gaga ati enggau asil bumi ti pemadu badas. Emas, pirak, enggau batu berega deka dikena ngias diri, ukai utai ti ngasuh orang kaya. Kayu, batu, enggau besi ti manah kualiti sereta enda ibuh dibeli deka seruran bisi kena nirika rumah ti manah. Bala pangan nulung kitai ketegal sida deka ngereja nya, ukai ketegal kitai ngaji sida. Kitai deka bekunsi semua asil ba dunya tu.

¹⁸ Tu semina sekeda ari upah ngagai orang ke nyadi pangan Jehovah enggau Jesus. Penyembah Jehovah ba dunya deka manjung gaga ati lebuh sida ninga jaku Jesus: ‘Datai kitu, kita ke udah diberekatka Apai aku, awakka kita bempu Perintah ti udah disedia ke kita kenyau ari penumbuh dunya.’—Mat. 25:34.