1, 2. Nama kebuah kitai patut berandau pasal chara kena ngelantangka ati orang ke tusah? (Peda gambar ba pun artikel.)

 “NYAUKA setaun pengudah anak lelaki kami duai mati, kami duai berasai balat tusah ati sereta merinsa,” ku Susi. Pengudah bini iya mati ngenyit, seiku menyadi Kristian lelaki madahka iya napi “penusah ba ati ke enda ulih ditelah.” Lalu mayuh orang napi pemerinsa ke baka tu. Ba eklisia Kristian kemaya hari tu, mayuh bala menyadi Kristian enda nyangka orang ti dikesayauka sida mati sebedau Armagedon. Engka orang ti dikesayauka nuan udah mati, tauka nuan engka nemu pasal orang ke benung tusah. Enti pia, nuan engka berunding, ‘Baka ni orang ke tusah tau bulih pengelantang ba ati?’

² Sekeda orang madahka, awak ulih nyumanka semua telih. Tang kati tu selalu baka nya? Seiku indu balu madahka, “Aku enggau bendar ulih madahka utai ke digaga  seiku-seiku orang enggau awak iya ulih nulung nyumanka iya.” Telih ba tubuh begunaka awak sereta intu ti manah ngambika ulih suman. Pia mega enggau pemerinsa ba emosi. Nama utai ke ulih nulung orang ke tusah ngurangka pemerinsa ba emosi?

3, 4. Nama kebuah kitai ulih pechaya Jehovah meretika penusah ba ati kitai?

³ Apai kitai ti pengasih, Jehovah, nya orang ke meri pengelantang ba ati ti diguna kitai. (Bacha 2 Korint 1:3, 4.) Iya nyadi chunto ti pemadu badas pasal meretika penusah ba ati orang, lalu Iya besemaya ngagai nembiak Iya: “Aku tu ke meri kita [‘pengelantang,’ NW].”—Isa. 51:12; Mas. 119:50, 52, 76.

⁴ Apai kitai ti ngembuan pengerindu mega kala lenyau orang ti dikesayau, baka nembiak Iya Abraham, Isak, Jakop, Moses, Raja David, sereta sida ke bukai. (P-pau. 12:6-8; Mat. 22:31, 32; SKR. 13:22) Bup Kudus nunjukka, Jehovah nganti maya Iya deka ngangkatka sida ke tetap ati nya. (Jop 14:14, 15) Maya nya, sida deka gaga ati sereta ngembuan pengerai ti sempurna. Jehovah mega kala lenyau Anak tuai Iya ti balat dikerinduka Iya. Kitai tusah deka ngambarka pemalat pemerinsa ke ditapi Jehovah lebuh Iya meda Anak Iya mati enggau penuh pemerinsa.—Jhn. 5:20; 10:17.

5, 6. Baka ni Jehovah ngelantangka ati kitai?

⁵ Kitai ulih enggau pengabis ati arapka Jehovah deka nulung kitai. Nya alai, kitai patut seruran besampi ngagai Iya enda ngira maya lalu madahka penusah ati diri. Kitai berasai lantang ati laban nemu Jehovah meretika asai ati kitai lalu Iya meri pengelantang ba ati ti diguna kitai! Tang baka ni Iya ngereja nya?

⁶ Siti chara ti dikena Jehovah ngelantangka ati kitai, iya nya ngena roh kudus Iya. (SKR. 9:31) Jesus besemaya, Apai kitai deka meri roh kudus Iya ti besai kuasa ngagai semua orang ke minta roh kudus nya. (Luk. 11:13) Susi, ke disebut ba pun tadi, madahka: “Kami duai suah besampi lalu minta Jehovah ngelantangka ati kami duai. Tiap kali besampi, pemaik ari Petara amat nyaga ati sereta runding kami duai.”—Bacha Pilipi 4:6, 7.

7, 8. Nama kebuah kitai ulih pechaya Jesus deka ngelantangka ati kitai?

⁷ Lebuh Jesus ba dunya, iya enggau sempurna neladan kualiti manah Apai iya ari utai ti disebut sereta utai ti digaga iya. (Jhn. 5:19) Jehovah ngirumka Jesus ke dunya ngambi nyumanka “ati orang ke tusah” sereta “semua orang ke ngulit.” (Isa. 61:1, 2; Luk. 4:17-21) Orang nemu, Jesus meretika pemerinsa sida sereta amat deka nulung sida.—Heb. 2:17.

 ⁸ Lebuh Jesus agi biak, iya tentu bisi bala pangan sereta diri sebilik ke udah mati. Ngambika chunto, apai tiri iya, Josep, engka mati lebuh Jesus agi biak. a (Peda nota kaki.) Uji gambarka penusah ke ditapi orang ke biak ti ngembuan pengibuh ke patut natka penusah ati diri, sereta penusah ati indai, enggau bala menyadi iya.

 9. Baka ni Jesus ngayanka diri meretika penusah ba ati orang lebuh Lasarus mati?

⁹ Lebuh bejalaika pengawa nginjil, Jesus nunjukka diri amat meretika orang sereta ulih ngasaika penusah ba ati sida. Ngambika chunto, lebuh pangan rapat iya Lasarus mati, Jesus ngasaika pemerinsa ke ditapi Maria seduai Marta. Ketegal iya balat ngasaika penusah ati sida, nya alai iya berengkah nyabak, taja pan iya nemu diri deka ngangkatka Lasarus idup baru.—Jhn. 11:33-36.

10. Baka ni kitai ulih nemu Jesus meretika asai ati kitai kemaya hari tu?

¹⁰ Baka ni jaku Jesus ti ngelantangka ati menya ulih nulung kitai kemaya hari tu? Bup Kudus enggau terang madahka, Jesus enda berubah. Bup Kudus madahka: “Jesus Kristus enda berubah kemari, sehari tu enggau ke belama iya.” (Heb. 13:8) Iya dikumbai “Pun pengidup” laban iya muka peluang idup belama iya ngagai kitai. Jesus empu mega ulih meretika asai ati ti tusah lalu “ulih nulung orang ke kena laban penguji.” (SKR. 3:15; Heb. 2:10, 18) Nya alai kitai ulih nemu, Jesus agi berasai tusah ati lebuh orang ngasaika pemerinsa. Iya meretika penusah ati sida, lalu iya ulih ngelantangka ati sida “lebuh [sida] begunaka” pengelantang ba ati.—Bacha Hebrew 4:15, 16.

11. Ni bagi ayat ke ngelantangka ati nuan?

¹¹ Cherita pasal Jesus ke balat tusah ati lebuh Lasarus mati nya siti ari pemayuh ayat dalam Bup Kudus ke ulih ngelantangka ati. Tu enda ngasuh kitai tekenyit, laban “semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang.” (Rom. 15:4) Enti nuan benung tusah ati, nuan mega tau bulih pengelantang ba ati ari ayat di baruh tu:

•   ‘Jehovah diau semak orang ke tusah ati lalu ngidupka sida ke nadai agi pengadang.’—Mas. 34:18, 19.

•   “Lebuh ati aku mayuh pengirau, Nuan [Jehovah] merindang aku, lalu ngasuh ati aku gaga.”—Mas. 94:19.

•   ‘Awakka Jesus Kristus Tuan kitai, enggau Petara ti Apai kitai, ke rinduka kitai, lalu udah meri kitai peransang ti meruan belama iya, enggau pengadang, ulih pengasih Iya, meransang sereta ngeringka ati kita.’—2 Tes. 2:16, 17. b—Peda nota kaki.

12. Baka ni kitai ulih ngelantangka ati orang bukai?

¹² Orang ke tusah ati mega tau bulih pengelantang ba ati dalam eklisia Kristian. (Bacha 1 Tesalonika 5:11.) Baka ni nuan ulih ngering sereta ngelantangka ati orang ke ngembuan “ati ti selalu tusah”? (J-lam. 17:22) Kingatka, bisi “maya enda bemunyi enggau maya bejaku.” (P-jar. 3:7) Seiku indu balu ke benama Dalene madahka, orang ke tusah ati patut mantaika runding sereta asai ati diri. Nya alai, utai ti pemadu beguna ke ulih digaga nuan iya nya mending dulu lalu anang guai bejaku. Junia, ke mati menyadi lelaki ti tuai ari iya ketegal munuh diri, madahka, “Taja pan nuan enda entu ulih amat meretika penusah ba ati sida, utai ti beguna iya nya nuan deka meretika asai ati sida.”

13. Nama patut dikingatka kitai pasal penusah ba ati?

¹³ Kitai patut ingat, ukai semua kitai ngasaika sereta ngayanka penusah ati diri enggau chara ti sama. Kekadang tusah deka nerangka enggau nyemetak pemalat pemerinsa ke diasaika kitai. Jaku Petara madahka: “Semina ati nemu pemerinsa iya, lalu orang bukai enda ulih ngasaika pengaga ati nya.” (J-lam. 14:10, NW) Indah lebuh orang madahka baka ni asai ati iya, orang bukai enda seruran senang meretika utai ti deka dipadah iya.

14. Nama ulih disebut kitai kena ngelantangka ati orang ke tusah?

¹⁴ Kekadang tusah mega deka nemu utai ti patut disebut ngagai orang ke benung tusah ati. Tang Bup Kudus madahka, “jaku ti disebut enggau bejimat, ulih nyuman.” (J-lam. 12:18) Mayuh orang udah tetemuka jaku ti ngelantangka ati ke ulih dikunsi ba brosur Bila Seseorang yang Anda Kasihi Meninggal.-IN c (Peda nota kaki.) Taja pia, kesuah agi utai ti pemadu beguna ke ulih digaga nuan iya nya “nyabak enggau orang ke nyabak.” (Rom. 12:15) Gaby ke udah mati laki madahka, kekadang chara ti pemadu manah dikena iya mantaika asai ati diri iya nya nyabak. Ku iya nambah: “Nya kebuah aku berasai lantang mimit lebuh bala pangan nyabak enggau aku. Ba maya nya, aku enda entu berasai kediri lebuh aku berasai tusah ati.”

15. Baka ni kitai ulih ngelantangka ati orang bukai enti kitai ngasaika diri tusah deka ngereja nya? (Peda mega kutak “ Leka Jaku ti Ngelantangka Ati.”)

¹⁵ Enti nuan ngasaika diri tusah deka nyebut utai ti ngelantangka ati, nuan engka ulih ngereja nya enggau ngirumka kad, email, mesej, tauka surat. Nuan ulih ngena ayat Bup Kudus ti ngelantangka ati, madahka kualiti manah ke dikingat nuan pasal orang ke udah mati, tauka bekunsi kenang ti ngagaka ati ke dikerindu nuan. Ku Junia madahka:  “Nerima pesan pandak ti meransang ati tauka kangau datai begulai enggau menyadi Kristian ti indu amat udah mayuh nulung aku. Leka jaku ke disebut ngasuh aku berasai dikesayau sereta dikeibuhka.”

16. Nama siti chara ke ulih mujur dikena ngelantangka ati orang bukai?

¹⁶ Sampi kitai ulih nulung bala menyadi Kristian kitai ke benung tusah ati. Kitai ulih besampi ke sida tauka besampi enggau sida. Taja pan tusah deka ngereja nya laban nuan engka ngasaika diri deka nyabak, sampi nuan ke ari ati amat ulih ngelantangka ati. Ku Dalene ngenang: “Kekadang lebuh menyadi Kristian indu datai ngelantangka ati aku, aku nanya sekalika sida deka besampi. Lebuh berengkah besampi, sida tusah deka nyebut leka sampi, tang tiap kali pengudah beberapa ayat, munyi nyawa sida majak inggar lalu nyebut sampi ti amat ari ati. Pengarap, pengerindu, sereta pengibuh sida ti teguh amat ngeringka pengarap.”

17-19. Nama kebuah kitai patut terus ngelantangka ati orang bukai?

¹⁷ Tusah deka nemu enggau nyemetak ni pengelama seiku-seiku orang mengkang tusah ati. Lebuh orang ti dikesayauka mati, terubah iya mayuh bala pangan sereta kaban belayan bisi ngelantangka ati. Tang pengudah sida nyau berengkah kisuk enggau pengidup besehari-hari, orang ke benung tusah ati agi begunaka pengelantang ba ati. Nya alai sedia meh nulung. “Pangan endang seruran ngayanka pengerindu sida. Nama guna bisi kaban belayan enti  sida enda enggau natka penusah?” (J-lam. 17:17) Kitai patut ngelantangka ati orang ke tusah seagi-agi sida begunaka kitai.—Bacha 1 Tesalonika 3:7.

¹⁸ Anang enda ingat, orang ulih ngenyit berasai tusah ati ba sebarang maya. Tu engka ketegal ulang taun pengawa jadi melaki-bini, sekeda musik, gambar, pengawa, tauka bau, bunyi, tauka musin ba taun nya. Lebuh bini tauka laki ke udah mati kaling pengidup ngereja siti-siti utai kediri keterubah iya, baka datai ngagai gempuru besai tauka Ngingatka Pemati Jesus, tu amat ulih ngasuh berasai merinsa. Ku seiku menyadi Kristian lelaki ke udah mati bini madahka: “Aku ngumbai ulang taun keterubah pengawa jadi melaki-bini nya utai ti balat ngenusahka ati sereta enda senang. Tang beberapa iku bala menyadi Kristian ngatur siti pengawa beserumpu makai ti enda besai enggau bala pangan ke pemadu rapat enggau aku ngambika aku enda berasai sunyi.”

¹⁹ Kingatka, orang ke tusah ati ukai semina begunaka jaku peransang ba siti-siti maya aja. Junia madahka: “Kesuah agi bantu sereta kaul ke diberi taja pan ukai ba maya siti-siti ulang taun, lebih agi beguna. Pengawa ke enda diatur nya deka berega agi sereta ngenataika mayuh agi pengelantang ba ati.” Amat, kitai enda ulih muai semua penusah ba ati tauka asai ati ti sunyi ba sida, tang kitai ulih ngelantangka ati sida ke tusah enti ngereja utai ke sida. (1 Jhn. 3:18) Gaby madahka: “Aku amat beterima kasih ngagai Jehovah laban bala tuai gempuru ke ngembuan pengerindu nulung napi tiap iti penanggul. Sida amat ngasuh aku ngasaika Jehovah nulung aku.”

20. Nama kebuah semaya Jehovah nya pun pengelantang ti besai?

²⁰ Endang ngelantangka ati ulih nemu Jehovah, Petara ti pun semua pengelantang, deka muai semua penusah ba ati maya ngangkatka orang mati idup baru. (Jhn. 5:28, 29) Jehovah ti Pemadu Tinggi besemaya “deka ngerusak pemati belama iya! Iya deka ngendas ai mata ari mata semua orang.” (Isa. 25:8) Udah nya, ari ke “nyabak enggau orang ke nyabak,” semua orang ba dunya deka “rami gaga enggau orang ke rami gaga.”—Rom. 12:15.