Rasul Paul nemu, propaganda Sitan nya endang tau ngachau kitai. Tang ukai semua orang Kristian nemu pasal utai tu. Ngambika chunto, sekeda orang di Korint ngumbai diri kering ba pemendar, lalu enda ulih dikuasa Sitan. (1 Korint 10:12) Nya kebuah Paul meri jaku tangkan tu: “Tang aku irau enggai ke, baka ular ke ngena pemintar iya nipu Awa, runding kita dibai tesat ari ati ti tuchi ti balat angkunka Kristus.”—2 Korint 11:3.

Jaku Paul nunjukka kebuah enda tau kelalu andalka diri empu. Ngambika ulih menang ngelaban propaganda Sitan, nuan patut nemu penusah ke datai ari propaganda nya sereta nyaga diri propaganda nya.

Dalam konteks tu, propaganda nya penerang ti enda betul tauka nesatka ti dikena nipu orang tauka nguasa chara orang berunding sereta ngereja pengawa. Nitihka bup Propaganda and Persuasion, propaganda nya “enda beradat, ngemediska, sereta enda lurus.” Orang nerangka reti propaganda ngena leka jaku baka “bula, ngelimpangka, nipu, ngasut, [sereta] nguasa runding.”

Propaganda endang amat ulih ngenusahka laban iya belubah-lubah nguingka runding lalu kitai enda entu sedarka iya. Kitai ulih nyemaka tu baka gis berachun ke enda ulih dipeda tauka disium. Vance Packard, seiku pakar ke landik pasal ulah mensia, madahka propaganda ngachau chara kitai ngereja utai “lebih agi ari ke ditemu kitai.” Seiku agi pakar madahka, propaganda udah ngasuh orang ngembuan ulah ke balat ngenusahka sereta enda ulih diterima, lalu udah  ngujungka genocide (pengawa ngemunaska siti-siti bansa), perang, sereta pengawa merinsaka ketegal bansa tauka pengarap.—Easily Led—A History of Propaganda.

Enti mensia ulih nipu kitai ngena propaganda sida, endaka Sitan lebih agi ulih? Iya udah belajarka pendiau mensia kenyau ari mensia ditempa. Pia mega, iya diatu nguasa “semua dunya,” nya alai iya ulih ngena semua dunya ngerembaika pemula iya. (1 John 5:19; John 8:44) Sitan “udah mampul runding” mayuh orang ngena propaganda iya nyentukka iya diatu “nipu semua dunya.” (2 Korint 4:4; Pemandang 12:9) Baka ni nuan ulih nyeliahka propaganda iya?

Jesus madahka siti chara ti senang kena ngelaban propaganda: “Nemu pemendar, lalu pemendar deka ngelepaska kita.” (John 8:31, 32) Ba siti perang, seiku soldadu patut nemu dini alai tau bulih penerang ti tau dikearapka laban munsuh deka ngerembaika pemula kena nipu iya. Nya alai dini nuan tau bulih penerang ti tau dikearapka? Jehovah udah nyendiaka penerang nya dalam Jaku Iya, Bup Kudus. Dia nuan tau bulih semua utai ti diguna nuan kena ngelaban propaganda Sitan.—2 Timoti 3:16, 17.

Endang amat, Sitan nemu tu. Nya alai, iya ngena dunya ke dikuasa iya ngelimpangka kitai sereta enda meransang kitai macha sereta belajarka Bup Kudus. Anang ditipu “akal Sitan”! (Epesus 6:11) Semina ngembuan batang ajar pasal pemendar, enda chukup. Kitai patut bebendar ngenalamka penemu pasal pemendar. (Epesus 3:18) Baka ke dipadah seiku penulis, Noam Chomsky: “Nadai orang nuang pemendar ke dalam untak nuan. Iya utai ke patut digiga kediri empu.” Nya alai, “giga kediri empu” enggau chara “mansik Bup Kudus tiap hari.”—Kereja Rasul 17:11.

Sitan enggai nuan berunding enggau manah sereta meretika pemendar ke didinga nuan. Nama kebuah? Laban propaganda “deka mujur agi” enti orang “enda diperansang berunding enggau manah.” (Media and Society in the Twentieth Century) Anang jampat pechayaka sebarang utai ke didinga enggau enda berunding dalam pasal utai nya. (Jaku Dalam 14:15) Petara meri nuan penau sereta pemintar berunding, nya alai kena meh utai nya ngeringka pengarap nuan.—Jaku Dalam 2:10-15; Rome 12:1, 2.

Bala soldadu ke dikuingka propaganda deka nyadi takut sereta enda entu deka belaban. Propaganda indah ulih ngasuh sida belaya enggau pangan diri tauka nyeraraka diri ari bala soldadu ke bukai. Nitih ku seiku general Jerman, propaganda nya kebuah orang Jerman alah ba Perang Dunya I. Iya madahka, orang balat dikuingka propaganda nyentukka sida enda ulih berundingka utai bukai. Sitan ngena chara ti sama ngerusak penyerakup orang Kristian kemaya hari tu. Ngambika chunto, iya nguji ngasuh bala menyadi Kristian enda sepenemu enggau pangan diri. Tauka iya nguji deka ngasuh sida ninggalka gerempung Jehovah enggau ngasuh sida ngumbai gerempung nya enda lurus tauka udah ngereja utai ti salah.

Anang mudah kena tipu! Titihka jaku ajar ari Jaku Petara sereta mengkang beserakup enggau bala menyadi Kristian. Ngambika chunto, Bup Kudus meransang kitai terus ‘ngampun pangan diri’ lalu jampat mutarka utai ke ngasuh enda sepenenu. (Kolosi 3:13, 14; Matthew 5:23, 24) Lalu Bup Kudus enda ngasuh kitai nyeraraka diri ari bala menyadi Kristian. (Jaku Dalam 18:1) Tentuka nuan besedia deka nyeliahka propaganda Sitan. Tanya diri empu, ‘Lebuh ke penudi iya menyadi Kristian ngemediska ati aku, kati aku mutarka utai nya ngena chara ti ngelantangka ati Petara tauka ngelantangka ati Sitan?—Galatia 5:16-26; Epesus 2:2, 3.

Seiku soldadu ke enda taluk ngagai ketuai iya tentu enda ulih belaban enggau manah. Nya alai bala munsuh ngena propaganda ngerusak pengandal bala soldadu sereta pengarap ngagai ketuai sida. Enti bala ketuai ngereja penyalah, bala munsuh nguji deka ngena tu, lalu madahka: “Kita enda ulih arapka sida!” lalu “Anang nejuka sida mai kita ngagai penusah!” Sitan ngereja utai ti sama. Iya nguji ngerusak pengandal nuan ngagai orang ke dikena Jehovah ngiring nembiak Iya.

Baka ni nuan ulih nyaga diri empu? Enggau keran deka mengkang dalam gerempung Jehovah. Terus taluk sereta nyukung orang ke ngiring nembiak Petara, taja pan sida enda sempurna. (1 Tesalonika 5:12, 13) Orang ke limpang ari pemendar sereta bala penipu ke bukai engka nyerang gerempung Jehovah.  (Titus 1:10) Taja pan utai ke disebut sida baka ke betul, anang “mudah irau ati.” (2 Tesalonika 2:2) Titihka jaku ajar ke diberi Paul ngagai Timoti: “Enda tau enda majak bepegai ba utai ti udah dipelajar,” sereta ingatka “sapa ke udah ngajar nuan utai nya.” (2 Timoti 3:14, 15) Pikirka semua bukti ke nunjukka nuan ulih arapka ulun ke tetap ati ke udah dikena Jehovah nyauka seratus taun diatu kena ngajar kitai pemendar.—Matthew 24:45-47; Hebrew 13:7, 17.

Sitan mega nguji nguingka nuan ngena chara ti nyemetak. Kekadang iya nguji ngasuh nuan berasai takut. Asai ati ti takut nya “siti ari propaganda ti pemadu lama.” (Easily Led—A History of Propaganda) Philip M. Taylor, seiku profesor ari menua British, madahka orang Asiria ngena utai ti ngasuh takut enggau propaganda kena ngalahka bala munsuh sida. Sitan mega ngena asai ati ti takut, baka takutka orang, takut diperinsa, sereta takut mati, kena ngasuh nuan badu nyembah Jehovah.—Isaiah 8:12; Jeremiah 42:11; Hebrew 2:15.

Anang nejuka Sitan ngereja tu ba nuan! Jesus madahka: “Anang takutka orang ke munuh tubuh, tang udah nya enda ulih ngereja utai lebih ari nya.” (Luke 12:4) Andal enggau pengabis ati ke Jehovah deka ngamatka semaya Diri ti deka nyaga nuan, meri nuan “kuasa ti besai,” sereta nulung nuan nyeliahka serang ari Sitan.—2 Korint 4:7-9; 1 Peter 3:14.

Endang amat, kekadang bisi maya iya nuan berasai lemi tauka takut. Tang kingatka jaku peransang Jehovah ngagai Josua: ‘Kering sereta berani: anang takut tauka lemi semengat, laban Aku, Jehovah Petara nuan bisi enggau nuan di sebarang endur nuan bejalai.’ (Josua 1:9) Enti nuan berasai irau, jejampat meh besampi ngagai Jehovah pasal pengirau ati nuan. Nuan ulih pechaya, ‘pemaik Petara, ti ngelui peragam mensia, deka nyaga ati enggau runding’ nuan. Udah nya, nuan deka bisi pengering kena nyeliahka semua propaganda Sitan.—Pilipi 4:6, 7, 13.

Kati nuan agi ingatka propaganda ke dikena seruan orang Asiria, kena ngenakutka nembiak Petara? Iya dekaka sida pechaya, nadai seiku orang indah Jehovah, ulih ngelindung sida ari Asiria. Lalu iya madahka Jehovah udah ngasuh orang Asiria ngerusak Jerusalem. Nama saut ari Jehovah? Anang ‘nejuka orang Asiria ngemba kita ngena jaku ti ngumbai Jehovah enda ulih ngelepaska kita.’ (2 Raja 18:22-25; 19:6) Jehovah udah ngirumka seiku melikat ngambika munuh 185,000 iku orang Asiria dalam semalam aja.—2 Raja 19:35.

Kala nuan meda cherita wayang ke alai orang enda sedarka diri kena tipu? Kati nuan deka enggau nyawa ti inggar madah: ‘Anang pechayaka utai nya! Sida bula ngagai nuan!’ Uji gambarka, bala melikat madah ngagai nuan: “Anang alah dikemulaka Sitan!”

Nya alai, anang mendingka propaganda Sitan. (Jaku Dalam 26:24, 25) Pendingka Jehovah sereta panggaika diri ba Iya dalam semua utai ke dikereja nuan. (Jaku Dalam 3:5-7) Iya rinduka nuan, lalu meransang nuan: “Nuan enda tau enda bepenemu-dalam, anak, nya baru aku deka lantang ati.” (Jaku Dalam 27:11) Enti nuan ngereja tu, nuan ulih ngalahka utai ti ngachau runding nuan!