1, 2. Nama reti merening ngagai Jehovah?

KITAI benung idup ba “hari ti penudi” ke bisi “mayuh macham penusah deka nyadi.” (2 Tim. 3:1) Pengidup deka majak tusah sebedau Jehovah ngerusak dunya ti jai tu lalu mai pemaik ti bendar ngagai dunya. Ketegal tu, kitai patut nanya diri empu, ‘Ngagai sapa aku patut ngiga bantu enggau iring?’ Kitai tentu nyebut “Ngagai Jehovah,” lalu nya meh saut ti pemadu manah.

² Nama reti merening ngagai Jehovah? Lalu baka ni kitai ulih nentuka diri mengkang merening ngagai Iya lebuh bisi penanggul? Menya, seiku penulis Bup Kudus nerangka penyuah kitai patut merening ngagai Jehovah lebuh kitai begunaka bantu. (Bacha Masmur 123:1-4.) Penulis nya madahka, lebuh kitai merening ngagai Jehovah, kitai baka seiku ulun ke bepanggai ba tuan iya. Baka ni nya? Seiku ulun  merening ngagai, tauka bepanggai ba, tuan iya ngambika meri iya pemakai sereta ngelindung iya. Tang iya mega patut seruran beratika tuan iya ngambika ulih meretika utai ti dikedekaka tuan iya lalu ngereja nya. Pia mega, kitai patut belajarka Jaku Petara ninting hari ngambika ulih meretika utai ti dikedekaka Jehovah lalu ngereja nya. Enggau nya kitai pechaya Jehovah deka mantu lebuh kitai begunaka bantu.—Eps. 5:17.

3. Nama ulih ngelimpangka kitai ari merening ngagai Jehovah?

³ Taja pan kitai nemu diri patut seruran merening ngagai Jehovah, tang kadang-kadang kitai ulih dikelimpangka. Tu meh utai ke nyadi ba pangan rapat Jesus, Marta. Iya “dikelimpangka mayuh macham pengawa.” (Luk. 10:40-42) Marta ke tetap ati ulih dikelimpangka taja pan Jesus bisi enggau iya. Nya alai, kitai enda patut tekenyit enti kitai mega ulih dikelimpangka. Nama ulih ngelimpangka kitai ari merening ngagai Jehovah? Ba artikel tu, kitai deka bejuraika baka ni kitai ulih dikelimpangka utai ti dikereja orang bukai. Lalu kitai mega deka beratika chara ulih mengkang merening ngagai Jehovah.

4. Nama kebuah kitai enda nyangka Moses ulih lenyau peluang tama ngagai Menua ti Udah Disemaya?

⁴ Moses tentu merening ngagai Jehovah lebuh iya ngiga iring. Bup Kudus madahka Moses ‘baka ke meda Petara ti enda ulih dipeda.’ (Bacha Hebrew 11:24-27.) Bup Kudus mega madahka “nadai nabi udah bisi kala baka Moses di menua Israel, ke bejaku betunga mua enggau Jehovah.” (U-dat. 34:10) Tang taja pan Moses nya pangan rapat Jehovah, iya lenyau peluang tama ngagai Menua ti Udah Disemaya. (P-pau. 20:12) Nama udah nyadi?

5-7. Nama nyadi enda lama pengudah orang Israel pansut ari menua Ejip, lalu nama digaga Moses?

⁵ Kurang ari dua bulan pengudah orang Israel pansut ari menua Ejip, lalu sebedau sida datai ba Bukit Sinai, bisi penusah besai nyadi. Orang Israel berengkah mutap ketegal nadai ai. Sida berengkah mutap ngelaban Moses sereta balat ringat, nya alai “Moses lalu bebendar besampi ngagai Jehovah. Ku iya, ‘Nama utai ti ulih dikereja aku ke sida tu? Sida nyau sedia deka nuku aku ngena batu.’” (P-sut. 17:4) Jehovah meri Moses iring ti nyemetak. Jehovah ngasuh iya mai tungkat lalu malu batu ba Bukit Sinai. Bup Kudus madahka: “Moses lalu malu batu nya di mua bala tuai orang Israel.” Udah nya ai pansut, orang Israel bisi mayuh ai ke diirup, lalu penanggul sida udah diputarka.—P-sut. 17:5, 6.

⁶ Bup Kudus madahka, Moses ngumbai endur nya Masah, reti nya “Penguji,” lalu Meribah, reti iya “Mutap.” Nama kebuah? “Laban orang Israel mutap sereta nguji Jehovah, lebuh sida nanya, ‘Kati Jehovah bisi enggau kitai, tauka nadai?’”—P-sut. 17:7.

⁷ Baka ni asai ati Jehovah pasal utai ke nyadi ba Meribah? Ba Jehovah, ulah orang Israel nya ngelaban Iya sereta penuduk Iya, ukai ngelaban Moses. (Bacha Masmur 95:8, 9.) Utai ke dikereja orang Israel nya salah. Tang Moses ngereja utai  ti ngena. Iya merening ngagai Jehovah lalu nitihka semua iring ari Jehovah.

8. Nama nyadi lebuh orang Israel nyau deka pansut ari menua puang?

⁸ Taja pia, nama utai ti sama ke nyadi baru 40 taun udah nya? Orang Israel nyau deka pansut ari menua puang. Sida datai ba Kades, semak adan Menua ti Udah Disemaya. Endur tu mega dikumbai Meribah. * (Peda nota kaki.) Nama kebuah? Laban orang Israel mutap baru ketegal nadai ai. (P-pau. 20:1-5) Tang sekali tu, Moses ngereja penyalah ti besai.

9. Nama iring ti diberi Jehovah ngagai Moses, tang nama digaga Moses? (Peda gambar ba pun artikel.)

⁹ Nama digaga Moses lebuh orang Israel ngelaban? Sekali agi, iya merening ngagai Jehovah ngiga iring. Tang maya tu Jehovah nadai ngasuh Moses malu batu. Iya ngasuh Moses ngambi tungkat, mai orang Israel semak ngagai batu, lalu udah nya bejaku ngagai batu. (P-pau. 20:6-8) Bisi Moses ngereja nya? Nadai. Iya balat pedis ati, nya alai iya bejaku enggau nyawa ti inggar ngagai sida: “Pendingka aku diatu, kita ke seruran angkat ngelaban; kati kita ngasuh kami mansutka ai ari batu tu ke kita?” Udah nya iya malu batu nya, ukai sekali aja, tang dua kali.—P-pau. 20:10, 11.

10. Baka ni asai ati Jehovah enggau utai ti digaga Moses?

¹⁰ Jehovah balat ringat ngagai Moses. (U-dat. 1:37; 3:26) Nama kebuah? Siti kebuah nya engka ketegal Moses enda ngasika sekeda iring baru ke diberi Jehovah.

11. Lebuh Moses malu batu nya, nama kebuah Moses nyau ngasuh orang Israel ngumbai Jehovah enda ngereja kereja ajih?

¹¹ Bisi kebuah bukai ke ulih ngasuh Jehovah ringat. Batu besai ba Meribah ti keterubah nya batu ti kering. Enda ngira ni pemalat batu nya dipalu, orang nemu ai endang enda ulih pansut. Tang batu ba Meribah ti kedua nya enda sebaka. Dia bisi batu kapur. Laban batu kapur lembut, ai ulih tama lalu betatam dalam tanah. Orang ulih ngaga lubang kena ngulihka ai nya. Nya alai lebuh Moses enda bejaku ngagai batu nya tang malu batu nya, kati orang Israel ngumbai Jehovah udah ngereja kereja ajih tauka sida ngumbai ai nya pansut kediri empu? * (Peda nota kaki.) Kitai enda tentu nemu.

12. Nama siti agi kebuah ke ngasuh Jehovah ringat ngagai Moses seduai Aron?

¹² Bisi siti agi kebuah ke ngasuh Jehovah balat ringat ngagai Moses seduai Aron. Moses madah ngagai orang Israel ke bisi dia: “Kati kita ngasuh kami mansutka ai ari batu tu ke kita?” Lebuh  Moses nyebut “kami,” iya engka nyebut pasal iya enggau Aron. Utai ke disebut Moses nadai ngayanka basa laban iya nadai meri puji ngagai Jehovah ke ngereja kereja ajih nya. Masmur 106:32, 33 madahka: ‘Ba mata ai di Meribah, orang mayuh nyungkak Jehovah ringat, lalu ngenusahka Moses. Sida nyungkak Moses balat amat ringat datai ke nyau bejaku enda berunding.’ * (Peda nota kaki.) (P-pau. 27:14) Moses nadai meri basa ke patut ke diterima Jehovah. Ku Jehovah madah ngagai Moses seduai Aron: “Seduai udah ngelaban pesan Aku di Meribah.” (P-pau. 20:24) Nya penyalah ti besai amat!

13. Nama kebuah chara Jehovah ngukum Moses nya patut sereta lurus?

¹³ Jehovah deka Moses seduai Aron ngereja lebih agi laban seduai iya ngiring nembiak Iya. (Luk. 12:48) Kelia, Jehovah enda ngemendarka semua orang Israel tama ngagai Menua ti Udah Disemaya laban sida udah angkat ngelaban Iya. (P-pau. 14:26-30, 34) Nya alai lebuh Moses ngelaban, Jehovah endang ngereja utai ti patut sereta lurus lebuh ngukum iya ngena chara ti sama. Sama baka sida ti ngelaban ke bukai, Moses enda dikemendarka tama ngagai Menua ti Udah Disemaya.

14, 15. Nama ngasuh Moses angkat ngelaban Jehovah?

¹⁴ Nama ngasuh Moses angkat ngelaban Jehovah? Peratika baru utai ti disebut ba Masmur 106:32, 33: ‘Ba mata ai di Meribah, orang mayuh nyungkak Jehovah ringat, lalu ngenusahka Moses. Sida nyungkak Moses balat amat ringat datai ke nyau bejaku enda berunding.’ Nya alai taja pan orang Israel ke angkat ngelaban Jehovah, tang Moses empu ke balat amat ringat. Ulah iya ke enda ulih nagang diri ngujungka iya bejaku enggau enda berundingka utai ti deka nyadi.

¹⁵ Moses ngetu merening ngagai Jehovah laban iya ngelakka ulah orang ngelimpangka iya. Lebuh orang Israel keterubah iya mutap pasal ai, Moses ngereja utai ti ngena. (P-sut. 7:6) Iya engka nyau lelak sereta pedis ati ketegal orang Israel udah betaun-taun ngelaban. Nya engka mega ketegal Moses nyau semina berundingka asai ati diri, ukai berundingka chara iya deka ngemuliaka Jehovah.

16. Nama kebuah kitai patut berundingka utai ti digaga Moses?

¹⁶ Enti nabi ke tetap ati baka Moses ulih dikelimpangka lalu bedosa, utai ti sama mega ulih nyadi ba kitai. Moses baru deka tama ngagai Menua ti Udah Disemaya, lalu kitai baru deka tama ngagai dunya baru. (2 Pet. 3:13) Kitai tentu enggai lenyau peluang ti badas nya. Tang ngambika ulih tama ngagai dunya baru, kitai patut terus merening ngagai Jehovah sereta seruran ngasika Iya. (1 Jhn. 2: 17) Nama ulih dipelajarka kitai ari penyalah ti dikereja Moses?

17. Baka ni kitai ulih nagang diri lebuh pedis ati?

¹⁷ Anang enda nagang diri lebuh nuan pedis ati. Kadang-kadang kitai suah napi penanggul ti sama. Tang Bup Kudus madahka: “Nya alai anang leju ngereja utai ti badas, laban ba maya ti patut kitai deka ngetau, enti kitai enda mantul ngapa.” (Gal. 6:9; 2 Tes. 3:13) Lebuh bisi utai tauka orang ke ngasuh kitai enda badu-badu pedis ati, kati bisi kitai berunding dulu sebedau bejaku? Bisi kitai nagang pemedis ati diri? (J-lam. 10:19; 17:27; Mat. 5:22) Lebuh bisi orang ngelaban kitai, kitai patut ‘ngawakka Petara ngayanka pengeringat Iya.’ (Bacha Rome 12:17-21.) Nama reti nya? Ari ke pedis ati, kitai enggau ati ti liat nganti Jehovah mutarka penanggul kitai ba maya ti patut. Enti kitai deka malas penyai tang enda merening ngagai Jehovah, kitai enda bebasaka Iya.

18. Nama patut dikingatka kitai bekaul enggau nitihka iring ari Jehovah?

¹⁸ Nitihka semua iring ti pemadu baru. Kati kitai enggau naka ulih nitihka iring ti pemadu baru ke udah diberi  Jehovah? Kitai enda patut majak ngereja siti-siti utai baka ke udah ketegal nya chara kitai selalu ngereja iya. Kitai patut jampat nitihka iring baru ke diberi Jehovah nengah gerempung Iya. (Heb. 13:17) Pia mega kitai patut bejimat ngambika ‘enda ngelui utai ti udah ditulis.’ (1 Kor. 4:6) Lebuh kitai nitihka semua iring ari Jehovah, kitai mengkang merening ngagai Iya.

19. Baka ni kitai enda nejuka utai salah ti dikereja orang ngerusak kaul kitai enggau Jehovah?

¹⁹ Anang nejuka utai salah ti dikereja orang ngerusak kaul nuan enggau Jehovah. Enti kitai terus merening ngagai Jehovah, kitai tentu enggai ngerusak kaul kitai enggau Iya tauka pedis ati enggau utai ti dikereja orang. Tu beguna bendar kelebih agi enti kitai bisi megai sekeda tanggung pengawa ba gerempung Jehovah, baka Moses. Tiap iku kitai patut bebendar gawa sereta ngasika Jehovah ngambika ulih selamat. (Plp. 2:12) Taja pia, besai agi tanggung pengawa ke dipegai kitai, mayuh agi utai ti dikearapka Jehovah ari kitai. (Luk. 12:48) Tang enti kitai amat rinduka Jehovah, nadai utai ulih ngelimpangka kitai tauka nyeraraka kitai ari pengerindu Iya.—Mas. 119:165; Rom. 8:37-39.

20. Nama utai ti keran deka digaga kitai?

²⁰ Kitai idup ba maya ti tusah sereta bisi mayuh penanggul. Nya alai endang beguna kitai mengkang merening ngagai Jehovah ke merintah di serega, ngambika ulih meretika utai ti dikedekaka Iya. Kitai anang sekali-kali nejuka ulah orang ngerusak kaul kitai enggau Jehovah. Kitai ulih belajar ari utai ke nyadi ba Moses. Ari ke pedis ati enggau penyalah ke dikereja orang, aram meh kitai ‘merening ngagai Jehovah Petara kitai, datai ke Iya nyau kasihka kitai.’—Mas. 123:1, 2.