1, 2. (a) Nama kebuah nya manah setanah enggau Jehovah? (b) Nama deka dikerandauka kitai ba artikel tu?

ENDANG manah enti kitai mengkang rapat enggau Jehovah. Nadai orang ti bekuasa, bepenemu, sereta bisi pengasih lebih agi ari Iya! Kitai tentu deka seruran taluk ngagai Iya sereta setanah enggau Iya. (Mas. 96:4-6) Tang bisi sekeda orang ke nyembah Iya enda mujur ngereja nya.

² Ba artikel tu, kitai deka berandau pasal sekeda orang ke ngaku diri setanah enggau Jehovah tang sida ngereja utai ti dipegedika Iya. Utai ti dipelajar kitai ari sida ulih nulung kitai mengkang taluk ngagai Jehovah.

3. Nama kebuah Jehovah nguji nulung Kain, lalu nama dipadah Jehovah ngagai iya?

³ Pikirka pasal Kain. Iya enda nyembah petara pelesu, tang Jehovah enda nerima sembah iya. Nama kebuah enda?  Jehovah meda Kain bisi ati ti jai. (1 Jhn. 3:12) Jehovah nangkan Kain: “Enti nuan udah ngereja utai ti ngena, nuan tentu deka tuchum; tang laban nuan udah ngereja utai ti jai, dosa diatu benung ngipa nuan ba mua pintu nuan. Iya keran deka merintah nuan, tang nuan enda tau enda ngalahka iya.” (P-kal. 4:6, 7) Jehovah enggau terang madahka enti Kain nesal ati lalu milih setanah enggau Iya, Iya deka setanah enggau Kain.

4. Nama digaga Kain lebuh iya bisi peluang ulih setanah enggau Jehovah?

⁴ Enti Kain ngubah runding iya, Jehovah deka nerima sembah iya baru. Tang Kain enggai mendingka Jehovah, lalu runding ti salah sereta pengingin ti berundingka diri empu ngujungka iya ngereja utai ti salah. (Jas. 1:14, 15) Lebuh Kain agi biak, iya engka nadai kala berunding deka ngelaban Jehovah. Tang diatu iya enda bedulika jaku tangkan Jehovah, angkat ngelaban Jehovah, lalu munuh menyadi iya empu!

5. Nama bansa runding ke tau ngujungka kitai enda diterima Jehovah?

⁵ Baka Kain, orang Kristian kemayaharitu engka ngumbai diri nyembah Jehovah tang sida ngereja utai ti dipegedika Jehovah. (Jud. 11) Iya engka aktif ba pengawa nginjil sereta datai begempuru enggau tetap. Tang iya mega engka nejuka runding ti kamah, pengamu, tauka asai ati ti begedi bekuasa atas runding iya. (1 Jhn. 2:15-17; 3:15) Runding ke baka tu ngujungka pengawa ti bedosa. Orang engka enda nemu utai ti dirunding tauka dikereja kitai, tang Jehovah nemu. Iya nemu sekalika kitai amat setanah enggau Iya tauka enda.—Bacha Jeremiah 17:9, 10.

6. Baka ni Jehovah nulung kitai ngalahka pengingin ti salah?

⁶ Taja pan kitai ngereja penyalah, Jehovah enda beguai-guai ninggalka kitai. Enti kitai nuju ngagai jalai ti tau ngemediska kitai, Jehovah minta kitai: “Pulai baru ngagai Aku, nya baru Aku deka pulai baru ngagai kita.” (Mal. 3:7) Jehovah nemu kitai bisi pengelemi ke patut dilaban. Tang Iya deka kitai meruan setanah enggau Iya lalu ngelaban utai ti jai. (Isa. 55:7) Enti kitai ngereja nya, Iya besemaya deka nulung kitai, lalu meri kitai pengering ke dikena ngalahka pengingin ti salah.—P-kal. 4:7.

7. Baka ni Solomon lenyau kaul enggau Jehovah?

⁷ Lebuh Solomon agi biak, iya bisi kaul ti manah enggau Jehovah. Jehovah nulung iya bepenemu-dalam sereta meri iya pengawa ti besai iya nya nirika Rumah Sembiang ti chukup manah di Jerusalem. Tang Solomon lenyau kaul enggau Jehovah. (1 Raj. 3:12; 11:1, 2) Adat Petara madahka raja ‘enda tau mayuh bini, laban nya deka ngasuh iya ninggalka Jehovah.’ (U-dat. 17:17) Solomon enda ngasika adat tu. Iya bisi 700 iku bini sereta 300 iku indu simpan! (1 Raj. 11:3) Mayuh ari bala indu tu orang bansa bukai ke nyembah petara pelesu. Nya alai Solomon mega enda ngasika adat Petara ke enda ngasuh jadi enggau indu orang bansa bukai.—U-dat. 7:3, 4.

8. Nama utai jai ti dikereja Solomon?

⁸ Solomon belubah-lubah lenyau pengerindu ke adat Jehovah. Pengujung iya, Solomon amat ngereja utai ti jai. Iya nirika alta ke petara indu Astarte sereta  petara pelesu Kemos. Iya nyembah petara pelesu tu enggau bala bini iya. Solomon mega nirika alta ke petara pelesu tu ba bukit ke betunga enggau nengeri Jerusalem, alai iya nirika Rumah Sembiang Jehovah! (1 Raj. 11:5-8; 2 Raj. 23:13) Solomon engka ngumbai Jehovah enda ibuhka semua utai jai ti dikereja iya seagi-agi iya bisi nunu pemeri ba Rumah Sembiang.

9. Nama nyadi lebuh Solomon enda mendingka jaku tangkan Jehovah?

⁹ Tang Jehovah beratika penyalah Solomon. Bup Kudus madahka, ‘Jehovah ringat ngagai Solomon’ laban ati Solomon udah limpang ari Jehovah. Jehovah udah nguji nulung iya. Jehovah ‘udah ngayanka Diri dua kali ngagai Solomon, lalu udah nagang iya nyembah petara orang bansa bukai, Solomon mengkang enda ngasika Jehovah’. Ketegal nya, Jehovah enda agi nerima sereta nulung iya. Jehovah enda ngemendarka bala peturun Solomon merintah semua bansa Israel, lalu sida mega napi penanggul ti besai beratus taun.—1 Raj. 11:9-13.

10. Nama ulih ngerusak kaul kitai enggau Jehovah?

¹⁰ Enti kitai milih bala pangan ke enda meretika tauka bebasaka standard Jehovah, sida ulih ngachau runding sereta ngerusak kaul kitai enggau Jehovah. Sida engka bala menyadi Kristian kitai, tang sida nadai kaul ti tegap enggau Jehovah. Tauka sida engka kaban  belayan, orang ke diau sepiak rumah, orang ke sama enggau gawa, tauka orang ke sama sekula ti enda nyembah Jehovah. Enti orang ke enggau kitai begulai enda nitihka standard Jehovah, sida ulih ngujungka kitai lenyau kaul enggau Jehovah.

11. Nama nulung kitai milih bala pangan?

¹¹ Bacha 1 Korint 15:33. Mayuh orang bisi kualiti ti manah. Lalu orang ke enda nyembah Jehovah engka enda seruran ngereja utai ti jai. Nuan engka ngelala sekeda orang ke baka nya. Kati reti nya sida tau enggau kitai begulai? Baka ni sida ulih ngerusak kaul nuan enggau Jehovah? Kati sida nulung nuan rapat agi enggau Jehovah? Nama utai ti beguna agi ba sida? Nama utai ti dikerandauka sida? Kati sida selalu bejaku pasal fesyen, duit, komputer, telefon binching, tablet, pemerindang, sereta utai bukai ti dikinginka sida? Kati sida suah bejai orang bukai? Kati sida rindu ngena jaku tundi ti kamah? Jesus madahka: “Laban mulut kita nyebut utai ti ngemenuhka ati kita.” (Mat. 12:34) Enti nuan nemu orang ke enggau nuan begulai ulih ngerusak kaul nuan enggau Jehovah, anang nejuka nya! Kurangka jam begulai enggau sida. Enti ulih badu agi begulai enggau sida.—J-lam. 13:20.

12. (a) Nama dipadah Jehovah ngagai orang Israel enda lama pengudah sida pansut ari menua Ejip? (b) Nama ku orang Israel lebuh Jehovah ngasuh sida taluk?

¹² Kitai mega ulih belajar ari utai ke nyadi pengudah Jehovah ngelepaska orang Israel ari menua Ejip. Lebuh sida begelumu ba mua Bukit Sinai, Jehovah mandangka Diri ngena chara ti ngerawanka ati! Sida meda kilat, asap, sereta mua hari ti chelum. Sida mega ninga guntur sereta bunyi ti inggar baka munyi terumpit. (P-sut. 19:16-19) Udah nya sida ninga Jehovah madahka Diri nya ‘Petara ti chemburu.’ Iya besemaya deka taluk ngagai orang ke rinduka Iya sereta ngasika pesan Iya. (Bacha Pemansut 20:1-6.) Jehovah deka orang Israel nemu, Iya setanah enggau sida enti sida setanah enggau Iya. Enti sema nuan bisi enggau dia, baka ni asai ati nuan lebuh ninga jaku Jehovah nya? Nuan tentu deka nyaut baka orang Israel ke madahka: ‘Kami deka ngereja semua utai ti udah disebut Jehovah.’ (P-sut. 24:3) Tang enda lama udah nya, bisi utai nyadi ke nguji penaluk orang Israel ngagai Jehovah. Nama penguji nya?

13. Nama utai ke nguji penaluk orang Israel?

¹³ Orang Israel takut lebuh Jehovah mandangka kuasa Iya ti besai. Nya alai Moses niki ngagai Bukit Sinai lalu bejaku enggau Jehovah ngarika sida. (P-sut. 20:18-21) Tang Moses lama enda nurun ari bukit pulai ngagai kem. Sida lama mengkang ba menua puang lalu nadai orang ngulu. Nama deka digaga sida? Orang Israel engka kelalu bepanggai ba Moses nguluka sida. Sida belabuh irau lalu ngasuh Aron: “Kitai enda nemu namaka penyadi Moses ti udah nguluka kitai pansut ari menua Ejip. Nya alai gaga siku petara ke kitai, ngambika iya bisi nguluka kitai.”—P-sut. 32:1, 2.

14. Nama penemu salah ke dikembuan orang Israel, lalu nama digaga Jehovah?

¹⁴ Orang Israel nemu nyembah engkeramba nya salah. (P-sut. 20:3-5) Tang  enda lama udah nya sida nyembah anak sapi emas! Taja pan sida enda ngasika pesan Jehovah, sida ngumbai diri agi setanah enggau Jehovah. Aron indah ngumbai pengawa nyembah anak sapi nya ‘pengerami ngemesaika Jehovah’! Nama digaga Jehovah? Iya madah ngagai Moses, orang Israel udah “bedosa” lalu ninggalka “jalai” Iya. Jehovah balat ringat lalu berunding deka ngerusak semua bansa nya.—P-sut. 32:5-10.

15, 16. Baka ni Moses enggau Aron nunjukka diri setanah enggau Jehovah? (Peda gambar ba pun artikel.)

¹⁵ Tang Jehovah nya Petara ti pengasih. Iya enggai ngerusak orang Israel. Iya meri sida peluang nunjukka diri deka setanah enggau Iya. (P-sut. 32:14) Lebuh Moses meda orang manjung, belagu, sereta betanda ba mua anak sapi emas, iya mechahka engkeramba nya lalu ngaga iya anchur baka tepung. Udah nya Moses enggau nyawa ti inggar bejaku: ‘Semua orang ke setanah enggau Jehovah, mansang kitu!’ Lalu ‘semua orang Lewi begempuru ngelingi’ Moses.—P-sut. 32:17-20, 26.

¹⁶ Taja pan Aron udah ngaga anak sapi emas nya, iya nesal ati lalu enggau sida Lewi setanah enggau Jehovah. Sida ke taluk tu enggau terang nunjukka diri enda setanah enggau sida ke bedosa nya. Nya pemutus ti manah, laban sehari nya beribu iku orang ke nyembah anak sapi emas nya mati. Tang sida ke setanah enggau Jehovah selamat, lalu Iya besemaya deka merekatka sida.—P-sut. 32:27-29.

17. Nama ulih dipelajarka kitai ari utai ti ditulis Paul pasal anak sapi emas?

¹⁷ Nama ulih dipelajarka kitai? Rasul Paul madahka: “Semua utai tu nyadi chunto ke kitai” ngambika kitai enda “nyembah engkeramba.” Paul madahka utai nya “dituliska kena ngajar kitai, laban pengujung dunya udah datai ba kitai. Nya alai enti kita ngumbai diri bediri tegap, bejaga kita ngambika kita enda rebah.” (1 Kor. 10:6, 7, 11, 12) Baka ke disebut Paul, indah sida ke nyembah Jehovah nemu tekelanjur ngereja utai ti jai. Sida engka ngumbai Jehovah agi nerima sida. Tang ketegal orang deka nyadi pangan Jehovah tauka ngumbai diri taluk ukai reti iya amat diterima Jehovah.—1 Kor. 10:1-5.

18. Nama engka ngasuh kitai dikelimpangka ari Jehovah, lalu nama ulih nyadi?

¹⁸ Lebuh Moses enda jampat nurun ari Bukit Sinai baka ke dijangka orang Israel, sida belabuh irau. Enti pengujung dunya tu enda jampat datai baka ke dijangka kitai, kitai mega engka berasai irau. Kitai engka berengkah ngumbai dunya baru ti disemaya Jehovah agi jauh tauka enda amat. Kitai mega engka berengkah beratika utai ti dikinginka kitai, ukai beratika utai ti dikedekaka Jehovah. Enti kitai enda bejimat, kitai ulih dikelimpangka ari Jehovah, lalu ngereja utai ke enda kala diperundingka kitai.

19. Nama patut dikingatka kitai, lalu nama kebuah?

 ¹⁹ Jehovah deka kitai ngasika Iya enggau pengabis ati lalu nyembah Iya seiku aja. (P-sut. 20:5) Nama kebuah Iya deka kitai ngereja nya? Laban Iya rinduka kitai. Enti kitai enda ngereja utai ti dikedekaka Jehovah, kitai tentu ngereja utai ti dikedekaka Sitan. Lalu tu ulih ngenusahka kitai. Paul madahka: ‘Kita enda tau ngirup ari mangkuk Jehovah, lalu ngirup mega ari mangkuk antu. Kita enda tau makai ba mija Jehovah, lalu makai mega ba mija antu.’—1 Kor. 10:21.

20. Baka ni Jehovah ulih nulung kitai taja pan kitai bisi ngereja penyalah?

²⁰ Kain, Solomon, enggau orang Israel bisi peluang nesal ati sereta ngubah ulah sida. (SKR. 3:19) Jehovah enda beguai-guai ninggalka orang taja pan sida bisi ngereja penyalah. Perundingka baka ni Iya udah ngampun Aron. Kemayaharitu, Jehovah meri kitai jaku tangkan kena nyaga kitai ari ngereja utai ti salah. Iya ngena Bup Kudus, litaricha kitai, sereta bala menyadi Kristian ke bukai nangkan kitai. Enti kitai beratika jaku tangkan Jehovah, Iya deka mandangka pengasih ngagai kitai.

21. Nama patut digaga kitai lebuh penaluk kitai ngagai Jehovah diuji?

²¹ Jehovah bisi tuju ngayanka pengasih. (2 Kor. 6:1) Pengasih Iya meri kitai peluang “muai semua ulah ti jai, enggau semua pengingin dunya.” (Bacha Titus 2:11-14.) Ba dunya kemayaharitu, seruran bisi utai ke nguji penaluk kitai ngagai Jehovah. Nya alai enggau naka ulih meh mengkang setanah enggau Jehovah, enda tau enda nangika Iya, “nyembah Iya siku aja,” sereta “seruran bepegai teguh ba Iya”!—U-dat. 10:20.