1. Nama kebuah kitai ulih ngumbai semua utai enggi Jehovah magang? (Peda gambar ba pun artikel.)

SEMUA utai endang enggi Jehovah magang! Iya bempu ‘langit enggau serega, enggau dunya sereta enggau semua utai ti di dunya.’ (U-dat. 10:14; Pem. 4:11) Ketegal Jehovah nempa mensia, nya alai semua kitai nyadi pesaka Iya. (Mas. 100:3) Tang ari semua mensia, Jehovah semina milih sekeda orang ngambika diempu Iya.

2. Nitih ku Bup Kudus, sapa udah diempu Jehovah?

² Ambika chunto, Masmur 135 madahka bala penyembah Jehovah ke tetap ati maya jeman Israel kelia nya “pesaka Iya.” (Mas. 135:4) Hosia mega madahka sekeda orang ke ukai orang Israel deka nyadi nembiak Jehovah. (Hos. 2:23) Jaku Hosia nya dikeamatka lebuh Jehovah belabuh milih sida ke ukai orang Israel merintah enggau Kristus di serega. (SKR. 10:45; Rom. 9:23-26) Sida ti dipilih ke serega nya dikumbai “bansa ti kudus.” Sida diempu Jehovah. (1 Pet. 2:9, 10) Tang baka ni enggau semua orang Kristian ke tetap ati  kemayaharitu ke bisi peluang idup belama iya ba dunya? Jehovah mega ngumbai sida “nembiak Aku” sereta nembiak ke dipilih Iya.—Isa. 65:22.

3. (a) Sapa ke bisi kaul ti spesial enggau Jehovah kemayaharitu? (b) Nama deka dipejuraika kitai ba artikel tu?

³ Kemayaharitu, raban ke ‘mit,’ ke bisi peluang idup belama iya di serega, sereta “bedus ti bukai,” ke bisi peluang idup belama iya ba dunya, sama begulai nyembah Jehovah nyadi “siti raban.” (Luk. 12:32; Jhn. 10:16) Kitai deka ngayanka diri beterima kasih ngagai Jehovah laban bisi kaul ti spesial enggau Iya. Ba artikel tu, kitai deka bejuraika chara kitai ulih ngayanka terima kasih ngagai Jehovah laban udah meri berekat ti manah nya.

4. Baka ni kitai ulih beterima kasih ngagai Jehovah ketegal ngemendarka kitai bisi kaul enggau Iya, lalu baka ni Jesus ngereja utai ti sama?

⁴ Kitai ngayanka diri beterima kasih ngagai Jehovah lebuh kitai nyerahka diri ngagai Iya sereta dibaptisa. Udah nya semua orang ulih meda kitai enggi Jehovah lalu deka ngasika Iya. (Heb. 12:9) Jesus ngereja utai ti sama lebuh iya dibaptisa. Taja pan iya udah nyadi bansa ke diserahka ngagai Jehovah, iya nyerahka diri ngagai Jehovah. Jesus baka ke nyebut: ‘Naka meh pengerindu ati aku ngereja peneka Nuan, O Petara aku!’—Mas. 40:7, 8.

5, 6. (a) Nama dipadah Jehovah pengudah Jesus dibaptisa? (b) Nama sempama ke ulih nulung kitai meretika asai ati Jehovah pasal pengawa kitai ke nyerahka diri ngagai Iya?

⁵ Baka ni asai ati Jehovah lebuh Jesus dibaptisa? Bup Kudus madahka: “Lebuh Jesus udah dibaptisa, iya pansut ari dalam ai. Langit lalu tebuka. Iya lalu meda roh kudus Petara nurun lalu inggap ba iya baka burung achang. Siti nyawa lalu bejaku ari serega, ‘Tu Anak ke dikesayauka Aku. Aku rinduka iya.’” (Mat. 3:16, 17) Jesus endang udah diempu Jehovah. Tang Jehovah gaga ati lebuh meda Jesus deka ngena pengidup diri nyembah Iya seiku aja. Jehovah mega gaga ati lebuh kitai nyerahka pengidup diri ngagai Iya, lalu Iya deka merekat kitai.—Mas. 149:4.

⁶ Tang Jehovah endang udah bempu semua utai! Nama ulih diberi kitai ngagai Iya? Uji gambarka, seiku lelaki bisi bungai ti manah ba taman. Anak indu iya ke agi mit ngambi siti bungai lalu meri ngagai iya. Taja pan bungai nya enggi apai, tang apai gaga ati nerima pemeri nya. Nya nunjukka anak sayauka iya. Bungai ke diberi anak nya berega agi ari semua bungai ke bisi ba taman iya. Pia mega, Jehovah gaga ati lebuh kitai deka nyerahka pengidup diri ngagai Iya.—P-sut. 34:14.

7. Baka ni Malaki nulung kitai meretika asai ati Jehovah pasal orang ke sanggup nyembah Iya?

⁷ Bacha Malaki 3:16 ari nota kaki. * Nama kebuah nya beguna nyerahka pengidup diri ngagai Jehovah sereta dibaptisa? Kenyau ari kandung, kitai endang udah diempu Penempa kitai, Jehovah. Tang uji pikirka pengaga ati ti deka diasaika Jehovah lebuh kitai nerima Iya  nyadika Pemerintah sereta nyerahka diri ngagai Iya! (J-lam. 23:15) Jehovah nemu bagi orang ke deka nyembah Iya, lalu Iya nuliska nama sida dalam “bup pengingat” Iya.

8, 9. Nama diguna Jehovah ba orang ke bisi nama ditulis dalam “bup pengingat”?

⁸ Enti deka ngetanka nama kitai dalam “bup pengingat” Jehovah, bisi utai ke patut dikereja kitai. Malaki madahka kitai patut nangika Jehovah sereta belematika nama Iya. Enti kitai nyembah mensia tauka utai bukai, nama kitai deka dibuai ari bup Jehovah nya!—P-sut. 32:33; Mas. 69:28.

⁹ Nya alai semina besemaya deka ngereja peneka Jehovah sereta dibaptisa enda chukup. Utai nya digaga kitai sekali aja, tang nyembah Jehovah nya jalai pengidup kitai. Seagi-agi kitai idup, kitai patut nunjukka diri ngasika Jehovah ari utai ti dikereja kitai.—1 Pet. 4:1, 2.

10. Nama bida nyata entara orang ke nyembah enggau orang ke enda nyembah Jehovah?

¹⁰ Ba artikel sebedau tu, kitai udah belajar pasal Kain, Solomon, enggau orang Israel ke ngumbai diri nyembah Jehovah tang sida enda taluk ngagai Iya. Ari chunto sida kitai belajar, semina ngumbai diri nyembah Jehovah aja enda chukup. Kitai patut begedika utai ti jai lalu rinduka utai ti badas. (Rom. 12:9) Jehovah madahka bisi bida ti nyata ‘entara orang ke lurus enggau orang ke jai, entara orang ke betuaika Petara enggau orang ke enda betuaika Iya.’—Mal. 3:18.

11. Baka ni orang ulih nemu kitai semina nyembah Jehovah seiku aja?

¹¹ Kitai beterima kasih ngagai Jehovah laban udah milih kitai nyadika nembiak Iya! Semua orang ulih meda sekalika kitai setanah enggau Jehovah tauka enda. (Mat. 5:16; 1 Tim. 4:15) Tanya diri empu: ‘Kati orang ulih meda aku amat taluk ngagai Jehovah? Kati aku gaga ati ulih madahka diri Saksi Jehovah?’ Uji gambarka penusah ati ti diasaika Jehovah lebuh kitai malu madahka diri enggi Iya ngagai orang.—Mas. 119:46; bacha Mark 8:38.

12, 13. Nama kebuah sekeda bala menyadi Kristian kitai ngasuh orang tusah deka ngelala sekalika sida nya Saksi-Saksi Jehovah tauka ukai?

¹² Tang sayau amat, indah sekeda bala Saksi nunda “roh dunya.” Ketegal tu, sida nadai tentu bebida ari orang ke enda nyembah Jehovah. (1 Kor. 2:12) “Roh dunya” ngasuh orang beberatka pengingin sida empu aja. (Eps. 2:3) Ambika chunto, taja pan kitai udah suah ditangkan, sekeda nya agi enda begari enggau penumbas iya. Sida ngena gari ke sendat sereta ngayanka tubuh, indah lebuh datai begempuru. Tauka sida milih stail buk ti kelalu. (1 Tim. 2:9, 10) Ketegal tu, bala menyadi Kristian ke bukai tusah deka nemu sekalika sida nya Saksi-Saksi Jehovah tauka ukai.—Jas. 4:4.

¹³ Bisi utai bukai ke ngasuh bala Saksi  enda tentu bebida ari orang ba dunya. Ambika chunto, sekeda sida betanda sereta ngembuan ulah ke enda patut ba orang Kristian lebuh ba siti-siti pengerami. Sekeda nya ngengkahka gambar sida ba media sosial lalu meri komen ke mantaika runding mensia. Sida engka enda ngereja dosa ti besai lalu agi enggau eklisia, tang sida ulih ngachau bala menyadi Kristian bukai ke bebendar deka bebida ari orang ba dunya.—Bacha 1 Peter 2:11, 12.

14. Nama patut digaga kitai ngambika ulih nyaga kaul ti spesial enggau Jehovah?

¹⁴ Semua utai ba dunya endang digaga kena ngasuh kitai beberatka “utai ti dikinginka tubuh, utai ti dikinginka mata, temegahka pengaya.” (1 Jhn. 2:16) Kitai enggi Jehovah, nya alai kitai bebida. Kitai ‘nulak semua ulah ti jai, enggau semua pengingin dunya,’ lalu kitai ‘nemu nagang diri, diau lurus, sereta nangika Petara dalam dunya tu.’ (Tit. 2:12) Semua chara pengidup kitai, nyengkaum chara kitai bejaku, makai, ngirup, begari, enggau gawa, patut enggau terang nunjukka kitai endang enggi Jehovah.—Bacha 1 Korint 10:31, 32.

15. Nama kebuah kitai patut rindu sereta manah enggau bala menyadi Kristian ke bukai?

¹⁵ Kitai nunjukka kaul kitai enggau Jehovah nya berega ari chara kitai begulai enggau bala menyadi Kristian. Sida enggi Jehovah, sama baka kitai. Enti kitai ingatka tu, kitai deka seruran rindu sereta manah enggau sida. (1 Tes. 5:15) Nama  kebuah tu beguna? Ku Jesus madah ngagai bala murid iya: ‘Enti kita rinduka pangan diri, nya baru semua orang deka nemu kita murid aku.’—Jhn.13:35.

16. Nama ulih dipelajarka kitai ari Adat Moses pasal pengerindu Jehovah ngagai nembiak Iya?

¹⁶ Siti chunto ari Adat Moses ulih nulung kitai meretika chara kitai patut begulai enggau bala menyadi Kristian. Ba rumah sembiang Jehovah, bisi perengka ke diungkupka kena nyembah Jehovah. Adat nya enggau terang madahka baka ni orang Lewi patut ngintu perengka nya, lalu barang sapa ke enda nitihka iring nya deka dibunuh. (P-pau. 1:50, 51) Enti Jehovah ibuhka chara orang ngintu perengka ke dikena dalam sembah ngagai Iya, Iya tentu ibuh agi ke chara orang patut begulai enggau bala penyembah Iya ke udah nyerahka diri ngagai Iya sereta taluk! Iya deka kitai nemu kitai berega ba Iya lebuh Iya madahka: “Barang sapa nyerang kita, nyerang orang ke pemadu dikesayauka Aku.”—Sek. 2:8.

17. Nama utai ti ‘dipeda sereta dipendingka’ Jehovah?

¹⁷ Malaki madahka Jehovah “meda sereta mendingka enggau bejimat” baka ni nembiak Iya begulai enggau pangan diri. (Mal. 3:16) Jehovah “nemu sapa ke enggi Iya.” (2 Tim. 2:19) Iya nemu semua utai ti dikereja sereta disebut kitai. (Heb. 4:13) Iya ulih meda enti kitai enda manah enggau bala menyadi Kristian. Tang kitai pechaya Jehovah mega meda enti kitai nyambut, gerah jari, deka ngampun, sereta manah ati.—Heb. 13:16; 1 Pet. 4:8, 9.

18. Baka ni kitai ulih beterima kasih ngagai Jehovah ketegal udah milih kitai nyadi nembiak Iya?

¹⁸ Ketegal kitai ulih nyadi nembiak ke diempu Jehovah, kitai deka ngayanka diri beterima kasih ngagai Iya. Kitai nemu lebuh kitai nyerahka pengidup diri ngagai Iya, kitai ngaga pemutus ti manah. Taja pan kitai diau “begulai enggau orang ke jai sereta bedosa,” kitai agi ulih nyadi orang ke “nadai bepenyalah, tuchi” lalu manchar “baka bintang di dunya tu.” (Plp. 2:15) Nya alai kitai keran deka nyeliah ari ngereja sebarang utai ti dipegedika Jehovah. (Jas. 4:7) Lalu kitai rindu sereta bebasaka bala menyadi Kristian kitai laban sida mega enggi Jehovah.—Rom. 12:10.

19. Nama upah ke diberi Jehovah ngagai orang ke diempu Iya?

¹⁹ Bup Kudus madahka: ‘Jehovah enggai ninggalka bala nembiak Iya.’ (Mas. 94:14) Tu endang amat. Enda ngira nama nyadi, Jehovah deka enggau kitai. Taja pan kitai mati, Iya deka ingatka kitai. (Rom. 8:38, 39) ‘Enti kitai idup, kitai idup ke Jehovah, lalu enti kitai mati, kitai mati ke Jehovah. Nya alai, nemuka kitai idup tauka mati, kitai endang enggi Jehovah.’ (Rom. 14:8) Kitai nganti maya Jehovah deka ngidupka baru semua pangan Iya ti taluk ke udah mati. (Mat. 22:32) Indah diatu kitai bulih mayuh pemeri ti badas ari Apai kitai. Baka ke dipadah Bup Kudus, ‘lantang meh bansa ti ngaku Jehovah nyadika Petara sida. Beberekat meh orang ke udah dipilih Jehovah nyadika nembiak Iya!’—Mas. 33:12.