Ngemansangka Pengasih ke “Semua Mensia”
LEBUH Jesus ngajar bala murid iya chara nusui berita manah, iya mega bisi madah pasal ukai semua orang deka mendingka sida. (Luke 10:3, 5, 6) Pia mega ba pengawa nginjil kitai kemayaharitu. Sekeda orang ke ditemu kitai engka orang ti kasar tauka jampat ringat. Lalu lebuh sida ngayanka ulah ke baka nya, tu engka ngasuh kitai tusah deka nginjil sereta ngayanka pengasih ngagai sida.
Orang ke pengasih nemu penanggul sereta utai ti diguna orang bukai. Iya mega berasai sinu sereta deka nulung sida. Tang nama deka nyadi enti kitai nadai pengasih ngagai orang ke ditemu kitai ba pengawa nginjil? Kitai deka lenyau pengeransing, iya nya kitai nadai ati deka nginjil ngagai sida, lalu kitai enda ulih nulung sida. Kitai ulih mandingka pengeransing kitai baka api. Ngambika api ulih mau, iya begunaka mayuh oksigen. Pia mega, ngambika pengeransing kitai majak nambah, kitai patut ngembuan pengasih!—1 Tesalonika 5:19.
Baka ni kitai ulih nyadi orang ke pengasih agi, taja pan tusah deka ngereja nya? Aram kitai berandauka tiga iti teladan ke ulih ditunda kitai: Jehovah, Jesus, enggau rasul Paul.
NELADAN PENGASIH JEHOVAH
Beribu taun, orang udah nyebut utai ti bula pasal Jehovah. Taja pia, Iya tetap “manah enggau orang ke enda nemu beterima kasih, sereta enggau orang ke jai.” (Luke 6:35) Baka ni Jehovah ngayanka pengasih? Iya sabar enggau semua orang. Iya dekaka “semua mensia” diselamatka. (1 Timoti 2:3, 4) Taja pan Jehovah begedika penyai, tang Iya ngumbai orang berega ba Iya lalu dekaka semua sida diselamatka magang.—2 Peter 3:9.
Jehovah nemu Sitan landik ngasuh orang pechayaka utai ti bula. (2 Korint 4:3, 4) Mayuh orang diajar utai ti bula pasal Petara kenyau ari mit. Nya alai tu ngasuh sida tusah deka nerima pemendar. Tang, Jehovah keran deka nulung sida. Baka ni kitai nemu?
Ambika chunto, baka ni asai ati Jehovah pasal orang ba nengeri Nineweh. Taja pan sida jai, Jehovah madah ngagai Jonah: “Nya alai Aku patut lebih agi kasihka nengeri Nineweh ti besai nya, laban nengeri nya bisi 120,000 iku anak mit [“orang,” NW] ti nadai nemu utai!” (Jonah 4:11) Jehovah kasihka sida laban sida enda nemu pemendar pasal Iya. Nya alai, Iya nganjung Jonah nangkan sida.
Baka Jehovah, kitai mega kasihka orang. Sida berega ba kitai. Nya alai, kitai keran deka nulung sida nemu pasal Jehovah taja pan sida enda tentu deka nerima pemendar.
NELADAN PENGASIH JESUS
Baka Apai iya, Jesus kasihka orang “laban sida irau ati sereta nadai daya, baka bedus ti nadai orang ngibun.” (Matthew 9:36) Jesus nemu kebuah sida baka nya. Nya ketegal tuai pengarap sida jai sereta ngajar pemula ngagai sida. Jesus nemu mayuh sida ke datai mendingka iya deka ngelakka bemacham penanggul nekul sida ari nyadi murid iya. Taja pia, Jesus agi ngajar sida mayuh utai.—Mark 4:1-9.
Enti keterubah iya orang enggai nerima pesan ke dibai kitai, anang lemi semengat
Enti bisi utai berubah ba pengidup, orang engka deka nerima pemendar
Lebuh orang enggai nerima pesan ke dibai kitai, kitai patut enggau naka ulih belematika kebuah sida baka nya. Engka sida bisi penemu ti enda manah pasal Bup Kudus tauka pasal orang Kristian ketegal sida udah meda orang ke ngumbai diri Kristian ngereja utai ti jai. Sekeda sida engka udah ninga pemula pasal utai ti dipechaya kitai. Sida ke bukai engka nangika kaban belayan tauka orang ke beserimbai pendiau ngeleseka sida enti sida berandau enggau kitai.
Sekeda orang ke ditemu kitai engka napi utai ti enda manah ke balat ngachau pengidup sida. Seiku pengerintis seberai tasik ke benama Kim madahka, mayuh orang ba kandang endur alai iya nginjil nya orang ke selamat ari perang, lalu udah lenyau semua utai ke dikemisi sida. Sida nadai ngembuan pengadang ti bendar ke jemah ila. Sida asa ati sereta enda pechayaka sapa-sapa. Orang ba endur nya suah nguji deka ngetuka bala Saksi ari nginjil. Indah bisi sekali Kim diserang lebuh iya benung nginjil.
Baka ni Kim ulih mengkang ngayanka pengasih, indah lebuh orang jai enggau iya? Iya seruran nguji ngingatka Jaku Dalam 19:11, ke madahka: “Enti nuan orang ke mereti, nuan deka nagang diri lengkar.” Lebuh iya berunding pasal utai ke kala nyadi ba orang ke diau dia, tu nulung iya berasai kasihka sida. Lalu ukai semua orang ke ditemu iya deka nerima. Taja pia, agi bisi orang ke ngayanka minat sereta ulih diabas iya baru ba endur nya.
Kitai ulih nanya diri empu: ‘Enti aku nadai nemu pemendar, baka ni aku nerima penatai Saksi-Saksi Jehovah enti sida nginjil ngagai aku?’ Ambika chunto, baka ni enti kitai udah ninga mayuh pemula pasal bala Saksi? Kitai mega engka enggai nerima penatai sida, lalu maya nya kitai mega begunaka pengasih ari sida. Jesus madahka kitai patut manah enggau orang baka ti dikedekaka kitai kereja orang ngagai kitai. Nya alai, kitai enggau naka ulih meretika baka ni asai ati orang lalu sabar enggau sida taja pan nya tusah dikereja.—Matthew 7:12.
NELADAN PENGASIH PAUL
Rasul Paul ngayanka pengasih indah ngagai orang ti enda rinduka pengawa nginjil iya. Nama kebuah? Laban iya ingatka diri kala ngereja utai ti sama. Ku iya madahka: “Aku dulu menya udah bejaku busung ngelaban Iya, lalu udah merinsaka [“nembiak Iya,” NW]. Tang aku udah bulih pengasih, laban lebuh maya nya suba aku nadai nemu utai, laban aku apin arap.” (1 Timoti 1:13) Paul nemu, Jehovah enggau Jesus udah balat kasihka iya. Paul ulih meretika orang ke deka nagang iya nginjil, laban iya kala ngereja utai ti sama.
Kadang-kadang, Paul betemu enggau orang ke balat arapka ajar ti bula. Baka ni asai ati iya? Lebuh Paul ba Atens, Kereja Rasul 17:16 bisi nyebut, iya “balat tusah meda nengeri nya penuh laban engkeramba.” Taja pia Paul ngena utai ti ngenusahka ati iya ngajar sida. (Kereja Rasul 17:22, 23) Paul ngubah chara iya nginjil nitihka gaya pengidup orang ti bebida ngambika iya “ulih nyelamatka sekeda sida.”—1 Korint 9:20-23.
Lebuh kitai nginjil ngagai orang ke arapka ajar ti bula tauka enggai nerima pesan ke dibai kitai, kitai ulih neladan Paul. Kitai ulih ngena utai ti ditemu kitai pasal sida ngambika ulih nulung sida belajar pasal berita manah ke bekaul enggau utai ti manah agi. (Isaiah 52:7) Seiku menyadi Kristian indu ke benama Dorothy madahka: “Ba endur kami nginjil, mayuh orang ngumbai Petara nya kasar sereta rindu ngakim. Aku muji sida laban sida amat arapka Petara, lalu udah nya madahka sida pasal utai ke dipadah Bup Kudus bekaul enggau personaliti Jehovah ti bepengerindu sereta semaya Iya ke jemah ila.”
MENGKANG ‘NGALAHKA PENYAI NGENA PEMADAS’
Seraya kitai majak semak enggau pengujung dunya, kitai ulih meda ulah orang “majak jai se-jai.” (2 Timoti 3:1, 13) Tang kitai enda patut lenyau pengasih tauka pengaga ati ketegal ulah sida. Jehovah meri kitai pengering ngambika ulih ‘ngalahka penyai ngena pemadas.’ (Rome 12:21) Seiku pengerintis ke benama Jessica madahka, iya suah betemu enggau orang ke sumbung sereta orang ke ngeleseka kitai enggau pesan ke dibai kitai. Ku iya agi: “Tu ulih ngachau. Lebuh aku berengkah berandau, aku besampi ngagai Jehovah dalam ati, lalu minta tulung Iya ngambika ngembuan runding ti sama baka Iya pasal orang ke enggau aku berandau nya.” Tu nulung Jessica enda kelalu berundingka asai ati diri empu aja, tang berundingka chara kena nulung orang nya.
Kitai majak ngiga orang ke deka nemu pasal pemendar
Nyau kelama, sekeda orang deka nerima tulung ari kitai lalu belajarka pemendar
Kitai mega patut nguji meransang bala menyadi Kristian lebuh nginjil enggau sida. Jessica madahka lebuh iya nginjil enggau bala menyadi, lalu seiku ari sida bisi napi peneleba ti enda manah, iya nguji enda berandauka utai nya. Tang, iya berandau pasal utai ti positif, baka asil ti manah ba pengawa nginjil kitai taja pan sekeda orang enggai nerima pesan ke dibai kitai.
Jehovah nemu, kadang-kadang tusah kitai deka nginjil. Tang Iya amat gaga ati lebuh kitai neladan pengasih Iya! (Luke 6:36) Amat, pengasih enggau pengeliat ati Jehovah ngagai orang ba dunya tu bisi tatak. Kitai pechaya, Iya nemu agi maya ti ngena endur muai semua utai ti jai ba dunya tu. Sebedau hari nya datai, kitai patut beberatka pengawa nginjil. (2 Timoti 4:2) Nya alai, aram meh kitai nginjil enggau ransing sereta ngembuan pengasih ti bendar ngagai “semua mensia.”
