Nuan Deka Dikelala sereta Diterima Sapa?
‘Petara ukai enda lurus. Iya deka mengkang ingatka pengawa ti udah dikereja kita, enggau pengerindu ti dipandangka kita.’—HEB. 6:10.
1. Nama pengingin ke dikembuan semua kitai?
BAKA NI asai ati nuan lebuh orang ke dikelala sereta dipebasa nuan enda ingatka nama nuan tauka enda ngelala nuan? Nuan tentu tusah ati. Nama kebuah? Laban tiap iku kitai ingin deka diterima orang bukai. Tang kitai ukai semina deka sida ngelala kitai. Kitai deka sida nemu kitai tu orang ke baka ni sereta nemu utai ke udah dijapai kitai.—P-pau. 11:16; Jop 31:6.
2, 3. Nama ulih nyadi ngagai pengingin kitai ti keran deka dikelala orang? (Peda gambar ba pun artikel.)
2 Tang enti kitai enda bejimat, pengingin deka dikelala ulih ngelimpangka kitai. Dunya Sitan ulih ngasuh kitai bisi pengingin deka tebilang sereta berasai diguna. Pengingin ke baka tu tau ngujungka kitai enda bebasa sereta meri sembah ti patut ngagai Apai kitai ti di serega, Petara Jehovah.—Pem. 4:11.
3 Maya jeman Jesus, sekeda tuai pengarap bisi penemu ti salah pasal deka dikelala. Jesus nangkan bala murid iya: “Bejaga ari sida pengajar Adat, ke rindu bejalai ngena baju ti panjai, lalu rindu ditabi orang ba sebelah pasar lalu milih penuduk ti pemadu manah dalam balai gempuru enggau ba pengerami makai besai.” Ku iya agi: “Sida deka nerima ukum ti besai agi!” (Luk. 20:46, 47) Tang Jesus muji seiku indu ke balu sereta seranta ke nepu dua singkap duit engkeraju, engka lebuh nadai orang beratika utai ti digaga iya. (Luk. 21:1-4) Jesus enggau terang nunjukka penemu iya pasal deka dikelala enda sama enggau orang bukai. Artikel tu deka nulung kitai ngembuan penemu ti betul pasal dikelala, ke diasuh Jehovah kembuan kitai.
PATUT DIKELALA PETARA
4. Baka ni kitai deka orang ngelala kitai, lalu nama kebuah?
4 Baka ni kitai deka orang ngelala kitai? Kitai ukai deka dikelala orang ketegal kitai bisi pelajar ke tinggi, bisi pemujur ba pengawa dagang, tauka tebilang ba dunya pemerindang baka ke digaga mayuh orang. Paul nerangka baka ni orang patut ngelala kitai lebuh iya madahka: ‘Diatu, kita udah nemu Petara, tauka iya ti betul agi, Petara udah nemu kita, nya alai nama kebuah kita keran deka nikal baru ngagai roh ti lemi, ti seranta, lalu nyadi ulun sida baru?’ (Gal. 4:9) Endang peluang ti badas enti ‘Petara udah nemu’ kitai, laban Iya Pemerintah ti Pemadu Tinggi di dunya raya! Jehovah ngelala sapa kitai, Iya rinduka kitai, sereta deka kitai rapat enggau Iya. Jehovah nempa kitai ngambika ulih nyadi pangan Iya.—P-jar. 12:13, 14.
5. Nama patut digaga kitai ngambika dikelala Petara?
5 Kitai nemu Moses nya pangan Jehovah. Lebuh iya minta ngagai Jehovah: “Padahka pelan Nuan ngagai aku,” lalu ku Jehovah nyaut: “Aku deka ngereja utai ti dipinta nuan, laban Aku amat nemu nuan, lalu Aku amat lantang ati ke nuan.” (P-sut. 33:12-17) Jehovah mega ulih ngelala kitai seiku-seiku. Tang nama patut digaga kitai ngambika ulih nyadi pangan Jehovah? Kitai patut rinduka Iya sereta nyerahka pengidup kitai ngagai Iya.—Bacha 1 Korint 8:3.
6, 7. Nama tau ngasuh kitai lenyau kaul enggau Jehovah?
6 Taja pia, kitai patut ngetanka kaul ti berega enggau Apai kitai ti di serega. Baka orang Kristian ba abad keterubah di Galatia, kitai patut badu nyadi ulun “roh ti lemi, ti seranta” ke datai ari dunya tu, nyengkaum pemujur sereta nyadi tebilang. (Gal. 4:9) Bala menyadi Kristian di Galatia udah ngelala Petara, lalu Petara pan udah ngelala sida. Tang Paul madahka sida “nikal baru” ngagai utai ke nadai guna. Nya alai Iya baka ke nanya sida: ‘Nama kebuah kita deka nikal baru lalu nyadi ulun utai ti beli enggau nadai guna nya baru?’
7 Kati utai ti sama ulih nyadi ba kitai? Au. Baka Paul, pengudah kitai nemu pemendar, kitai ngelengkaka utai ke ngasuh kitai tebilang sereta mujur ba dunya Sitan. (Bacha Pilipi 3:7, 8.) Kitai engka nulak sekulasip, kereja ti manah, tauka peluang tau bulih mayuh duit. Tauka kitai engka nyadi tebilang tauka kaya ketegal landik ba musik tauka sukan. Tang kitai nulak semua peluang nya. (Heb. 11:24-27) Endang enda patut nesalka pemutus nya lalu ngumbai pengidup kitai deka manah agi enti sema ngulihka semua utai nya! Runding ke baka nya tau ngasuh kitai nikal baru ngagai utai ba dunya tu, utai ke udah dikumbai kitai “ti lemi, ti seranta.” *—Peda nota kaki.
NGERINGKA PENGERAN KITAI KE DEKA DIKELALA SERETA DITERIMA JEHOVAH
8. Nama ulih ngeringka pengeran kitai ke deka dikelala sereta diterima Jehovah?
8 Baka ni pengeran kitai ke deka dikelala sereta diterima Jehovah ulih majak nambah nyentukka kitai enggai dikelala sereta diterima dunya? Kitai patut beratika dua iti utai ti bendar. Kesatu, Jehovah seruran ngelala orang ke nyembah Iya enggau tetap ati. (Bacha Hebrew 6:10; 11:6) Ba Jehovah, tiap iku nembiak Iya ke tetap ati nya berega. Nya alai Iya ngasaika nya “enda lurus” enti enda ibuhka sida. Jehovah seruran nemu “sapa ke enggi Iya.” (2 Tim. 2:19) Iya “deka ngintu orang ke lurus” lalu nemu baka ni deka nyelamatka sida.—Mas. 1:6; 2 Pet. 2:9.
9. Padahka sekeda chunto pasal baka ni Jehovah nunjukka Diri nerima nembiak Iya.
9 Kadang-kadang, Jehovah nunjukka Diri nerima nembiak Iya enggau chara ti spesial. (2 Ban. 20:20, 29) Ambika chunto, perundingka chara Jehovah nyelamatka nembiak Iya ba Tasik Mirah lebuh bala soldadu raja menua Ejip ti kering ngagai sida. (P-sut. 14:21-30; Mas. 106:9-11) Utai tu balat ngalitka ati dataika orang ba endur nya agi ngenang pasal utai nya pengudah 40 taun. (Jos. 2:9-11) Kitai berasai diperansang enti kitai ingatka baka ni Jehovah rinduka nembiak Iya lalu ngena kuasa Iya nyelamatka sida kelia menya, laban enda lama agi Gok ari menua Magok deka nyerang kitai. (Esk. 38:8-12) Maya nya, kitai deka gaga ati laban kitai udah nulak dunya lalu diterima Petara.
Kadang-kadang Jehovah meri upah ngagai nembiak Iya enggau chara ti enda dijangka
10. Nama utai bendar ke bukai ti patut diperatika kitai?
10 Kedua, utai ti patut diperatika kitai nya Jehovah ngasuh kitai dikelala enggau chara ti enda dijangka kitai. Jehovah enggai meri upah ngagai orang ke semina ngereja utai ti manah ketegal deka dipuji. Nama kebuah? Laban baka ke dipadah Jesus, lebuh orang muji sida, nya meh upah sida. (Bacha Matthew 6:1-5.) Tang, Jesus madahka Apai iya ulih meda enti orang nadai bulih upah ketegal utai manah ke dikereja sida ke orang bukai. Nya alai Jehovah deka meri upah tauka merekatka sida. Lalu kadang-kadang Jehovah meri upah ngagai nembiak Iya enggau chara ti enda dijangka. Aram kitai berandauka sekeda chunto nya.
JEHOVAH MEREKATKA SEIKU INDU BIAK KE BARUH ATI ENGGAU CHARA TI ENDA DIJANGKA
11. Baka ni Jehovah merekatka Maria?
11 Jehovah milih seiku indu biak ti baruh ati ke benama Maria nyadi indai ngagai Anak Iya, Jesus. Maria diau ba Nasaret, siti nengeri mit ke jauh ari Jerusalem enggau Rumah Sembiang. (Bacha Luke 1:26-33.) Nama kebuah Jehovah milih Maria? Melikat Gabriel madah ngagai Maria pasal iya udah ‘dikerinduka Petara.’ Kitai nemu Maria nya pangan rapat Jehovah ari utai ti dipadah Maria ngagai kaban belayan iya, Elisabet. (Luk. 1:46-55) Jehovah udah beratika Maria. Iya meri Maria berekat ti enda dijangka, ketegal Maria tetap ati ngagai Iya.
12, 13. Baka ni Jesus dipebasa pengudah iya ada sereta lebuh Maria mai iya ngagai Rumah Sembiang 40 hari udah bekau nya?
12 Lebuh Jesus ada, ngagai sapa Jehovah madah pasal pengada Jesus? Ukai ngagai bala pegawai tauka pemerintah ti tinggi pangkat di Jerusalem sereta Betlehem. Tang, Jehovah nganjung melikat ngagai bala pengibun bedus ke nyaga bedus ba padang di luar nengeri Betlehem. (Luk. 2:8-14) Udah nya, bala pengibun bedus nya ngabas anak mit ke baru ada nya. (Luk. 2:15-17) Maria seduai Josep tentu tekenyit ati meda Jesus dipebasa ngena chara nya. Chara Jehovah enggau Sitan ngereja utai enda sama. Pengudah Sitan nganjung orang ke pandai pasal bintang nemuai ngagai Jesus enggau apai indai iya, semua orang di Jerusalem nemu pasal pengada Jesus. Lalu tu ngujungka mayuh penusah nyadi. (Mat. 2:3) Ketegal nya, mayuh anak mit dibunuh.—Mat. 2:16.
13 Adat ke diberi Jehovah ngagai orang Israel madahka, pengudah 40 hari beranak, indu ke ngadaka anak lelaki patut meri pemeri ngagai Jehovah. Nya alai Maria mupuk enggau Josep seduai Jesus bejalai kira-kira semilan kilometer (enam batu) ari Betlehem ngagai Rumah Sembiang di Jerusalem. (Luk. 2:22-24) Lebuh di rantau jalai, Maria engka berunding sekalika imam besai deka ngereja utai ti spesial kena masa Jesus. Jesus amat dipebasa, tang ngena chara ti enda dijangka Maria. Jehovah milih Simeon, ‘orang ke lurus sereta angkunka Petara,’ enggau seiku nabi indu ke benama Anna, indu balu ke beumur 84 taun, madahka Jesus deka nyadi Messiah tauka Kristus ti udah disemaya.—Luk. 2:25-38.
14. Nama upah ti diberi Jehovah ngagai Maria?
14 Kati Jehovah agi merekatka Maria ketegal iya enggau tetap ati ngemesai sereta ngibun Jesus? Au. Petara nentuka sekeda utai ke disebut enggau digaga Maria ditulis dalam Bup Kudus. Maria enda ulih enggau Jesus lebuh iya bejalaika pengawa nginjil dalam kandang tiga taun setengah. Tu engka ketegal iya balu, lalu ngasaika diri patut diau di Nasaret. Nya alai iya nadai mayuh peneleba manah baka ke dikembuan sida ke bukai. Tang lebuh Jesus mati iya bisi semak Jesus. (Jhn. 19:26) Maria mega bisi enggau bala murid Jesus di Jerusalem sebedau sida nerima roh kudus kena Pentikos. (SKR. 1:13, 14) Iya tentu bisi dipilih ke serega sama enggau bala murid ke bukai. Enti pia, iya bulih peluang enggau Jesus di serega belama iya. Nya tentu upah ti badas ketegal nyembah Jehovah enggau tetap ati!
JEHOVAH NUNJUKKA DIRI NERIMA ANAK IYA
15. Baka ni Jehovah nunjukka Diri nerima Jesus lebuh Jesus ba dunya?
15 Jesus enggai nerima basa ari bala tuai pengarap tauka pemerintah. Ulih diterima Jehovah nya utai ti berega ba Jesus. Tang Jehovah tiga kali bejaku ari serega, lalu tu nulung Jesus nemu Jehovah rinduka iya. Tu tentu meransang Jesus! Enda lama pengudah Jesus dibaptisa ba Sungai Jordan, ku Jehovah madah: ‘Tu Anak ke dikesayauka Aku. Aku rinduka iya.’ (Mat. 3:17) Lalu semina John Pemaptisa ke ninga Jehovah bejaku munyi nya. Kira-kira setaun sebedau Jesus mati, tiga iku rasul iya ninga utai ti dipadah Jehovah pasal Jesus: ‘Tu Anak ke dikesayauka Aku. Aku rinduka iya. Pendingka iya!’ (Mat. 17:5) Kepenudi iya, semina beberapa hari sebedau Jesus mati, Jehovah sekali da agi bejaku enggau Anak Iya ari serega.—Jhn. 12:28.
Nama ulih dipelajarka nuan ari chara Jehovah nunjukka Diri nerima Anak Iya? (Peda genteran 15-17)
16, 17. Baka ni Jehovah meri basa enggau chara ke enda dijangka ngagai Jesus?
16 Jesus nemu orang deka ngumbai iya orang ke bejaku busung ngelaban Petara lalu iya deka mati enggau chara ti amat ngemaluka. Taja pia, iya besampi ngambika peneka Petara dikemujurka. (Mat. 26:39, 42) ‘Iya enda malu natka diri ba tiang perinsa,’ laban iya deka diterima Apai iya tang ukai diterima dunya. (Heb. 12:2) Baka ni Jehovah nunjukka Diri nerima Jesus?
17 Lebuh ba dunya, Jesus besampi minta pulai baru mulia ke kala dikembuan iya lebuh enggau Apai iya di serega. (Jhn. 17:5) Tang Bup Kudus nadai madahka Jesus ngarapka diri deka bulih lebih agi ari nya. Iya enda ngarapka diri deka bulih upah ti spesial ketegal ngereja peneka Apai iya ba dunya. Tang nama digaga Jehovah? Iya meri basa enggau chara ke enda dijangka ngagai Jesus. Pengudah ngangkatka Jesus idup baru, Jehovah meri Jesus penuduk ke “tinggi” agi di serega. Iya mega meri Jesus pengidup ke enda nemu mati, utai ke enda kala diterima sapa-sapa sebedau tu! * (Peda nota kaki.) (Plp. 2:9; 1 Tim. 6:16) Chara Jehovah meri upah ke pengawa ti udah dikereja Jesus enggau tetap ati amat ngalitka ati!
18. Nama ulih nulung kitai diterima Petara, ukai diterima dunya?
18 Nama ulih nulung kitai diterima Jehovah, ukai diterima dunya? Kitai patut ingat Jehovah seruran ngelala sereta nerima nembiak Iya ke tetap ati, lalu Iya suah meri sida upah enggau chara ti enda dijangka. Kitai semina ulih ngambarka baka ni Jehovah deka merekatka kitai jemah ila. Tang ke diatu, seraya kitai natka penusah enggau penanggul ke bisi ba dunya tu, kitai patut ingat dunya ti jai tu deka lenyau. Nya alai sebarang utai ke ngasuh orang dikelala sereta diterima dunya tu deka lenyau. (1 Jhn. 2:17) Tang Apai kitai, Jehovah, nya “lurus.” Iya deka mengkang ingatka pengawa enggau pengerindu ti udah dipandangka kitai ketegal nama Iya. (Heb. 6:10) Iya tentu deka nunjukka Diri nerima kitai, engka enggau chara ke enda kala dijangka kitai!
