1-2. (a) Nitihka pesan Jesus ba Matthew 28:18-20, nama tuju eklisia Kristian? (b) Nama tanya ke deka diperatika kitai?

BALA rasul tentu gagit ati lebuh sida begempuru ba bukit di Galili. Pengudah Jesus diangkatka idup baru, iya ngasuh sida betemu enggau iya dia. (Mat. 28:16) Engka maya nya meh Jesus ‘pegari di mua lebih lima ratus iku murid iya sereta sekali.’ (1 Kor. 15:6) Nama kebuah Jesus ngasuh sida betemu enggau iya dia? Iya deka meri sida siti pengawa ti ngagitka ati: ‘Bejalai kita ngagai semua bansa lalu gaga sida nyadi murid aku.’—Bacha Matthew 28:18-20.

² Bala murid ke ninga jaku Jesus nya, nyau kelama nyadi sebagi ari eklisia Kristian ba abad keterubah. Tuju sida iya nya, ngaga mayuh agi orang nyadi murid Kristus. * Kemayaharitu, bisi mayuh eklisia Saksi-Saksi Jehovah di serata dunya. Lalu nyentuk ke seharitu tuju sida agi sama. Ba artikel tu, kitai deka beratika empat iti tanya: Nama kebuah pengawa ngaga orang nyadi murid beguna bendar? Nama patut digaga kitai kena ngaga orang nyadi murid? Kati semua orang Kristian bisi ungkup ba pengawa tu? Nama kebuah kitai begunaka ati ti liat lebuh ngereja pengawa tu?

3. Nitihka John 14:6 enggau 17:3, nama kebuah pengawa ngaga orang nyadi murid beguna bendar?

³ Nama kebuah pengawa ngaga orang nyadi murid beguna bendar? Laban semina murid Kristus aja ke ulih nyadi pangan Petara. Pia mega, sida ke nitihka Kristus bisi pengidup ti manah agi diatu, lalu ngembuan pengadang idup belama iya jemah ila. (Bacha John 14:6; 17:3.) Amat, Jesus udah meri kitai tanggung pengawa ti besai. Tang kitai ukai kediri lebuh ngereja tu. Lebuh Paul nulis pasal diri empu enggau sekeda sida ke rapat enggau iya, iya madahka: ‘Kami sama bekereja enggau Petara.’ (1 Kor. 3:9) Endang basa ti chukup besai udah diberi Jehovah enggau Kristus ngagai mensia ti enda sempurna!

4. Nama ulih dipelajar kitai ari chunto Ivan enggau Matilde?

⁴ Pengawa ngaga orang nyadi murid ulih ngenataika mayuh pengaga ba ati kitai. Peratika chunto Ivan seduai bini iya Matilde, ba menua Colombia. Seduai iya nginjil ngagai seiku lelaki ke biak ti benama Davier. Lelaki nya madahka: “Aku deka ngaga ubah ba pengidup, tang tusah amat.” Davier nya seiku orang ke landik ba boksing lalu iya majak makai dadah, udu ngirup, lalu diau begulai enggau pangan indu iya, Erika. Ivan madah: “Kami berengkah belajarka Bup Kudus enggau iya. Endur iya diau amat jauh, lalu kami patut bejam-jam ngena basikal ba jalai ke luchak. Pengudah beratika ubah ba ulah enggau pendiau Davier, Erika pan enggau belajarka Bup Kudus.” Nyau kelama, Davier badu agi enggau boksing, makai dadah, sereta ngirup. Iya mega jadi enggau Erika. Ku Matilde madah: “Aku enggau laki aku amat gaga ati lebuh Davier enggau Erika dibaptisa ba taun 2016. Kami ngenang baru jaku Davier ke madahka: ‘Aku deka ngaga ubah, tang tusah amat.’ Kami duai Ivan berasai chukup gaga meda pemansang seduai iya nyentukka kami nyabak.” Endang amat, kitai tentu berasai chukup gaga ati lebuh nulung orang bukai nyadi murid Kristus.

5. Nama utai keterubah ke patut digaga kitai kena ngaga orang nyadi murid?

⁵ Utai keterubah ke patut digaga kitai iya nya ngiga orang ke deka belajar pasal Jehovah. (Mat. 10:11) Tang kitai patut bebendar ngiga sereta nginjil ngagai sida. Enggau bebendar nginjil ngagai sida sereta ngasika pesan Kristus ke ngasuh nginjil, kitai nunjukka diri amat Saksi-Saksi Jehovah.

6. Nama ulih nulung kitai mujur ba pengawa nginjil?

⁶ Sekeda orang keran deka belajarka Bup Kudus. Tang bisi mega mayuh ari sida baka ke enda beduli. Kitai patut meransang sida ngambika deka belajar mayuh agi. Ngambika mujur ba pengawa nginjil, kitai patut besedia enggau manah. Pilih tajuk ti engkeman ke ulih meransang minat orang ke ditemu kitai. Udah nya, perundingka chara nuan deka ngena topik nya.

7. (a) Baka ni nuan deka ngepunka randau enggau orang? (b) Nama kebuah nuan ngumbai mending sereta ngayanka basa nya utai ti beguna bendar?

⁷ Ambika chunto, nuan engka nanya orang ke bempu rumah: “Ulih aku nemu nama runding nuan pasal tu? Mayuh orang ba dunya tu napi penanggul. Kati nuan ngumbai bisi perintah ti ulih mutarka penanggul ba dunya tu?” Udah nya nuan ulih berandauka Daniel 2:44. Tauka nuan engka ulih nanya: “Ba runding nuan, nama chara ti pemadu manah kena ngajar anak nyadi orang ti menyana?” Udah nya nuan ulih berandauka Ulang Adat 6:6, 7. Enda ngira topik ke dikerandau, pikirka pasal orang ke ningaka nuan. Perundingka baka ni sida tau bulih penguntung ari  belajarka Bup Kudus. Lebuh berandau enggau sida, endang manah enti nuan mendingka sida lalu bebasaka runding sida. Enggau chara nya, nuan ulih meretika sida enggau manah agi lalu sida deka agi mendingka nuan.

8. Nama kebuah kitai patut terus nguji ngaga pengawa datai ngabas?

⁸ Sebedau orang mutus deka belajarka Bup Kudus, nuan engka patut ngena awak enggau pengering ngereja pengawa datai ngabas. Nama kebuah? Laban orang engka nadai ba rumah maya nuan datai. Pia mega, nuan engka patut datai ngabas beberapa kali sebedau orang ke bempu rumah nya deka belajarka Bup Kudus enggau nuan. Kingatka meh, utai tanam deka agi tumbuh enti suah dipanjah. Pia mega, pengerindu orang ke Jehovah enggau Kristus deka nambah lebuh kitai suah belajarka Bup Kudus enggau orang nya.

9-10. Nama kebuah kitai ngumbai tiap iku orang Kristian bisi enggau nulung ngiga orang ke deka belajar pasal Jehovah?

⁹ Tiap iku orang Kristian bisi enggau nulung ngiga orang ke deka belajar pasal Jehovah. Kitai ulih mandingka pengawa tu enggau pengawa ngiga anak mit ke tesat. Baka ni? Peratika siti chunto ti amat nyadi. Seiku anak mit ke beumur tiga taun udah tesat. Kira 500 iku orang bisi enggau pengawa ngiga iya. Pengudah kira 20 jam, seiku ari sida tetemuka anak mit ke lenyau nya ba ladang jagung. Iya ke tetemuka anak mit nya enggai nerima puji laban ku iya  madah: “Beratus iku orang sama enggau ngiga iya.”

¹⁰ Mayuh orang baka anak mit nya. Sida ngasaika diri tesat. Sida nadai pengadang ke jemah ila, nya alai kitai patut nulung sida. (Eps. 2:12) Lebih ari lapan juta iku kitai sama bekereja nguji ngiga sida tu. Nuan engka nadai tetemuka orang ke deka belajarka pemendar ari Bup Kudus enggau nuan. Taja pia, bala penginjil bukai ba endur ti sama engka tetemuka orang ti deka belajar. Lebuh sida tetemuka orang ke deka nyadi murid Kristus, kitai bela gaga ati enggau sida.

11. Taja pan nuan nadai pemelajar Bup Kudus, baka ni nuan ulih nulung ngaga orang nyadi murid?

¹¹ Taja pan nuan nadai pemelajar Bup Kudus, nuan ulih nulung ngaga orang nyadi murid ngena chara bukai. Ambika chunto, nuan ulih ngelaluka penatai orang ke baru lalu nyadi bakih sida lebuh sida datai ngagai Palan Gempuru. Enggau chara nya, nuan nulung sida nemu, pengerindu nya tanda ke nunjukka kitai orang Kristian ti bendar. (Jhn. 13:34, 35) Taja pan nuan meri saut ti pandak, nuan ulih ngajar orang ke baru datai ba gempuru chara ngayanka pengarap sida lebuh meri saut enggau chara ti bebasa sereta ari ati. Nuan mega ulih sama enggau penginjil ke baru ba pengawa nginjil, lalu nulung iya ngena Bup Kudus lebuh ngajar orang. Lebuh nuan ngereja nya, nuan deka ngajar iya neladan Kristus.—Luk. 10:25-28.

12. Kati kitai begunaka pengelandik ti spesial lebuh ngaga orang nyadi murid? Terangka.

¹² Nadai seiku ari kitai patut ngumbai, pengawa ngaga orang nyadi murid Jesus begunaka pengelandik ti spesial. Nama kebuah? Peratika chunto Faustina ke diau ba menua Bolivia. Iya enda nemu macha lebuh berengkah begulai enggau Saksi-Saksi Jehovah. Kenyau ari nya, iya bisi belajar macha mimit. Diatu, iya udah dibaptisa lalu iya rindu ngajar orang. Selalu iya, Faustina ngajar lima iku pemelajar Bup Kudus ninting minggu. Taja pan Faustina bedau tentu landik macha baka pemelajar Bup Kudus iya, iya udah nulung enam iku pemelajar iya dibaptisa.—Luk. 10:21.

13. Taja pan kitai kisuk, nama sekeda berekat ke diulih kitai ari pengawa ngaga orang nyadi murid?

¹³ Mayuh orang Kristian kisuk laban sida bisi mayuh tanggung pengawa. Taja pia, sida ngena awak sida ngajar orang Bup Kudus. Lalu tu ngagaka ati sida. Peratika chunto Melanie, ari menua Alaska. Iya indai tunggal ke ngemesaika anak indu ti beumur lapan taun. Iya mega bisi kereja sekular penuh jam lalu nulung ngintu apai iya ke sakit riman. Semina Melanie seiku aja ke nyadi Saksi ba genturung  pendiau iya ke jauh nya. Iya seruran besampi minta pengering kena nginjil taja pan gaya hari amat chelap laban iya keran deka ngiga orang ke deka belajarka Bup Kudus. Pengujung iya, iya betemu enggau Sara. Sara gagit ati lebuh nemu Petara bisi nama. Enda lama udah bekau nya, Sara berengkah belajarka Bup Kudus. Ku Melanie madahka: “Maya lemai Hari Lima aku lelak amat, tang kami duai anak indu aku bulih penguntung laban terus ngajar Bup Kudus. Kami rindu ngaga pansik pasal tanya ari Sara. Lalu kami berasai gaga ati lebuh meda iya nyadi pangan Jehovah.” Taja pan disakal, Sara enggau berani napi penanggul nya. Iya pansut ari gerija, lalu dibaptisa nyadi seiku ari Saksi-Saksi Jehovah.

14. (a) Baka ni sida ke ngaga murid nya baka orang berikan? (b) Baka ni jaku Paul ba 2 Timoti 4:1, 2 meransang nuan ngereja pengawa ngaga orang nyadi murid?

¹⁴ Taja pan nuan bedau agi tetemuka orang ke deka nyadi murid, anang asa ati. Anang ngetu ngiga orang ke deka belajar. Kingatka meh, Jesus nyemaka pengawa ngaga orang nyadi murid enggau pengawa berikan. Orang ke berikan engka ngena mayuh jam sebedau sida bulih asil. Kesuah agi sida gawa jauh malam tauka tumu pagi, lalu kadang-kadang sida patut belayar ngagai endur ti jauh. (Luk. 5:5) Pia mega, sekeda bala menyadi Kristian enggau sabar ngena mayuh jam ngiga orang ke  deka belajar Bup Kudus. Nama kebuah? Ngambika sida ulih tetemuka mayuh agi orang. Sida ke bebendar ngereja tu suah deka bulih asil ti manah. Ulih nuan nguji nginjil ba maya tauka alai endur nuan ulih tetemuka mayuh agi orang?—Bacha 2 Timoti 4:1, 2.

15. Nama kebuah ngajar pemelajar Bup Kudus begunaka ati ti liat?

¹⁵ Nama kebuah ngajar pemelajar Bup Kudus begunaka ati ti liat? Siti kebuah nya kitai patut nulung sida belajar sereta rinduka utai ti diajar Bup Kudus. Kitai mega patut nulung sida ngelala sereta rinduka Pengarang Bup Kudus, iya nya Jehovah. Kitai ukai semina ngajar utai ke dikedekaka Jesus ari murid iya, tang mega ngajar sida nemu chara nyadi orang Kristian ti bendar. Kitai patut sabar nulung sida ngambika ulih nitihka prinsip Bup Kudus ba pengidup. Sekeda pemelajar kitai ulih ngubah runding enggau ulah sida dalam beberapa bulan aja. Tang sekeda ke bukai engka begunaka awak ti lama agi.

16. Nama dipelajarka nuan ari chunto ke bekaul enggau Raúl?

¹⁶ Seiku pengerintis seberai tasik ba menua Peru bisi asil ti manah ketegal iya liat ati. Ku iya madahka: “Aku udah belajarka dua iti bup enggau seiku pemelajar Bup Kudus ke benama Raúl. Tang iya agi tusah nitihka utai ti udah dipelajarka iya ari Bup Kudus. Tikah iya bisi penanggul, iya agi ngena jaku ti kamah, lalu bala anak iya tusah deka bebasaka iya. Taja pia, iya seruran datai ke gempuru. Nya alai, aku majak nulung iya enggau ruang bilik iya. Lebih ari tiga taun pengudah aku ngajar iya, iya pan layak dibaptisa.”

17. Nama deka dipejuraika kitai ba artikel ke nangkanka tu?

¹⁷ Jesus ngasuh kitai bejalai lalu ngaga orang nyadi murid iya. Nya alai, kitai suah bejaku enggau orang ke ngembuan runding ti bebida ari kitai, nyengkaum orang ke nadai pengarap tauka orang ke enda pechayaka Petara. Artikel ke nangkanka tu deka bejuraika chara kitai ulih nusui berita manah ngagai mayuh macham orang.