1. Nama dipadah Paul pasal diri empu?

RASUL PAUL enda malu madahka diri kala berasai lemi. Nama utai ke ngasuh iya lemi? Iya madahka tubuh iya “majak lemi.” Iya mega ngasaika tusah ngereja utai ti ngena, lalu kekadang Jehovah enda nyaut sampi iya enggau chara ti dikearapka iya. (2 Kor. 4:16; 12:7-9; Rom. 7:21-23) Paul mega madahka munsuh iya ngumbai iya lemi. * Tang iya enda nejuka runding sida tauka pengelemi iya empu, ngasuh iya ngasaika diri nadai guna.—2 Kor. 10:10-12, 17, 18.

2. Nitihka 2 Korint 12:9, 10, nama utai ke dipelajar Paul?

² Nama utai ke dipelajar Paul? Paul belajar, orang ulih nyadi kering taja pan iya lemi. (Bacha 2 Korint 12:9, 10.) Jehovah madahka, kuasa Iya deka “nyadi pemadu badas” lebuh Paul lemi. Reti nya, Jehovah deka meri pengering ke diguna Paul. Keterubah, aram kitai meda kebuah kitai enda patut pedis ati lebuh munsuh beduan kitai.

3. Nama kebuah kitai ulih gaga ati lebuh dikeduan munsuh?

³ Semua kitai enda rindu dikeduan. Taja pia, enti munsuh beduan kitai lalu kitai pedis ati enggau utai ke disebut sida,  tu tau ngasuh kitai lemi. (J-lam. 24:10) Baka ni kitai ulih mutarka iya? Baka Paul, kitai ulih gaga ati lebuh dikeduan. (2 Kor. 12:10) Nama kebuah? Lebuh orang beduan sereta ngelaban kitai, tu nunjukka kitai nya murid Jesus. (1 Pet. 4:14) Jesus madahka, murid iya deka diperinsa. (Jhn. 15:18-20) Tu kala nyadi ba orang Kristian ba kurun keterubah. Maya nya, sida ke nitihka runding orang Gerika ngumbai orang Kristian enda pandai sereta lemi. Lalu ba orang Judah, orang Kristian dikumbai “ukai orang ke bepelajar, tang orang ke sengapa-dia,” baka Peter enggau John. (SKR. 4:13) Orang Kristian mega dikumbai lemi ketegal enggai enggau politik tauka pengawa soldadu. Nya alai, mayuh orang enda bebasaka sida.

4. Nama digaga orang Kristian ba kurun keterubah lebuh orang bejaika sida?

⁴ Kati orang Kristian ba kurun keterubah enda agi bejalaika pengawa sida ketegal runding munsuh sida? Enda. Rasul Peter enggau John ngumbai nya siti basa taja pan diperinsa ketegal nitih sereta ngajar pasal Jesus. (SKR. 4:18-21; 5:27-29, 40-42) Bala murid Jesus berasai temegah ati bejalaika pengawa sida. Taja pan orang ke ngelingi sida enda ngayanka basa, tang orang Kristian ba kurun keterubah mai mayuh agi penguntung ari orang ke ngelaban sida. Ambika chunto, bup mit dalam Bup Kudus ke ditulis sida agi ulih mengkang dikena nulung sereta meri pengadang ngagai bejuta iku orang. Lalu Perintah Petara ke ditusui sida udah merintah ba serega lalu deka merintah dunya enda lama agi. (Mat. 24:14) Tang nama nyadi ngagai perintah Rome kelia menya ke merinsaka orang Kristian? Perintah nya udah abis lalu munsuh nembiak Petara udah nadai agi. Indah enti sida diangkatka idup baru, sida deka diperintah murid Jesus ke nyadi raja ba Perintah Petara.—Pem. 5:10.

5. Nitihka John 15:19, nama kebuah Saksi-Saksi Jehovah dikemaruhka?

⁵ Kemayaharitu, sekeda orang enda bebasaka Saksi-Saksi Jehovah lalu ngumbai kitai beli sereta lemi. Nama kebuah? Laban kitai enda setuju enggau ulah sida. Kitai bebendar deka baruh ati, sereta ngasi. Tang orang ba dunya rindu ulah ti sumbung, temegah, sereta ngelaban. Pia mega, kitai enda enggau pengawa politik sereta pengawa soldadu. Ketegal kitai enggai nitihka chara orang ba dunya, nya alai sida ngemaruhka kitai.—Bacha John 15:19; Rom. 12:2.

6. Nama pengawa ti besai reti ke ulih mujur ketegal tulung ari Jehovah?

⁶ Taja pan orang ba dunya ngumbai kitai lemi, Jehovah ngena kitai ngereja pengawa ti besai reti. Kitai bisi peluang enggau ba pengawa nginjil ti pemadu besai dipejalaika dalam sejarah mensia. Nembiak Iya kemayaharitu ngeluarka litaricha ti pemadu mayuh disalin sereta disadung ba serata dunya. Sida mega ngena Bup Kudus nulung bejuta iku orang ngembuan pengidup ti manah agi. Semua pengawa tu ulih mujur ketegal Jehovah. Tang, kati Jehovah ulih nulung tiap iku kitai nyadi kering? Nama patut digaga kitai ngambika bulih tulung ari Iya? Kitai deka bejuraika tiga iti pekara ke ulih dipelajar ari rasul Paul.

7. Nama utai ke dipelajar kitai ari Paul?

⁷ Siti utai ke dipelajar kitai ari Paul iya nya, anang bepanggai ba pengering tauka  penau diri empu lebuh gawa ke Jehovah. Paul ulih nyadi sumbung sereta bepanggai ba diri empu. Iya ada di Tarsus, indu nengeri Silisia, di menua Rome. Tarsus nya nengeri ti kaya sereta bisi universiti ti tebilang. Paul orang ti bepelajar. Iya diajar Gamaliel, seiku pengajar Adat ti dibasa orang mayuh. (SKR. 5:34; 22:3) Lalu Paul mega nyadi orang ti tampak nama entara orang Judah. Ku iya: “Aku jauh nyulut mansang dalam agama orang Judah ari orang bukai ke sama serebak enggau aku.” (Gal. 1:13, 14; SKR. 26:4) Tang Paul enda bepanggai ba diri empu.

8. Nitihka Pilipi 3:8, nama runding Paul pasal utai ti dilengkaka iya, lalu nama kebuah iya “gaga ke pengelemi”?

⁸ Paul gaga ati ngelengkaka utai ti ulih ngasuh iya tampak nama ba dunya. Iya ngumbai semua utai nya “uras magang.” (Bacha Pilipi 3:8.) Ketegal iya nyadi orang Kristian, iya napi mayuh penusah. Iya dipegedi bansa iya empu. (SKR. 23:12-14) Iya diperinsa sereta dijil orang Rome, peranak menua iya empu. (SKR. 16:19-24, 37) Paul mega nemu diri enda sempurna lalu tusah deka ngereja utai ti ngena. (Rom. 7:21-25) Tang, iya enda nejuka semua utai tu nagang iya ari nitihka Kristus. Bup Kudus madahka, iya “gaga ke pengelemi.” Nama kebuah? Laban lebuh iya lemi, iya ulih ngasaika tulung ari Petara.—2 Kor. 4:7; 12:10.

9. Nama runding kitai pasal utai ti enda dikembuan kitai?

⁹ Semua kitai deka bulih pengering ari Jehovah. Tang kitai anang ngumbai Jehovah semina meda pengerai, pelajar, chara pengidup, tauka pengaya, kena meri kitai pengering. Jehovah enda ngemeratka semua utai tu. Ukai semua nembiak Jehovah “orang ke bepenemu-dalam enti dikira nitihka penemu mensia. . . . orang ke bekuasa, . . . orang ke tinggi pangkat.” Tang, Jehovah ngena orang “ti lemi di dunya tu.” (1 Kor. 1:26, 27) Nya alai, anang nejuka utai ti enda dikembuan nuan nagang  nuan ari nyembah Jehovah. Tang, nuan patut ngumbai nya peluang nulung nuan ngasaika pengering ari Jehovah. Ambika chunto, enti nuan takut enggau orang ke nyakal pengarap nuan, besampi meh minta pemerani ari Jehovah kena ngetanka pengarap nuan. (Eps. 6:19, 20) Tauka enti nuan balat sakit, minta Jehovah meri nuan pengering ngambika mengkang ransing gawa ke Iya. Ninting kali nuan ngasaika tulung ari Jehovah, pengarap nuan ba Iya majak tegap.

10. Nama kebuah kitai patut belajar pasal teladan nembiak Petara kelia menya, baka ke disebut ba Hebrew 11:32-34?

¹⁰ Paul ransing belajarka Jaku Petara. Iya nemu mayuh fakta. Iya mega belajar mayuh ari teladan nembiak Petara kelia menya. Lebuh iya nulis ngagai orang Kristian ke ngena jaku Hebrew, iya ngasuh sida belematika teladan nembiak Jehovah ti tetap ati kelia menya. (Bacha Hebrew 11:32-34.) Seiku ari nembiak nya, Raja David. Iya ukai semina dilaban bala munsuh, tang mega orang ke kala nyadi bakih iya. Lebuh kitai belematika teladan David, kitai ulih belajar baka ni teladan David ngeringka Paul lalu baka ni kitai ulih nunda Paul.

11. Nama kebuah David dikumbai lemi? (Peda gambar ba kulit majalah.)

¹¹ Goliat nya soldadu ti kering, besai, bisi perengka perang ke manah agi, sereta bepeneleba ba perang. Lebuh iya meda David, “iya ngeleseka David,” laban iya ngumbai David nya lemi. Ba mata Goliat, David nya biak umur lalu nadai peneleba ba perang. Tang kebendar iya, David nya kering. Iya bepanggai ba Jehovah lalu Jehovah meri iya pengering kena ngalahka Goliat.—1 Sam. 17:41-45, 50.

12. Nama siti agi penguji ke ditapi David?

¹² Bisi siti agi penguji ke ulih ngasuh David berasai lemi. Iya enggau taluk nyukung Saul, raja ke dipilih Jehovah merintah Israel. Terubah iya, Raja Saul bebasaka David. Tang udah nya, penyumbung Saul ngujungka iya kepapaska David. Nya alai, Saul jai enggau David lalu deka munuh iya.—1 Sam. 18:6-9, 29; 19:9-11.

13. Nama digaga David lebuh Raja Saul jai enggau iya?

¹³ Taja pan Raja Saul jai enggau iya, tang David terus ngayanka basa ngagai raja ke dipilih Jehovah. (1 Sam. 24:6) David enda nyalahka Jehovah ketegal utai ke digaga Saul. Tang, David bepanggai ba Jehovah meri pengering kena betan napi penguji tu.—Mas. 18:1, sereta nota kaki ba tajuk mit ke Masmur 18.

14. Nama penguji ke ditapi rasul Paul ti sama enggau David?

¹⁴ Rasul Paul mega napi penguji baka David. Munsuh Paul jauh kering agi ari iya. Mayuh orang ke tinggi pangkat begedika iya. Sida suah malu iya sereta muai iya dalam rumah jil. Pia mega, orang ke kala nyadi bakih iya, jai enggau iya. Indah sekeda menyadi Kristian pan ngelaban iya. (2 Kor. 12:11; Plp. 3:18) Tang, Paul mujur napi semua utai tu. Baka ni? Iya terus nginjil taja pan disakal. Iya tetap ati enggau bala menyadi Kristian taja pan sida ngasaka ati iya. Lalu kelebih agi, iya terus nyembah Jehovah nyentukka pengujung idup iya. (2 Tim. 4:8) Paul ulih napi semua penguji tu ketegal iya bepanggai ba Jehovah, ukai bepanggai ba pengering iya empu.

15. Nama juluk ati kitai, lalu baka ni kitai ulih ngereja nya?

 ¹⁵ Kati nuan dikeduan tauka disakal bakih ba sekula, ba endur gawa, tauka diri sebilik ke ukai Saksi? Kati kala menyadi Kristian jai enggau nuan? Enti pia, kingatka teladan David enggau Paul. Nuan ulih ‘ngalahka penyai ngena pemadas.’ (Rom. 12:21) Juluk ati kitai nya ukai deka ngelaban, baka David ke ngelaban Goliat. Tang, kitai ngalahka penyai lebuh nulung orang belajar pasal Jehovah sereta Bup Kudus. Nuan ulih ngereja tu enggau (1) bepanggai ba Bup Kudus kena nyaut tanya orang, (2) ngayanka basa sereta pemanah ngagai orang ke ngelaban, sereta (3) ngereja utai ti badas ngagai semua orang, nyengkaum munsuh nuan.—Mat. 5:44; 1 Pet. 3:15-17.

16-17. Nama seruran dikingatka Paul?

¹⁶ Sebedau Paul nyadi murid Kristus, iya mechat nembiak Jesus. (SKR. 7:58; 1 Tim. 1:13) Maya nya, iya dikumbai Saul. Kena nagang iya ari terus merinsaka orang Kristian, Jesus bejaku enggau iya ari serega lalu ngasuh iya nyadi buta. Ngambika ulih meda baru, Paul patut minta tulung ari nembiak Jesus, raban ke suah diperinsa iya. Enggau baruh ati, Paul nerima tulung ari Ananias, seiku murid Jesus ke nyuman mata iya.—SKR. 9:3-9, 17, 18.

¹⁷ Paul tentu seruran ingatka utai ke nyadi tu. Taja pan iya megai tanggung pengawa ba gerempung Kristian, tang iya seruran baruh ati. Iya mega sanggup nerima tulung ari bala menyadi Kristian. Iya madahka, sida “ngelantangka ati” tauka [“ngeringka,” NWT] iya.—Kol. 4:10, 11.

18. Nama kebuah kitai kekadang enggai nerima tulung ari bala menyadi Kristian?

¹⁸ Nama dipelajar kitai ari Paul? Lebuh kitai berengkah begulai enggau nembiak Jehovah, kitai engka rindu nerima tulung ari bala menyadi Kristian. Tu ketegal kitai ngumbai diri agi baru ba pemendar lalu  apin bulih mayuh penemu. (1 Kor. 3:1, 2) Tang, baka ni enggau diatu? Kitai engka tusah deka nerima tulung enti kitai ngumbai diri udah lama ba pemendar sereta bisi mayuh peneleba. Tang Jehovah suah ngena bala menyadi Kristian, nyengkaum sida ke baru ba pemendar, ngeringka kitai. (Rom. 1:11, 12) Nya alai, enti kitai deka bulih pengering ari Jehovah, kitai patut nerima bantu ari bala menyadi Kristian kitai.

19. Nama ke ngasuh Paul mujur ngereja utai ti ngalitka ati?

¹⁹ Pengudah Paul nyadi orang Kristian, iya ulih ngereja mayuh utai ti ngalitka ati. Nama kebuah? Laban pemujur ke diulih iya ukai bepanggai ba pengerai, pelajar, pengaya, tauka chara pengidup. Tang iya nemu, enti iya baruh ati sereta bepanggai ba Jehovah, iya ulih mujur ngereja utai ti manah. Aram meh semua kitai neladan Paul enggau (1) bepanggai ba Jehovah, (2) belajar ari teladan nembiak Petara kelia menya, (3) nerima tulung ari bala menyadi Kristian. Enggau nya, lebuh kitai lemi, Jehovah deka meri kitai pengering!