Jesus nyadi Imam Besai lebuh iya dibaptisa ba taun 29 Masihi. Baka ni kitai nemu? Lebuh dibaptisa, Jesus nyerahka diri ngereja “peneka” Petara. Tu reti iya, Jesus sanggup nyerahka nyawa diri nyadika tebus. (Gal. 1:4; Heb. 10: 5-10) Peneka Jehovah tau disemaka baka alta. Lebuh Jesus meri nyawa iya, tu baka iya nyadi pemeri ba alta. Alta tu udah bisi kenyau ari Jesus dibaptisa. Atur ngambika kitai ulih nyembah Jehovah nengah tebus Jesus tau disemaka baka Rumah Sembiang. Rumah Sembiang tu mega udah bisi kenyau ari Jesus dibaptisa. Sama baka alta nya begian ti beguna ba Rumah Sembiang, peneka Jehovah mega beguna ngambika kitai ulih nyembah Iya.—Mat. 3:16, 17; Heb. 5:4-6.

Atur ngambika kitai ulih nyembah Jehovah nengah tebus Jesus, udah berengkah. Atur tu, ti disemaka baka Rumah Sembiang begunaka imam besai. Nya alai, Jesus dipilih nyadi Imam Besai ‘ngena roh kudus enggau kuasa.’ (SKR. 10:37, 38; Mrk. 1:9-11) Tang, baka ni kitai nemu Jesus dipilih nyadi Imam Besai sebedau pemati iya enggau pengangkat iya ari mati? Kitai ulih tetemuka saut tu ari chunto Aron enggau bala imam besai ke nangkanka Aron.

Nitihka Adat Moses, semina imam besai ulih tama ngagai Endur ti Pemadu Kudus. Lalu bisi tirai entara Endur ti Pemadu Kudus enggau Endur ti Kudus. Imam besai semina ulih tama ngagai Endur ti Pemadu Kudus ba Hari Pengampun Dosa. (Heb. 9:1-3, 6, 7) Aron enggau sida ke nangkanka iya semina ulih tama “nengah kain tirai” ngagai Endur ti Pemadu Kudus pengudah sida dipilih nyadi imam besai. Pia mega, Jesus udah dipilih nyadi Imam Besai sebedau iya mati, lalu pengudah nya tama ‘nengah kain tirai nya, iya nya, nengah tubuh iya empu,’ ngagai pengidup ba serega. (Heb. 10:20) Ketegal nya, rasul Paul madah, Jesus datai nyadi “Imam Besai” lalu udah nya “nengah langkau sembiang ti besai sereta badas agi ti ukai digaga mensia,” lalu tama ngagai “serega.”—Heb. 9:11, 24.

Lebuh Jesus niki ke serega sereta nyerahka genselan nyawa iya ti sempurna kena nebus kitai, iya ngepunka pengawa ngambika sempekat baru ulih dipejalaika. Baka ni chara iya?

Terubah, iya betemu enggau Jehovah. Udah nya, Jesus nyerahka genselan nyawa iya ti sempurna ngagai Jehovah. Lalu penudi iya, Jehovah nerima genselan darah Jesus. Sempekat baru ulih dipejalaika pengudah semua tu digaga.

Bup Kudus enda madah enggau silik kemaya Jehovah nerima genselan tebus Jesus. Nya alai, kitai enda ulih madahka kemaya sempekat baru dipejalaika. Tang kitai nemu, Jesus niki ke serega sepuluh hari sebedau hari Pentikos. (SKR. 1:3) Dalam timpuh nya, Jesus nyerahka genselan tebus iya ngagai Jehovah, lalu Jehovah nerima tebus Jesus. (Heb. 9:12) Bukti sempekat baru benung dipejalaika terang dipeda maya Pentikos 33 Masihi.—SKR. 2:​1-4, 32, 33.

Nya alai, sempekat baru nya berengkah dipejalaika lebuh Jehovah nerima genselan darah Jesus, lalu Imam Besai Jesus, nyadi Pengari sempekat nya.—Heb. 7:25; 8:1-3, 6; 9:13-15.