1. Nitihka 3 John 3, 4, nama ke ngasuh kitai gaga ati?

ULIH nuan ngambarka pengaga ati rasul John lebuh ninga pasal menyadi ke kala diajar iya agi nyembah Jehovah enggau tetap ati? Sida napi mayuh penanggul, lalu John bebendar ngeringka pengarap sida. Ba John, sida baka anak iya. Sama mega, kitai gaga ati lebuh anak kitai tauka pemelajar Bup Kudus, nyerahka diri ngagai Jehovah sereta terus nyembah Iya.—Bacha 3 John 3, 4.

2. Nama tuju surat ke ditulis John?

² Ba taun 98 Masihi, John engka diau ba tauka semak Epesus. Iya engka mindah kia pengudah dilepaska ari jil di pulau Patmos. Ba maya nya, iya nerima roh kudus Jehovah kena nulis tiga iti surat. Tuju surat nya kena meransang menyadi Kristian ngetanka pengarap ba Jesus lalu terus diau dalam pemendar.

3. Nama tanya ke deka disaut kitai?

³ Semina John aja rasul ke agi idup, lalu iya irauka empas ke dibai pengajar ti pelesu ba eklisia. * (1 Jhn. 2:18, 19, 26) Sida madahka diri ngelala Petara, tang enda ngasika pesan Jehovah. Ba artikel tu, kitai deka bejuraika jaku lalau ke diberi John sereta nyaut tiga iti tanya: (1) Nama reti diau dalam pemendar?, (2) Nama ulih nagang kitai diau dalam pemendar? sereta (3) Baka ni kitai nulung pangan diri diau dalam pemendar?

4. Nitihka 1 John 2:3-6 sereta 2 John 4, 6, nama patut digaga kitai ngambika diau dalam pemendar?

⁴ Ngambika kitai diau dalam pemendar, kitai patut nemu pemendar ari Bup Kudus. Nambahka nya, kitai enda tau enda ‘ngasika pesan Jehovah.’ (Bacha 1 John 2:3-6; 2 John 4, 6.) Jesus netapka teladan ti manah ngasika Jehovah. Enti kitai deka ngasika Jehovah, kitai enggau naka ulih nitihka singkang Jesus.—Jhn. 8:29; 1 Pet. 2:21.

5. Nama patut dipechayaka kitai?

⁵ Ngambika terus diau dalam pemendar, kitai enda tau enda pechaya Jehovah nya Petara ti enda bula, lalu utai ke dipadah Iya ba Bup Kudus nya amat. Kitai mega pechaya Jesus nya Messiah. Mayuh orang kemayaharitu enda pechaya Jesus udah dipilih nyadi Raja Perintah Petara. John nangkan bisi “mayuh orang ke penipu,” ke deka nesatka sida ti enda entu pechayaka pemendar pasal Jehovah enggau Jesus. (2 Jhn. 7-11) John nulis: “Sapa orang ke bula? Orang ke bula nya orang ke ngumbai Jesus nya ukai Kristus.” (1 Jhn. 2:22) Semina siti aja chara kitai ulih nyeliahka diri ari ditipu, iya nya belajarka Bup Kudus ngambika ulih ngelala Jehovah enggau Jesus. (Jhn. 17:3) Enggau nya, kitai pechaya kitai bisi pemendar.

6. Nama utai ke ulih nagang bala menyadi Kristian ke biak diau dalam pemendar?

⁶ Semua nembiak Jehovah patut bejimat enggau penemu mensia ngambika enda ditesatka, kelebih agi menyadi Kristian ke biak. (1 Jhn. 2:26) Alexia, * seiku menyadi indu ari menua Perancis ke beumur 25 taun madahka: “Lebuh ba sekula, aku belajar pasal evolusi sereta penemu mensia. Kekadang aku rindu enggau penemu nya, lalu tu ngasuh aku kakang ati pasal pemendar. Tang aku berunding, enti aku pechayaka semua utai ke diajar pengajar aku lalu enda ibuhka utai ke diajar Bup Kudus, nya endang salah.” Alexia belajarka bup Kehidupan—Bagaimana Asal Mulanya? Melalui Evolusi atau Penciptaan? Dalam beberapa minggu, iya enda agi berasai kakang ati. Ku iya nampung: “Aku pechaya,  Bup Kudus ngundan pemendar. Lalu aku nemu, nitihka standard Jehovah ba pengidup deka meri aku pengaga ba ati enggau pemaik.”

7. Nama patut diseliahka kitai, lalu nama kebuah?

⁷ Semua nembiak Jehovah, enda ngira biak tauka tuai, patut bejimat ngambika enda ngembuan pengidup ti pura-pura. John madahka kitai enda ulih ngumbai diri nyembah Jehovah, tang ba maya ti sama ngereja ulah ti kamah. (1 Jhn. 1:6) Enti kitai deka ngagaka ati Jehovah, kitai patut nyaga ulah diri empu. Indah enti kitai ngumbai diri ulih ngelalaika penyalah ari mensia, kingatka meh, Jehovah ulih meda semua utai.—Heb. 4:13.

8. Nama patut ditulak kitai?

⁸ Kitai patut nulak runding mensia pasal dosa. Rasul John nulis: “Enti kitai madahka diri nadai dosa, kitai nipu diri empu.” (1 Jhn. 1:8) Ba jeman John, orang Kristian ke limpang madahka, orang ulih ngereja penyalah lalu agi ulih nyadi pangan Petara. Mayuh orang kemayaharitu ngembuan runding ti sama. Sida madah pechayaka Petara, tang sida enda setuju enggau runding Jehovah bekaul enggau ulah ti salah. Ambika chunto, bekaul enggau ulah seks. Bisi sekeda ulah seks ke salah ba Jehovah, tang mayuh orang ngumbai sida ulih ngereja nya laban nya pemutus diri empu.

9. Nama penguntung enti bala nembiak Kristian nitihka utai ku Bup Kudus?

⁹ Bala nembiak Kristian engka berasai ditekan nerima runding orang ba sekula tauka endur gawa bekaul enggau ulah seks. Tu meh utai ke nyadi ba Aleksandar. Ku iya: “Sekeda indu ba sekula ngansak aku beleman enggau sida. Ketegal aku enggai ngereja nya, sida ngumbai aku gay.” Tu engka bisi nyadi ba nuan. Tang enti nuan nitihka utai ku Bup  Kudus, nuan ulih nyaga nama diri empu, pengerai, nyeliahka ari berasai besalah, sereta ulih terus nyadi pangan Jehovah. Tiap kali nuan nulak penguji, nuan deka senang agi ngereja utai ti betul. Kingatka mega, runding ti salah pasal seks datai ari Sitan. Enti nuan nulak runding ti salah nya, nuan “ngalahka Sitan.”—1 Jhn. 2:14.

10. Baka ni 1 John 1:9 nulung kitai nyembah Jehovah enggau ati ti beresi?

¹⁰ Kitai nemu semina Jehovah aja bisi hak nentuka nama disengkaum ba ulah ti salah. Nya alai, kitai bebendar enggai bedosa. Tang lebuh kitai bedosa, kitai ngaku penyalah diri nengah sampi. (Bacha 1 John 1:9.) Enti kitai ngereja dosa ti besai, kitai minta tulung ari tuai gempuru laban sida dikena Jehovah nyaga kitai. (Jas. 5:14-16) Taja pia, kitai anang terus nyalahka diri ketegal penyalah ke digaga kitai suba. Nama kebuah? Laban Jehovah, Apai ti bepengerindu, udah nyediaka tebus anak Iya kena ngampun kitai. Enti Jehovah madahka Iya deka ngampunka orang ke nesal ati, Iya endang ngereja nya. Nya alai, kitai ulih nyembah Jehovah enggau ati ti beresi.—1 Jhn. 2:1, 2, 12; 3:19, 20.

11. Baka ni kitai ulih nyaga diri ari ajar ke ulih ngelemika pengarap kitai?

¹¹ Kitai patut nulak penemu orang Kristian ti limpang. Ari pun eklisia Kristian ditumbuhka, Sitan udah ngena mayuh orang Kristian ti limpang ngasuh nembiak Petara berasai kakang ati ke pemendar. Nya alai, kitai patut ngelala ni bagi penerang ti amat tauka bula. * Munsuh kitai engka ngena internet tauka media sosial kena ngelemika pengarap kitai ngagai Jehovah sereta pengerindu ke bala menyadi Kristian. Anang meh  pechayaka semua pemula tu, ke datai ari Sitan!—1 Jhn 4:1, 6; Pem. 12:9.

12. Nama kebuah kitai patut negapka pengarap ba pemendar ke diulih kitai?

¹² Kena nyeliah serang ari Sitan, kitai patut ngenalamka pengarap kitai ngagai Jesus sereta andal Jehovah ngena Jesus nyapai tuju Iya. Kitai mega patut pechayaka seraban menyadi Kristian lelaki ke dikena Jehovah ngiring gerempung Iya kemayaharitu. (Mat. 24:45-47) Kitai ngereja tu lebuh belajarka Bup Kudus enggau tetap. Udah nya, pengarap kitai deka baka urat pun kayu ti galak tumbuh jauh ke dalam tanah. Paul mega nusui utai ti sama lebuh nulis ngagai eklisia ba Kolosi. Ku iya: ‘Laban kita udah nyambut Jesus Kristus nyadi ka Tuan, diau begempong meh kita dalam iya. Awak ka urat kita nyerangkap dalam ba iya, diri ka pengidup kita bedudok ba iya, lalu nyadi lebih agi tegap dalam pengarap.’ (Kol. 2:6, 7, Berita Manah Ka Rebak Diatu) Enti kitai bebendar negapka pengarap, Sitan tauka penyukung iya enda ulih nagang kitai ari diau dalam pemendar.—2 Jhn. 8, 9.

13. Nama patut dikingatka kitai, lalu nama kebuah?

¹³ Kitai nemu dunya deka begedika kitai. (1 Jhn. 3:13) John ngingatka kitai “semua dunya di baruh kuasa Sitan.” (1 Jhn. 5:19) Majak kitai semak enggau pengujung dunya, majak agi Sitan pedis ati. (Pem. 12:12) Iya ukai semina nyerang ngena chara ti enda berupai baka ulah ti kamah tauka pemula ke datai ari orang Kristian ti limpang, tang iya mega ngena pemerinsa ti balat. Sitan nemu timpuh diri nyau deka abis. Nya alai, iya nguji nagang pengawa nginjil kitai tauka ngerusakka pengarap kitai. Kitai enda tekenyit lebuh sekeda tauka semua pengawa kitai ditagang ba sekeda menua. Taja pia, bala menyadi kitai ke diau ba menua nya, terus betan. Sida nunjukka, enda ngira utai ke digaga Sitan ngagai nembiak Jehovah, kitai ulih mengkang tetap ati!

14. Nama siti chara kitai ulih nulung bala menyadi Kristian diau dalam pemendar?

¹⁴ Kena nulung bala menyadi Kristian diau dalam pemendar, kitai patut ngayanka penyiru. (1 Jhn. 3:10, 11, 16-18) Kitai ukai semina rinduka pangan diri lebuh senang, tang mega lebuh bisi penusah. Ambika chunto, kati bisi menyadi Kristian ke begunaka pemerindang tauka tulung ketegal orang dikesayau udah nadai? Tauka kati bisi bala menyadi ke lenyau mayuh utai ketegal ai bah, penusah angus, tauka tanah berenyang lalu begunaka bantu nirika Palan Gempuru tauka rumah? Enti kitai amat rindu sereta siru ngagai bala menyadi Kristian, kitai ngayanka nya ari ulah kitai, ukai semina nyebut aja.

15. Nitihka 1 John 4:7, 8, nama patut digaga kitai?

¹⁵ Enti kitai nunjukka pengerindu ngagai pangan diri, kitai neladan Apai kitai, Jehovah. (Bacha 1 John 4:7, 8.) Siti chara kitai nunjukka pengerindu, iya nya ngampun pangan diri. Ambika chunto, seiku orang engka ngemediska ati kitai lalu minta ampun. Kitai nunjukka pengerindu enggau ngampunka iya lalu enda ingatka penyalah nya agi. (Kol. 3:13) Seiku menyadi lelaki ke benama Aldo pedis ati lebuh ninga seiku menyadi ti dipebasa iya nyebut utai ti enda manah pasal gaya pengidup bansa Aldo. Aldo madahka, “Aku seruran besampi ngambika Jehovah nulung aku enda ngembuan asai ati ti enda manah ngagai menyadi nya.” Tang, Aldo ngereja lebih ari nya. Iya mai menyadi lelaki nya sama nginjil. Lebuh nginjil, Aldo madahka  jaku ke disebut menyadi nya ngasuh iya enda nyamai ati. Ku Aldo: “Lebuh iya nemu asai ati aku, iya minta ampun. Ari chara iya bejaku, aku nemu iya nesal enggau utai ke disebut iya. Udah nya, kaul kami duai nyadi manah baru.”

16-17. Nama juluk ati nuan?

¹⁶ Rasul John amat rinduka bala menyadi Kristian lalu deka sida ngembuan pengarap ti tegap. Pengerindu enggau pengibuh iya ulih dipeda ari tiga iti surat ke ditulis iya. Endang ngagaka ati lebuh nemu menyadi Kristian ke deka merintah enggau Jesus ba serega mega bisi pengerindu sereta pengibuh baka John!—1 Jhn. 2:27.

¹⁷ Enggau naka ulih meh belematika jaku lalau ke udah dikerandauka kitai ba artikel tu. Aram meh kitai terus diau dalam pemendar, ngasika Jehovah ba semua pekara. Belajarka Bup Kudus, lalu andalka pemendar dalam nya. Tegapka pengarap ba Jesus. Tulak penemu mensia enggau ajar orang Kristian ti limpang. Anang idup enggau pura-pura sereta ngereja dosa. Titihka standard moral Jehovah. Lalu tulung meh bala menyadi Kristian diau dalam pemendar enggau ngampun sida ke ngemediska ati kitai sereta mantu sida ke begunaka tulung. Enggau nya, enda ngira nama penanggul ke ditapi, kitai deka terus diau dalam pemendar.