1. Nama ulih nyadi enti orang rindu bepekit?

KEMAYAHARITU, mayuh orang rindu bepekit lalu sida enda peduli enti ulah sida ngemediska orang bukai. Ambika chunto, seiku tuke ke deka mujur agi ari tuke bukai engka ngereja utai ti enda lurus ngambika bisnis iya manah agi. Seiku atlet engka sengaja ngasuh atlet bukai bakal ngambika iya ulih menang. Seiku pelajar engka nipu ngambika iya ulih tama ngagai universiti ti tebilang. Ketegal kitai orang Kristian, kitai nemu ulah ke baka tu endang salah. Tu “pengingin orang ti nitihka gaya pengidup mensia ti bedosa.” (Gal. 5:19-21, Bup Kudus Berita Manah Ka Rebak Diatu) Tang, kati bisi sekeda ari nembiak Jehovah ke enda sedar sida ngembuan ulah rindu bepekit lalu engka meransang orang ba eklisia ngereja utai ti sama? Kitai patut berundingka tanya tu. Enti sema eklisia bisi orang ke deka bepekit, tu ulih ngachau penyerakup kitai.

2. Nama deka dikerandauka kitai ba artikel tu?

² Ba artikel tu, kitai deka berandauka sekeda utai ke ngasuh kitai ngumbai diri manah agi ari orang bukai. Kitai mega deka bejuraika sekeda teladan nembiak Jehovah ke tetap ati ba Bup Kudus, ke enda ngumbai diri manah agi ari orang bukai. Keterubah, aram kitai meresa tuju ati diri empu.

3. Nama tanya ke ulih ditanya kitai?

³ Kekadang, engka manah enti kitai meresa tuju ati diri empu. Kitai ulih nanya diri: ‘Kati aku berasai nyamai agi pengudah aku mandingka diri enggau orang bukai? Kati aku bebendar gawa ba eklisia ketegal aku keran deka nyadi pemadu  manah tauka manah agi ari orang bukai? Tauka aku bebendar gawa ketegal deka ngelantangka ati Jehovah?’ Nama kebuah kitai patut nanya tanya tu? Peratika utai ti dipadah Jaku Petara.

4. Nitihka Galatia 6:3, 4, nama kebuah kitai enda patut mandingka diri enggau orang bukai?

⁴ Bup Kudus madah kitai enda patut mandingka diri empu enggau orang bukai. (Bacha Galatia 6:3, 4.) Nama kebuah? Siti kebuah nya, enti kitai ngumbai diri manah agi ari menyadi Kristian kitai, tu tau ngasuh kitai nyadi sumbung. Kebuah kedua, enti kitai mandingka diri lalu ngumbai menyadi Kristian kitai manah agi ari kitai, kitai deka asa ati. Enda ngira ni bagi, dua iti runding tu enda manah. (Rom. 12:3) Seiku menyadi indu ke benama Katerina, * ke diau di Greece, madahka: “Aku kala mandingka diri empu enggau orang ke bajik agi, landik agi ba pengawa nginjil, sereta senang ngiga kaban. Asil iya, aku berasai enda beguna.” Kitai patut ingat, Jehovah mai kitai semak enggau Iya ukai ketegal kitai bajik, landik bejaku tauka dikerinduka orang bukai, tang ketegal kitai rinduka Iya lalu mendingka Anak Iya.—Jhn. 6:44; 1 Kor. 1:26-31.

5. Nama ulih dipelajarka nuan ari seiku menyadi lelaki ke benama Hyun?

⁵ Siti agi tanya ke tau ditanya kitai iya nya, ‘Nama runding bala menyadi pasal aku? Kati aku orang ke ngemansangka pemaik? Tauka aku suah bekelikuh enggau menyadi Kristian?’ Peratika peneleba seiku menyadi lelaki ke benama Hyun ari Korea Selatan. Taja pan iya tuai gempuru, iya kala ngumbai orang ke megai tanggung pengawa ba eklisia deka bepekit enggau iya. Ku iya madah, “Aku rindu ngiga penyalah bala menyadi lelaki tu lalu suah enda setuju enggau utai ke dipadah sida.” Nama asil iya? Ku Hyun nampung, “Ulah aku ngasuh eklisia enda beserakup.” Sekeda ari bala pangan Hyun nulung iya nemu pasal penanggul iya. Hyun ngaga ubah lalu kemayaharitu iya tuai gempuru ti manah. Enti kitai nemu diri bisi asai deka bepekit enggau orang bukai lalu enda ngemansangka pemaik, kitai patut ngaga ubah enggau jampat.

6. Nitihka Galatia 5:26, nama kualiti ke ngasuh kitai bepekit enggau orang bukai?

⁶ Bacha Galatia 5:26. Nama kualiti ke ngasuh orang deka bepekit? Siti nya sumbung. Orang ke sumbung berundingka diri empu aja. Siti agi kualiti nya kepapas. Orang ti kepapaska orang bukai ukai semina inginka utai enggi orang nya, tang iya mega deka ngerampas utai ke enggi orang nya. Orang ti kepapaska orang bukai nya kebendar iya begedika orang nya. Kitai deka nyeliahka diri ari dua iti ulah ti enda manah tu, baka kitai ngenyauhka diri ari penyakit ti berampit!

7. Nama sempama ke nunjukka penyumbung enggau kepapaska orang bukai nya enda manah?

⁷ Penyumbung enggau kepapas tau disemaka enggau indu sampuk ke makai pun kayu. Nyau kelama, pun kayu nya tau tumbang. Pia mega, seseiku orang engka udah lama nyembah Jehovah. Tang enti iya sumbung tauka kepapaska orang bukai, nyau kelama iya ulih mai penusah ngagai diri empu. (J-lam. 16:18) Iya engka badu nyembah Jehovah lalu mai pemedis ngagai diri empu enggau orang bukai. Baka ni kitai ulih  nyeliahka diri ari nyadi sumbung sereta kepapaska orang bukai?

8. Baka ni kitai ngelaban penyumbung?

⁸ Baka ni kitai ulih ngelaban penyumbung? Kingatka jaku lalau rasul Paul ngagai orang Kristian ba Pilipi. Ku iya madah: “Anang ngereja utai semina berundingka diri empu aja, tauka beduduk ba ati ti deka ngenyumbungka diri, tang enggau ati ti baruh, seruran ngumbai orang bukai pama agi ari kita.” (Plp. 2:3) Enti kitai ngumbai orang bukai pama agi ari kitai, kitai enda bepekit enggau sida ke bisi pengelandik tauka penau ti enda dikemisi kitai. Tang, kitai gaga ati laban sida ulih ngena pengelandik nya gawa ke Jehovah lalu mai mulia ngagai Iya. Lalu enti sida tu nitihka jaku lalau rasul Paul, sida mega engka betatika pemanah kitai. Asil iya, kitai tau ngemansangka penyerakup enggau pemaik ba eklisia.

9. Baka ni kitai ulih nyeliahka diri ari kepapaska bala menyadi Kristian?

⁹ Kitai ulih nyeliahka diri ari kepapaska bala menyadi Kristian, enti kitai sedar tatak diri empu. Enti kitai baruh ati, kitai enda nguji deka nunjukka diri landik agi ari orang bukai. Tang, kitai deka belajar ari menyadi ke landik agi ari kitai. Ambika chunto, enti bisi menyadi lelaki ba eklisia ke landik meri cheramah, kitai ulih nanya iya baka ni iya nyediaka cheramah iya. Enti bisi menyadi indu ke landik manduk, kitai ulih nanya penemu iya ngambika kitai ulih manduk enggau manah baka iya. Lalu enti bisi nembiak Kristian ke tusah deka ngiga kaban, iya ulih nanya penemu ari menyadi ke senang ngiga kaban. Enggau chara tu, kitai ulih nyeliahka diri ari kepapaska orang bukai lalu ngemanahka agi pengelandik diri.

10. Nama penanggul ke ditapi Gideon?

¹⁰ Peratika utai ti nyadi entara Gideon, ari raban bansa Manasi, enggau sida ke ari raban bansa Epraim. Enggau saup ari Jehovah, Gideon enggau 300 iku soldadu iya menang ba perang. Tu tau ngasuh sida temegahka  diri. Orang ari Epraim datai betemu enggau Gideon ukai ketegal sida deka muji iya tang deka belaya enggau iya. Tu ketegal sida berasai pedis ati laban Gideon enda mai sida beperang ngelaban munsuh Petara. Sida kelalu deka ngetanka nama manah raban bansa diri lalu enda meda utai ti beguna agi, iya nya Gideon udah nulung ngemuliaka nama Jehovah lalu nyaga nembiak Jehovah.—P-ulu. 8:1.

11. Nama dipadah Gideon ngagai orang bansa Epraim?

¹¹ Enggau baruh ati Gideon madah ngagai sida: “Utai ti ulih dikereja aku nya mit amat enti dibandingka enggau utai ti udah dikereja kita.” Udah nya, Gideon ngingatka sida baka ni Jehovah udah nulung sida ngereja utai ti besai agi. Asil iya, sida “badu agi ringat ngagai iya.” (P-ulu. 8:2, 3) Gideon sanggup ngayanka pemaruh ati ngambika ulih ngemansangka pemaik entara nembiak Petara.

12. Nama ulih dipelajarka kitai ari teladan raban bansa Epraim enggau Gideon?

¹² Nama ulih dipelajarka kitai? Ari teladan raban bansa Epraim, kitai belajar ari ke deka ngulihka mulia ke diri empu, kitai patut meri mulia ngagai Jehovah. Nama ulih dipelajar tuai bilik enggau tuai gempuru ari teladan Gideon? Enti bisi orang ringat enggau utai ke digaga kitai, kitai patut meretika kebuah iya bisi ngembuan asai ati nya. Kitai ulih muji iya ketegal pengawa ke digaga iya enggau manah. Tang tu begunaka pemaruh ati ari kitai, kelebih agi enti orang nya endang salah. Kingatka, ngembuan kaul ti manah enggau bala menyadi Kristian beguna agi ari ngetanka penemu diri.

13. Nama penanggul ke ditapi Hanah, lalu nama digaga iya kena mutarka nya?

¹³ Pikirka teladan Hanah. Iya jadi enggau seiku orang Lewi ke benama Elkanah. Elkanah amat rinduka iya. Tang Elkanah bisi bini ke bukai, ke benama Peninah. Taja pia, Elkanah rinduka Hanah lebih agi ari Peninah. “Peninah bisi anak, tang Hanah nadai anak.” Ketegal nya, “Peninah selalu ngeleseka Hanah ngambika iya ringat.” Nama asai ati Hanah? Bup Kudus madah: “Hanah nyau nyabak, lalu enggai makai.” (1 Sam. 1:2, 6, 7) Taja pia, Bup Kudus nadai madahka Hanah deka malas penyai Peninah. Tang Hanah madahka Jehovah pasal asai ati iya lalu andal Jehovah deka nulung iya. Kati ulah Peninah ngagai Hanah bisi berubah? Bup Kudus nadai madahka utai nya. Tang kitai nemu, Hanah bulih pemaik lalu “mua iya enda agi tusah.”—1 Sam. 1:10, 18.

14. Nama dipelajarka kitai ari teladan Hanah?

¹⁴ Nama dipelajarka kitai ari teladan Hanah? Enti bisi orang deka bepekit enggau nuan, kingatka nuan enda ibuh nunda  iya. Ari ke malas penyai ngena penyai, uji meh bebaik enggau iya. (Rom. 12:17-21) Enti sema iya enggai berubah, nuan tetap deka bulih pengelantang sereta pengaga ati.

15. Nama utai ti sama entara Apollos enggau Paul?

¹⁵ Ke penudi iya, aram kitai meda nama ulih dipelajarka kitai ari teladan Apollos enggau rasul Paul. Seduai iya bela nemu pasal Jaku Petara. Seduai iya mega pengajar ti landik sereta tebilang. Lalu seduai iya udah nulung mayuh orang nyadi murid Jesus. Taja pia, seduai iya enda kepapaska pangan diri.

16. Apollos nya orang ke baka ni?

¹⁶ Apollos “asal ari Aleksandria.” Maya nya mayuh orang belajar ba Aleksandria. Iya orang ke lanchar bejaku, lalu “nemu amat pasal Bup Kudus.” (SKR. 18:24) Lebuh Apollos ba Korint, sekeda menyadi rinduka iya lebih agi ari menyadi lelaki ke bukai, nyengkaum Paul. (1 Kor. 1:12, 13) Kati Apollos ke ngasuh sida baka nya? Perundingka tu. Pengudah Apollos ninggalka Korint, Paul ngasuh iya pulai baru. (1 Kor. 16:12) Enti Apollos ngasuh bala menyadi bepekit, Paul tentu enda ngasuh iya pulai baru ngagai Korint. Tang kitai andal, Apollos tentu ngena pengelandik iya enggau manah iya nya kena nginjil pasal Berita Manah sereta negapka bala menyadi. Kitai mega nemu Apollos orang ke baruh ati. Ambika chunto, lebuh Akuila enggau Prisila ‘nerangka ngagai iya penemu ti betul agi pasal Jalai Petara,’ Bup Kudus nadai madahka iya ringat ngagai seduai iya.—SKR. 18:24-28.

17. Baka ni Paul ngemansangka pemaik?

¹⁷ Rasul Paul nemu pasal semua pengawa manah ke digaga Apollos. Tang Paul enda  irauka runding orang ke ngumbai Apollos manah agi ari iya. Kualiti Paul ti manah baka pemaruh ati, nemu tatak diri sereta enda nitihka asai ati diri ulih dipeda maya iya meri jaku lalau ngagai eklisia di Korint. Iya enda rindu maya orang madah “Aku nitihka Paul,” tang iya meri semua puji ke Petara Jehovah enggau Jesus Kristus.—1 Kor. 3:3-6.

18. Nitihka 1 Korint 4:6, 7, nama ulih dipelajarka kitai ari teladan Apollos enggau Paul?

¹⁸ Nama ulih dipelajarka kitai ari teladan Apollos enggau Paul? Kitai engka ngereja mayuh pengawa ke Jehovah, sereta udah nulung mayuh orang dibaptisa. Tang kitai nemu, kitai ulih ngereja tu ketegal saup ari Jehovah. Kitai mega belajar enti kitai bisi mayuh tanggung pengawa ba eklisia, tu reti iya kitai bisi mayuh agi peluang deka ngemansangka pemaik dalam eklisia. Kitai amat beterima kasih laban tuai gempuru enggau penulung gempuru nulung kitai beserakup sereta bebaik enggau pangan diri. Sida ngereja tu lebuh meri jaku lalau ngena Bup Kudus. Sida enda nguji ngemuliaka diri empu, tang nulung eklisia ngasika Jesus sereta nitihka teladan iya.—Bacha 1 Korint 4:6, 7.

19. Nama ulih digaga tiap iku kitai? (Peda mega kutak “ Seliahka Ari Meransang Ulah Bepekit.”)

¹⁹ Semua kitai bisi pengelandik enggau penau ari Petara. Kitai ulih ngena pemeri nya “nulung pangan diri.” (1 Pet. 4:10) Kitai engka ngasaika pengawa kitai nya mit aja. Taja pia, pengawa nuan ke deka ngemansangka penyerakup ulih disemaka baka batu bata ke dikena ngaga rumah. Aram meh kitai bebendar nyeliahka diri ari bepekit lalu enggau naka ulih ngemansangka pemaik enggau penyerakup ba eklisia!—Eps. 4:3.