Jehovah deka orang ke kawin gaga ati sereta ngembuan kaul ti rapat enggau pangan diri belama iya. (Mat. 19:4-6) Enti nuan deka kawin, baka ni nuan ulih ngiga kaling pengidup ti manah? Ketegal Jehovah nya Penempa kitai, Iya nemu utai ke patut digaga kitai ngambika bisi tikah ti ngagaka ati. Nya alai, enti nuan nitihka lalau ke diberi Jehovah, nuan deka bulih pengaga ati ti bendar. Peratika sekeda prinsip Bup Kudus bekaul enggau utai tu.

Keterubah, kitai patut nemu pemendar tu. Ku Bup Kudus: “Nadai utai ti nemu agi ngakal ari ati mensia.” (Jer. 17:9) Lebuh dua iku orang ke deka kawin, berengkah betemu lalu besulu, seduai iya ulih ngembuan asai ati ti kuat ngagai pangan diri. Enti tu nyadi, sida tusah deka ngaga pemutus ti manah. Enti orang ngaga pemutus deka kawin bepelasarka utai ke diasai aja, sida deka berasai asa ati. (J-lam. 28:26) Nya alai, manah agi enti sida sabar lalu ngelala pangan diri enggau manah sebedau madahka asai ati diri tauka ngaga semaya.

Jaku Dalam 22:3 madahka: “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.” Nama penusah ke deka nyadi enti ngiga kaling pengidup nengah laman web? Sayau amat, sekeda orang napi peneleba ti enda manah. Sida besulu enggau orang ke enda dikelala nengah online lalu udah nya sedar orang nya kebendar iya nipu sida. Pia mega, bisi orang ngaga akaun pelesu kena nipu duit orang bukai. Kekadang, sida mega nipu orang enggau madahka diri Saksi-Saksi Jehovah.

Peratika penusah ke bukai ke ulih nyadi. Sekeda laman web ngena program komputer ke ulih nulung orang nentuka sapa ke ulih nyadi sulu sida. Taja pia, nadai bukti ti nunjukka chara tu mujur. Nya alai, kitai enggai kelalu andalka program komputer ke digaga mensia lebuh ngaga pemutus ti berat, baka ngiga kaling pengidup ti manah. Enti dibandingka enggau prinsip Bup Kudus, program komputer enda ulih dikearapka.—J-lam. 1:7; 3:5-7.

Siti prinsip ba Jaku Dalam 14:15 madahka: “Orang ke beli deka arapka sebarang utai, tang orang ke pintar deka nyingkang enggau bejimat.” Sebedau nentuka seseiku orang ulih nyadi kaling pengidup nuan, nuan patut ngelala iya  enggau manah agi. Tang tu engka tusah dikereja enti seduai betemu nengah online aja. Indah enti nuan ulih meda penerang pasal pangan diri tauka ngena mayuh awak bejaku nengah online, kati nuan amat ulih ngelala iya? Sekeda orang ke ngumbai diri udah tetemuka sulu ati, deka berasai tekenyit lebuh sida betemu enggau pangan diri.

Seiku pemasmur madahka: “Aku enda begulai enggau orang ke bula, lalu aku enggai begulai enggau orang ke pura-pura ngapa.” (Mas. 26:4) Mayuh orang ngasaika enda salah enti sida bebula pasal penerang diri ba laman web ngambika ulih narit ati orang. Sida engka ngelalaika ulah ti enda manah lalu ulah tu enda dipeda lebuh sida nganjung mesej. Endang amat beguna enti kitai berundingka tanya tu: Taja pan sida engka madahka diri Saksi-Saksi Jehovah, kati sida udah dibaptisa? Kati sida orang ke tegap ba pengarap? Kati sida ngembuan kaul ti rapat enggau Jehovah? Kati sida dipebasa dalam eklisia? Tauka sida nya teladan ti enda manah, tauka “orang ke jai”? (1 Kor. 15:33; 2 Tim. 2:20, 21) Lalu, kati sida bibas kawin nitihka prinsip Bup Kudus? Nuan patut nemu saut ngagai semua tanya tu. Tang tu engka tusah dikereja enti nuan enda ulih nanya penemu Saksi bukai ke ngelala orang nya enggau manah. (J-lam. 15:22) Pia mega, nembiak Jehovah ke tetap ati enda sekali-kali berunding deka “besulu enggau orang ke enda arap.”—2 Kor. 6:14; 1 Kor. 7:39.

Ketegal mayuh penusah ulih nyadi enti ngiga kaling pengidup nengah laman web, bisi chara ke bukai kena ngiga sereta bekelala enggau orang ke ulih nyadi kaling pengidup nuan. Dini nuan ulih tetemuka orang ke engka ulih nyadi kaling pengidup nuan? Lebuh kitai ulih begulai enggau orang mayuh, Saksi-Saksi Jehovah bekelala enggau pangan diri maya ba gempuru, gempuru besai, konvensyen, sereta ba pengawa bukai.

Lebuh pengawa begempuru tu enda dikemendarka, chunto maya pandemik COVID-19 tu, kitai begempuru ngena perengka elektronik. Ba dia, nuan bisi peluang ngelala menyadi ke bujang dara. Nuan ulih meda chara sida ngenataika begian sida ba gempuru sereta ninga saut ti ngayanka pengarap sida. (1 Tim. 6:11, 12) Nuan mega ulih berandau enggau sida ba breakout room pengudah gempuru. Lalu, lebuh nuan enggau makai tauka main begulai nengah video call enggau menyadi ke bukai, nuan ulih meda chara menyadi ke narit ati nuan begulai enggau orang bukai. Enggau nya, nuan ulih meda pemanah ti dikembuan iya. (1 Pet. 3:4) Nyau kelama lebuh nuan ngelala iya enggau manah agi, nuan ulih nentuka sekalika seduai bisi juluk ati ti sama sereta ulih nyadi kaling pengidup ti manah.

Lebuh orang ke bedau kawin ngiga kaling pengidup ngena prinsip Bup Kudus, sida deka ngasaika pemendar jaku lalau tu ke madah: ‘Enti nuan bulih bini [tauka laki], nuan bulih utai ti manah. Nya ngayanka Jehovah manah enggau nuan.’—J-lam. 18:22.