1. Nama asai ati ti patut dikembuan kitai ketegal Jehovah udah ngawakka kitai besampi ngagai Iya?

 PENEMPA serega enggau dunya udah meri kitai siti pemeri ti amat berega. Iya ngawakka kitai besampi ngagai Iya. Perundingka tu: Kitai ulih mantaika semua utai ti bisi dalam ati kitai ngagai Jehovah ba barang maya sereta dalam nama-nama bansa jaku. Kitai mega enda ibuh ngaga temu janji sebedau besampi. Kitai ulih besampi ngagai Iya ari sepital, tauka indah ari rumah jil. Lalu kitai yakin, Apai kitai ti bepengerindu deka ningaka kitai. Kitai amat beterima kasihka pemeri tu.

2. Baka ni Raja David nunjukka diri beterima kasihka peluang iya ti ulih besampi?

² Raja David beterima kasihka peluang iya ti ulih besampi. Iya belagu ngagai Jehovah: “Sambut meh sampi aku nyadika menyan.” (Mas. 141:1, 2) Maya jeman David, bala imam bejimat lebuh nyediaka menyan ti kudus ke dikena ba sembah ti tuchi. (P-sut. 30:34, 35) Sama baka sida ke nyediaka menyan enggau silik, David mega deka berunding enggau manah pasal utai ti deka dipadah iya dalam sampi ngagai Jehovah. Nya mega utai ti keran digaga kitai. Kitai deka sampi kitai ngelantangka ati Jehovah.

3. Nama ulah ti patut diayanka kitai lebuh besampi ngagai Jehovah, lalu nama kebuah?

³ Lebuh kitai besampi ngagai Jehovah, kitai patut ngayanka basa ti dalam. Perundingka genera ti ngalitka ati ke dipeda Isaiah, Esekiel, Daniel, enggau John. Semua genera tu bebida ari pangan diri, tang semua genera nya mega bisi utai ti  sama. Semua genera nya ngambarka Jehovah baka seiku Raja ti bemulia. Isaiah ‘meda Jehovah duduk ba kerusi diraja Iya, tinggi sereta bemulia.’ (Isa. 6:1-3) Esekiel meda Jehovah duduk ba kerita perang iya, dikelingi “penampak . . . baka gaya anakraja.” (Esk. 1:26-28) Daniel meda “Iya ke idup belama iya” ke ngena gari ti burak baka seleju lalu kaki kerita nya mau laban api. (Dan. 7:9, 10) Lalu, John meda Jehovah duduk ba kerusi diraja ke dikelingi anakraja ti bechura baka batu samerut. (Pem. 4:2-4) Lebuh kitai belematika mulia Jehovah, nya ngasuh kitai beterima kasih agi ke Jehovah laban udah ngawakka kitai besampi ngagai Iya. Tang, nama patut disampika kitai?

4. Nama ulih dipelajarka kitai pasal sampi ari utai ti dipadah Jesus ba pun chunto sampi ke ditulis ba Matthew 6:9, 10?

⁴ Bacha Matthew 6:9, 10. Dalam Jaku Ajar ba atas Bukit, Jesus ngajar bala murid iya chara besampi ti ngelantangka ati Petara. Pengudah nyebut “baka tu ku chara kita patut besampi,” Jesus lalu nyebut utai ti pemadu penting dulu dalam sampi iya. Iya besampi ngambika nama Jehovah dikuduska, penatai Perintah Petara ke deka ngerusak semua munsuh Petara, sereta utai manah ke deka dikereja Petara ke dunya enggau mensia ba jemah ila. Enggau ngereja nya dalam sampi kitai, kitai nunjukka peneka Petara nya utai ti pemadu penting ba kitai.

5. Kati Jehovah ninga lebuh kitai besampi pasal utai ti diguna diri empu?

⁵ Ba begian bukai dalam sampi nya, Jesus nunjukka kitai ulih besampika utai ti diguna diri empu. Kitai ulih minta Jehovah meri pemakai ke sehari nya, ngampunka penyalah kitai, nyaga kitai ari penguji, enggau ngelepaska kitai ari penyai. (Mat. 6:11-13) Lebuh kitai minta semua utai tu ari Jehovah, kitai nunjuk ngagai Jehovah pasal kitai ke nemu diri begunaka bantu ari Iya sereta deka ngelantangka ati Iya.

6. Kati kitai semina ulih besampika utai ti disebut dalam chunto sampi nya aja? Terangka.

⁶ Jesus enggai bala murid iya nandu leka jaku ke bisi dalam chunto sampi nya. Dalam sampi Jesus kebukai, iya bisi nyebut utai bukai ti penting ba iya maya nya. (Mat. 26: 39, 42; Jhn. 17:1-26) Baka nya mega, kitai ulih besampika sebarang utai ti ngasuh kitai irau. Lebuh kitai patut ngaga pemutus, kitai ulih besampi minta penemu-dalam enggau pemereti ba ati. (Mas. 119:33, 34) Lebuh kitai patut ngereja siti-siti utai ti tusah, kitai ulih besampi minta tulung kena nemu chara ngereja pengawa nya. (J-lam. 2:6) Apai indai ulih besampika bala anak sida, bala anak ulih besampika apai indai sida, lalu semua kitai ulih sereta patut besampika pemelajar Bup Kudus kitai sereta orang bukai ke alai kitai nginjil. Tang sampi kitai ukai semina sampi peminta aja.

7. Nama kebuah kitai patut muji Jehovah dalam sampi?

⁷ Kitai patut ingat meri puji ngagai Jehovah dalam sampi kitai. Nadai orang ke layak agi nerima puji kelimpah ari Petara kitai. Iya “manah enggau kami, sereta ngampun.” Iya mega “kasih sereta rindu, seruran liat ati, seruran nelap sereta tetap ati.” (Mas. 86:5, 15) Kitai endang bisi kebuah ti manah muji Jehovah ketegal sapa Iya sereta utai ti udah digaga Iya.

8. Nama sekeda utai bukai ke ulih ngasuh kitai beterima kasih ngagai Jehovah? (Masmur 104:12-15, 24)

⁸ Kelimpah ari muji Jehovah dalam sampi kitai, kitai mega diperansang beterima kasih ngagai Iya ketegal utai manah ke udah disediaka Iya ke kitai. Ambika chunto, kitai ulih beterima kasih ngagai Iya ketegal bungai ti bisi mayuh warna, bisi mayuh macham pemakai ti nyamai, sereta bala bakih ti ngasuh kitai gaga ati. Apai kitai ti bepengerindu udah meri kitai semua utai tu enggau mayuh agi utai bukai ngambika kitai ulih gaga ati. (Bacha Masmur 104:12-15, 24.) Lalu keberat agi, kitai beterima kasih ngagai Jehovah ketegal semua iring ke udah diberi Iya kena nulung kitai mengkang tegap ba pengarap, sereta harapan ti manah ke diberi Iya ke kitai.

9. Nama ulih nulung kitai seruran ingat meri terima kasih ngagai Jehovah? (1 Tesalonika 5:17, 18)

⁹ Kitai engka senang enda ingat meri terima kasih ngagai Jehovah ketegal utai ti udah digaga Iya ke kitai. Nama ulih nulung nuan ingat? Nuan ulih ngaga lis pasal utai ti udah disampika nuan, lalu nuan ulih beratika utai  ti udah ditulis nya kena meda baka ni Jehovah udah nyaut sampi nuan. Udah nya, beri terima kasih dalam sampi ketegal tulung ke udah diberi Iya. (Bacha 1 Tesalonika 5:17, 18.) Perundingka tu: Kitai berasai gaga ati sereta dikerindu lebuh orang ngayanka diri beterima kasih ke kitai. Baka nya mega, lebuh kitai meri terima kasih ngagai Jehovah ketegal nyaut sampi kitai, nya ngagaka ati Iya. (Kol. 3:15) Tang, bisi siti agi kebuah ti penting ke ngasuh kitai meri terima kasih ngagai Petara.

10. Nitihka 1 Peter 2:21, nama kebuah kitai patut beterima kasihka Jehovah ketegal nganjung Jesus ke dunya?

¹⁰ Bacha 1 Peter 2:21. Kitai patut beterima kasihka Jehovah ketegal nganjung Anak ke dikesayauka Iya kena ngajar kitai. Lebuh kitai macha pasal Jesus, kitai belajar mayuh utai pasal Jehovah sereta baka ni kitai ulih ngagaka ati Iya. Enti kitai ngayanka pengarap ngagai genselan tebus Jesus, kitai ulih nyadi pangan rapat Petara Jehovah sereta bisi pemaik enggau Iya.—Rom. 5:1.

11. Nama kebuah kitai besampi dalam nama Jesus?

¹¹ Kitai beterima kasihka Jehovah laban kitai ulih besampi ngagai Iya nengah Anak Iya. Jehovah ngena Jesus meri kitai utai ti dipinta kitai. Jehovah ninga sereta nyaut sampi ke diberi dalam nama Jesus. Jesus nerangka: ‘Aku deka ngereja sebarang utai ti dipinta kita dalam nama aku, ngambika Apai dimuliaka dalam Anak.’—Jhn. 14:13, 14.

12. Nama siti agi kebuah kitai beterima kasihka Jehovah ketegal Anak Iya?

¹² Jehovah ngampunka dosa kitai ketegal genselan tebus Jesus. Bup Kudus ngambarka Jesus nya ‘Imam Besai, ke duduk muak ari kanan kerusi diraja Petara ti Pemadu Tinggi di serega.’ (Heb. 8:1) Jesus mega “Penyaup ke bejaku ngagai Apai ngarika kitai.” (1 Jhn. 2:1) Kitai amat beterima kasih laban Jehovah udah meri kitai seiku Imam Besai ke meretika penusah ke ditapi kitai ketegal enda sempurna sereta ke “deka bejaku ngarika kitai”! (Rom. 8:34; Heb. 4:15) Kitai mensia ti enda sempurna, nyadi enti kitai nadai genselan tebus ari Jesus, kitai enda ulih besampi ngagai Jehovah. Nuan tentu setuju, sampi terima kasih ke diberi kitai ngagai Jehovah endang enda chukup kena ngayanka diri beterima kasih ngagai Jehovah laban pemeri ke udah diberi Iya ke kitai amat besai, iya nya Anak Iya Empu!

13. Ba malam sebedau iya mati, baka ni Jesus ngayanka pengerindu ngagai bala murid iya?

¹³ Ba malam sebedau iya mati, Jesus lama besampika bala murid iya. Iya minta Apai iya “nyaga sida ari iya ti jai.” (Jhn. 17:15) Nya nunjukka penalam pengerindu Jesus ke sida! Taja pan iya nemu enda lama agi iya deka balat merinsa, tang iya agi irauka bala rasul iya.

14. Baka ni kitai ulih ngayanka diri rinduka bala menyadi Kristian kitai?

¹⁴ Baka Jesus, kitai enda semina berundingka utai ti diguna diri empu aja. Tang kitai suah besampika bala menyadi Kristian kitai. Lebuh kitai ngereja nya, kitai ngasika pesan Jesus ke ngasuh kitai rinduka pangan diri lalu kitai mega nunjuk ngagai Jehovah penalam pengerindu kitai ke bala menyadi Kristian kitai. (Jhn. 13:34) Besampika bala menyadi Kristian kitai ukai pengawa ti lebu ngapa. Bup Kudus madahka: “Sampi orang ke lurus endang bekuasa sereta bisa.”—Jas. 5:16.

15. Nama kebuah bala menyadi Kristian kitai begunaka sampi kitai?

 ¹⁵ Bala menyadi Kristian kitai begunaka sampi kitai laban sida patut tan napi mayuh penusah. Kitai ulih minta Jehovah nulung sida tan napi penyakit, pengerusak alam, perang, perinsa, tauka penusah bukai. Kitai ulih besampika bala menyadi Kristian kitai ke bebendar nulung sida ke ditinggang pengerusak alam. Nuan empu engka nemu sekeda orang ti napi penusah ke baka nya. Nuan ulih nyebut nama sida dalam sampi nuan ngagai Jehovah. Kitai ngayanka pengerindu ti bendar lebuh kitai minta Jehovah nulung sida tan napi penusah nya.

16. Nama kebuah kitai patut besampika bala menyadi ke ngiring kitai?

¹⁶ Bala menyadi ke ngiring ba eklisia amat beterima kasih lebuh kitai nyebut pasal sida dalam sampi kitai, lalu sampi nya deka nulung sida. Rasul Paul nemu iya begunaka orang bukai besampika iya. Iya nulis: “Besampi mega ke aku ngambika lebuh aku bejaku, leka jaku diberi ngagai aku lebuh aku, enggau ati ti berani, madahka misteri Berita Manah.” (Eps. 6:19) Kemayaharitu mega, kitai bisi mayuh bala menyadi lelaki ke bebendar ngiring kitai. Kitai ngayanka pengerindu ngagai sida lebuh kitai minta Jehovah merekatka pengawa sida.

17-18. Kemaya kitai engka diasuh besampi ngarika orang bukai? Nama patut dikingatka kitai?

¹⁷ Kekadang, kitai engka diasuh besampi ngarika orang bukai. Ambika chunto, seiku menyadi indu ke ngajar Bup Kudus engka ngasuh menyadi indu ke enggau iya besampi. Menyadi indu ke enggau iya engka enda entu ngelala pemelajar Bup Kudus nya. Nyadi, iya engka minta ngambika meri sampi penutup ke pelajar nya. Enggau nya, iya deka nemu agi nama utai ke patut disebut lebuh besampika pemelajar nya.

¹⁸ Seiku menyadi lelaki engka diasuh besampi ba gempuru sebedau nginjil tauka ba gempuru kebukai ba eklisia. Bala menyadi lelaki ke bisi peluang ngereja nya patut ingat nama tuju gempuru nya. Sampi enda patut dikena ngemetulka tauka ngajar eklisia, tauka ngaga jaku gerah. Ba mayuh gempuru,  timpuh lima minit udah diatur ke lagu enggau sampi. Nyadi, menyadi lelaki ke besampi nya enda ibuh ngena “mayuh macham leka jaku,” kelebih agi enti nya sampi pemuka ke gempuru.—Mat. 6:7.

19. Nama deka nulung kitai besedia ke hari lebuh Jehovah ngakim?

¹⁹ Kitai patut ngenuluka agi pengawa besampi dalam pengidup kitai laban hari Jehovah ngakim majak semak. Bekaul enggau tu, Jesus madahka: “Bejaga berari, besampi minta diri kering rari ari semua utai ti deka nyadi.” (Luk. 21:36) Enti kitai seruran besampi, pengarap kitai deka tegap lalu kitai deka besedia lebuh hari Jehovah ngakim datai.

20. Baka ni sampi kitai ulih nyadi baka menyan ti bebau rengut?

²⁰ Nama udah dikerandauka kitai? Kitai amat beterima kasihka peluang kitai ti ulih besampi. Utai ti pemadu penting ke patut disampika kitai, iya nya utai ti bekaul enggau peneka Jehovah. Kitai mega meri terima kasih ketegal Anak Petara enggau Perintah iya, sereta besampika bala menyadi Kristian kitai. Lalu endang amat, Jehovah mega dekaka kitai besampika utai ti diguna kitai besehari-sehari sereta tulung ke diguna kitai ngambika pengarap kitai mengkang tegap. Lebuh kitai berunding enggau silik pasal utai ti dipadah dalam sampi kitai, nya nunjukka kitai beterima kasihka peluang ti istimewa tu. Leka sampi kitai deka nyadi baka menyan ti bebau rengut ngagai Jehovah, lalu ngagaka ati Iya.—J-lam. 15:8.