1. Nama utai ke ulih diandalka kitai, lalu nama kebuah?

 LEBUH nuan beratika gaya dunya diatu, kati nuan ngasaika nya tusah deka pechayaka dunya tu deka berubah nyadi manah agi? Ruang bilik enda agi rinduka pangan diri baka suba. Orang majak kasar sereta berundingka diri empu. Mayuh orang tusah deka pechayaka piak ti bekuasa. Tang utai ke nyadi tu ulih ngasuh nuan andal dunya tu deka berubah nyadi manah agi. Nama kebuah? Laban ulah orang kemayaharitu sama baka utai ti dipadah Bup Kudus pasal “hari ti penudi.” (2 Tim. 3:1-5) Nadai orang ulih nyakal pengamat jaku benabi tu, lalu pengamat tu nunjukka Jesus Kristus udah nyadi Raja Perintah Petara. Tang tu semina siti ari mayuh jaku benabi pasal Perintah Petara. Lebuh kitai beratika jaku benabi ke udah dikeamatka ba taun-taun ti udah, nya deka negapka agi pengarap kitai.

2. Nama deka dikerandauka kitai dalam artikel tu, lalu nama kebuah? (Terangka utai ke nyadi ba mua majalah.)

² Ba artikel tu, kitai deka berandauka (1) jaku benabi ke nulung kitai meretika kemaya Perintah Petara berengkah merintah, (2) jaku benabi ke nulung kitai nemu Jesus udah nyadi Raja Perintah Petara di serega, sereta (3) jaku benabi ke deka nerangka baka ni munsuh Perintah Petara dirusakka.  Kitai deka beratika semua jaku benabi tu amat sejalai enggau pangan diri, lalu nya deka nulung kitai nemu dini alai kitai diatu senentang pelan Jehovah bekaul enggau semua utai ke benung nyadi tu.

3. Ari jaku benabi ba Daniel 7:13, 14, nama ulih dipechayaka kitai pasal Raja Perintah Petara?

³ Jaku benabi ba Daniel 7:13, 14 madahka, Jesus Kristus nya Pemerintah ti pemadu manah ba Perintah Petara. Orang ari semua bansa deka ‘betuaika iya magang’ lalu nadai pemerintah deka nganti iya. Siti agi jaku benabi ba bup Daniel madahka, Jesus deka berengkah merintah ba Perintah nya ba ujung timpuh ke dikumbai “tujuh taun.” Kati amat kitai ulih nemu kemaya Jesus nyadi Raja?

4. Terangka baka ni Daniel 4:10-17 nulung kitai nemu ni maya Jesus berengkah nyadi Raja. (Peda mega nota kaki.)

⁴ Bacha Daniel 4:10-17. “Tujuh taun” ke dipadah ba bup Daniel nya ngambarka timpuh pengelama 2,520 taun. Timpuh nya berengkah ba taun 607 S.M. lebuh orang Babilon muai raja ti penudi ke duduk ba kerusi diraja Jehovah di Jerusalem. Timpuh tu abis ba taun 1914 M. lebuh Jehovah ngasuh Jesus nyadi Raja ba Perintah Petara. Jesus nya “orang siku ke diasuh [ke bisi hak, NWT]” nyadi Raja ti dipilih Jehovah. b—Esk. 21:25-27.

5. Nama siti chara kitai tau bulih penguntung ari jaku benabi pasal timpuh “tujuh taun” tu?

⁵ Baka ni kitai tau bulih penguntung ari jaku benabi tu? Enti kitai mereti jaku benabi pasal timpuh “tujuh taun,” nya deka ngasuh kitai andal agi ke Jehovah ti deka ngamatka semua semaya Iya baka ke udah dipadah. Jehovah madahka, Iya deka nuduh Jesus nyadi Raja ba maya ti udah ditetapka. Lebuh maya nya datai, Jehovah ngereja nya. Nya alai, kitai mega nemu Iya deka ngamatka semua jaku benabi ke bukai ba maya ti udah ditetapka Iya. Au, hari Jehovah ‘tetap deka nyadi, lalu Iya enda masau jam!’—Hab. 2:3.

6. (a) Nama utai ti dipeda kitai ba dunya tu ke nunjukka Jesus benung merintah ba serega? (b) Baka ni bukti tu ngamatka jaku benabi ke dipadah ba Pemandang 6:2-8?

⁶ Ba pengujung pengawa nginjil Jesus ba dunya, Jesus madahka sekeda utai ke deka nyadi ba dunya tu ti nulung nembiak iya nemu kemaya iya berengkah merintah ba serega. Sekeda utai ke dipadah iya nya nyengkaum perang, lapar pungkang, sereta tanah berenyang. Iya mega madahka “penyakit deka balat nyadi ba mayuh bengkah endur.” Siti ari chunto nya penyakit COVID-19 ke ngelekai baru-baru tu. Semua utai ke nyadi tu sebagi ari “tanda” ari Bup Kudus ke nunjukka penatai Kristus. (Mat. 24:3, 7; Luk. 21:7, 10, 11) Lebih ari 60 taun pengudah Jesus mati sereta niki ke serega, Jesus sekali agi madahka utai ti sama ngagai rasul John nengah siti genera. (Bacha Pemandang 6:2-8.) Semua utai tu udah nyadi kenyau ari maya Jesus nyadi Raja ba taun 1914.

7. Nama kebuah mayuh amat utai jai nyadi ba dunya kenyau ari maya Jesus nyadi Raja?

⁷ Nama kebuah gaya dunya tu majak jai-sejai kenyau ari maya Jesus nyadi Raja? Pemandang 6:2 madahka siti utai ti penting. Utai keterubah digaga Jesus pengudah iya nyadi Raja ba Perintah Petara iya nya beperang. Ngelaban sapa? Ngelaban Sitan enggau bala  melikat ti jai. Nitihka Pemandang bagi 12, Sitan alah lalu iya enggau bala melikat ti jai dibuai ngagai dunya. Ketegal nya, mayuh penusah nyadi ba dunya laban Sitan “balat pedis ati” sereta benung nyerang mensia.—Pem. 12:7-12.

8. Baka ni kitai tau bulih penguntung seraya kitai meda jaku benabi pasal Perintah Petara benung dikeamatka?

⁸ Baka ni kitai tau bulih penguntung ari semua jaku benabi nya? Utai ke nyadi ba dunya sereta ubah besai ba ulah mensia deka nulung kitai nemu Jesus udah nyadi Raja. Nya alai, ari ke pedis ati lebuh meda orang berundingka diri empu sereta jai, kitai nemu ulah sida nya ngamatka jaku benabi dalam Bup Kudus. Perintah Petara udah berengkah merintah! (Mas. 37:1) Lalu ketegal Armagedon majak semak, kitai deka meda mayuh agi penusah nyadi ba dunya tu. (Mrk. 13:8; 2 Tim. 3:13) Kitai amat beterima kasih laban Apai kitai ti di serega ke penuh enggau pengerindu udah nulung kitai nemu kebuah mayuh amat penusah nyadi ba dunya tu.

9. Baka ni jaku benabi ba Daniel 2:28, 31-35 ngambarka kuasa dunya ti penudi, lalu kemaya iya berengkah merintah?

⁹ Bacha Daniel 2:28, 31-35. Kemayaharitu kitai ulih meda jaku benabi tu dikeamatka. Mimpi Nebukadnesar nunjukka “utai ke deka nyadi jemah ila” pengudah Kristus berengkah merintah. Bala munsuh Jesus ba dunya deka nyengkaum kuasa dunya ti penudi ke dipadah dalam Bup Kudus ti digambarka ngena kaki “besi bechampur enggau tanah liat.” Kuasa dunya tu udah berengkah merintah. Iya berengkah merintah maya Perang Dunia I  lebuh Britain enggau Amerika Serikat bekerejasama, lalu numbuhka kuasa dunya Anglo-Amerika. Mimpi Nebukadnesar pasal patung nya mega madahka dua iti utai pasal kuasa dunya tu ke bebida ari perintah ke sebedau nya.

10. (a) Nama utai ke ulih dipeda kitai ba kuasa dunya Anglo-Amerika ke sama baka ke dipadah ba jaku benabi Daniel? (b) Nama utai ke patut diseliahka kitai? (Peda kutak “ Bejimat enggau Tanah Liat!”)

¹⁰ Kesatu, enda baka kuasa dunya bukai dalam genera nya, kuasa dunya Anglo-Amerika digambarka ngena besi ti dichampur enggau tanah liat. Iya ukai sebengkah utai aja baka emas tauka pirak. Tanah liat nya ngambarka orang biasa. (Dan. 2:43) Kemayaharitu kitai ulih meda kuasa orang biasa ba pengawa ngundi, kimpin ke bekaul enggau hak sivil, pengawa ngelaban perintah, sereta kesatuan pekereja udah ngasuh pemerintah ba kuasa dunya tu tusah deka ngereja peneka sida.

11. Baka ni penatai perintah Kuasa Dunya Anglo-Amerika negapka agi pengarap kitai pasal kitai ke benung idup ba hari ti penudi?

¹¹ Kedua, baka ke digambarka kaki ba patung nya, Anglo-Amerika nya kuasa dunya ti penudi ke dipadah dalam Bup Kudus. Nadai agi perintah bukai pengudah iya. Tang Perintah Petara deka ngerusakka iya enggau perintah bukai ba Armagedon. c—Pem. 16:13, 14, 16; 19:19, 20.

12. Nama bukti bukai ari jaku benabi Daniel ke meri kitai pengelantang sereta harapan?

¹² Baka ni kitai tau bulih penguntung ari jaku benabi tu? Jaku benabi Daniel meri kitai bukti bukai ti nunjukka kitai benung idup ba hari ti penudi. Lebih ari 2,500 taun suba Daniel madahka pengudah Babilon, bisi empat buah kuasa dunya ke deka merintah atas nembiak Petara. Pia mega, iya madahka Kuasa Dunya Anglo-Amerika nya kuasa dunya ti penudi ke deka merintah. Tu meri kitai pengelantang enggau harapan laban enda lama da agi Perintah Petara deka ngerusak semua perintah mensia lalu merintah atas serata dunya.—Dan. 2:44.

13. Baka ke dipadah ba Pemandang 17:9-12, nama utai ti digambarka “raja ti kelapan” enggau “sepuluh iku raja,” lalu baka ni jaku benabi tu udah dikeamatka?

¹³ Bacha Pemandang 17:9-12. Mayuh pengerusak nyadi ketegal Perang Dunya I, lalu tu ngamatka siti agi jaku benabi Bup Kudus pasal hari ti penudi. Bala pemerintah ba dunya deka mai pemaik ba serata dunya. Nya alai kena Januari 1920, sida numbuhka Liga Bangsa-Bangsa ke udah nya diganti enggau Pertubuhan Bangsa-Bangsa Bersatu kena Oktober 1945. Gerempung tu dikumbai “raja ti kelapan.” Tang iya ukai kuasa dunya. Iya semina bisi kuasa ketegal bala perintah ke nyukung iya. Bup Kudus ngumbai bala perintah tu “sepuluh iku raja.”

14-15. (a) Nama utai ti dipadah Pemandang 17:3-5 pasal “Babilon ti Besai”? (b) Nama deka nyadi ngagai sukung ke diberi ngagai pengarap pelesu?

¹⁴ Bacha Pemandang 17:3-5. Ba genera ari Petara, rasul John meda seiku indu sundal, “Babilon ti Besai,” ke ngambarka semua gerempung pengarap pelesu. Baka ni genera tu dikeamatka? Gerempung pengarap pelesu udah lama bekerejasama enggau bala perintah ba dunya tu sereta nyukung pengawa sida. Tang enda lama da agi, Jehovah deka ngasuh bala perintah ba dunya tu “ngereja juluk ati Iya.” Nama asil iya? “Sepuluh iku raja” tauka bala perintah dunya tu deka nyerang gerempung pengarap pelesu sereta ngerusakka sida.—Pem. 17:1, 2, 16, 17.

¹⁵ Baka ni kitai nemu pengujung Babilon ti  Besai nyau semak? Kena nyaut tanya nya kitai patut meda kuta Babilon menya. Kuta nya dikelingi Sungai Eupratis ti besai. Bup Pemandang mandingka bejuta iku orang ke nyukung Babilon ti Besai nya baka “sungai.” (Pem. 17:15) Tang bup nya mega madahka sungai nya deka “rangkai,” tu nunjukka gerempung pengarap pelesu sedunya deka lenyau mayuh ari orang ke nyukung iya. (Pem. 16:12) Kemayaharitu, jaku benabi nya benung dikeamatka laban mayuh orang enggai bisi pengarap lalu sida ngiga chara bukai kena mutarka penanggul sida.

16. Baka ni kitai tau bulih penguntung lebuh kitai meretika pasal kemaya Pertubuhan Bangsa-Bangsa Bersatu ditumbuhka sereta kemaya Babilon ti Besai deka dirusakka?

¹⁶ Baka ni kitai tau bulih penguntung ari jaku benabi tu? Pertubuhan Bangsa-Bangsa Bersatu ke ditumbuhka sereta mayuh orang ke enggai nyukung pengarap pelesu nunjukka kitai benung idup ba hari ti penudi. Taja pan mayuh orang enggai agi nyukung Babilon ti Besai, tang ukai tu ke deka ngerusak gerempung pengarap pelesu. Baka ke dipadah tadi, Jehovah deka ngasuh “sepuluh  iku raja” ke ngambarka perintah dunya ti nyukung Pertubuhan Bangsa-Bangsa Bersatu ngambika “ngereja juluk ati Iya.” Bala perintah deka enggau ngenyit ngerusakka Babilon ti Besai. Tu deka ngasuh serata dunya tekenyit. d (Pem. 18:8-10) Pengelabuh Babilon ti Besai deka meri empas ti besai ngagai serata dunya sereta ngujungka mayuh penanggul, tang nembiak Petara bisi dua iti kebuah deka gaga ati. Pengarap pelesu ke udah lama nyadi munsuh Petara Jehovah deka nadai agi lalu enda lama da agi, kitai deka dilepaska ari sistem dunya ti jai tu!—Luk. 21:28.

17-18. (a) Baka ni kitai ulih terus negapka pengarap kitai? (b) Nama deka dikerandauka kitai ba artikel pengudah tu?

¹⁷ Daniel madahka, penemu ti bendar deka majak mayuh. Lalu nya amat udah nyadi! Kitai diatu udah meretika jaku benabi ke bekaul enggau jeman kitai. (Dan. 12:4, 9, 10) Jaku benabi tu amat betul, nya ngasuh kitai amat bebasaka Jehovah sereta Jaku Iya. (Isa. 46:10; 55:11) Nyadi, terus tegapka pengarap nuan enggau belajarka Bup Kudus sereta nulung orang bukai ngembuan kaul ti rapat enggau Jehovah. Jehovah deka nyaga semua orang ke arapka Iya enggau pengabis ati lalu meri sida “pemaik ti pemadu menyana.”—Isa. 26:3.

¹⁸ Ba artikel pengudah tu, kitai deka berandauka jaku benabi pasal eklisia Kristian ba hari ti penudi. Baka ke deka dipelajarka kitai, semua jaku benabi tu mega nunjukka kitai benung idup ba hari ti penudi. Kitai deka meda bukti bukai ti nunjukka Jesus, ke diatu nyadi Raja kitai, benung ngulu semua nembiak iya ke tetap ati.